Read Khoekhoegowab 1 Gao-aogu 7 Bible Online

1 Gao-aogu 7 - Khoekhoegowab bible

1 Gao-aogu 7

¹Xawe ǁîb di ommab ge Salomoba disiǃnonaǀa kurigu ǃnâ ge ǂnubi, tsîb ge ommi âb hoaba ge dītoa.

²ǁÎb ge ǁkhāti haixa ǃkhais di ommi Libanonni diba gere ǂnubi; ǀguikaidisi ǂhâgu kōb ge kōsib âba ge i tsî korodisi ǂhâgu ǂhabasib âba tsî ǃnonadisi ǂhâgu ǀgapib âba, haka ǁgaragu sederǂkhâǃnâgu didi ai tsî sederǃnaogu ǂkhâhaigu ai.

³Tsîb ge sederhain ǀkha ge ǃgū-aihe hâ i ǁnā ǁgaragu, hakadisikoroǀa ǂkhâǃnâgu ai hâgu ǀgapise, disikoroǀaga ǀgui ǁgarab ai.

⁴Tsî di ge ǃnona ǁgaragu ai kōǂui-aide ge hâ i, ǀgui mûǂuidaos ge nau mûǂuidaos ǀgapise ge hâ i ǃnona ǃnādi ai.

⁵ǁKhāti gu ge ǁāgu tsî ǁāb haigu hoaga hakaǁhôaxase ge ī i kōǂui-ai-i ǀkha; tsî mûǂuidaos ge mûǂuidaos ǃoagu ge hâ i ǃnona ǃnādi ai.

⁶ǁNās khaoǃgâb ge ǂkhâǃnâgu xa ai-omma ge dī; korodisi ǂhâgu kōb ge gaxub âba ge i tsî ǃnonadisi ǂhâgu kōse ǂhabasib âba, tsî ai-ommi ge ǁîgu ǃoa-ai ge hâ i tsî ǂkhâǃnâgu ǁau ǃnaogu ǀkha ǁîgu ǃoa-ai.

⁷ǁKhātib ge ai-omma ge dī trons aiǃâ, ǁîb ǃnâb ra ǂhanuǂhanuba, ǀgoraǃgâs di ai-omse, sederhain ǀkha ǃgū-aihe hâba ǃhūba xu ǃhūb kōse.

⁸Tsî ǁîb di ommi hîab ge ǁanǃnâb tawab ge ǀnî ai-omma ge hâ i nau ai-omma xu ǃnābǀî, nē sîsenni ǀkha ǀguiti-ība; ǁkhātib ge Faraob di ôas, Salomob ge tarase ūsa omma ge ǂnubiba, ǁnā ai-ommi khami ība.

⁹Nēn hoan ge ǃgomǀgausa ǀuidi ǁhôaǀguirob ai ǁhāhe hâdi xa ge dīhe hâ i, ǃnābǀî tsî ǃaugab ai saxab ǀkha ge ǃgaohe hâ ide, ǃgaoǃgaosa xu ǃnaogu di ǀamǀuidi kōse tsî ǃaugaba xu ai-ommi kaib kōse.

¹⁰Tsîb ge ǁkhāti ǃgaoǃgaohe ge hâ i ǃgomǀgausa ǀuidi ǀkha, kai ǀuidi ǀkha; ǀuidi, disi ǂhâgu kōse a gaxudi tsî ǀuidi, ǁkhaisa ǂhâgu kōse a gaxudi ǀkha.

¹¹Tsî ǀgapise ǃgomǀgausa ǀuidi, ǁhôaǀguirogu ǃoa ǁhāhe hâde tsî sederhain tsîna.

¹²Tsî ai-ommi kaib ge hâ ǂnamipehe ge hâ i ǃnona ǁgaragu ǁhāhe hâ ǀuidi xa tsî ǀgui ǁgaras sederǃnaogu xa. Nēti i ge ī ǃnāb di ai-ommi ǃKhūb ommi dib ǀkha tsî ǁnā ommi di ai-ommi ǀkha.

¹³Tsî gao-aob Salomob ge sî tsî Hirammi Tiruǁîba ge ūhā kai.

