Read Khoekhoegowab 1 Gao-aogu 20 Bible Online

1 Gao-aogu 20 - Khoekhoegowab bible

1 Gao-aogu 20

¹Tsî Benhadadi, Siriab di gao-aob, ge ǀgaib âb hoaba ge ǀhaoǀhao; tsî ǃnonadisiǀgamǀa gao-aogu ge ǁîb ǀkha ge hâ i, tsî hān tsî kunidi tsîna; tsîb ge ǃapa tsî Samariasa xāǂgā tsî ǁîsa ge ǃkhamū.

²Tsîb ge sîsabega ge sî Axab, Israeli di gao-aob ǃoa ǃās ǃnâ.

³Tsîb ge ge mîba kai bi: Nētib ra Benhadada mî: Sa ǀhaiǀurib tsî sa ǃhuniǀurib tsîkha ge a ti; tsî sa hoan xa îsa taradi tsî ǁkhāti ǀgôan tsîn ge a ti.

⁴Ob ge Israeli di gao-aoba ǃeream tsî ge mî: Sa mîs ǃoa, ti ǀhonkhoe gao-aotse, tita ge a sa, ū ta hân hoan ǀkha.

⁵ǁNās khaoǃgâ gu ge sîsabega ǁkhawa hā tsî ge mî: Nētib ra Benhadada mî: Tita ge sa ǃoa sî tsî ge mî: Sa ǀhaiǀurib tsî sa ǃhuniǀurib tsî sa taradi tsî sa ǀgôan tsînats ge tita nî mā;

⁶xawe ǁari nē ǁaeb ǁkhāb ai ta ge ti ǃgāga sa ǃoa nî sî, î gu sa ommi tsî sa ǃgāgu di omgu tsîga ôaǃnâ; o i ge nî ī, sa mûǁae a turaxan hoana gu nî ǁîgu di ǃomǁaeb ǃnâ ǁgui tsî ǁîna nî ūbē ǃkhaisa.

⁷ǃNubaib ge Israeli di gao-aoba ǃhūb di kaigu hoaga ǂgai tsî ge mî: ǃGaoǃgâ î go mû, nēb ra ǂkhababa ôa ǃkhaisa; ǁîb ge tita ǃoa go sî xui-ao ti taradi ǂama tsî ti ôan ǂama tsî ti ǀhaiǀurib ǂama tsî ti ǃhuniǀurib ǂama, tsî tita ge ǁîba ǂkhā tama go i.

⁸On ge kaigu hoagu tsî ǁaes hoas tsîna ǁîb ǃoa ge mî: Tā ǁnâuǀnam, îts tā mā-am.

⁹ǁNā-amagab ge Benhadadi di sîsabegu ǃoa ge mî: Ti ǀhonkhoe gao-aoba mîba: ǂGuro ǃnās aits ǁîn ǂama sa ǃgāta ǃoa go sîn hoana ta ge nî dī, xawe nē ǃkhaisa ta ge a dī ǁoa. O gu ge sîsabega ǃgû tsî ǃereamsa ge ūsība bi.

¹⁰Ob ge Benhadada ǁîb ǃoa sî tsî ge mî: Eloga a gu nēti dī-ū te, î gu ǁnāti dīǀaro te, Samarias di tsarab ga ǃomǃnābǀoab ǁnā ǁaes, ti dāǃharode ra saos hoas dide ǂâubao.

¹¹Ob ge Israeli gao-aoba ǃeream tsî ge mî: Mîba bi: ǃGaesen ra-e a-i tā koasen, oresen ra-i axase.

¹²Tsî i ge ge ī, nē mîsab ge tentomdi ǃnâb ra gao-aogu ǀkha ā hîa ǁnâuo, ob ge ǃgāgu âb ǃoa ge mî: ǂHomisen. O gu ge ǃās ǃoagu ge ǂhomisen.

¹³Tsî mû, kēbo-ao-i ge Axab, Israeli gao-aob tawa dāhā tsî ge mî: Nētib ra ǃKhūba mî: Mûts go nē kai ǂguiba? Mû, tita ge ǁîna nētsē sa ǃomǁae nî mā, sats nî ǂanga, tita a ǃKhū ǃkhaisa.

¹⁴Ob ge Axaba: Tari-e xu? ti ge mî. Ob ge ǁîba ge mî: Nētib ra ǃKhūba mî: ǀGôagu ǃhūǃâdi ǂamkhoegu diga xu. Ob ge: Tari-e nî tsoatsoa ǃkhamma? ti ge mî. Ob ge: Sats, ti ge mî.

¹⁵ǃNubaib ge ǀgôagu ǃhūǃâdi ǂamkhoegu diga ge ǃgôa, tsî gu ge ǀgamkaidisiǃnonadisiǀgamǀa ge i; tsî ǁîgu khaoǃgâb ge ǁaes hoas Israeli ôan hoan disa ge ǃgôa, hûǀoadisise.

