Read Khoekhoegowab 1 Gao-aogu 3 Bible Online

1 Gao-aogu 3 - Khoekhoegowab bible

1 Gao-aogu 3

¹Tsî Salomob ge Faraob, Egipteǁî gao-aob ǀkha ǀuigu, tsî Faraob ôasa ū tsî Davib di ǃās ǃnâ ge ūhā si, ǁîb ommi tsî ǃKhūb di ommi tsî Jerusalems ǂnamipe hâ ǂnubiǂgoabab nî ǂnubitoas kōse.

²Nēs ǀguis ge ge ī: ǁAes ge ǀgapigu ai gere ǁguiba, ǁnā ǁaeb kōses ge ǃKhūb di ǀonsa omma ǂnubibahe tama hâ i xui-ao.

³Tsî Salomob ge ǃKhūba ǀnam hâǃâ ǁîb îb Davib di ǂnûiǂgādi ǃnâ ge ǃgû; ǁguibas tsî ǀanǀans ǀguisab ge ganupe ǀgapigu ai gere hî.

⁴Tsî gao-aob ge Gibeons ǃoa ge ǃgû ǁnāpab nî ǁguibase, ǁî ǀgapib a kai amaga: ǀGuiǀoadisi khauǁguibadeb ge Salomoba ǁnā altars ai ge ǁguiba.

⁵Gibeons tawab ge ǃKhūba Salomob tawa tsuxuba ǁhapo-i ǃnâ ge ǂhai; tsî Elob ge: ǂGaoǀkhā te re, tare xū-e ta nî mā tsi ǃkhaisa, ti ge mî.

⁶Ob ge Salomoba ge mî: Sats ge sa ǃgāb Davib, ti îba, kai ǀkhomma ge dī-ū, sa ais aiǃâb ge tanisen khami, amab ǃnâ tsî ǂhanu-aisib ǃnâ tsî sa aiǃâ hâ ǂhauǃnâsib ǂgaob dib ǀkha; tsî sats ge ǁîba nē kai ǀkhomma ge sâuba, ǀgôabats ge mā bi ǃkhaisa, trons âb ai ǂnôaba, nētsē ī khami.

⁷Tsî nēsi, ǃKhū, ti Elotse, sats ge sa ǃgāta gao-aose ge dī, ti îb Davib di ǃās ǃnâ; tsî tita ge a ǂkham ǀgôa, tsî ta ge ǂgâs kas, ǂoas kas hoasa a ǀū.

⁸Tsî sa ǃgāta ge sa ǁaes ǁaegu hâ, sats ǁhûiǂuibasen hâs, kai ǁaes, ǂguib ǃaroma ǃgôahe tsî ǀnōhe ǁoasa.

⁹Sa ǃgāta ǁnâi ǁnâuǃāxa ǂgaoba mā, sa ǁaesa ta nî ǂhanuǂhanu ǁkhāse, ǃgâib tsî ǂkhabab tsîkha ǁaegu ǁnâuǃāxase ra ǀgoraǃâ. Tari-e kha nē ǀgauxa ǁaes âtsa a ǂhanuǂhanu ǁkhā?

¹⁰Tsî ǃKhūb ge ge ǃgâibahe Salomob ge nē ǃkhaisa ǂgaoǀkhā bi ǃkhais xa.

¹¹Ob ge Eloba ǁîb ǃoa ge mî: Nē ǃkhaisats go ǂgaobasen amaga tsî ǂgui tsēdets ǂgaobasen tama tsî ǃkhūsibats ǂgaobasen tama tsî sa khākhoen di ǀomsats ǂgaobasen tama hâ amaga, tsî ǁnâuǃābats go ǂgaobasen amaga, ǀgoraǃgâsats nî hî ǁkhāse,

¹²mû, o ta ge tita sa mîdi ǃoa go dī, mû, tita ge satsa gā-ai tsî ǁnâuǃāxa ǂgaoba go mā, sats khamib ge sa aiǃâ hâ tama ge hâ i, tsî sats khami īb ge sa khaoǃgâ khâi tide.

¹³Tsî ǂgaobasen tamats hân ona ta ge tita go mā tsi: ǃKhūsib tsî ǃgôab tsîkha hoakha, sats khami īb sa tsēdi ǃnâ gao-aogu ǁaegu hâ tides kōse.

