Read Khoekhoegowab 1 Gao-aogu 22 Bible Online

1 Gao-aogu 22 - Khoekhoegowab bible

1 Gao-aogu 22

¹Tsî i ge ǃnona kuriga ǃnōsa ge i, tsî toro-i xare-i ge Siriaǁîn tsî Israelǁîn ǁaegu ge hâ tama hâ i.

²Xawe ǃnonaǁî kurib ai i ge ge ī, Josafati, Judab di gao-aob, ge Israeli di gao-aob ǃoa ǁgôaxa

³ǃnubaib ge Israeli di gao-aoba ǁîb di ǃgāgu ǃoa ge mî: ǂAn go a xare, Ramots Gileadi dis a sage di ǃkhaisa? Tsî sage ge ǃnōsase hâ tsî ǁîsa ū tama Siriab gao-aob di ǃomǁaeba xu.

⁴Ob ge Josafati ǃoa ge mî: Xare kha ǃgûǀkhā tets nî ǃkhammi ǁga Ramot-Gileads ǃoa? Ob ge Josafata Israelǁîn di gao-aob ǃoa ge mî: Î ta tita sats ī khami ī, îs ti ǁaesa sa ǁaes khami ī tsî ti hāna sa hān khami.

⁵ǃAruǀîb ge Josafata Israeli di gao-aob ǃoa: Îts ǁnâi nētsē ǃKhūb di mîsa dî re! ti ge mî.

⁶ǃNubaib ge Israeli di gao-aoba kēbo-aogu hoaga, hakakaidisi aoga ǀhaoǀhao tsî ǁîgu ǃoa ge mî: Ramot-Gileads ǃoa ǃgû tsî ta kha ǁîsa nî ǃkhamū? ǀÛ ta nî ǁîsa? O gu ge ge mî: ǃApa, ǃKhūb ge ǁîsa gao-aots ǃomǁae nîra mā xuige.

⁷Ob ge Josafata ge mî: ǀNî kēbo-ao-i ǃKhūb di-e hâ tama nēpa, ǁî-e khom nî dî-e?

⁸Ob ge Israeli di gao-aoba Josafati ǃoa ge mî: ǀNî aob ge hâ, ǁîba xub ga ǃKhūba dîheba; xawe ta ge ǁkhan bi hâ, tita xab ǃgâi-i xare-e kēbo tama tsî ǂkhabab ǀguibab ra kēbo xui-ao. ǁNāb ge Mikajab Jimlab ôaba. Ob ge Josafata: Tā îts gao-aotsa ǁnāti mî, ti ge mî.

⁹ǁGoasib ge Israeli di gao-aoba omǃnāb di ǃoabasabeba ǂgai tsî ǁîb ǃoa ge mî: ǃHaese Mikajab, Jimlab ôaba ūhā.

¹⁰Tsî Israeli di gao-aob tsî Josafati, Judab di gao-aob tsîkha ge tronra âkha ai ge ǂnôa i, gao-aosi sarana anasen hâǃâ, ǁnā ǂhaba ǃkhais Samarias di ǁāb tawa hâs ai, tsî kēbo-aogu hoagu ge ǁîkha aiǃâ gere kēbo.

¹¹Tsî Sedekiab, Kenaanab ôab ge ǂnūǀuriǁnâkha dībasen tsî ge mî: Nētib ra ǃKhūba mî: Nēkha ǀkhats ge Siriaǁîna nî ǃkhā, ǁînats nî hoaragase hîkākās kōse.

¹²Tsî kēbo-aogu hoagu ge ǁnāti kēbo tsî ge mî: ǃGû Ramot-Gileads ǃoa, ots ge nîra ǃgâiǃgâ, ǃKhūb ge ǁîna gao-aots ǃomǁae nîra mā xuige.

