Read Khoekhoegowab 1 Gao-aogu 5 Bible Online

1 Gao-aogu 5 - Khoekhoegowab bible

1 Gao-aogu 5

¹Tsî Salomob ge ǁnā gaosidi, ǃāba xu Filisteǁîn di ǃhūb kōse tsî Egipteb di ǀkharib kōse gere sīde ge gaoǂam; ǁîdi ge ǁguibaxūna gere ūhā tsî Salomoba gere ǃoaba, ǁîb ûib di tsēdi hoade.

²Tsî ǂûn Salomob din ǀgui tsēs ǀguis din ge ǃnonadisi kor ǀui tsampere ge i tsî ǃnanidisi kor ora tsampere ge i.

³Disi kausa goman, ǀgamdisi ǃû ra goman tsî ǀguikaidisi gūn tsîna, ǁkhaman, ǁgûn, ǁgaon tsî kausa anin tsîn ose.

⁴ǁÎb ge gaoǂamsa ge ūhâ i ǃāb nēxa ǃnani hân hoan ǂama, Tifsaxsa xu Gasas kōse ǃāb nēxa ǃnani hâ gao-aogu hoagu ǂama; tsîb ge ǁîb di ǀkhākha hoakha ǂnamipe ǂkhîba ge ūhâ i.

⁵Tsî Judab tsî Israeli tsîkha ge sâusase ge ǁan mâ-i hoa-e ǁî-i di ǂauxûiǂûhais tsî ǁî-i di ǀnomahais ǃgao, Dansa xu Bersebas kōse Salomob di tsēdi hoade.

⁶Tsî Salomob ge hakadisiǀoadisi kunihāna ge ūhâ i, tsî disiǀgamǀaǀoadisi ǃgapi-aoga.

⁷Tsî ǂam aogu ge mâb hoaba ǁkhâb âb ai gao-aob Salomob tsî gao-aob Salomob di tāba ra ǀgūn hoana gere ǂhomiba; tsî gu ge xū-i xare-e tôasi kai tama ge hâ i.

⁸Tsî gerstǃhorob tsî ǃhoroǃgaodan, hān ǂhâba hân tsî ǃhae kameln ǂhâba hâna gu ge ǁnā ǃkhais, ǁîb hâs hoas ǃoa gere ūsī, mâb hoaba ǁguiǂamheb hâ xase.

⁹Tsî Elob ge Salomoba gā-aisib tsî kaise kai ǁnâuǃāb tsî hara ǂâis ǂgaob dis di ǃkhōǂgāba ge mā, ǀgopab hurib amǃgâ ǁgoeb khami.

¹⁰Tsî gā-aisib Salomob dib ge aiǂoas digu hoagu di gā-aisib ǃgâ-ai ge kai i, tsî Egipteǁîgu di gā-aisib hoab ǃgâ-ai;

¹¹ā, ǁîb ge khoen hoan ǂamai gā-ai ge i, Etanni, Esraǁîb, tsî Hemanni tsî Kalkoli tsî Dardab tsîgu, Maholi ôagu ǂamai; tsî ǀons âb ge ǁîb ǂnamipe hâ ǀūben hoan ǃnâ ge hâ i.

¹²Tsîb ge ǃnonaǀoadisi ǂkhoamîde ge ǃhoa, tsî ǁnaetsanadi âb ge ǀguiǀoadisi tsî koro ge i.

¹³Tsîb ge ǁkhāti hain xa gere ǃhoa, sederhais, Libanonni ai hâsa xu hisobhais, ǂnubiǂgoaba xu ra ǀkhīs kōse; tsîb ge ǁkhāti ǀgoan xa gere ǃhoa tsî anin xa tsî ǂhanaben xa tsî ǁaun xa.

¹⁴Tsîn ge ǁaedi hoadi dina ge hā, gā-aisib Salomob diban nî ǁnâuse, gao-aogu ǃhūbaib digu hoagu, gā-aisib âb xa ge ǁnâugu dina.

¹⁵Tsî Hirammi, Tires di gao-aob, ge ǁîb ǃgāga ge sî Salomob ǃoa, Salomoban gao-aose go ǂkhauǀkhā ǁîb îb di ǃās ǃnâ tib ge ǁnâu xui-ao, Hirammi ge Daviba hugaǀgui ǀnam hâ i amaga.

¹⁶ǁNās khaoǃgâb ge Salomoba Hirammi ǁga sî tsî ge mî:

¹⁷Sats ge a ǂan, ti îb Davib, ǃKhūb ǁîb Elob di ǀonsa omma ǂnubiba ǁoa ge i ǃkhaisa, ǁnā torogu, ǁîgu xab ge hâǂgāhe hâ igu ǃaroma, ǃKhūb ǁîga ǂaiǃnākha âb ǃnaga ge mās kōse.

