Read Khoekhoegowab 1 Gao-aogu 6 Bible Online

1 Gao-aogu 6 - Khoekhoegowab bible

1 Gao-aogu 6

¹Tsî i ge hakakaidisiǁkhaisadisiǁî kurib ǃnâ ge ī Egipteba xu doeǂoas Israeli dis khaoǃgâ, hakaǁî kurib, Salomob ra Israeli ǂama gaosîsens dib ǃnâ, Sifǁkhâb ǃnâb (ǀgamǁî ǁkhâb ge ǁîba), ge ǃKhūb di omma ǂnubitsoatsoa ǃkhaisa.

²Tsî ǁnā ommi gao-aob Salomob ge ǃKhūba ǂnubibab ge ǃnanidisi ǂhâgu kōse gaxu ge i tsî ǀgamdisi ǂhâgu kōse ǂhaba ge i tsî ǃnonadisi ǂhâgu kōse ǀgapi ge i.

³Tsî ai-ommi, ǁnā ommi tempeli dib aiǃâ hâb ge ǀgamdisi ǂhâgu kōse gaxu ge i, ǂhabasib ommi dib ǃoa, tsî disi ǂhâgu kōse ǂhaba ge i, ommi aiǃâbǀî.

⁴Tsîb ge omma mûǂuidaode ge dība ǂganamhe hâ kōǂuidi ǀkha.

⁵Tsî ommi di ǂnubiǂgoab ǂnamipeb ge ǂnami-omde ge ǂnubi, ommi di ǂnamipe, ǂnubiǂgoagu ǂnamipe tempeli tsî ǃhoaǀî ǃkhais tsîra digu ǂnamipe. Nētib ge xōǀkhā omde ge dīǂnami.

⁶Hoadi xa ǃnaga hâ ǃnā-oms ge ǂhabasib âsa koro ǂhâgu kō ge i, tsî ǁaegu hâ om-ais ge ǂhabasib âsa ǃnani ǂhâgu kō tsî ǃnonaǁîs ge ǂhabasib âsa hû ǂhâgu kō ge i; ommi ǂnamipeb ge ǃaugabǀî ǃnubuǃnubu-aide ge dī, ommi di ǂnubiǂgoagu ǃnâ di ǃkhōbasen tidega.

⁷Tsî ommi ge ǂnubiheb ge ǃnubai ǀuidi ǁāǁābaheb hâdi ǀkha gere ǂnubihe; ǂnau-ūxūdi kas, ǃō-i kas, ǀnî ǂnūǀurisîsenūda-i kas hoas ge ommi ǃnâ ǂnubiheb ra hîa ǁnâuhe tama ge hâ i.

⁸Dao-ams ǁaegub ǃnâ hâ xōǃnâ-oms dis ge ommi di amǀkhāb ai ge hâ i; tsî īǂnamipeǃapa-ūda-i ain ge ǁaegub ǃnâ hâs ǃoa tsî ǁaegub ǃnâ hâsa xu ǃnonaǁîs ǃoa ge ǃapa.

⁹Nētib ge omma ǂnubi tsî ge dītoa, tsîb ge omma ge ǃgū-ai ǃnaogu tsî sederǃnaogu tsîn ǀkha.

¹⁰Tsîb ge ǁkhāti ommi hoab tawa ǃnā-omde ge ǂnubi, koro ǂhâgu kōse ǀgapide; tsîb ge ǁîde ommi tawa ge ǃgaeǁapoǁapo sederǃnaogu ǀkha.

¹¹ǃNubais ge mîs ǃKhūb disa Salomoba hāba tsî ge mî:

¹²Nē ommi, hîats ra ǂnubib xasa: Ti ǂnûiǂgādi ǃnâ ǃgû tsîts ga ti ǂhanuga dī tsî ti mîmādi hoade ǃkhōǀgaipeo, ǁîdi ǃnâ ra ǃgûǃâ, o ta ge tita ti mîsa nîra ǁapoǁapoba tsi, sa îb Davib ǃoa ta ge ǃhoasa.

¹³Tsî tita ge Israeli ôan ǁaegu nîra ǁan; tsî tita ge ti ǁaes Israelsa ǁnāxū tide.

¹⁴Nētib ge Salomoba ǁnā omma ǂnubi tsî ge dītoa bi.

¹⁵ǁKhātib ge ǂnubiǂgoagu ommi diga ǃnābǀî sederhai ǁgā ǃnaogu ǀkha ge kuru; ǃhūb ommi diba xub ge ǂamais di ǃnaogu kōse ǁîga ǃnābǀî hai-i ǀkha ge ǃkhûǀkhā; tsîb ge ǃhūb ommi diba dene ǁgā haigu ǀkha ge ǃkhûǃgâ.

¹⁶Tsîb ge ommi di ǃgâba ǀgamdisi ǂhâgu kōse seder ǁgā haigu ǀkha ge kuru ǃhūba xu ǃnaogu kōse, tsîb ge ǁîba ǃnāba xu ǃhoaǀîǃkhaise ge kurubasen ǃanun di ǃanuse.

¹⁷Tsî hakadisi ǂhâgu kōseb ge ǁnā omma gaxu ge i, ǁîb ge tempeli aiǃâ ge hâ i.

¹⁸Sederhain ommi din ge ǃnābǀî ǃgaohe ge hâ i ǃkhurudi tsî khowasen hâ ǃkhādi tsîn ase; sederhain ǀguin ge hū ge i; ǀui-i xare-i ge mûhesa tama ge hâ i.

¹⁹Tsî ǃhoaǀîǃkhaisab ge ommi ǃnābǀî ge ǂhomi, ǃgaeǀhaos ǃKhūb dis di ǂgaesab nî ǁnāpa ǂnûiga.

