Read Khoekhoegowab 1 Gao-aogu 8 Bible Online

1 Gao-aogu 8 - Khoekhoegowab bible

1 Gao-aogu 8

¹ǃNubaib ge Salomoba Israeli di kaigu tsî ǃhaodi di danagu hoagu, Israeli ôan ǃnâ hâ ǁgûgu di ǂamsagu tsîna ge ǀhaoǀhao gao-aob Salomob tawa Jerusalems ǃnâ, ǃKhūb di ǃgaeǀhaos di ǂgaesa gu nî Davib di ǃās, ǁnās ge Sionsa xu ūhāse.

²Tsî Israeli aogu hoagu ge gao-aob Salomob tawa ge ǀhao, kaitsēs ai Etanimǁkhâb ai; ǁnāb ge hûǁî ǁkhâba.

³Tsî kaigu Israeli digu hoagu ge hāo, o gu ge pristerga ǂgaesa ge ūkhâi.

⁴Tsî gu ge ǃKhūb di ǂgaes tsî tentoms ǀhûs dis tsîra, ǁnā ǃanu xapan, tentoms ǃnâ hân hoan ǀkha ge ūhā; pristergu tsî Leviǁîgu tsîn ge ǁîna ge ūhā.

⁵Tsî gao-aob Salomob tsî Israeli di ǀhaohâb hoab, ǁîb tawa ǀhû hâb tsîn ge ǁîb ǀkha ǂgaes aiǃâ ge hâ i tsî gūn tsî goman, ǂguib ǃaroma ǃgôahe tsî ǀnōhe ǁoana gere ǁguiba.

⁶Nēti gu ge pristerga ǃgaeǀhaos ǂgaes ǃKhūb disa ge ūǃapa, ǁîs di ǃkhais ǁga, ǃhoaǀîǃkhais ommi dis ǁga, ǃanun di ǃanub ǃoa, xerukha di ǁgabogu ǃnagas kōse.

⁷Xerukha ge ǁgabogu hoaga ǂgaes di ǃkhais ai ge khoraǂui xui-ao; tsî xerukha ge ǂgaes tsî tani-ūǃkhaira âsa ǀgapiseba xu ge ǃgū-ai.

⁸ǁNās khaoǃgâ gu ge ǃkhōhaira ǃaruǀî ge ǀhōǂui, ǃkhōhaira di danara ge ǃanusiba xu ǃhoaǀîǃkhais aiǃâba xu gere mûhese, xawe ǃaugaba xu ge mûhe ǁoa i; tsî ra ge ǁnāpa hâ nētsēs kōse.

⁹ǀNî xū-i xare-i ge ǂgaes ǃnâ ge hâ tama hâ i, ǀgam ǀuixoa-aixūra, Moseb ge Horeb tawa ǁîs ǃnâ ǂgāra ǀguira, ǃKhūb ge Israeli ôan ǀkha ǃgaeǀhao-e dī ǃnubai, Egipteǃhūba xun ge doeǂoao.

¹⁰Tsî i ge ge ī, pristergu ge ǃanuba xu ǂoa ǃnubai i ge ǃâu-e ǃKhūb di omma ge ǀoaǀoa.

¹¹Tsî pristergu ge mâ ǁoa ge i, ǃoaba gu nîse ǃâus xa, ǃKhūb di ǂkhaisib ge ǃKhūb di omma ǀoaǀoa amaga.

¹²ǁGoasib ge Salomoba ge mî: ǃKhūb ge ge mî, ǃkhaenab ǃnâb nî ǁan ǃkhaisa.

¹³Tita ge omma goro ǂnubiba tsi, sa ǁanǃkhaise, ǁaposa ǃkhai-e, sa ǀamo hâǃkhaise.

¹⁴ǁNās khaoǃgâb ge gao-aoba ais âba unu tsî Israeli di ǀhaohâb hoaba ge ǀkhae; tsî Israeli di ǀhaohâb hoab ge ge mâ i.

¹⁵Tsîb ge ge mî: Ab karehe ǃKhūb, Israeli di Elob, ams âb ǀkha ti îb Davib ǁga ǃhoa tsî ǃommi âb ǀkha ǁîsa ge dīǀoaǀoaba, mî raǃâ:

¹⁶Ti ǁaes Israelsa ta ge Egipteǃhūba xu ǂgaeǂguiǂui tsēsa xu ta ge Israeli di ǃhaodi hoade xu ǃāsa ǁhûiǂuibasen tama hâ, omma ta nî ǂnubise, ti ǀons nî ǁnāpa hâga; xawe ta ge Daviba ǃkhōǂuibasen hâ, ti ǁaes Israels ǂamab nî aiǃgû-ao kaise.