¹⁸Xawe nēsib ge ǃKhūb, ti Eloba ti ǂnamipe sâba go mā te! Mâǃoasabe-i xare-i ge a ǀkhai tsî ǂhani-i xare-i ge a ǀkhai.

¹⁹Mû, o ta ge tita ǂâibasen hâ, ǃKhūb, ti Elob di ǀonsa ta nî omma ǂnubiba ǃkhaisa, ǃKhūb ge ti îb Davib ǃoa ǃhoa tsî: Sa ôab, sa amǃnâs ai ta trons âts ai nî ǂnûib, ǁîb ge ti ǀonsa omma nî ǂnubiba, ti ge mî.

²⁰Îts ǁnâi mîmā, î gu sederhaide Libanonni ai ǁhāba te, ti; o gu ge ti ǃgāga sa ǃgāgu ǀkha nî hâ, tsî amǃnâs sa ǃgāgu disa ta ge nî mā tsi, mîts nî xase; ǂants a, sida ǃnâ khoe-i, Sidonǁîn khami haina ǁhāsa a ǂan-i xare-i a ǀkhai ǃkhaisa xui-ao.

²¹Tsî i ge ge ī, Hirammi ge Salomob di mîde ǁnâuo, ob ge kaise ǃgâiaǂgao tsî ge mî: ǃKhūba ab nētsē ǀkhaehe, Daviba gā-ai ǀgôaba ge māba nē kai ǁaes ǂama.

²²Tsî Hirammi ge Salomob ǃoa sî tsî ge mî: Tita ge go ǁnâu, tare xū-i ǃaromats tita ǃoa go sî ǃkhaisa; tita ge sa ǂâis hoasa nî dī sederhain ǀkha tsî denehain ǀkha.

²³Ti ǃgāgu ge ǁîna Libanonna xu hurib amǃgâ nî ūǁgôa; o ta ge tita ǁîna ǂgaudi ai huriba-ū nî ūǃgû ǁnā ǃkhais, sats nî mîmâisa ǃoa, tsî ta ge ǁîna ǁnāpa nî ore, ots ge satsa ǁnāpa xu ǁîna nî ūbē; ots ge sats ona ti ǂâisa dī tsî nî ti omma ǂûmā.

²⁴Nētib ge Hiramma Salomoba sederhain tsî denehain tsîna ge mā, ǂgaob ge xase.

²⁵Tsî Salomob ge Hiramma ǀgamdisiǀoadisi kor ǃhorob xa ommi âb di ǂûse ge mā, tsî ǀgamdisi kor ǁgâihe hâ olib xa; nēnab ge Salomoba Hiramma kurikorobe gere mā.

²⁶Tsî ǃKhūb ge Salomoba gā-aisiba ge mā, ǁîbab ge mîmâibase; tsî ǂkhîb ge ge hâ i Hirammi tsî Salomob tsîkha ǁaegu, tsî ǁî ǀgamkha ge ǃgaeǀhao-e ge dī.

²⁷Tsî gao-aob Salomob ge ūǂuihesa ǀgaus khoegu disa Israeli hoaba xu ge ǀkhī kai; tsî ǀgaus ge ǃnonadisiǀoadisi khoe ge i.

²⁸Tsîb ge ǁîga Libanonni ǃoa ge sî disiǀoadisiga ǁkhâkorobe ǃnādi ai; o gu ge ǀgui ǁkhâba Libanonni ai tsî ǀgam ǁkhâkha mâb hoab âga ommi âb ǃnâ ge hâ i; tsî Adonirammi ge ūǂuihesagu ǂama ge mâihe hâ i.

²⁹ǁÎgu tawab ge gao-aob Salomoba hûdisiǀoadisiga ge ūhâ i, ǃgomga ra taniga, tsî ǁkhaisadisiǀoadisi ǁhā-aoga ǃhommi ai.

³⁰Tsî ǁnāgu, Salomob xa ǂamkhoese ge ǂnûihegu, sîsenni ǂama hâgu ǃnonaǀoadisi tsî ǃnonakaidisigu, ǁaes sîsenna ra dīse ge gaoǂamga.

³¹Tsî gao-aob ge mîmā ǃnubai gu ge kai ǀuide ge ūhā, ǃgomǀgausa ǀuidi, ǁhāǂhanuǂhanuhe hâ ǀuide, ommi di ǃgaoǃgaob nî ǁguihega.

³²Tsî Salomob di ǂnubi-aogu tsî Hirammi di ǂnubi-aogu tsî Gebalǁîgu tsîgu ge ǁîde gere ǁhā-ūnu tsî haide gere ǂhomi tsî ǀuide, ommi nî ǂnubihese.