Read Khoekhoegowab 2 Gao-aogu 12 Bible Online

2 Gao-aogu 12 - Khoekhoegowab bible

2 Gao-aogu 12

¹Hûǁî kurib Jehub dib ǃnâb ge Joaba ge gao-ao kai, tsîb ge hakadisi kuriga gere gaosîsen Jerusalems tawa; tsî ǁîb îs di ǀons ge Sibja ge i, Bersebas disa.

²Tsî Joab ge ǃKhūb mûǁae a ǂhanuna gere dī ǁîb di tsēdi hoade, pristeri Jojadab ǁîba gere ǁgau xui-ao.

³Xawe ǀgapigu ǀguigu ge ge dīǁnâhe tama hâ i; ǁaes ge ganupe ǀgapigu ai gere ǁguiba tsî ǀanǀan.

⁴Tsî Joab ge pristergu ǃoa ge mî: ǁNā marib khaihe hâ xūn dib, ǃKhūb di ommi ǃoa ra ūhāheb, ǁnā marib, ǃgôahesan ra māba, mâ-i hoa-e ǁî-i ra ǃgôahe khami, tsî ǁnā marib, mâ-i hoa-i ǂgaob ǃnâ i ǂâibasen hâ khami ǃKhūb di ommi ǃnâ nî ūǂgāba:

⁵ǁÎba a gu pristerga ū, mâ-i hoa-e ǁî-i di ǂansabe-i xa, î gu ommi di khôaǃkhaide dī-unu, khôaǃkhaise ra hōhen hoana.

⁶Xawe i ge ǀgamdisiǃnonaǀaǁî kurib gao-aob Joab dib ǃnâ ge ī, pristergu ommi di khôaǃkhaide dī-unu tama ǃkhaisa;

⁷ǃnubaib ge gao-aob Joaba pristeri Jojadab tsî nau pristerga ǂgai tsî ǁîgu ǃoa ge mî: Tare xū-i ǃaroma go kha ommi khôaǃkhaide dī-unu tama hâ? Î go nēsi ǃaruǀî sago di ǂansabena xu tā mariba ū, î go ǁîba ommi di khôaǃkhaide māba.

⁸O gu ge pristerga ge ǀhûǀgui, ǁaesa xu gu ge mari-e ū tide ǃkhaisa tsî ommi di khôaǃkhaide gu dī-unu tide ǃkhaisa.

⁹Ob ge pristeri Jojadaba ǂgae-e ū tsî ā-e doroǂgā ǂganais â-i ǃnâ, tsîb ge ǁî-e altars amǀkhāb ai ge mâi, ǃKhūb di ommi ǃnâts ra ǂgâ ǀkhāb ai, tsî pristergu, dā-aiǃnaoba ra ǃûigu ge ǁî-i ǃnâ ǁnā marin, ǃKhūb di ommi ǃnâ ra ūhāhen hoana ge ǂgā.

¹⁰Tsî i ge ge ī, ǂgui marin ǂgaes ǃnâ hâ ǃkhaisa gu ge mû, ob ge gao-aob di xoa-aoba ǀgapipristeri ǀkha ǃapa tsî ǁîna ǃgaeǁae tsî marina ge ǃgôa ǃkhaisa, ǃKhūb di ommi ǃnâ ra hōhena.

¹¹Tsî gu ge marina ǃgâise ǀguiǀgui hâǃâ ǁnāgu, sîsenni ǂama mûǂamaose ǃKhūb di omma ǂnûibahe hâgu di ǃomǁae ge mā; tsî gu ge ǁîna haikuru-aogu tsî ǂnubi-aogu, ǃKhūb di omma ra dī-unuga ge mā.

¹²Tsî ǂnubi-aogu tsî ǀuiǁhā-aoga, hain tsî ǁhā-unuhe hâ ǀuidi tsîn nî ǁamahese, ǃKhūb ommi di khôaǃkhaidi nî dī-unuhega, tsî ǁnā xūn, omma ra māǂuibahen hoana, ǁîb nî dī-unuhega.

¹³Xawen ge ǃKhūb di omma dībahe tama ge hâ i: ǃHuniǀurixapadi, gôadi, ǀgapiǃoredi, ǀgapadadi, ǀnî ǃhuniǀurisoa-i kas, ǀhaiǀurisoa-i kas hoas tsîna ǁnā marin, ǃKhūb di ommi ǃoa ra ūhāhen xa.

¹⁴Tsîn ge ǁnāgu sîsenna ra dīga ge māhe; o gu ge ǁîn ǀkha ǃKhūb di omma ge dī-unu.

¹⁵Tsîn ge ǁkhāti ǁnā aogu, marin ra ǁîgu ǃomǁae māhegu xa ǃereamsa ǂgaoǀkhā tama ge i, ǁnāgu, sîsenna ra dīga gu nî māse, îǂhôase gu ge ǂharugu amaga.

¹⁶Xawe ǀhapiǁguibadi marin tsî ǁoreǁguibadi marin ge ǃKhūb di ommi ǃoa ge ūhāhe tama hâ i, ǁîn ge pristergu di ge i.

¹⁷ǃNubaib ge Hasaeli, Siriab di gao-aoba ǃapa tsî Gatsa ǃkhamū tsî ge ū si; ǁnās khaoǃgâb ge Hasaela ais âba ge unu, Jerusalems ǃoagub nî ǃapase.

¹⁸Ob ge Joab, Judab di gao-aoba, khaihe hâ xūn Josafati, Jorammi tsî Ahasiab tsîgu, ǁîb îgu, Judab gao-aogu ge khain hoana ge ū tsî ǁîb di khaihesa xūn tsî ǁnā ǃhuniǀurib, ǃKhūb ommi di ǁaegub ǃnâ tsî gao-aob di ommi ǃnâ ge hōheba ū tsî ǁîna Hasaeli, Siriab gao-aob ǃoa ge sî; ǃnubaib ge Jerusalemsa xu ge ǃgûbē.

¹⁹Tsî nau xūn Joab ǃnaeǃkhaidi din tsîb ge dīn hoan ge ǃNaeǃkhaidi ǂkhanis Judab gao-aogu dis ǃnâ xoahe hâ.

²⁰Tsî ǁîb di ǃgāgu ge khâi tsî ǃgaeǀhao-e dī tsî Joaba ge ǃgam, Milob di ommi ǃnâ, Silas ǃoa ra ǁgôaba.

²¹Josakari, Simeati ôab, tsî Josabadi, Someri ôab tsîkha, ǃgākha âb ge ǁîba ǂnau, ǁōb ges kōse xui-ao, tsîn ge ǁîba ǁîb îgu ǀkha ge ǁkhō Davib di ǃās ǃnâ, tsî Amasiab, ǁîb ôab ge ǁîb di ǃās ǃnâ ge gao-ao kai.