¹⁶Tsîn ge tsēǃgâǁaeb ai ge ǂoa. Ob ge Benhadada ge ākhanu hâ i tentomdi ǃnâ ǁîb tsî gao-aogu tsîga, ǁnā ǃnonadisiǀgamǀa gao-aogu, ǁîba ge huiga.

¹⁷Tsî ǀgôagu ǃhūǃâdi ǂamkhoegu digu ge aibe ge ǂoa. Ob ge Benhadada ǀnîga ge sîǂui, tsî gu ge ǂhôa bi tsî: Samariasa xu gu ge khoega ge ǃgûǂoa, ti ge mî.

¹⁸Ob ge ǁîba: ǂKhîb ǃoas ka ǁîgu go ǂoasao, o ûitsamase ǁîga ǃkhō; tsî ǃkhammi ǃoas ka, ǁîgu go ǂoasao, o ûitsamase ǁîga ǃkhō, ti ge mî.

¹⁹Tsî nē ǂkham khoegu ǃhūǃâdi ǂamkhoegu digu ge ǃāsa xu ǂoao, tsî ǂnubis, ǁîga ra saos ona,

²⁰ob ge mâb hoab âga ǁîb di khoeba ge ǂnau, o gu ge Siriaǁîga ge ǁhâ, tsî Israeli ge ǁîga ge sauruǃgon; xawe Benhadadi, Siriab di gao-aob, ge hā-i ai ge ûiǂoa ǀnî ǃgapi-aogu ǀkha.

²¹Ob ge Israeli gao-aoba ǂoa tsî hān tsî kunidi tsîna ge ǂnau, Siriaǁînab ge kaise ǂnaus kōse.

²²ǃNubaib ge ǁnā kēbo-aoba Israeli di gao-aob tawa dāsī tsî ǁîb ǃoa ge mî: ǃGû îts sī ǀgaiǀgaisen; îts ǃgaoǃgâ, îts kō, tare-ets nî dī ǃkhaisa; kurib di ǁkhawahās ǀkhab ge Siriab di gao-aoba sa ǃoagu nîra ǃapa xuige.

²³ǃGāgu Siriab gao-aob digu ge ǁîb ǃoa mî xui-ao: ǁÎn di elogu ge a ǃhomgu di elo, ǁnā-amaga gu ge sige go ǀgaidā; xawe amase a da ǁîna ǂgās ai ǃkhamū, o da ge ǁîna nî ǀgaidā.

²⁴ǁNā-amaga nē ǃkhaisa dī: Gao-aoga dībē, mâb hoaba ǁîb di ǃkhaisa xu, îts ǃhūǃkhōmâi-aoga ǁîgu di ǃās ǃnâ mâi.

²⁵Tsî satsa îts ǂnubi-e ǃgôabasen, ǁnā ǂnubis, satsa xu ge ǁnāǁgôas khami kō-e, tsî hān, ǁnā hān ge kō i khami, tsî kunide, ǁnā kunidi ge kō i khami, î ge ǂgās ai ǁîna ǃkhamū, ise ge sige ǁîna ǀgaidā tide ǃkhaisa. Ob ge dommi âga ǁnâu tsî ǁnāti ge dī.

²⁶Tsî i ge ǁkhawahās kurib dis ǀkha ge ī, Benhadadi Siriaǁîna ge kōǃgâ ǃkhaisa; tsîb ge Afeks ǃoa ge ǃapa, Israelab nî ǃkhamūga.

²⁷Tsî Israeli ôan on ge kōǃgâhe tsî ǂûxūna ge māhe, tsî ûixūna ūhâsen ge ǁîna ge ǃgûǃoa; tsî Israeli ôan ge ǁîn ǃoa-ai ge ǁgoe, ǀgam ǃâra pirin dira ase, xawe Siriaǁîn ge ǃhūba ge ǀoaǀoa.

²⁸O i ge Elob ao-e dāhā tsî Israeli gao-aob ǃoa ge mî: Nētib ra ǃKhūba mî: Siriaǁîn ge ge mî, ǃKhūb ge a ǃhomgu di elo, tsîb ge ǂgādi di elo tamaba, ǁnā-amaga ta ge tita nē kai ǂguiba sa ǃomǁae nîra mā, ǂan du nîga, tita a ǃKhū ǃkhaisa.

²⁹Tsî nēn ge naun ǃoa-ai ge ǁgoe i hû tsēde; tsî i ge hûǁî tsēs ai ge ī, ǃkhams ge tsoatsoahe ǃkhaisa; tsî Israeli ôan ge Siriaǁîn xa ǀguikaidisiǀoadisi ǀnūǃgû-aoga ge ǂnau ǀgui tsēs ai.

³⁰Tsî ǃgau ge gu ge Afeks ǃoa ge ǁhâ ǃās ǃnâ, tsî ǂnubiǂgoab ge ǀgamdisihûǀaǀoadisi khoegu hîa ge ǃgaugu ai ge ǁnā; tsî Benhadadi on ge ǁhâ tsî ǃās ǃnâ ge sī, nē ǃnā-omsa xu nau ǃnā-omsa ǃoa ra ǁhâmase.