¹⁴Tsî ti daogu ǃnâ ǃgû tsîts ga ti ǂnûiǂgādi tsî mîmāde dīo, sa îb Davib ge ǃgû khami, o ta ge tita ǁkhāti sa tsēde nîra ǃnūǃnū.

¹⁵Tsî Salomob ge ǃnoaǂkhaio, mû, o i ge ǁhapo ge ī. Tsî Jerusalems tawa sī tsîb ge ǂgaes ǃKhūb di ǃgaeǀhaos dis aiǃâ mâ tsî khauǁguibade ge ǁguiba tsî ganganǁguibade ge ǁāǁā tsî ǁîb ǃgāgu hoaga ǂûǁae-e gere dība.

¹⁶ǃNubai ra ge ǀgam tarara, ǀai-aora, gao-aob tawa ge hā; tsî ra ge ais âb aiǃâ sī ge mâ.

¹⁷Os ge ǀgui tarasa ge mî: Okha, ti ǀhonkhoetse, tita tsî nē taras tsîm ge ǀgui oms ǃnâ ǁan hâ; tsî tita ge ǁîs tawa ǁnā oms ǃnâ ge ǁora.

¹⁸Tsî i ge ǃnonaǁî tsēs ai ti ǁoras khaoǃgâ ge ī, nē taras on ge ǁora ǃkhaisa; tsîm ge ǀhû ge hâ i, ǃhaokhoe-i xare-i ge sim ǀkha oms ǃnâ hâ tama ge hâ i, siǀgamm ǀguim ge oms ǃnâ ge hâ i.

¹⁹Tsî ǀgôab nē taras dib ge tsuxub ǃnâ ge ǁō, ǁîb ais ge ǁgoe xui-ao.

²⁰Os ge tsuxuǃgâb ai khâi tsî ti ôaba ǀkhāb âtaba xu ge ū, sa ǃgāta ǁom hâ hîa, tsî ǁîs di tîǂams ǃnâ ge ǁgui bi, tsî ǁîs di ǁō hâ ǀgôabas ge ti tîǂams ǃnâ ge ǁgui.

²¹O ta ge ǁgoaga ge khâi, ti ôaba ta nî daisiga, tsî mû, ǁîb ge ǁō ge hâ i; tsî ǁgoaga ta ge ǂōrisase kō-o, mû, ob ge tita ge ǁora ǀgôa tama hâ.

²²ǃNubais ge nau tarasa ge mî: Hî-î, ûitsamab ge a ti ôa, tsî ǁō hâb ge a sa. Tsî naus ge ge mî: Hî-î, ǁō hâb ge a sa ôa, tsî ûitsamab ge a ti ôa. Nēti ra ge ǁîra gao-aob di ais aiǃâ ge ǂnoagu.

²³Ob ge gao-aoba ge mî: Nēs ra mî: Ti ôab ge ûitsama, tsî sa ôab ge ǁō hâba; tsî naus ra mî: Hî-î, sa ôab ge ǁō hâba, tsî ti ôab ge ûitsamaba.

²⁴Ob ge gao-aoba: Gôaba ūhāba te, ti ge mî. On ge gôaba gao-aob di ais aiǃâ ge ūhā.

²⁵ǁGoasib ge gao-aoba: Ûitsama ǀgôaba ǃkhaiǃā ǀgam ǃâra ǃnâ, î go ǀguisa ǀgui ǃkhareba mā tsî nausa nau ǃkhareba, ti ge mî.

²⁶Os ge ǁnā taras, ǀgôab âs a ûitsamasa gao-aob ǃoa ǀkhoma, ǃnāb âs ra ǀgôab âs ǂama gon xui-ao, tsî ge mî: Okha, ti ǀhonkhoetse, ǁnā ûitsama ǀgôaba ǁîsa mā, îts tā ǃgam bi! Os ge nausa: Sab kas, tib kas hoasa, ab ǃkhaiǃāhe, ti ge mî.

²⁷ǃNubaib ge gao-aoba ǃeream tsî ge mî: ǁÎsa mā ûitsama ǀgôaba, î go tā ǃgam bi ti go mîs, ge a ǁîb di î.

²⁸Tsî Israeli hoab ge nē ǀgoraǃgâs, gao-aob ge ǀgoraǃgâsa ǁnâu tsî gao-aob di aisa ge sau, mûn ra xui-ao, Elob di gā-aisib ǁîb ǃnâ hâ ǃkhaisa, ǀgoraǃgâb nîse.