¹⁷Tsî ti îb Davib ge ǁkhāti ǂgaob ǃnâ ǂâibasen ge hâ i, ǃKhūb Israeli Elob ǀonsab nî omma ǂnubiba ǃkhaisa.

¹⁸Xawe ǃKhūb ge Davib ti îb ǃoa ge mî: Sa ǂgaob ǃnâts ge ge ǂâibasen hâ i, ti ǀonsats nî omma ǂnubiba ǃkhaisa: ǁÎ ǃkhais ǀkhats ge ǃgâise ge dī, ǂgaob ǃnâts ge ǁnāti ǂâibasen hâ isa.

¹⁹Xawe sats ge ǁnā omma ǂnubi tide, tsî sa ôab, sa kamanaba xu nî ǀkhīb, ǁîb ge ti ǀonsa omma nî ǂnubiba.

²⁰Nētib ge ǃKhūba ǁnā mîs âb hîab ge ǃhoasa, ge ǁapoǁapo: Tita ge ti îb Davib di amǃnâs ai ge khâi, tsî tita ge Israeli di trons ai ge ǂnû, ǃKhūb ge ǃhoa xase; tsî tita ge ǃKhūb, Israeli di Eloba omma ge ǂnubiba.

²¹Tsî ta ge ǁnāpa ǃkhai-e, ǂgaes, ǃKhūb ǃgaeǀhaos disa ge ǁāǁāba hîa ǁîs ǃnâ hâs, sida în ǀkhab ge dīsa, Egipteǃhūba xub ge ǁîna ǂgaeǂguiǂui ǃnubai.

²²Tsî Salomob ge ǃKhūb di altars aiǃâ Israeli di ǀhaohâb hoab ǃoa-ai mâ tsî ǃomkha âba ǀhommiǀî khoraǂui,

²³tsî ge mî: ǃKhūtse, Israeli di Elotse, sats khami ī Elo-i ge a ǀkhai, ǀgapise ǀhommi ǃnâs karao, ǃnaga ǃhūbaib ais karao, sats, ǃgaeǀhaos tsî ǀkhomxaǂgaosib tsîra sa ǃgāda, ais âts aiǃâ ǂgaob hoab ǀkha ra tanisen da ǃkhōǀgaipeba hâtsa.

²⁴Sa ǃgāb, ti îb Daviba, ǁîbats ge ǃhoa-ūna ǃkhōǀgaipeba hâtsa; ams âts ǀkhats ge ge ǃhoa tsî ǃommi âts ǀkhats ge ge dīǀoaǀoa, nētsē i ī xase.

²⁵Tsî nēsi, ǃKhūtse, Israeli di Elotse, sa ǃgāb, ti îb Daviba ǃkhōǀgaipeba re, ǁîbats ge ǃhoaǀîna, mî raǃâ: Aob xarebats ge ti ais aiǃâba xu ǃgaoǁnâ-aihe tide, Israeli di trons ai nî ǂnûba; nēs ǀguisa dī tsî gu sa ôaga ǁîgu di daoba sâu, î gu ti ais aiǃâ ǃgû, sats ge ti ais aiǃâ gere ǃgû khami.

²⁶Tsî nēsi, ǃKhūb Israeli di Elotse, as ǁnâi sa mîsa ama kai re sa ǃgāb, ti îb Davib ǃoats ge ǃhoasa.

²⁷Xawe amaseb kha ǁnâi Eloba ǃhūbaib ai nî ǁan? Mû, ǀhommi, ā, hoan xa ǀgapi ǀhommi ge satsa a ǃkhōǂgā ǁoa, matikōseb ǁnās ǃgâ-ai nē ommi, satsa ta ge ǂnubibaba satsa ǃkhōǂgā tide!

²⁸ǂNan re ǀgores sa ǃgāta dis ǃoa, tsî ǁî ta di ǀkhomas ǃoa, ǃKhū, ti Elotse, îts ǁnâu ǁnā ǂgais tsî ǁnā ǀgores, sa ǃgāta nētsē ais âts aiǃâ ra ǀgoresa.