³¹ǃNubai gu ge ǃgāgu âba ǁîb ǃoa ge mî: Kō, sige ge ge ǁnâu, Israeli gao-aogu a ǀkhomxa gao-ao ǃkhaisa; î ge ǁnâi ǁhōga ǃgaesen sage di kamanagu ai tsî tsuriba sage di danadi ai, î ge Israeli gao-aob ǃoa ǂoa; ǀnîsib ge sa ǀomsa nî ûi kai.

³²ǁGoasi gu ge ǁhōga ge ǃgaesen ǁîgu di kamanagu ai tsî tsuriba ǁîgu di danadi ai tsî gao-aob tawa sī tsî ge mî: Sa ǃgāb Benhadadi ra mî: As ti ǀomsa ûi re. Ob ge: Ganupeb kha a ûitsama? ǁÎb ge a ti ǃgâ, ti ge mî.

³³O gu ge aoga ǂōrisase ǃgaoǃgâ tsî ǃhaese ǁîb xas ase ū tsî: Sa ǃgâsab Benhadadi ge a ǁî, ti ge mî. Ob ge: Sī î go ūhā bi, ti ge mî. Ob ge Benhadada ǁîb tawa ge ǂoaxa, tsîb ge ǁîba kunis ai ge ǃapa kai.

³⁴Tsîb ge ǁîb ǃoa ge mî: ǁNā ǃādi sa îb ge ti îba xu ūdi, ǁîde ta ge ǁkhawa nî mā, îts daoga dībasen Damaskus ǃnâ, ti îb Samarias ǃnâ ge dī xase. Tsî tita ge, (tib ge Axaba ge mî) nē ǃgaeǀhao-i ǀkha nî ǃgû kai tsi. Nētib ge ǃgaeǀhao-e ǁîb ǀkha dī tsî ge xū bi.

³⁵ǃNubai i ge ao-i kēbo-aogu ôagu di-e ǁîb di horesab ǃoa ǃKhūb di mîsa xu: ǂNau te re! ti ge mî. Xaweb ge aoba ǁîba ǂnausa ge ǂkhā.

³⁶Ob ge ǁîb ǃoa ge mî: ǃKhūb dommats go ǁnâuǀnam tama i amaga, mû, ob ge xamma, tita xuts ga ǃgû ǃnubai nîra ǃgam tsi. Tsî ǁîb ge ǃgûo, ob ge xamma ǁîba hō tsî ge ǃgam.

³⁷ǁNās khaoǃgâb ge ǀnî aoba hō tsî ǁîb ǃoa: ǂNau te re! ti ge mî. Tsî nē aob ge ǁîba ge ǂnau tsî ge ǂnauǁhū bi.

³⁸ǃNubaib ge kēbo-aoba ǃgû tsî gao-aob aiǃâ daob ǃnâ sī ge mâ; tsîb ge tsaob ǀkha tsoro tsî ge ǀkharaǀkharasen, ǁîb di mûra tawa.

³⁹Tsî i ge ge ī, gao-aob ge ǃgû-īo, ob ge gao-aoba ǂgaiǀî tsî ge mî: Sa ǃgāta ge ǃkhams di ǁaegub ǃnâ go ǂoa, tsî mû, khoeb ge ǃkhamsa xu ǂgō hâ khoeba tita ǁga ūhā tsî ge mî: Nē khoeba sâu, ǀnîsib ga ǁîba ǁkhuiheo, os ge sa ǀomsa ǁîb ǀoms di amǃnâs ai nîra hâ, ots ge ǀgui talensa ǀhaiǀurib xa nîra matare.

⁴⁰Tsî i ge ge ī, sa ǃgāta nēpa tsî naupa a dīxūxa hîab ge a ǀkhai. ǃNubaib ge Israeli di gao-aoba ǁîb ǃoa: Nēs ge a sa ǀgoraǃgâ; sats ǂûts ge ǁîsa go ǀgoraǃgâ, ti ge mî.

⁴¹ǃNubaib ge ǃhae tsî tsaoba ge ūǁnâ ǁîb di mûra xu; ob ge Israeli di gao-aoba ǁîba ge mûǂan, kēbo-aogu di ǀguib a ǃkhaisa.

⁴²Ob ge ǁîb ǃoa ge mî: Nētib ra ǃKhūba mî: ǁNā aob, tita ge ǀâxarebats sa ǃomma xu go ǃgû kai ǃkhais ǃaromas ge sa ǀomsa ǁîb ǀoms di amǃnâs ai nîra hâ tsî sa ǁaesa ǁîb di ǁaes di amǃnâs ai.

⁴³Ob ge Israeli di gao-aoba ǃan tsî ǁaixa hâse ǁîb di ommi ǃoa ǁaru tsî Samarias tawa ge sī.