Read Khoekhoegowab 2 Gao-aogu 15 Bible Online

2 Gao-aogu 15 - Khoekhoegowab bible

2 Gao-aogu 15

¹ǀGamdisihûǀaǁî kurib Jerobeammi, Israeli gao-aob dib ǃnâb ge Asariab, Amasiab, Judab gao-aob di ôaba Judab ǂama ge gao-ao kai.

²ǁÎb ge disiǃnaniǀa kurixa ge i, gao-ao kaib ge ǃnubai, tsîb ge korodisiǀgamǀa kurigu kōse ge gaosîsen, Jerusalems tawa; tsî ǀons ǁîb îs dis ge Jexolia ge i, Jerusalems disa.

³Tsîb ge ǃKhūb mûǁae a ǂhanuna gere dī, ǁîb îb Amasiab ge dīn hoan ǁkhān khami.

⁴ǀGapigu ǀguigu ge dīǁnâhe tama ge hâ i; ǁaes ge gorose ǀgapigu ai gere ǁguiba tsî ǀanǀan.

⁵Tsî ǃKhūb ge gao-aoba ǂnau, ob ge ge ǃomamaxa ǁōb âb di tsēs kōse; tsîb ge ǀguri hâ ommi ǃnâ ge ǁan; tsî Jotammi, gao-aob di ôab, ge omma mûǂam tsî ǃhūb di ǁaesa ge ǂhanuǂhanu.

⁶Tsî nau xūn Asariab di ǃnaeǃkhaidi din tsîb ge dīn hoan ge ǃNaeǃkhaide ǂkhanis Judab gao-aogu dis ǃnâ xoahe hâ.

⁷Tsî Asariab ge ge ǁō tsîn ge ǁîba ǁîb îgu tawa ge ǁkhō Davib di ǃās ǃnâ; tsî ǁîb ôab Jotammi ge ǁîb di ǃās ǃnâ ge gao-ao kai.

⁸ǃNonadisiǁkhaisaǀaǁî kurib Asariab, Judab gao-aob dib ǃnâb ge Saxariab, Jerobeammi ôaba Israeli ǂama ge gao-ao kai Samarias tawa, ǃnani ǁkhâgu kōse.

⁹Tsîb ge ǃKhūb mûǁae a ǂkhabana gere dī, ǁîb îgu ge dīs ǁkhās xase; ǁîb ge ǁgôa tama ge hâ i Jerobeammi, Nebati ôab, Israela ge ǁore kaib di ǁorena xu.

¹⁰Tsî Salummi, Jabeb ôab ge ǃgaeǀhao-e ǁîb ǃoagu dī tsî ǁaes aiǃâ ǁîba ge ǂnauǃan; tsîb ge ǁîb di ǃās ǃnâ ge gao-ao kai.

¹¹Tsî nau xūn Saxariab di ǃnaeǃkhaidi din, mû, ǁîn ge ǃNaeǃkhaide ǂkhanis Israeli gao-aogu dis ǃnâ xoahe hâ.

¹²Nēs ge ǁnā mîs ǃKhūb disa ge i, Jehub ǃoab ge ǁîba ǃhoasa, mî rase: ǀGôagu hakaǁî ǃhaos digats ge satsa trons ai nîra ǂnû kaibahe. Tsî i ge ǁnāti ge ī.

¹³Salummi, Jabeb ôab ge ǃnonadisikhoeseǀaǁî kurib Asariab, Judab gao-aob dib ǃnâ ge gao-ao kai; tsîb ge ǀgui ǁkhâb kōse Samarias tawa gere gao.

¹⁴Menahemmi, Gadib ôab ge Tirsasa xu ǃapa tsî Samarias tawa hā tsî Salummi, Jabeb ôaba Samarias tawa ǂnauǃan tsî ǁîb di ǃās ǃnâ ge gao-ao kai.

¹⁵Tsî nau xūn Salummi di ǃnaeǃkhaidi din tsî ǁîb di ǃgaeǀhaos hîab ge dīsa, mû, ǁîn ge xoahe hâ ǃNaeǃkhaide ǂkhanis Israeli gao-aogu dis ǃnâ.

¹⁶ǃNubaib ge Menahemma Tifsaxs tsî ǁîs ǃnâ hân hoana ge ǂnau tsî ǁîs di ǀkharigu ona Tirsasa xu; ǁkhowa-ambahe tamab ge i amagab ge ǁîna ge ǂnau; ǁîn di ǀgamǀkhā hâ taradi hoadeb ge ge ǃgaoǁkhowa-am.

¹⁷ǃNonadisikhoeseǀaǁî kurib Asariab, Judab gao-aob dib ǃnâb ge Menahemmi, Gadi ôaba, Israeli ǂama ge gao-ao kai tsî disi kuriga Samarias tawa ge gaosîsen.

¹⁸Tsîb ge ǃKhūb mûǁae a ǂkhabana gere dī; tsî ǁîb di tsēdi hoadi kōse Jerobeammi, Nebati ôab, Israela ge ǁore kaib di ǁorena xu ǁgôa tama ge hâ i.

¹⁹ǃNubaib ge Puli, Asiriab di gao-aoba ǃhūb ǃoagu ge hā; ob ge Menahemma Pula ǀguiǀoadisi talende ǀhaiǀurib xa ge mā, ǃommi âb nî ǁîb ǀkha hâse, gaosisab nî ǁîb di ǃommi ǃnâ ǀgaiǀgaiba biga.

