Read Khoekhoegowab 2 Gao-aogu 13 Bible Online

2 Gao-aogu 13 - Khoekhoegowab bible

2 Gao-aogu 13

¹ǀGamdisiǃnonaǀaǁî kurib Joab, Ahasiab ôab, Judab gao-aob dib ǃnâb ge Joahab, Jehub ôaba ge gao-ao kai, Israeli ǂama Samarias tawa, disihûǀa kurigu kōse.

²Tsîb ge ǃKhūb mûǁae a ǂkhabana gere dī, Jerobeammi, Nebati ôab, Israela ge ǁore kaib di ǁorenab ge sao xui-ao; ǁîna xub ge ǁgôa tama ge hâ i.

³ǁNā-amagab ge ǃKhūb di ǁaiba ge ǂhubi Israeliǀî, tsîb ge ǁîna Hasaeli, Siriab gao-aob ǃomǁae ge mā tsî Benhadadi, Hasaeli ôab ǃomǁae ǁnā tsēdi hoadi ai.

⁴Ob ge Joahaba ǃKhūb aisa ǁkhōse ge ǀgoreǀî, ob ge ǃKhūba ge ǁnâu-am bi, Israeli di ǁgâiǀāb, Siriab gao-aob ra ǁîna ǁgâiǀā-ūbab ge mû xui-ao.

⁵Nētib ge ǃKhūba Israela ore-ao-e ge mā, on ge Siriaǁîn di omǃnāba xu ge ǂoaxa; tsî Israeli ôan ge tentomdi ân ǃnâ ge ǁan, aibe i ge ī xase.

⁶Xawen ge Jerobeammi, Israela ge ǁore kaib ommi di ǁorena xu ǁgôa tama ge hâ i, tsîb ge ǁîn ǃnâ ge ǃgû, tsî ǀhomas ge ǁkhāti Samarias tawa ge mâhâhâ.

⁷ǁÎb ge Joahaba ǀnî ǁae-e ge ǃgauba tama hâ i, korodisi ǃgapi-aogu tsî disi kunidi tsi disiǀoadisi ǀnūǃgû-aogu tsîn ǀguina xui-ao; Siriab gao-aob ge ǁîna ge hîkākā tsî ǁîna ge dātsautsau, tsarab khami.

⁸Tsî nau xūn Joahab di ǃnaeǃkhaidi din tsîb ge dīn hoan tsî ǁîb di ǀgaib tsîn ge ǃNaeǃkhaidi ǂkhanis Israeli gao-aogu dis ǃnâ xoahe hâ.

⁹Tsî Joahab ge ǁîb îgu ǀkha ge kā, tsîn ge ǁîba Samarias tawa ge ǁkhō; tsî Joab, ǁîb ôab ge ǁîb di ǃās ǃnâ ge gao.

¹⁰ǃNonadisihûǀaǁî kurib Joab, Judab di gao-aob dib ǃnâb ge Joab, Joahab ôaba ge gao-ao kai, Israeli ǂama Samarias tawa disiǃnaniǀa kurigu kōse.

¹¹Tsîb ge ǃKhūb mûǁae a ǂkhabana gere dī, tsîb ge Jerobeammi, Nebati ôab, Israela ge ǁore kaib di ǁorena xu ǁgôa tama ge hâ i, tsîb ge ǁîn ǃnâ ge ǃgû.

¹²Tsî nau xūn, Joab di ǃnaeǃkhaidi din tsîb ge dīn hoan tsî ǁîb di ǀgaib, ǁîb ǀkhab ge Amasiab, Judab gao-aoba ǃkhamūb tsîn ge ǃNaeǃkhaidi ǂkhanis Israeli gao-aogu dis ǃnâ xoahe hâ.

¹³Tsî Joab ge ge ǁō tsî Jerobeammi ge trons âb ai ge ǂnû. Tsî Joab ge Samarias ǃnâ Israeli di gao-aogu tawa ge ǁkhōhe.