²⁹Sa mûra a ra tsēa tsî tsuxuba khowasase hâ re nē ommi ǂama, nē ǃkhais ǂama, ǁîs xats ge: Ti ǀons ge ǁnāpa nî ǁan, ti mîsa, îts ǁnâu ǁnā ǀgores, sa ǃgāta nē ǃkhais tawa ra ǀgoresa.

³⁰ǁNâu ǁnâi re ǀkhomas sa ǃgāta dis tsî sa ǁaes Israels tsîda, nē ǃkhais ǃnâ nî ǀgoreda disa; ǁnâu re sa ǁanǃkhaiba xu, ǀhomma xu; ā ǁnâu îts ǀûba re.

³¹Khoe-i ga ǁî-i di ǀgūkhoen ǃoagu ǁoreo, tsî i ga nū-i ǀâxareb di-e ǁguiǂamheo, ǁî-aitsama i nî ǀâxarexūsen ti, tsî nūs ǁnā ǀâxareb dis ga sa altars aiǃâ nē ommi ǃnâ hāo,

³²ǁnâu ǁnâi re satsa ǀhomma xu, îts dī tsî sa ǃgāda ǂhanuǂhanuba, ǂhanuoǃnâ-e ra ǀgoraǃgâǃâ, daob â-e ǁî-i danas ai ra hā kaiǃâ tsî ǂhanu-ai-e ra ǂhanu-ai kaiǃâ, ǁî-e ǂhanu-aisib â-i ǃoa ra mādawase.

³³Sa ǁaes Israels ga khākhoeb di ais aiǃâ danheo, sa ǃoagun ge ǁore amaga, tsîn ga ǃhobasen tsî sa ǀonsa ǁguiǁnâo tsî sa ais aiǃâ nē ommi ǃnâ ǀgore tsî ǀkhomao,

³⁴ǁnâu ǁnâi re satsa ǀhomma xu îts ǁoren sa ǁaes Israels dina ǀûba, îts ǁîna ǁkhawa ūhā ǁnā ǃhūb ǁîn îgats ge māb ǃnâ.

³⁵ǀHommi ga ǂganamseno, ǀapi-i a ǀkhais kōse, sa ǃoagun ge ǁore amaga, tsîn ga nē ǃkhais ǃnâ ǀgore tsî sa ǀonsa ǁguiǁnâ tsî ǁoren âna xu ǃhobaseno, sats nî ǁîna ǁnoras khaoǃgâ,

³⁶ǁnâu ǁnâi re satsa ǀhommi ǃnâ îts ǀûba ǁoren sa ǃgāta tsî sa ǁaes Israels dina, ǁînats ga ǁnā ǃgâi daob, ǁîb ǃnân nî ǃgûba a ǁkhāǁkhās khaoǃgâ; îts ǀapiba mā re sa ǃhūb, sa ǁaesats ge ǀumise māb ǃnâ.

³⁷ǃÂtsūǀkhāb ga ǃhūb ǃnâ hâo, ǂhīǁōb ga hâo, ǃhorob ǁōb kas, ǀaub kas, ǂhoms kas, ǃnoms kas hoas ga hâo, khākhoe-i ân ga ǁîna ǁîn ǃhūb di ǃādi ǃnâ xāǂgāo, ǀnî ǁō-ai-i kas, ǀnî ǀaesen-i kas hoas ga hâo;

³⁸mâ ǀgores hoas, mâ ǀkhomas hoas, mâ khoe-i hoa-i xas kas, sa ǁaes Israels hoas xas ga dīhe ǂanǃān kao, mâ-i hoa-e ǁî-i ǂgaob di ǁnora-ai-e tsî mâ-i hoa-i ga ǃomkha â-e nē ommi ǃnâ khoraǂuio,

³⁹ǁnâu ǁnâi re satsa ǀhommi, sa ǁaposa ǁanǃkhaib ǃnâ, îts ǀûba îts dī îts mâ-i hoa-e ǁî-i di daogu hoagu ǃoa, ǂgaob â-ets a ǂan khami mā, sats ǀguits ge khoen ôan di ǂgaoga a ǂan xuige;

⁴⁰în ǃaoǃgâ tsi, hoa tsēdi ǁnā ǃhūb sida îgats ge māb ǃnân nî ûis kōse.