²⁰Tsî Menahemmi ge nē mariba Israela ge ǁguiǂam ǃkhū hâgu hoaga, Asiriab di gao-aobab nî māga, mâ aob hoaba korodisi sekeln kōse ǀhaiǀurib xa; nētib ge Asiriab di gao-aoba ǁkhawa oa tsî ǁnāpa ǃhūb ǃnâ hâ tama ge hâ i.

²¹Tsî nau xūn, Menahemmi di ǃnaeǃkhaidi din tsîb ge dīn hoan ge xoahe hâ ǃNaeǃkhaide ǂkhanis Israeli gao-aogu dis ǃnâ.

²²ǁNās khaoǃgâb ge Menahemmi ona ge ǁō, tsî ǁîb di ôab Pekahiab ge ǁîb di ǃās ǃnâ ge gao-ao kai.

²³Korodisiǁî kurib Asariab, Judab gao-aob dib ǃnâb ge Pekahiab, Menahemmi ôaba ge gao-ao kai Israeli ǂama, tsî ǀgam kurikha ge gaosîsen, Samarias tawa.

²⁴Tsîb ge ǃKhūb mûǁae a ǂkhabana gere dī, ǁîb ge Jerobeammi, Nebati ôab, Israela ge ǁore kaib di ǁorena xu ǁgôa tama ge hâ i.

²⁵Tsî Pekab, Remaliab ôab, ǁîb danakhoeb ge ǃgaeǀhao-e ǁîb ǃoagu dī tsî ge ǂnau bi, Samarias tawa gao-aob ommi di î-ommi ǃnâ Argob tsî Arjeb tsîkha ǀkha tsî korodisi khoegu Gileadi ôan digu ǀkha. Nētib ge ǁîba ge ǃgam tsî ǁîb di ǃās ǃnâ ge gao-ao kai.

²⁶Tsî nau xūn, Pekahiab di ǃnaeǃkhaidi din tsîb ge dīn hoan, mû, ǁîn ge ǃNaeǃkhaide ǂkhanis Israeli gao-aogu dis ǃnâ xoahe hâ.

²⁷Korodisiǀgamǀaǁî kurib Asariab, Judab gao-aob dib ǃnâb ge Pekab, Remaliab ôaba ge gao-ao kai Israeli ǂama, tsîb ge ǀgamdisi kuriga gere gaosîsen, Samarias ǃnâ.

²⁸Tsîb ge ǃKhūb mûǁae a ǂkhabana gere dī; ǁîb ge Jerobeammi, Nebati ôab, Israela ge ǁore kaib di ǁorena xu ǁgôa tama ge hâ i.

²⁹Pekab, Israeli gao-aob di tsēdi ǃnâb ge Tiglat-Pileseri, Asiriab di gao-aoba hā tsî ge ū Ijons, Abel-Bet-Maaxas, Janoaxs, Kedes, Hasors, Gileadi, Galileab tsî Naftalib ǃhūb hoaba; tsîb ge ǁîna ge ǃgû-ū Asiriab ǃoa.

³⁰Tsî Hoseab, Elab ôab ge ǃgaeǀhao-e ge dī Pekab, Remaliab ôab ǃoagu, tsîb ge ǁîba ge ǂnauǃan, tsîb ge ǁîb ǃās ǃnâ ge gao-ao kai ǀgamdisiǁî kurib Jotammi, Usiab ôab dib ai.

³¹Tsî nau xūn Pekab di ǃnaeǃkhaidi din tsîb ge dīn hoan, mû, ǁîn ge xoahe hâ ǃNaeǃkhaide ǂkhanis Israeli gao-aogu dis ǃnâ.

³²ǀGamǁî kurib Pekab, Remaliab ôab, Israeli gao-aob dib ǃnâb ge Jotammi, Usiab ôaba ge Judab gao-ao kai.

³³ǀGamdisikoroǀa kurixab ge ǁîba ge i, gao-ao kaib ge ǃnubai, tsîb ge disiǃnaniǀa kuriga ge gaosîsen Jerusalems tawa. ǀOns ǁîb îs dis ge Jerusa ge i, Sadoki ôasa.

³⁴Tsîb ge ǃKhūb mûǁae a ǂhanuna gere dī; ǁîb îb Usiab ge dīs ǁkhās xaseb ge ǁîba gere dī.

³⁵ǀGapigu ǀguigu ge dīǁnâhe tama ge hâ i; ǁaes ge gorose ǀgapigu ai gere ǁguiba tsî ǀanǀan; ǁîb ge ǀgapi ǁāb ǃKhūb ommi diba ge ǂnubi.

³⁶Tsî nau xūn Jotammi di ǃnaeǃkhaidi din tsî dīb gen hoan, ǁîn ge xoahe hâ ǃNaeǃkhaide ǂkhanis Judab gao-aogu dis ǃnâ.

³⁷ǁNā tsēdi ǃnâb ge ǃKhūba Resinni, Siriab gao-aob tsî Pekab, Remaliab ôaba Judab ǃnâ ge sîtsoatsoa.

³⁸Tsî Jotammi ge ǁō tsî ge ǁkhōhe ǁîb îgu tawa ǁîb îb Davib di ǃās ǃnâ tsî ǁîb ôab Axasi ge ǁîb di amǃnâs ai ge gao-ao kai.