Read Khoekhoegowab 2 Gao-aogu 10 Bible Online

2 Gao-aogu 10 - Khoekhoegowab bible

2 Gao-aogu 10

¹Tsî Axab ge hûdisi ǀgôaga ge ūhâ i Samarias tawa. Tsî Jehub ge ǂkhanide ge xoa, Samarias ǃoab ge sîde Jesreels di ǂamkhoegu ǃoa, tsî kaigu ǃoa tsî, Axab ôagu di kaikai-aogu ǃoa, mî rase:

²Tsî nēsi, nē ǂkhanis ga sago tawa sīo, ǀhonkhoeb âgo di ôagu ǀkha hâgu, kunidi, hān, ǁaposa ǃās tsî ǀāxūn tsîn ǀkha hâgo tawa:

³Î go ǁnâi sago ǀhonkhoeb di ôagu xa a ǃgâi tsî ǁkhāba mûǂuibasen, î go ǁîba ǁgûb di trons ai ǂnûi î go sago ǀhonkhoeb di omma ǃkhamba.

⁴Xawe gu ge ǁîga kaise ǃao tsî: ǀGam gao-aokha ge ǁîb di ais aiǃâ mâ ǁoa ge i, mati ge ǁnâi sige nî mâ ǁkhā? ti ge mî.

⁵O gu ge ommi ǂama hâgu tsî ǃās ǂama hâgu tsî kaigu tsî kaikai-aoga Jehub ǃoa sî tsî ge mî: Sige ge a sa ǃgā; tsî sats ga sige mîban hoana ge ge nî dī; sige ge khoe-i xare-e gao-aodī tide; sa mûǁae a ǃgâina dī re.

⁶ǁGoasib ge ǀgamǁî ǃnās ai ǂkhani-e ǁîgu ǃoa ge xoa, mî raǃâ: Ti go kao tsî ti domma go ga ǁnâuo, ǁnâi danadi ǁnā aogu, sago ǀhonkhoeb di ôagu dide ū, î go ǁarikamǁgoaga ǁaupe nē ǁaeb ai ti tawa hā, Jesreels ǃoa. Tsî ǀgôagu gao-aob digu, hûdisi aogu ge ǃās di kaigu ǁîga ra kaikaigu tawa ge hâ i.

⁷Tsî i ge ge ī, ǂkhanis ge ǁîgu tawa sīo, o gu ge gao-aob di ôaga ū tsî ǁnā hûdisi aoga ge ǃgam; tsî gu ge danadi âga ǀharudi ǃnâ ǂgā tsî ǁîde ǁîb ǁga ge sî, Jesreels ǃoa.

⁸Tsî sîsabe-i ge hā tsî ǂhôa bi tsî: Gao-aob ôagu di danaden ge go ūhā, ti ge mî. Ob ge ǁîba: ǀGam ǃkhaira ai ǂnûi di ǁāb di ams tawa ǁarikamǁgoas kōse, ti ge mî.

⁹Tsî i ge ǃnauǁgoaga ge ī, ǂoab ge ǃnubaib ge ǃnōsase mâ tsî ǁaes hoas ǃoa: Sadu ge a ǂhanu-ai, ti ge mî; mû, tita ge ǃgaeǀhao-e ti ǀhonkhoeb ǃoagu dī tsî ǁîba go ǃgam; tsî tari-e nēga go ǃgam-e?

¹⁰ǁNâi ǂan ǁnā mîs ǃKhūb dis, ǃKhūb ge Axab di ommi ǃoagu ǃhoas xa i ge xū-i xare-e ǃhūb ai ǁnā tide ǃkhaisa; ǃKhūb ge go dī ǁîb ge ǃgāb âb Eliab di ǃoabasa xu ǃhoana.

¹¹ǁÎn tawab ge Jehuba Axab di ommi xa Jesreels tawa ge ǃgaun hoana ge ǂnau tsî ǁîb di kaigu hoaga tsî ǁîb di ǂansaben tsî ǁîb di pristergu tsîna, ǀgui-i xare-eb ge ǁîba ǃgauba tama is kōse.

