Read Khoekhoegowab 1 Gao-aogu 4 Bible Online

1 Gao-aogu 4 - Khoekhoegowab bible

1 Gao-aogu 4

¹Nētib ge gao-aob Salomoba ge gao-ao i Israeli hoab ǂama.

²Tsî nēgu ge gaosa ge i, ǁîb ge ūhâ iga: Asariab, Sadoki ôab ge prister ge i.

³Elihorefi tsî Ahiab tsîkha, Sisab ôakha ge xoa-ao ge i; Josafati, Ahiludi ôab ge ǂkhanisâu-ao ge i.

⁴Tsî Benajab, Jojadab ôab, ge ǂnubis di ǂamao ge i; tsî Sadoki tsî Abjatari tsîkha ge prister ge i.

⁵Tsî Asariab, Natanni ôab, ge ommûǂamao ge i; tsî Sabudi, Natanni ôab ge prister ge i tsî gao-aob di horesa ge i.

⁶Tsî Ahisari ge ommi xūn ǂama ge hâ i; tsî Adonirammi, Abdab ôab ge ǁguibaxūn ǂama ge hâ i.

⁷Tsî Salomob ge disiǀgamǀa mûǂamaoga ge ūhâ i, Israeli hoab ǂama, gao-aob tsî ommi âba gere ǂhansenbaga; mâb hoab âgu ge kurib ǃnâ ǀgui ǁkhâb kōse ǂhansenbasa ge ǁguiǂamhe hâ i.

⁸Tsî nēdi ge ǁîgu di ǀonde: Huri ôab ge Efraimmi ǃhommi ai ge hâ i.

⁹Ben-Dekeri ôab Makas ǃnâ, tsî Saalbims ǃnâ tsî Bet-Semes ǃnâ tsî Elon-Bet-Hanans ǃnâ.

¹⁰Ben-Hesedi ôab Arubots ǃnâ: ǁÎb ge ǁkhāti Soxos tsî Heferǃhūb hoaba ge ūhâ i.

¹¹Ben-Abinadab ôab ge Dors di ǃhūǃâs hoasa ge ūhâ i, nēb ge Tafats, Salomob ôasa tarase ge ūhâ i.

¹²Baanab, Ahiludi ôab, ge Tanaxs, Megidos tsî Bet-Seans hoas, Saretans tawa ǁgoes, Jesreels ǃnaga, Bet-Seans Saretans ǃnaga ǁgoesa xu Abel-Meholas kōse Jokmeams nau ǀkhāb kōse ra sīsa, ge ūhâ i.

¹³Geberi ôab ge Ramot-Gileads dis tawa ge hâ i. ǁÎb ge Jairi, Manaseb ôab di ǃhaidi, Gileadi ǃnâ hâde ge ūhâ i, tsîb ge ǁkhāti Argob di ǃâs Basanni ǃnâ hâsa ge ūhâ i, ǃnanidisi kai ǃādi, ǂnubiǂgoaga ǂaib ǁkhaeǀurigu ǀkha ūhâde ge ūhâ i.

¹⁴Ahinadab, Idob ôab ge Mahanaims tawa ge hâ i.

¹⁵Ahimaab ge Naftalib ǃnâ ge hâ i; ǁîb on ge Salomob di ôas, Basematsa, tarase ge ū.

¹⁶Baanab, Husaib ôab, ge Aseri ǃnâ tsî Bealots ǃnâ ge hâ i.

¹⁷Josafati, Paruaxi ôab, ge Isaskari ǃnâ ge hâ i.

¹⁸Simib, Elab ôab, ge Benjaminni ǃnâ ge hâ i.

¹⁹Geberi, Urib ôab ge Gileadi ǃhūb ǃnâ, Sihonni, Amorǁîn gao-aob di ǃhūb tsî Ogi, Basanni gao-aob di ǃhūb ǃnâ ge hâ i, tsîb ge ǀguri hâ mûǂamao ge i, ǁnā ǃhūb ǃnâ hâba.

²⁰Tsî Judab tsî Israeli din ge ǂgui ge i, ǀgopab hurib amǃgâ ǁgoeb a ǂgui khami, ǂû raǃâ tsî ā raǃâ tsî ǃgâiaǂgao hâǃâ.