Read Khoekhoegowab 1 Gao-aogu 9 Bible Online

1 Gao-aogu 9 - Khoekhoegowab bible

1 Gao-aogu 9

¹Tsî i ge ge ī, Salomob ge ǃKhūb di ommi tsî gao-aob di ommi tsî Salomob di turab hoab tsî dī ǂgaob hân hoana dītoao,

²ob ge ǃKhūba ǀgamǁî ǃnās ai Salomob tawa ge ǂhai, Gibeons ǃnâb ǁîb tawa ge ǂhai khami.

³Tsî ǃKhūb ge ǁîb ǃoa ge mî: Tita ge sa ǀgores tsî sa ǀkhomas, ti ais aiǃâts ge ǀkhomasa ge ǁnâu; tita ge ǁnā ommi, ti ǀonsa ta ǁnāpa ǀamose nî ǂnûisets ge ǂnubiba teba ge khai; tsî ti mûra tsî ti ǂgaob tsîn ge ǁnāpa nîra hâ, mâ tsēs hoasa.

⁴Tsî sats ga ti ais aiǃâ taniseno, sa îb Davib ge tanisen khami, ǂgaob di ǀoasib ǀkha tsî ǂhauǃnâsib ǀkha, hoaragasets ga tita ge mîmā tsîn hoan ǃoa dī tsî ti ǂnûiǂgādi tsî ti ǂhanugats ga ǃkhōǀgaipeo,

⁵o ta ge tita sa gaosis di tronsa Israeli ǂama nîra ǁapoǁapo, ǀamosib kōse; tita ge sa îb Davib ǃoa ǃhoa xase, mî raǃâ: Aob xarebats ge ǃgaoǁnâ-aihe tide Israeli di tronsa xu.

⁶Xawe tita xu du ga ǁnāǁgôao, sats tsî sa ôan tsîdo, tsî du ga ti mîmādi tsî ti ǂnûiǂgādi, sado ta ge mâi-aiǃâde ǃkhōǀgaipe tama i tsî ǃgû tsî du ga ǀkhara eloga ǃoaba tsî ǁîgu aiǃâ ǃhonǁgoao,

⁷o ta ge tita Israela nîra ǃhūǃnoma ǁnā ǃhūb, tita ge ǁîna māba xu, tsî nē ommi, ti ǀonsa ta ge khaibaba ta ge tita ti aisa xu nîra aoxū, tsî Israeli ge ǂkhoamîse tsî ǃhōmîse nîra ī ǁaedi hoadi ǃnâ.

⁸Tsî nē ommi, ǀgapi ge ib xasa, ǁîb ǂama i ǃgû-īǀkhā ka-i hoa-e burugâ tsî nîra ǂganǃhoa tsî: Tare xū-i ǃaromab kha ǃKhūba nē ǃhūb tsî nē ommi tsîkha ǁnāti ge dī-ū? ti nîra mî.

⁹On ge khoena nîra mî: ǃKhūb, ǁîn Elob, ǁîn îna Egipteǃhūba xu ge ǂgaeǂguiǂuiban ge ǁnāxū tsî ǀkhara eloga saoǃgon tsîn ge ǁîgu aiǃâ ǃhonǁgoa tsî ǁîga gere ǃoaba amaga; ǁnā-amagab ge ǃKhūba nē ǂkhabab hoaba ǁîn ai ge hā kai.

¹⁰Tsî i ge ǁnā ǀgamdisi kurigu, Salomob ge ǁîgu ǃnâ ǁnā ǀgam omkha, ǃKhūb di ommi tsî gao-aob di ommi tsîkha gere ǂnubigu di ǀunis ai ge ī,

¹¹ǁîkha ǃoab Hirammi, Tires di gao-aoba, Salomoba sederhain, denehain tsî ǃhuniǀurib tsîn xa turab âb hoab ge ī i khami ge ūǀkhība, ǃnubaib ge gao-aob Salomoba Hiramma ǀgamdisi ǃāde ge mā, Galileaǃhūb ǃnâ.

¹²Ob ge Hiramma Tiresa xu ge ǃgûǂoa, ǁnā ǃādi, Salomob ge ǁîba mādeb nî kōse; xawe di ge ǁîb mûǁae ǃgâi tama ge i.