¹²Tsîb ge khâi tsî ǃgû tsî Samarias tawa ge sī; tsî Bet-Ekeds ǃûi-aogu dis tawa daob ai

¹³hâǃâb ge Jehuba Ahasjab, Judab gao-aob ǃgâsaga hō tsî: Tarigo sago? ti ge mî. O gu ge: Sige ga a Ahasiab di ǃgâsa, tsî ge ge go ǁgôaxa, gao-aob di ôagu tsî gao-aos di ôaga ge nî tawedega, ti ge mî.

¹⁴Ob ge ǁîba: Ûitsamase ǁîga ǃkhō! ti ge mî. On ge ǁîga ûitsamase ǃkhō tsî ǀaus Bet-Ekeds tawa ǁîga ge ǃgam, hakadisiǀgamǀa aoga, tsîb ge ǁîgu xa ǀguib xareba ǃgau tama ge i.

¹⁵Tsî ǁnāpa xu ǃgû tsîb ge Jonadab, Rexab ôaba ge ǃoa, ǁîba ge tawedeba; ob ge ǁîb ǃoa: Sa ǂgaoba ǂhauǃnâb a, ti ǂgaob sa ǂgaob ǀkha hâs ǁkhās khami? ti ge mî. Ob ge Jonadaba: Ā, ti ge mî. Ob ge Jehuba: ǁNāti i ga io, ǁnâi ǃomma mā te! ti ge mî. Ob ge ǃommi âba ge mā bi, tsîb ge ǁîba kunis ai ge ǃapa kai.

¹⁶Tsîb ge ge mî: Tita ǀkha ǃgû îts ti ôasasib, ǃKhūba ta ūba hâba sī kō. Nētib ge ǁîba kunis âb ai ge ǃnari kai.

¹⁷Tsî Samarias tawab ge sīo, ob ge Axab din xa Samarias tawa ge ǃgaun hoana ge ǂnau, ǁîbab ge hîkākās kōse, ǁnā mîs ǃKhūb dis, Eliab ǁgab ge ǃhoas ǃoa.

¹⁸Tsî Jehub ge ǁaes hoasa ǀhaoǀhao tsî ǁîn ǃoa ge mî: Axab ge Baala ǂkharirose ǀgui ge ǃoaba, xawe Jehut ge ǁîba kaise nî ǃoaba.

¹⁹Î du ǁnâi Baali di kēbo-aogu hoagu tsî ǁîb di ǃoabasabegu hoagu tsî ǁîb di pristergu hoaga tita tawa ǂgaiǀhû, îb ǀguib xareba tā ǁkhuihe, kai ǁguiba-e ta ge Baala nî ǁguiba xuige; ǁkhuihe kab hoab ge ûi tideba. Xawe Jehub ge nēsa gāxaǃnâsiba xu ge dī, Baali di ǃoabasabegab nî hîǀhuruse.

²⁰ǃAruǀîb ge Jehuba: Baala kaitsē-e khaiba! ti ge mî. On ge ǁî-e ge ǂgaiǂui.

²¹Tsî Jehub ge Israeli hoab ǃoa ge sî; o gu ge Baali sîsenba-aogu hoaga ge hā, ǀgui aob xareb hîa hā tamab ge hâ tama hâ is kōse; tsî gu ge Baali di ommi ǃnâ ge hâ, Baali di ommi ge nē ǀamsa xu nau ǀams ǁga ǀoas kōse.

²²ǃNubaib ge ǁnāb, saran ommi ǂama ǂnûihe hâb ǃoa: Baali ǃoabasabegu hoaga sarana ūǀkhība, ti ge mî. Ob ge sarana ǁîga ge ūǂoaxaba.

²³Tsî Jehub ge Jonadab, Rexab ôab ǀkha Baali di ommi ǃnâ ge hā; ob ge Baali ǃoabasabegu ǃoa ge mî: Ôaǃnâ î go mû, îb tā ǀnîsi ǀguib ǃKhūb di ǃoabasabegu diba nēpa hâ, î go Baali ǃoabasabese ǀgui hâ.