⁴¹Tsî ǃhaokhoe-i on xasa, sa ǁaes Israels di tama-i tsî ǃnū ǃhūba xu sa ǀons ǃaroma ga hā-i

⁴²(ǁîn ge nî ǁnâu xui-ao sa kai ǀons tsî sa ǀgaisa ǃommi tsî sa ǀhōǂuihesa ǁôab xa), ǁî-i ga hā tsî nē ommi ǃnâ ǀgoreo,

⁴³ǁnâu ǁnâi re satsa ǀhommi, sa ǁaposa ǁanǃkhais ǃnâ, îts dī ǃhaokhoe-i ga sa ǃoa ǂgain hoan ǃoa, î di ǁaedi ǃhūbaib didi hoade ǂan sa ǀonsa, în satsa sa ǁaes Israels khami ǃaoga în ǂan, sa ǀons ra nē ommi hîa ta ge satsa ǂnubibab ǂama ǂgaihe ǃkhaisa.

⁴⁴Sa ǁaes ga khākhoeb ân ǃoagu torob ǃnâ ǃgûǂoao ǁnā daob, sats nî ǁîna sîba ū, tsîn ga ǃKhūb ǃoa ǀgoreo, nē ǃās sats ge ǃkhōǂuibasens tsî nē ommi, sa ǀonsa ta ge ǂnubibab ǀkhāb ai,

⁴⁵ǁnâu ǁnâi re ǀhommi ǃnâ ǁîn di ǀgores tsî ǁîn di ǀkhomasa, îts ǁîna ǂhanuǂhanuba re.

⁴⁶Sa ǃoagun ga ǁoreo (khoe-i hîa ǁore tama-i kom a ǀkhaio), tsî sats ga ǁîn ǂama ǁaixa tsî ǁîna māǁnâo khākhoeb di ais aiǃâ, on ge ǁnān, ǁîna ga ǃkhōna, ǁîna ǃkhōsan ase nî ūǃgû khākhoeb di ǃhūb hîa ǃnūb kas, ǀgūb kas hoasa ib ǁga;

⁴⁷tsîn ga ǃgûsī-ūhen ge ǃhūb ǃnâ ǂgaob ân ǃnâ ǂâiǂâisen, ǃhobasen tsîn ga ǃkhōsis ân di ǃhūb ǃnâ sa ǃoa ǀkhomabaseno, mî raǃâ: Sida ge ge ǁore, sida ge ǂkhabase ge dī, sida ge eloxoresase ge sîsen,

⁴⁸tsîn ga ǁnāti ǁîn di ǂgaob hoab ǀkha tsî ǁîn di ǀoms hoas ǀkha sa ǃoa ǃhobaseno khākhoen ân, ǁîna ǃkhōsase ge ǃgû-ūn di ǃhūb ǃnâ, tsîn ga sa ǃoa ǀgoreo, ǁîn di ǃhūb, ǁîn înats ge māb di daoba-ū tsî nē ǃās, sats ge ǃkhōǂuibasens tsî nē ommi, sa ǀonsa ta ge ǂnubibab di daoba-ū,

⁴⁹ǁnâu ǁnâi re satsa ǀhommi ǃnâ, sa ǁaposa ǁanǃkhais ǃnâ ǁîn di ǀgores tsî ǁîn di ǀkhomas tsîra îts ǁîna ǂhanudība re.

⁵⁰Îts sa ǁaesa ǀûba re sa ǃoagun nî ǁorena tsî ǁîn di ǃûǂamdi sa ǃoan nî ǃûǂam hâdi hoade; îts ǁîna ǀkhomxaǂgaosiba mā ǁnān, ǁîna ǃkhōsan ase ūhân di ais aiǃâ, în ǁîna ǀkhom, ti.

⁵¹Sa ǁae tsî sa ǀumin a ǁî xuige, Egipteǃhūba xuts ge ǂnūǀuriǁganomsa xu ǂgaeǂguiǂuina.

⁵²Î ra sa mûra khowasase hâba ǀkhomas sa ǃgāta dis tsî ǀkhomas sa ǁaes Israels disa, îts ǁîna ǁnâu re sa ǃoan ga ǂgain hoan ǃnâ.

⁵³Sats ge ǁîna ǃhūbaib di ǁaedi hoade xu sa ǀumi-amǃnâse ǁhûiǂuibasen xui-ao, sats ge Moseb, sa ǃgāb di ǃoabasa xu ǃhoa xase, sida înats ge Egipteba xu ǂgaeǂguiǂui ǃnubai, ǃKhūtse, ǃKhūtse.