¹³Tsî sîsabeb, hîa Mikajaba nî ǂgaise ge ǃgûb ge ǁîb ǃoa ge mî: Kō re, kēbo-aogu di mîdi ge ǀgui ams ǀguisa xus khami gao-aoba a ǃgâiba; as ǁnâi sa mîs ona ī, ǀguib âgu di mîs ī xase, îts ǃgâiba ǃhoa re.

¹⁴Xawe Mikajab ge ge mî: ǃKhūb a ûitsama ǃkhais ao ta ge tita ǃKhūb ga mîba tena nî ǃhoa.

¹⁵Tsî gao-aob tawab ge hāo, ob ge gao-aoba ǁîb ǃoa ge mî: Mikajatse, ǃgû ge nî Ramot-Gileads ǃoa, ǃkhamū si ge nîse, tamas ka io, ǀû ge nî ǁî ǃkhaisa? Ob ge ǁîb ǃoa ge mî: ǃGû, ots ge nîra ǃgâiǃgâ, ǃKhūb ge ǁîna gao-aots ǃomǁae nîra mā xuige.

¹⁶Ob ge gao-aoba ǁîb ǃoa ge mî: Matikō ǃnāde ta kha nî nūba tsi, ǃKhūb di ǀons ǃnâts ǀnî xū-e tiǀî ǃhoa tide ǃkhaisa; amab ǀguiba?

¹⁷Ob ge ge mî: Tita ge Israeli hoaba ǃhomgu ai ǀgaruǀgaruhe hâse ge mû, gūn, hîa ǃûi-ao-e ūhâ tama hân axase. Ob ge ǃKhūba ge mî: Nēn ge ǀhonkhoe-e ūhâ tama hâ; a-i mâ-i hoa-e ǁî-i di ommi ǃoa ǁkhawa ǂkhîb ǃnâ oa.

¹⁸ǃNubaib ge Israeli di gao-aoba Josafati ǃoa ge mî: Mîba tsi tama ta hâ, ǁîb ge tita ǃgâi-i xare-e kēboba tide tsî ǂkhabab ǀguiba nî kēbo, ti?

¹⁹ǃAruǀîb ge Mikajaba ge mî: ǁNâu ǃKhūb di mîsa: Tita ge ǃKhūba go mû trons âb ai ǂnôase tsî ǀhommi di ǂnubisa ǁîb di amǀkhāb tsî ǁîb di ǁareǀkhāb ǁôab tawa mâse.

²⁰Ob ge ǃKhūba ge mî: Tari-e kha Axaba nî ǃhoadan, ǃapa tsîb nî Ramot-Gileads tawa ǁnāse? Ob ge ǀguiba nēti tsî nauba ǁnāti ge mî.

²¹ǃNubaib ge ǀgui gagaba ǂoaxa tsî ǃKhūb di ais aiǃâ mâ tsî ge mî: Tita ge ǁîba nî ǃhoadan. Ob ge ǃKhūba: Mâ xū-i ǀkha? ti ge mî.

²²Ob ge ǁîba ge mî: ǂOa tsî ta ge ǂhumi gagase nî ī ǁîb di kēbo-aogu hoagu di ams ǃnâ. Ob ge: ǃHoadan tsîts ge ǁkhāti nîra hōbē; ǂoa îts ǁnāti dī, ti ge mî.

²³Tsî nēsi mû, ǃKhūb ge ǂhumi gaga-e nē kēbo-aogu sagu hoagu di ams ǃnâ go mā; tsî ǃKhūb ge ǂkhababa sats ǂama go ǃhoa.

²⁴ǃNubaib ge Sedekiab, Kenaanab ôaba, dāsī tsî Mikajaba xōb ai ǁapu tsî ge mî: Mâ daoba-ūb kha ǃKhūb di Gagaba tita xu go ǂoa, satsab nî ǃhoaǀîse?

²⁵Ob ge Mikajaba ge mî: Kō, sats ge ǁî ǃkhaisa nîra mû, nē ǃnā-omsa xu nau ǃnā-oms ǃoats ga ǃgû ǃnubai, gaugausents nîga.