¹⁴ǁÎb ge ǃoatara-i Naftaliǃhaos di-i di ôa ge i, tsî ǁîb di îb ge Tires di ao ge i, ǂaisîsenaob, gā-aisib tsî ǁnâuǃāb tsî ǂans tsîn ǀkha ǀoa hâba, sîsenain hoanab nî ǂaib ǃnâ dīse; nēb ge gao-aob Salomob tawa hā tsî sîsenni âb hoaba gere dī.

¹⁵Tsîb ge ǀgam ǂaiǂkhâǃnâkha ge dī, ǀgui ǂkhâǃnâb di ǀgapib ge disiǁkhaisaǀa ǂhâgu kō ge i tsî disiǀgamǀa ǂhâgu kōse gaxu tsuri-i ge nau ǂkhâǃnâba ge hâǂgā.

¹⁶ǁÎb ge ǁkhāti ǀgam ǂkhâǀuidanakha ǂnâhe hâ ǂaib xa ge dī, ǂkhâǃnâkha di danadi aib nî ǁîkha ǂnûise; koro ǂhâgu kōseb ge ǀgui ǂkhâǀuidanaba ǀgapi i tsî koro ǂhâgu kōse nau ǂkhâǃnâb di ǀgapiba.

¹⁷ǂHamdi ge ǂhamsîsenai-i xa dīhe ge hâ i, ǃgae-ūdade ǁkhamsîsenai-i xa ǁnā ǀuigu ǂkhâǃnâkha di danas ai hâgu ǂama; hûdi ge ǀgui ǂkhâǀuidanaba hâba ge i tsî hûde nau ǂkhâdanaba.

¹⁸Nētib ge ǂkhâǃnâkha ge dī ǀgam ǁgarakha ǀkha ǀgui ǂhams ǂnamipe, ǁnā ǂkhâǀuidanagu granatǂûn di danas ǂamǃnâ hâgu nî ǃgū-aihega; ǁnās ǁkhās xaseb ge ǁkhāti nau ǂkhâdanab tawa ge dī.

¹⁹Tsî ǀuidanakha, ǂkhâǃnâkha di danara ai hâkha ge ǃkhāros sîsenai-i xa dīhe ge hâ i, ai-ommi ǃnâ, haka ǂhâgu kōse.

²⁰Tsî ǀuidanakha ge ǀgam ǂkhâǃnâkha ai ge hâ i, ā, ǀgapib ǃnāb, ǂhams xōǀkhā hâb ǃoa-ai; tsî ǀgamkaidisi granatǂûn ge ǁgaragu ai ge hâǂnamipe hâ i, nau ǂkhâǀuidanab on ai.

²¹Tsîb ge ǂkhâǃnâkha ai-ommi tempeli dib ǃnâ ge mâi; tsî amǀkhāb ǂkhâǃnâba mâi tsîb ge ǀons âba Jaxin ti ge ǂgai tsî ǁareǀkhāb ǂkhâǃnâba mâi tsîb ge ǀons âba Boa ti ge ǂgai.

²²Tsî ǂkhâǃnâkha di danas ai i ge ǃkhāron sîsenai-e ge hâ i. Nētib ge ǂkhâǃnâkha di sîsenna ge dītoahe.

²³ǃAruǀîb ge huriba ge dī, ǂnâhe hâba; ǁîb ge disi ǂhâgu kō ge i, nē ǀams âba xu nau ǀams âb kōse, hoaragase ǃgupuba, tsîb ge koro ǂhâgu kōse ge ǀgapi i, tsîb ge ǀguiro-ūtsurib, ǃnonadisi ǂhâgu kōse ge gaxu ib xa ge hâǂnamihe hâ i.

²⁴Tsî ǁîb di ams ǃnaga di ge ǃhûde ge hâ i, ǁîba ra hâǂnamipeǃâ, disidi ǀgui ǂhâb ǃnâ, ǀgam ǁgarakha nē ǃhûdi dikha ge ǂnâs âb ǃnâ ge ǂnâhe hâ i.

²⁵ǁÎb ge disiǀgamǀa gomagu ai ge mâ i, ǃnonaga ǀapasǀî ra kōse, tsî ǃnonaga huriǂoasǀî ra kōse, tsî ǃnonaga ǃkhawagasǀî ra kōse, tsî ǃnonaga aiǂoasǀî ra kōse; tsî hurib ge ǁîgu ai ge hâ i; tsî ǁîgu di khaosǀkhāgu hoagu ge ǃnābǀî ge hâ i.