¹⁴Tsî Elisab ge ǁnā ǀaesenni, ǁîb xab ge ega ǁōba ge ǀaesen hâ i. Tsî Joab, Israeli gao-aob ge ǁîb tawa ǁgôaxa tsî ais âb aiǃâ ā tsî: Ti îtse, ti îtse, Israeli di kunis tsî ǁîs di ǃgapi-aose ītse, ti ge mî.

¹⁵Ob ge Elisaba ǁîb ǃoa ge mî: Khā-e ū tsî ǂāga! Tsî khā-i tsî ǂāgu tsînab ge ūo,

¹⁶ob ge Israeli gao-aob ǃoa ge mî: ǁGui sa ǃomma khās tawa! Ob ge ǃommi âba ǁîs tawa ge ǁgui; tsî Elisab ge ǁîb di ǃomkha gao-aob di ǃomkha ai ǁgui

¹⁷tsî ge mî: Mûǂuidaosa ǁkhowa-am aiǂoasǀî. Ob ge ge ǁkhowa-am. ǃNubaib ge Elisaba: ǁKhâu! ti ge mî. Ob ge ge ǁkhâu. Ob ge: ǂĀb ǃKhūb di ores dib, ǂāb Siriaǁîn ǃoa ores dib ge a ǁî, ti ge mî. Siriaǁînats ge Afeks tawa hîkākāhen ras kōse nîra ǂnau xui-ao.

¹⁸ǁNās khaoǃgâb ge: ǂĀga ū! ti ge mî. Ob ge ǁîga ge ū. ǁGoasib ge Israeli di gao-aob ǃoa ge mî: ǃHūba ǂnau! Ob ge ǃnona ǃnādi kōse ge ǂnau; ǁnās khaoǃgâb ge ǃnōsase ge mâ.

¹⁹ǃNubaib ge Elob aoba ǁîb ǂama kaise ǁaixa tsî ge mî: Koro ǃnādi kōses kas, ǃnani ǃnadi kōses kasats ga ǂnau hâo, ots ge ga Siriaǁîna hîkākāhen ras kōse ga ǂnau hâ, xawe nēsits ge Siriaǁîna ǃnona ǃnādi kōse nîra ǂnau.

²⁰ǁNās khaoǃgâb ge Elisaba ge ǁō, tsîn ge ǁîba ge ǁkhō. Tsî Moabǁîb di toroǂnubidi ge kurib di tsoatsoas ǃnâ ǃhūb ǃnâ ge hā.

²¹Tsî i ge ao-en ra ǁkhō hîa ge ī, mû, on ge ǂnubi-e ge mû; on ge ǁnā aoba Elisab di ǀhobas ǃnâ ge aoǂgā; tsî aob ge ǁîs ǃnâ sī tsî Elisab di ǂkhōga tsâǀkhāo, ob ge ûi tsî ǂaira âb ai ge mâ.

²²Tsî Hasaeli, Siriab gao-aob ge Israela Joahab di tsēdi hoadi kōse ge ǁgâiǀā.

²³Xawe ǃKhūb ge ǁîna ge ǀkhom tsî ǁîna ge ǀkhomxaǂgao, tsîb ge ǁînǀî ge ǂnan ǁnā ǃgaeǀhaos âb, Abrahammi, Isaki tsî Jakob tsîgu ǀkhab ūhâs ǃaroma; tsîb ge ǁîba ǁîna hîǀhuru ǂgao tama tsî ǁîna ge aoxū tama i ais âb aiǃâba xu, nēsis kōse.

²⁴Tsî Hasaeli, Siriab gao-aob ge ge ǁō, tsî ǁîb ôab Benhadadi ge ǁîb di ǃās ǃnâ ge gao-ao kai.

²⁵Tsî Joab, Joahab ôab ge Benhadadi, Hasaeli ôab ǃomǁaeba xu ǁnā ǃādi, ǁîb îb Joahab di ǃomǁaeba xub ge torob ǃnâ ūde ǁkhawa ge ū-oa; Joab ge ǁîba ǃnona ǃnadi kōse ǂnau tsî Israeli ǃāde ǁkhawa ge ūdawa.