²⁶Ob ge Israeli di gao-aoba ge mî: Mikajaba ū îts ǁîba ǁkhawa Amonni, ǃās di ǂamsab ǃoa ūsī tsî Joab, gao-aob ôab ǃoa,

²⁷îts mî: Nētib ra gao-aoba mî: Nēba ǂnûi ǃkhō-oms ǃnâ î ǁîba ǂōǂōsib di pereba ǂûsi tsî ǂōǂōsib di ǁgam-e āsi, ǂkhîb ǀkha ta nî oahās kōse.

²⁸Ob ge Mikajaba ge mî: ǂKhîb ǀkhats ga satsa oahāo, ob ge ǃKhūba tita xu ǃhoa tama hâ. Tsîb ge ǃaruǀî: ǁNâu ǁaedu hoado, ti ge mî.

²⁹Nēti kha ge Israeli di gao-aob tsî Josafati, Judab di gao-aob tsîkha Ramot-Gileads ǃoa ge ǃgû.

³⁰Tsî Israeli di gao-aob ge Josafati ǃoa ge mî: ǀKharati ǂgaeǂgāsen tsî ta ge ǃkhammi ǃnâ nî sī, xawe satsa sa sarana ǂgaeǂgā. Nētib ge Israeli di gao-aoba ǀkharati ǂgaeǂgāsen tsî ǃkhammi ǃnâ ge sī.

³¹Tsî Siriab di gao-aob ge kunidi di ǂamsagu, ǁîgab ǃnonadisiǀgamǀase ūhâga mîmā tsî ge mî: ǂKharib kas, kaib kas hoasa go ge ǃkhamū tide, Israeli di gao-aob ǀguiba.

³²Tsî i ge ge ī, kunidi di ǂamsagu ge Josafata mûo, o gu ge: Amase, nēb kom Israeli di gao-ao-o, ti mî tsî ge ǁîba ǃgûǃoa, ǃkhamū bi nîse, xawe Josafati ge ge ǂgai.

³³O i ge ge ī, kunidi di ǂamsagu ge mûo, Israeli di gao-ao tamab a ǃkhaisa, o gu ge ǁîb khaoǃgâba xu ge oa.

³⁴ǃNubai i ge ǀgui khoeba ǀguiǃnâxasib âb ǃnâ ǁîb di khāsa ǂgaeǃnâ tsî Israeli di gao-aoba ǁkhaib ǁâsarab tsî ǃkhoas tsîra ǁaegu ge ǁkhâu. ǃNubaib ge doeǁga-aob âb ǃoa ge mî: Dawasen îts ǃkhamma xu ūǂui te, tsuihe ta go xuige.

³⁵Tsî ǃkhammi ge ǁnātsē ge ǀaro, tsî gao-aob ge kunis ǀkha Siriaǁîn ǃoa-ai ge mâhâhâ kaihe; tsîb ge ǃuia ge ǁō, tsî ǀaob ǀhapis dib ge kunis di ǃnāb ǃnâ gere dâu.

³⁶Tsî ǂgaiǂui-i ge, sores ra ǂgâ hîa, toroǂnubisa ge ǃganu: Mâ-i hoa-e a-i oa ǁî-i di ǃās ǃoa tsî mâ-i hoa-e ǁî-i di ǃhūb ǃoa, ti.

³⁷Nētib ge gao-aoba ǁō tsî Samarias ǃoa ge ūsīhe; tsîn ge gao-aoba Samarias tawa ge ǁkhō.

³⁸Tsî kunisan ge Samarias di îǁgams ǃnâ ǁāǃnâ ǃnubain ge arina ǀaoba ge tsā, ǀai-aodi ra khōsen ǃkhais ai, ǃKhūb di mîs, ǁîb ge ǃhoasa ǃoa.

