Read Khoekhoegowab 2 Gao-aogu 11 Bible Online

2 Gao-aogu 11 - Khoekhoegowab bible

2 Gao-aogu 11

¹Tsî Atalias, Ahasiab îs ge ǀgôab âs ǁō hâ ǃkhaisa mûo, os ge khâi tsî gao-aosi surib hoaba ge ǃgam.

²Xawe Josebas, gao-aob Jorammi ôas, Ahasiab di ǃgâsas ge Joab, Ahasiab ôaba ū tsî ǁîba ge ǀâ, ǁnā gao-aob ôagu hîa nî ǃgamhegu di ǁaeguba xu, tsîs ge ǁîba kōǃgâ-aos âb ǀkha ǁomoms ǃnâ ge ūǂgā; tsîn ge Ataliasa xu ge gaugau bi, ǃgamheb tidese.

³Tsîb ge ǁîs ǀkha ǃKhūb di ommi ǃnâ ge gau hâ i ǃnani kurigu kōse; tsî Atalias ge ǃhūba ge gaoǂam.

⁴Tsî hûǁî kurib ǃnâb ge Jojadaba sî tsî ǀguikaidisi ǂamkhoega danakhoegu ǀkha tsî ǃkhoe-aogu ǀkha ū tsî ǁîb tawa ǃKhūb di ommi ǃnâ ge ūsī gu, tsîb ge ǁîgu ǀkha ǃgaeǀhao-e dī tsî ǃKhūb di ommi ǃnâ ge nū kai gu, tsîb ge gao-aob ôaba ge ǁgau gu.

⁵Tsîb ge ǁîga mîmā tsî ge mî: Nēs ge ǁnā ǃkhais sago nî dīsa: ǃNonaǁî ǃâs sago dis, sâtsēs ai ra ǂgâs ge ǃûisa nî hî, gao-aob di ommi ǃnâ.

⁶Tsî ǃnonaǁî ǃâs ge ǁāb Suri tawa nî hâ; tsî ǃnonaǁî ǃâs ge ǁāb tawa nî hâ ǃkhoe-aogu khaoǃgâ, nētimî go ge nē ommi di ǃûisa nî hî, ǁgūǂgâsa xu.

⁷Tsî ǀgam ǃâra sago dira, sâtsēs ai ra ǂoago hoago, ge ǃKhūb ommi tawa gao-aoba nî ǃûi.

⁸Tsî go ge gao-aoba nî hâǂgāǂnamipe, mâb hoab ǀāxūb âba ǃomǁae ūhâǃâ, tsî mâ-i hoa-i, sago di ǁgarakha ǁaegu ga ǂgâxa hâ-i, ǁî-i ge nî ǃgamhe; î go ǁnāti gao-aob ǀkha hâ, ǂoab kas ǂgâxab kas hoasa.

⁹O gu ge kaidisigu di danakhoega pristeri Jojadab ge mîmān hoana ge dī, tsî gu ge mâb hoaba ǁîb di aogu hîa sâtsēs ai ra ǂgâga, ǁnāgu sâtsēs ai ra ǂoagu ǀkha ū tsî pristeri Jojadab tawa ge sī.

¹⁰Ob ge pristera kaidisigu di ǂamsaga ǁhâigôagu tsî khōsikhōgu gao-aob Davib digu, ǃKhūb di ommi ǃnâ ge hâ iga ge mā.

¹¹Tsî ǃkhoe-aogu ge mâb hoaba ǀāxūb âba ǃomǁae ūhâǃâ ge mâ ommi di amǀkhāba xu ommi di ǁareǀkhāb kōse, altarsǀî tsî ommiǀî gao-aob ǂnamipe.

¹²ǁNās khaoǃgâb ge gao-aob ôaba ūǀkhī tsî krons tsî ǀhûǀguitimîsa ge mā bi tsî ge gao-aodī bi; tsî ge ǀnau bi; ǁnās tawa gu ge ǁam tsî: Ab gao-aoba gaxuse ûi re! ti ge mî.

¹³Tsî Atalias ge ǃkhoe-aogu tsî ǁaes di domma ǁnâuo, os ge ǁaes tawa ge hā ǃKhūb di ommi ǃnâ,

¹⁴tsî kō, tsîs ge ge mû gao-aob ǂkhâǃnâhaib tawa ǁnaetib ǃoa mâ ǃkhaisa tsî ǂamkhoegu tsî xâi-aogu ona gao-aob tawa; tsî ǃhūb di ǁaes hoas ge ǃgâiaǂgao tsî xâiǁnâde ra xâi. ǃNubais ge Ataliasa saran âsa ǀkhau tsî: ǀApexūs ge, ǀapexūs ge, ti ge ǃau.

¹⁵Ob ge pristeri Jojadaba kaidisigu di ǂamkhoegu, ǂnubis ǂama mâihe hâga mîmā tsî ge mîǀî gu: ǁGarakha-ū ǁîsa ǂgaeǂguiǂoa ǃaugab ǃoa, î go ǁîsa ga sao-i hoa-e ǃgam, gôab ǀkha; pristeri ge: ǃKhūb di ommi ǃnâs tā ǃgamhe, ti ge mî xui-ao.

¹⁶O gu ge ǃomga ge ǁgui-ai si tsîs ge daob, ǁîba-ūn ra gao-aob ommi ǃnâ ǂgâba-ū ǃgû-ūhe, tsî ǁnāpa ge ǃgamhe.

¹⁷Tsî Jojadab ge ǃgaeǀhao-e ge dī ǃKhūb tsî gao-aob tsî ǁaes tsîn ǁaegu, ǃKhūbas nî ǁaese ība ǃkhaisa; tsî ǁkhāti gao-aob tsî ǁaes tsîn ǁaegu.

¹⁸ǁNās khaoǃgâs ge ǃhūb di ǁaes hoasa Baali di ommi ǃnâ ǂgâ tsî ǁîba ge khôaǁnâ; ǁîb altardi tsî ǁîb īgu tsîga gu ge hîkākātoa, tsî Matanni, Baali di pristera gu ge altardi aiǃâ ge ǃgam. Tsî pristeri ge mûǂamaoga ge ǂnûi ǃKhūb di ommi ǃnâ.

¹⁹Tsîb ge kaidisigu di ǂamkhoegu tsî danakhoegu tsî ǃkhoe-aogu tsî ǃhūb di ǁaes hoas tsîna ge ū; tsîn ge gao-aoba ǃKhūb di omma xu ūǁgôa tsî ǃkhoe-aogu ǁāb di daoba-ū gao-aob di ommi ǃoa ge sī, tsîb ge gao-aogu di trons ai ge ǂnû.

²⁰Tsî ǃhūb di ǁaes ge ge ǃgâiaǂgao, tsî ǃās ge ge ǃnō, Ataliasan ge gôab ǀkha ǃgams khaoǃgâ, gao-aob ommi tawa.

²¹Joab ge hû kurixa ge i, gao-ao kaib ge ǃnubai.