²⁰Tsî ǃhoaǀîkhais ge aiǃâbǀî ǀgamdisi ǂhâgu kōse gaxu tsî ǀgamdisi ǂhâgu kōse ǂhaba tsî ǀgamdisi ǂhâgu kōse ǀgapi ge i, tsîb ge ǁîsa ǀui ǃhuniǀurib ǀguib ǀkha ge ǃkhûǀkhā; sederhai-altars onab ge ge ǃkhûǀkhā.

²¹Tsî Salomob ge omma ǃnāb ǃnâ ǀui ǃhuniǀurib ǀguib ǀkha ge ǃkhûǀkhā; tsîb ge ǃhoaǀîǃkhaisa ǃhuniǀuriǁkhamgu ǀkha ge ǂgan tsî ǁîsa ǃhuniǀurib ǀkha ge ǃkhûǀkhā.

²²Nētib ge ommi hoaba ǃhuniǀurib ǀkha ge ǃkhûǀkhā, ommi ge dītoahe hâ is kōse, ǁnās xōǀkhāb ge altars hoaba ǃhuniǀurib ǀkha ge ǃkhûǀkhā, ǃhoaǀîǃkhais aiǃâ hâsa.

²³Tsî ǃhoaǀîǃkhais ǃnâb ge ǀgam xerukha ge dī ǀkherahain xa; mâb hoab âkha ge disi ǂhâgu kōse ǀgapi ge i.

²⁴Tsî koro ǂhâgu kōse gaxub ge ǀgui ǁgabob xerub diba ge i; tsî koro ǂhâgu kōse nau ǁgabob xerub diba; nē ǁgabob âb di ǀamsa xu nau ǁgabob âb di ǀams kōse i ge disi ǂhâgu kō ge i.

²⁵Nētib ge nau xerub ona disi ǂhâgu kō ge i; xerukha hoakha ge ǀgui ǀguirob ǀguiba ge ūhâ i tsî ǀgui īsib ǀguib â-i ge i.

²⁶ǀGapib ǀgui xerub dib ge disi ǂhâgu kō ge i tsî ǁnāti nau xerub ona.

²⁷Tsîb ge nē xerukha ommi ǃnāb di ǁaegub ǃnâ ge mâi; tsî xerukha ge ǁgabokha ge ǃā, ǀguib di ǁgabob ge nē ǂnubiǂgoab ǁga sīs kōse tsî nau xerub di ǁgabob nau ǂnubiǂgoab kōse; tsî ǁgabogu âkha ge ommi ǃnābǀî nē ǁgaboba xu nau ǁgabob kōse gere sī.

²⁸Tsîb ge nē xerukha ǃhuniǀurib ǀkha ge ǃkhûǀkhā.

²⁹Tsî ommi di ǂnubiǂgoagu hoagab ge xoaǂgā-aidi ǀkha ge xoaǂgāǃnâǂnamipe, xerugu, palmhaidi tsî khowasa ǃkhādi tsîn ǀkha ǃnāb ǃnâ tsî ǃaugab ai.

³⁰ǁNās tawab ge ǃhūb ommi diba ǃhuniǀurib ǀkha ge ǃkhûǀkhā ǃnāb ǃnâ tsî ǃaugab ai.

³¹Tsî ǂgâǃkhais ǃhoaǀîǃkhais dis tawab ge ǁāga ge dī ǀkherahain xa; ǀgapise hâ dorpelhaib ge ǃnamhaikha ǀkha koroǁî ǃâs ǂnubiǂgoab di ge i.

³²ǀGam ǁākha on ge ǀkherahain xa dīhe ge hâ i; tsîb ge ǁîkha ai ge xoaǂgā xerub di xoaǂgāǃnâ-aide tsî palmhais dide tsî khowasa ǃkhādi dide, tsîb ge ǁîkha ǃhuniǀurib ǀkha ge ǃkhûǀkhā; ǁkhātib ge xerukha tsî palmhaidi tsîna ǃhuniǀurib ǀkha ge ǃkhûǀkhā.

³³Tsî ǁnātib ge tempeli di ǁāgu tawa ǁāb haiga ge dī ǀkherahain xa hakaǁî ǃâs ǂnubiǂgoab disa xu.

³⁴Tsî ǀgam ǁākha ge denehain xa dīhe ge hâ i; ǀgam ǃnamkha ǀgui dao-ams dikha ge ra gonǂnamipe, ǁnāti kha ge xoaǂgāhesa ǃnamkha nau dao-ams dikha ona gere gonǂnamipe.

³⁵Tsîb ge ǁîkha xerugu tsî palmhaidi tsî khowasa ǃkhādi tsîna ge xoaǂgāǃnâ, tsîb ge ǁîna ǃhuniǀurib ǀkha ge ǃkhûǀkhā ǃgaoǂgāǃnâhe hâ xūn ai.

³⁶ǁNās khaoǃgâb ge ǃnāb di ai-omma ge ǂnubi ǃnona ǁgaragu ǁhā-ūnuhe hâ ǀuidi digu ǀkha tsî ǀgui ǁgarab sederǃnaogu dib ǀkha.

³⁷Hakaǁî kurib ǃnâs ge ǃgaoǃgaos ǃKhūb ommi disa ge ǁguihe Sifǁkhâb ǃnâ.

³⁸Tsî disiǀguiǀaǁî kurib ǃnâ, Bulǁkhâb, ǁkhaisaǁî ǁkhâb ge ǁnāba, ǁîb aib ge nē omma ge dītoahe, ǃâdi âb hoab ǀkha tsî ǁîba anuba hân hoan ǀkha. Nētib ge hû kurigu ǃnâ ǁîba ge ǂnubi.