²⁴Tsî ǂgâxa gu geo, ǂāǁguibadi tsî khauǁguibadi tsîde gu nî ǁguibase, ǃnubaib ge Jehuba ǁkhaisadisi khoega ǃaugaba xu hā kai tsî ge mî: ǀGuib nē aogu, sago ǃomǁae ta ra māgu dib ga ûio, os ge ǁîb ǀomsa ǁnāb di ǀoms amǃnâs ai nî hâ.

²⁵Tsî i ge ge ī, khauǁguibasa gu ge ǁguibatoao, ob ge Jehuba ǃkhoe-aogu tsî danakhoegu ǃoa: ǂGâxa î go ǁîga ǂnau, ǀguib âgu ûi tides kōse, ti ge mî. O gu ge ǁîga gôab di ammi ǀkha ge ǂnau; ǃnubai gu ge ǃkhoe-aogu tsî danakhoegu tsîga ǁîga aoxū tsî ǁaposa ǃkhais, Baali ommi dis kōse ge ǁgūǂgâ.

²⁶Tsî gu ge ǂnûikhâihesa īgu Baali diga Baali omma xu ūǂoa tsî ǁîga ge khauǃkhū.

²⁷Tsî gu ge ǁkhāti ǂnûikhâihesa īb Baali diba ge khôaǁnâ; tsî gu ge Baali di ommi ona khôaǁnâ; tsî ǁîba ǂganǃgâsa sîsenǃkhaise ge dī, nētsēs kōse.

²⁸Nētib ge Jehuba Baala ge hîkākā Israela xu.

²⁹Xawe Jerobeammi, Nebati ôab, Israela ge ǁore kaib di ǁorena saoǃgonsa xub ge Jehuba ǁgôa tama, ǁnās ge, ǁnā ǃhuniǀuritsâukha, Bet-Els tsî Dans tsîra tawa hâkha xusa.

³⁰Ob ge ǃKhūba Jehub ǃoa ge mî: ǃGâisets go dī, ti mûǁae a ǂhanuna ra dīǃâ, tsî Axab di ommi tawats ti ǂgaob ǃnâ hân hoana go dī amagats ge satsa ǀgôaga hakaǁî ǃhaos kōse Israeli di trons ai nîra ǂnûibahe.

³¹Xawe Jehub ge ǃgaoǃgâ tama ge i, ǃKhūb, Israeli Elob di ǂhanub ǃnâb nî ǂgaob âb hoab ǀkha ǃgûsa; ǁîb ge Jerobeammi, Israela ge ǁore kaib di ǁorena xu ǁgôa tama ge hâ i.

³²ǁNā tsēdi aib ge ǃKhūba Israela ge ǃgaoǁnâtsoatsoa, tsî Hasaeli ge ǁîna Israeli di ǀkharigu hoagu ǃnâ ge ǂnau,

³³Jordanna xu sores ra ǁhaiǀî, Gileadi ǃhūb hoaba Gadǁîn, Rubenǁîn tsî Manaseǁîn tsîna; Aroers, ǃārob Arnonni amǃgâ ǁgoesa xu tsî Gileadi tsî Basanni tsîkha xu.

³⁴Tsî nau xūn, Jehub di ǃnaeǃkhaidi din tsîb ge dīn hoan tsî ǁîb di ǀgaib hoab, ǁîn ge xoahe hâ ǃNaeǃkhaidi ǂkhanis Israeli gao-aogu dis ǃnâ.

³⁵Tsî Jehub ge ge ǁō, tsîn ge ǁîba Samarias tawa ge ǁkhō tsî ǁîb ôab Joahab ge ǁîb di ǃās ǃnâ ge gao-ao kai.

³⁶Tsî tsēdi Jehub, Israeli ǂama Samarias ǃnâ gere gaosîsendi ge a ǀgamdisiǁkhaisaǀa kuri.