²⁶Tsî ǁaub âb ge ǀgui ǃommi di ǂhabasib kō ge i, tsî amǃgâb âb ge ǀgabis amǃgâb kas khami ge ī i, leliǃkhās khami, tsîb ge ǁîba ǀgamǀoadisi batga ge ǃkhōǂgā hâ i.

²⁷Tsîb ge ǁkhāti disi ǂaiǂnûi-aixūde ge dī; ǀgui ǂnûi-aixūs di gaxub ge haka ǂhâgu kō ge i, tsî ǂhabasib âb ge haka ǂhâgu kōse, tsî ǀgapib âb ǃnona ǂhâgu kōse.

²⁸Tsî nēb ge sîsenni ǂnûi-aixūdi diba ge i: ǁÎdi ge laide ge ūhâ i, tsî laidi ge ǂgomasa xūdi ǁaegu ge hâ i.

²⁹Tsî laidi, ǂgomasa xūdi ǁaegu hâdi ain ge xamgu, goman tsî xerugu tsîna ge hâ i; tsî ǂgomasa xūdi ai xamgu tsî goman, ǀgapise tsî ǃnagasǀîn ge dīǀaroxūn ǀui sîsenni dina ge hâ i.

³⁰Tsî ǀgui ǂnûi-aixūs ge haka ǂaiǀnūde ge ūhâ i tsî ǂaib ǂhaba ǀuridana; tsî ǁîs di haka ǁhôagu ge ǃhōde ge ūhâ i. ǁĀǃnâǃoreb ǃnaga di ge ǂnâhe hâ ǃhōde ge hâ i, mâ dīǀaro-i hoa-i xōǀkhā.

³¹Tsî ams âs ge ǂgomasa xūs ǃnâ ge hâ i tsî ǀgapise ǀgui ǂhâb kōse, tsî ams âs ge ǃgupu ge i, ǂais sîsenni xase, ǀgui tsî ǃkhare ǂhâb kōse; tsî ams âs ai di ge ǁkhāti xoaǂgā-aide ge hâ i, tsî laidi âs ge hakaǁhôaxa ge i, tsî ǃgupu tama ge hâ i.

³²Tsî haka ǀnūdi ge laidi ǃnaga ge hâ i tsî ǀnūdi di ǁôaga ǂnûi-aixūs ǃnâ; tsî ǀgapib ǀgui ǀnūs dib ge ǀgui tsî ǃkhare ǂkhâb kō ge i.

³³Tsî sîsenni ǁnā ǀnūdi dib ge kuniǀnū-i di sîsenni khami ge ī; ǁîdi di ǁôagu, ǁîdi di nafgu, ǁîdi di ǀurigu tsî ǁîdi di spekegu tsîn hoan ge ǂnâhe ge hâ i.

³⁴Tsî di ge haka ǃhōde ǀgui ǂnûi-aixūs di ǁhôagu ai ge hâ i; ǃhōdi âs ge ǂnûi-aixūsa xu ge hâ i.

³⁵Tsî ǂnûi-aixūs di danas ai i ge ǃgupuǃgupu ǂnamiperohe ge hâ i ǃkhare ǂhâb kōse, ǁkhāti di ge ǂnûi-aixūs di danas ai ǃkhōǃkhaide ge hâ i tsî laidi âdi ge ǁîsa xu ge hâ i.

³⁶Tsîb ge ǂhabaǀurigu ǃkhōǃkhaidi âs digu ai tsî laidi âs ai xerugu, xamgu tsî palmhaidi tsîna ge xoaǂgā, ǀkhaiǃnâǃkhai-i hoa-i xase tsî dīǀaron on ǁîs ǂnamipe.

³⁷Nē dommi aib ge disi ǂnûi-aixūde ge dī; ǀgui ǂnâs ǀguis, ǀgui ǀguirob ǀguib, ǀgui xoaǂgās ǀguisa di ge hoade ge ūhâ i.

