Read Khoekhoegowab 1 Gao-aogu 21 Bible Online

1 Gao-aogu 21 - Khoekhoegowab bible

1 Gao-aogu 21

¹Tsî i ge nē ǃnaeǃkhaidi khaoǃgâ ge ī, Naboti, Jesreelǁîb ge ǂauxûiǂûǃhanaba ge ūhâ i Jesreels ǃnâ, Axab, Samarias gao-aob di î-ommi tawa ǁgoeba.

²ǁNā-amagab ge Axaba Naboti ǃoa ǃhoa tsî ge mî: Sa ǂauxûiǂûǃhanaba mā te, îb ǂgāxūn di ǃhanase ība te, ti ommab a ǀgū amaga; o ta ge ǁîb xa a ǃgâi ǂauxûiǂûǃhana-e nî mā tsi; tsî sa mûǁae i ga ǃgâio, o ta ge ǁîb di ǀgausa marin ǃnâ nî mā tsi.

³Xawe Naboti ge Axab ǃoa ge mî: Tā ta ǃKhūb xa ǁîsa ībahe, ti îgu di ǀumisa ta nî satsa mā ǃkhaisa.

⁴ǃNubaib ge Axaba ommi âb ǃnâ ge ǁarusī ǃan tsî ǁaixa hâse Naboti, Jesreelǁîb di mîs hîab ge ǃhoa tsî: Ti îgu di ǀumisa ta ge mā tsi tide, ti mîs ǃaroma. Ob ge kharob âb ai ǁgoe tsî ais âba unu tsî pere-i xa ǂû tama ge hâ i.

⁵Os ge Isebels, ǁîb di tarasa, ǁîb tawa hā tsî ǁîb ǃoa ge mî: Tarexasa gagas âts ǃan hâ tsî pereǂû tamats hâsa?

⁶Ob ge ǁîba ǁîs ǃoa ge mî: Naboti, Jesreelǁîb ǀkha ǃhoa tsî ta ge ǁîb ǃoa: Sa ǂauxûiǂûǃhanaba mā te marin ama, ǃgâibahets kao, o ta ge ǀkhara ǂauxûiǂûǃhanaba ǁîb di amǃnâs ai nî mā tsî, ti ge mî, xaweb ge: Ti ǂauxûiǂûǃhanaba ta ge mā tsi tide, ti ge mî.

⁷ǃNubais ge Isebels, taras âba ǁîb ǃoa ge mî: Tsî satsa kha nē ǀgaus ai Israeli ǂama ra gaotsa? Khâi îts pere-e ǂû, îb sa ǂgaoba ǃgâiaǂgaoxa; tita ge ǂauxûiǂûǃhanab Naboti, Jesreelǁîb diba nî mā tsi.

⁸Os ge ǁîsa Axab di ǀons ǃnâ sîǂkhanide xoa tsî ǁîde ǁîb di ǀkhunuǂnûidas ǀkha ge ǀgaiǀgai, tsîs ge ǁnā ǂkhanide kaigu ǃoa tsî ǀgapiǃgôahesagu ǁnā ǃās ǃnâ Naboti ǀkha ǁan hâgu ǃoa ge sî.

⁹Tsîs ge ǁnā sîǂkhanidi ǃnâ xoa tsî ge mî: ǂÛtamahâsa ǂgaiǂui î go Nabota khoen ǁaegu hoan nî mû bise ǂnû kai.

¹⁰Î go ǁîb ǃoa-ai ǀgam khoekha, Beliali ôakha, ǁîb ǃoagu ra nēti ǀhûǀguitimîkha ǂnûi: Sats ge Elob tsî gao-aob tsîkha go ǃkhāǃkhā. Î go ǁnāpa xu ǂgaeǂguiǂui tsî ǀuiǁhom bi.

¹¹O gu ge aogu kaigu tsî ǀgapiǃgôahesagu, ǁîb di ǃās ǃnâ ǁan hâga ǁnāti ge dī, Isebels ge ǁîga ǃoa xoa khami.

¹²O gu ge ǂûtamahâsa ge ǂgaiǂui, tsî gu ge Nabota khoen ǃnâ ǀgapi ǃkhais ai ge ǂnûi.

¹³ǁGoasi kha ge ǀgam khoekha, Beliali ôakha ge hā, tsî kha ge ǁîb ǃoa-ai ge ǂnû; tsî Beliali ôakha ge Naboti ǃoagu khoen aiǃâ ge ǀhûǀguitimî: Naboti ge Elob tsî gao-aob tsîkha go ǃkhāǃkhā. O gu ge ǁîba ǃās ǃauga ǂgaeǂguiǂui tsî ge ǀuiǁhomǃan bi.