³⁹Tsî naun Axab ǃnaeǃkhaidi din tsîb ge dīn hoan tsî ǂkhoaǁgû-ommi, hîab ge kurub, tsî ǃādi, hîab ge ǂnubidi hoadi, ǁîn ge xoahe hâ ǃNaeǃkhaidi ǂkhanis Israeli gao-aogu dis ǃnâ.

⁴⁰Nētib ge Axaba ge ǁō, tsî ǁîb di ôab Ahasiab ge ǁîb di ǃās ǃnâ ge gao-ao kai.

⁴¹Tsî Josafati, Asab ôab ge ge gao-ao kai Judab ǂama hakaǁî kurib Axab, Israeli gao-aob dib ǃnâ.

⁴²Josafati ge ǃnonadisikoroǀa kurixa ge i, gao-ao kaib ge ǃnubai, tsîb ge ǀgamdisikoroǀa kuriga Jerusalems ǃnâ gere gaosîsen; tsî ǀons ǁîb îs dis ge Asuba ge i, Silhib ôasa.

⁴³Tsîb ge ǁîba ǁîb îb Asab di daob hoab ǃnâ gere tanisen, tsîb ge ǁîba xu ǂgō tama ge hâ i, ǃKhūb mûǁae a ǂhanuna ra dīse. Tsî ti ī xawe gu ge ǀgapiga dīǁnâhe tama ge hâ i; ganupes ge ǁaesa ǀgapigu ai gere ǁguiba tsî ǀanǀan.

⁴⁴Tsî Josafati ge Israeli di gao-aob ǀkha ǂkhîba ge dī.

⁴⁵Tsî nau ǃnaeǃkhaidi Josafati didi tsî ǀgaib hîab ge sîsenūb, tsî matib ge torodī ǃkhaisa, ǁî xūn ge xoahe hâ ǃNaeǃkhaidi ǂkhanis Judab gao-aogu dis ǃnâ.

⁴⁶Tsîb ge ǁkhāti ǃgau hâ taotaosa ǀgôaga ǃhūba xu ge dībē, ǁîb îb Asab di tsēdi ǃnâ ge ǃgauga.

⁴⁷ǁNāǃnubai i ge gao-ao-e hâ tama ge hâ i Edommi ǃnâ; ǃāǃkhōmâi-aob ǀguib ge gere gaosîsen.

⁴⁸Tsî Josafati ge Tarsis doe-omga ge kurubasen, ǃhuniǀurib ǂama Ofiri ǃoa nî ǃgûga, xawe gu ge ǃgû tama ge i, Esion-Gebers tawa gu ge khôaǂkhūhe hâ i amaga.

⁴⁹ǁGoasib ge Ahasiab, Axab ôaba Josafati ǃoa ge mî: A gu ti ǃgāga sa ǃgāgu ǀkha ǃgû doe-omgu ǃnâ. Xawe Josafati ge ǂgao tama ge i.

⁵⁰Tsî Josafati ge ǁō tsî ge ǁkhōhe ǁîb îgu tawa ǁîb îb Davib di ǃās ǃnâ; tsî ǁîb ôab Jorammi ge ǁîb di amǃnâs ai ge gao-ao kai.

⁵¹Ahasiab, Axab ôab, ge Israeli ǂama Samarias tawa ge gao-ao kai disihûǀaǁî kurib Josafati, Judab di gao-aob dib ǃnâ, tsîb ge ǀgam kurikha Israela ge gaoǂam.

⁵²Tsîb ge ǃKhūb mûǁae a ǂkhabana gere dī; ǁîb îb daob ǃnâ tsî ǁîb îs di daob ǃnâ tsî Jerobeammi, Nebati ôab, Israela ge ǁore kaib di daob ǃnâb ge ǃgû xui-ao.

⁵³Tsîb ge Baala gere ǃoaba tsî ǁîb aiǃâ ge ǃhonǁgoa tsî ǃKhūb, Israeli Eloba gere ǁaiǁai, ǁîb îb ge dīn hoan ǃoa.