³⁸Tsîb ge ǁkhāti disi ǂaiǁāǃnâǃorega ge dī; mâ ǁāǃnâǃoreb hoab ge hakadisi batga ge ǃkhōǂgā; mâ ǁāǃnâǃoreb hoab ge haka ǂhâgu kō ge i; mâ ǂnûi-aixūs ǁnā disi ǂnûi-aixūdi dis hoas aib ge ǀgui ǁāǃnâǃoreba ge hâ i.

³⁹Tsîb ge korodi ǁnā ǂnûi-aixūdi dide ommi di amǀkhāb ai ge mâi tsî korode ommi di ǁareǀkhāb ai, xawe huribab ge ge mâi ommi di amǀkhāb ai aiǂoas di ǃkhawagas ǃoa.

⁴⁰Tsîb ge Hiramma ǁāǃnâǃoregu tsî sîsenbē-ūxūn tsî ǀgapiǃoredi tsîna ge dī; tsî Hirammi ge sîsenni hoaba ge dītoa, gao-aob Salomobab ge ǃKhūb di omma ge dība:

⁴¹ǁNā ǀgam ǂkhâǃnâkha tsî kapitelkha, ǀgam ǂkhâǃnâkha di danas ai hâkha di ǃgupu xūra, tsî ǀgam ǂhamra, kapitelkha di ǀgam ǃgupu xūra ǂkhâǃnâkha ai hâra nî ǃgū-aihese.

⁴²Tsî hakakaidisi granatǂûn tsî ǀgam ǀûira dina; ǀgam ǁgarakha granatǂûn dikha mâ ǀûis hoas tawa, kapitelkha di ǀgam ǃgupu xūra ǂkhâǃnâkha ai hâra nî ǃgū-aihega;

⁴³ǁîb ge ǁkhāti disi mâ-aixūde ge kuru, tsî disi ǁāǃnâǃorega mâ-aixūdi ai;

⁴⁴ǁnān tawa ǀgui hurib, tsî disiǀgamǀa gomagu tsîna hurib ǃnaga;

⁴⁵tsî sūdi on tsî sîsenbē-ūxūn tsî ǀgapiǃoredi tsî ǁnā soadi, Hirammi ge gao-aob Salomoba ǃKhūb di omma dībadi tsîn, hoatsama ǂkhanuǂkhanuhe hâ ǂaib xa.

⁴⁶Jordanǃāb di ǂgāb aib ge gao-aoba ǁîna ge ǂnâ, ǂgoaxa ǃhūb ǃnâ, Sukots tsî Saretans tsîra ǁaegu.

⁴⁷Tsî Salomob ge nē soan hoana gororo tama ge hâ i ǂguib ân ǃaroma; ǂaib di ǃgommi ge ôaǃnâhe tama ge hâ i.

⁴⁸ǁKhātib ge Salomoba ǁnā xapadi ǃKhūb ommi didi hoadi tsî ǃhuniǀuri-altars tsî ǃhuniǀuritāb, ǁgauperegu ǃaroma hâb;

⁴⁹tsî kandelargu, koroga amǀkhāb ai tsî koroga ǁareǀkhāb ai ǃhoaǀîǃkhais aiǃâ ǃūmû ǃhuniǀurib ǀkha, tsî ǃkhādi tsî ǃamamǀaedi tsî ǁaraǂaoxūn tsîna ǃhuniǀhurib ǀkha;

⁵⁰tsî ǃoredi tsî gôadi tsî ǀgapiǃoredi tsî ǀanǀanǃoredi tsî wiroksoadi tsîna ǃgomǀgausa ǃhuniǀurib ǀkha; ǁîn tawa gonǂnamipexūn ǃnāb ommi di ǁāgu din, ǃanun di ǃanub din tsî tempelommi di ǁāgu dina ǃhuniǀurib ǀkha.

⁵¹Nētib ge sîsenni ǃKhūb ommi tawab ge gao-aob Salomoba dīb hoaba ge dītoahe. ǁNās khaoǃgâb ge Salomoba khaihesa xūn ǁîb îb Davib dina ge ūhā; ǀhaiǀurib, ǃhuniǀurib tsî xapan tsînab ge ǃKhūb ommi di ǁuigu tawa ge ǁgui.