⁵⁴Tsî i ge ge ī, Salomob ge nē ǀgores hoas tsî nē ǀkhomas hoasa ǃKhūb ǃoa ǀgoretoao, ob ge ǃKhūb di altars aiǃâba xu ge khâi ǁgoakha âb ai ǃhonsa xu, tsî ǀhommiǀîb ge ǃomkha âba khoraǂuisa xu;

⁵⁵tsî mâ tsîb ge ǀhaohâb Israeli dib hoaba ǀkhae tsî ǃgari dommi ǀkha ge mî:

⁵⁶Ab koahe ǃKhūb, ǁîb di ǁaes Israelsa sâba ge māba, ǁîb ge ǃhoan hoan ǃoa! ǀGui mîro-i xare-i ge ǁnā tama hâ ǁnā ǃgâi mîdi, ǁîb ge Moseb, ǁîb ǃgāb di ǃoabasa xu ǃhoadi hoadi xa.

⁵⁷ǃKhūb sida Eloba ab sida ǀkha hâ, sida în ǀkhab ge hâ is ǁkhās xase, ab ǁîba tā ǁnāxū da, îb tā māǁnâ da re.

⁵⁸Îb ǂgaogu âda ǁîb ǃoa ǂō, î da ǃgû ǁîb di daogu hoagu ǃnâ, î da dī ǁîb di mîmādi tsî ǁîb di ǂnûiǂgādi tsî ǁîb di ǂhanugu tsîn, sida înab ge mîmāna.

⁵⁹Î di nē ti mîdi, ǁîdi ǀkha ta go ǀkhomade ǃKhūb, sida Eloba ǀgūse hâba tsēa tsî tsuxuba; îb ǁîba ǂhanub ǁîb ǃgāta dib tsî ǂhanub ǁîb di ǁaes Israels diba sîsenǂui, mâ-i hoa-e tsēkorobe tsēs â-i ai.

⁶⁰Î di ǃhūbaib di ǁaedi hoade ǂan, ǃKhūb a ǁnā Elo ǃkhaisa, ǀnî tamab.

⁶¹Îb sadu ǂgaoba ǀoasase ǃKhūb, sida Elob ǀkha hâ, ǁîb di ǂnûiǂgādi ǃnâb nî ǃgûse, tsî ǁîb di mîmādeb nî dīse, nētsēs ǁkhās ai i ī xase.

⁶²Tsî gao-aob tsî Israeli hoab ge ǁîb ǀkha ǁguibade ge ǁguiba ǃKhūb di ais aiǃâ.

⁶³Tsî Salomob ge ganganǁguibade ǃKhūba ge ǁguiba, ǀgamdisiǀgamǀaǀoadisi goman tsî ǀguikaidisi tsî ǀgamdisiǀoadisi gūna. Nētin ge gao-aob tsî ǁaes hoas tsîna ǃKhūb di omma ge khai.

⁶⁴ǁNā tsēs ǁkhās aib ge gao-aoba ǁaegub ai-ommi dib, ǃKhūb di ommi aiǃâ hâba ge khai, ǁnāpab ge khauǁguibas tsî ǂûǁguibas tsîra ganganǁguibadi di kaub ǀkha ǁāǁā xui-ao: ǂAi-altars, ǃKhūb di ais aiǃâ hâs ge khauǁguibadi tsî ǂûǁguibadi tsî ganganǁguibadi di kaub tsîna ǃkhōǂgāsa ǂkhariba i xui-ao.

⁶⁵ǁNā ǁaeb ǁkhāb aib ge Salomoba kaitsēsa ge tsēdī tsî Israeli hoaba ǁîb ǀkha, kai ǀhaohâb, Hamats ǃnâts ra ǂgâsa xu Egipteb di ǃāb kōse, ǃKhūb, sida Elob di ais aiǃâ, hû tsēdi tsî hû tsēdi tsîde, ǁnās ge disihakaǀa tsēdi kōse.

⁶⁶Tsî ǁkhaisaǁî tsēs aib ge ǁaesa ge ǃgû kai; tsîn ge gao-aoba ge ǀkhae; ǁnās khaoǃgân ge ǁîn di tentomdi ǃoa ǃgâiaǂgaoxa tsî ǃgâiǃgâxa hâse ge ǁaru ǁnā ǃgâib, ǃKhūb Davib, ǁîb ǃgāb, tsî Israeli, ǁîb di ǁaesa ge dī-ūb hoab ǂama.