¹³ǁNā-amagab ge ge mî: Tarebe ǃāde kha nēde, ti ǃgâ, sats go tita a māde? Tsîb ge ǁîde Kabulǃhūb ti ge ǂgai, nētsēs kōse.

¹⁴Tsî Hirammi ge gao-aoba ǀguikaidisi tsî ǀgamdisi talende ǃhuniǀurib xa ge sîba.

¹⁵Tsî nēs ge ǃkhais ǃkhōǂuihesa ǀgaus khoegu dis, gao-aob Salomob ge ǀkhī kaisa, ǃKhūb di ommab nî ǂnubiga tsî ǁîb di ommi, Milob, Jerusalems di ǂnubiǂgoab, Hasors, Megidos tsî Gesers tsîna.

¹⁶Faraob, Egipteb di gao-aob ge hā tsî Gesersa ū tsî ǁîsa ǀaes ǀkha ge khauǃkhū, tsîb ge Kanaanǁîn, ǃās ǃnā ǁan hâna ǃgam tsî ǁîsa ǀgôas âb, Salomob tarasa, ǀkhaexūse ge mā.

¹⁷Nētib ge Salomoba Gesers tsî ǃnaga ǁgoe Bet-Horons tsîra ge ǂnubi

¹⁸tsî Baalats tsî Tamars, ǃgaroǃhūb dis tsîna ǁnā ǃhūb ǃnâ;

¹⁹tsî ǁuib ǃādi, Salomob ge ūhâ idi hoade tsî kuniǃādi tsî ǃgapi-aogu di ǃādi tsî Salomob ge ǂnubi ǂgao hâ ide Jerusalems ǃnâ tsî Libanonni ǃnâ tsî ǃhūb ǁîb gaosis dib hoab ǃnâ.

²⁰ǁNā ǁaes, Amorǁîn, Hetiǁîn, Perisiǁîn, Hiviǁîn tsî Jebusǁîn hîa Israeli di tama ge hâ in xa ge ǃgaus xasa:

²¹ǁÎn di ôan, ǁîn khaoǃgâ ǃhūb ǃnâ ge ǃgaun, Israeli ôan xa ǀâxarehe ǁoa ge in, ǁînab ge Salomoba khobosîsen-aose ge ǂnûi, nētsēs kōse.

²²Xawe Israeli ôan xab ge khobo-e dī tama hâ, tsîn ge toro-ao tsî ǃgā tsî gaosa tsî danakhoe tsî kunidi tsî ǃgapi-aogu âdi di ǂamkhoe ge i.

²³Nēgu ge mâihesagu, Salomob di sîsenni ǂama mâihe ge hâ igu di ǂamkhoe ge i, korokaidisi tsî korodisigu, ǁaes hîa ra sîsensa ge gaoǂamga.

²⁴ǀAses ge Faraob ôasa Davib di ǃāsa xu ǁîs di ommi, ǁîsab ge ǂnubibab ǃoa doe hā ob ge Miloba ge ǂnubi.

²⁵Tsî Salomob ge kurib ǃnâ ǃnona ǃnādi kōse khauǁguibadi tsî ganganǁguibadi tsîde ǁnā altars, ǃKhūbab ge ǂnubibab ai ǁguiba tsî gere ǀanǀan ǁnāb, ǃKhūb aiǃâ mâb ai, ommab ge dītoa ǃnubai.

²⁶Tsî gao-aob Salomob ge ǁkhāti doe-omga ge kuru, Esion-Gebers, Elots ǀgūse, ǂĀxahurib amǃgâ, Edomǃhūb ǃnâ ǁgoes tawa.

²⁷Tsî Hirammi ge ǁnā doe-omgu ǀkha ǁîb di ǃgāgu, hurikhoegu, huriba a ǂanga ge sî, Salomob di ǃgāgu ǀkha.

²⁸Tsî gu ge Ofiri tawa sī tsî ǁnāpa xu hakakaidisi talende ǃhuniǀurib xa ge ū tsî ǁî-e gao-aob Salomob tawa ge ūhā.