¹⁴ǁNās khaoǃgâ gu ge Isebels ǃoa ge haisi Naboti ge ǀuiǁhomhe tsî go ǁō, ti.

¹⁵Tsî Isebels ge ǁnâu Naboti ǀuiǁhomhe tsî ǁō hâ ǃkhaisa, os ge Isebelsa Axab ǃoa ge mî: Khâi îts ū Naboti, Jesreelǁîb di ǂauxûiǂûǃhanab, marin ama mā tsis tsînab ge ǂkhāba, Naboti ûitsama tama tsîb ǁō hâ xuige.

¹⁶Tsî Axab ge Naboti ǁō hâ ǃkhaisa ǁnâuo, ob ge ge khâi, Naboti, Jesreelǁîb di ǂauxûiǂûǃhanab ǃoa ǁgôa tsîb nî ǁîba ūbasense.

¹⁷ǁNāǃnubais ge ǃKhūb di mîsa Eliab, Tisbeǁîb ǃoa ge hā:

¹⁸Khâi î ǁgôa îts Axab, Israeli di gao-aob, Samarias ǃnâ hâba ǃgûǃoa; mû, ǁîb ge Naboti di ǂauxûiǂûǃhanab ǃnâ hâ, ǁîb ǃoab go ūbasen ib nîse ǁgôaba.

¹⁹Îts ǁîb ǃoa nēti mî: Nētib ra ǃKhūba mî: ǂNauǃan bi tsîts kha ǁkhāti go ǀumibasen? ǁNā soab ai ǁîb ǃoa nēti mî: Nētib ra ǃKhūba mî: Arin go Naboti di ǀaoba a tsā ǃkhais ǂhanis ain ge arina sa ǀaob ona nîra tsā.

²⁰Ob ge Axaba Eliab ǃoa ge mî: Hō tets go, ti khākhoetse? Ob ge ǁîba ge ǃeream: Tita ge go hō tsi, ǁî aitsamats go ǁamaxūsen tsî ǃKhūb mûǁae ǂkhabase a dī xui-ao.

²¹Mû, tita ge tsūǃōba nîra hāǂam kai tsi, tsî sa suriba nîra dībē; tsî tita ge Axab din xa nîra ǃhūǃnoma ǁnā-i, ǂgoab ai ra ǀkham-i tsî ǃgauhe tsî ǁnāxūhe hâ-e Israeli ǃnâ.

²²Tsî tita ge sa omma nîra dī Jerobeammi, Nebati ôab di ommi khami tsî Basab, Ahiab ôab di ommi khami, ǁnā ǂoeǂoes, ǁîs ǀkhats go ǂoeǂoe tes tsî Israelats go ǁîs ǀkha ǁore kais ǃaroma.

²³ǃAruǀîb ge ǃKhūba ǁkhāti Isebels ǂama ǃhoa tsî ge mî: Arin ge Isebelsa nîra ō Jesreels di aiǂnubiǂgoab tawa.

²⁴Axab din xa ga ǃās ǃnâ ǁō-i, ǁnā-en ge arina nîra ō; tsî ǃaub ǃnâ ga ǁō-i, ǁnā-en ge ǀhommi di anina nîra hapu.

²⁵ǀNîb ge ge ǀkhai i, Axab khami ge ǁamaxūsen hâ iba, ǃKhūb mûǁae a ǂkhabanab nî dīse, Isebels, taras âb xa dī kaihe tsî.

²⁶Tsîb ge kaise ǁgaisise gere dī, ǁgôatsuiǁgoa-eloga ra saoǃâ, ǁnā xūn Amorǁîn din, Elob ge Israeli ôan di ais aiǃâba xu ūn hâna xu doeǁgaǂuin khami.

²⁷Tsî i ge ge ī, Axab ge nē mîde ǁnâuo, ob ge saran âba ǀkhau tsî ǀkhāb âb ai ǁhō-e ana tsî ǂûtama ge hâ i; tsîb ge ǁkhāti ǁhōb ǃnâ ge ǁgoe tsî ǂause gere ǃgû.

²⁸Os ge mîs ǃKhūb disa Eliab, Tisbeǁîba ge hāba, mî rase:

²⁹Mûts go xare, matib ra Axaba ti ais aiǃâ ǃgamǃgamsen ǃkhaisa? Ti ais aiǃâb ta ǃgamǃgamsen amaga ta ge tita ǁnā ǂkhababa ǁîb di tsēdi ǃnâ hā kai tide; xawe ǁîb di ôab di tsēdi ǃnâ ta ge tita ǁnā ǂkhababa ǁîb di ommi ǂama nîra hā kai.