Read Khoekhoegowab 2 Gao-aogu 16 Bible Online

2 Gao-aogu 16 - Khoekhoegowab bible

2 Gao-aogu 16

¹Disihûǀaǁî kurib Pekab, Remaliab ôab dib ǃnâb ge Axasi Jotammi, Judab gao-aob di ôaba ge gao-ao kai.

²ǀGamdisi kurixab ge Axasa ge i, gao-ao kaib ge ǃnubai, tsîb ge disiǃnaniǀa kuriga gere gaosîsen Jerusalems tawa; tsîb ge ǃKhūb, ǁîb di Elob mûǁae a ǂhanuna dī tama ge hâ i, ǁîb îb Davib khami.

³Israeli gao-aogu di daob ǃnâb gere ǃgû xui-ao, ā, ǁîb ôab ǂhanibab ge ǁkhāti ǀaesa ge ǃgûǃganu kai ǁnā ǀūben, ǃKhūb ge Israeli ôan aiǃâba xu doeǁgaǂuin di ǁgaidīgu ǃoa.

⁴ǁÎb ge ǁkhāti ǀgapigu ai ǁguiba tsî gere ǀanǀan ǃnomdi ai tsî ǁkhāti ǃam haidi hoadi ǃgao.

⁵ǁGoasib ge Resinni, Siriab gao-aoba Pekab, Remaliab ôab, Israeli gao-aob ǀkha Jerusalems ǃoa ǃkhammi ǀkha ge ǃapa; tsî kha ge Axasa ge ǃnamiǂgā, xawe kha ge ǃkham ǁkhā tama ge i.

⁶ǁNā ǁaeb ǁkhāb aib ge Resinni, Arammi di gao-aoba Elatsa ǁkhawa Arammi tawa ūhā tsî Jodeǁîna Elatsa xu ge aoǂui, tsî Edomǁîn ge Elats tawa hā tsî ǁîs ǃnâ ge ǁan, nētsēs kōse.

⁷Tsî Axasi ge sîsabega ge sî Tiglat-Pileseri, Asiriab gao-aob ǃoa, mî raǃâ: Tita ge sa ǃgā tsî sa ôata; xuige hā îts ore te re Siriab gao-aob ǃomǁaeba xu tsî Israeli gao-aob ǃomǁaeba xu, ti ǃoagu mâkha.

⁸Tsî Axasi ge ǀhaiǀurib tsî ǃhuniǀurib tsîkha, ǃKhūb di ommi ǃnâ tsî gao-aob di ǁuigu ǃnâ ge hōhekha ū tsî ǁîkha Asiriab di gao-aoba ǀkhaexūse ge sîba.

⁹ǃNubaib ge Asiriab gao-aoba ǁîba ge ǁnâu; Asiriab gao-aob ge Damaskus ǃoa ǃapa tsî ge ū si tsî ǁîs dina ǃkhōsan ase ge ǃgû-ū Kirs ǃoa, tsîb ge Resinna ge ǃgam.

¹⁰ǃNubaib ge gao-aob Axasa Tiglat-Pileseri, Asiriab gao-aoba Damaskus kōse ge ǃgûǃoa; tsî altars, Damaskus tawa hâbab ge mûo, ob ge gao-aob Axasa pristeri Uriaba ǁnā altars di īb tsî xoaǁnâs âs, matis dīhe hâ ǃkhais diba ge sîba.

¹¹Ob ge Uriab, pristera, altarsa ge dī, gao-aob Axasi Damaskusa xu go haisis ǁkhās khami, ǁnātib ge pristeri Uriaba ge dī, gao-aob Axasi nî Damaskusa xu hā ǁaeb kōse.

¹²Tsî gao-aob ge Damaskusa xu hāo, ob ge gao-aoba altarsa ge mû; ob ge gao-aoba altarsa ǀgū tsî ǁîs ai ge ǁguiba.

¹³Tsîb ge khauǁguibas âba ge ǂhubi tsî ǁîb di ǂûǁguibasa, tsîb ge ǁîb di ǂnâǁguibasa ge ǂnâ tsî ganganǁguibadi âb di ǀaobab ge ge ǀgapi altars ai.

¹⁴Xawe ǂai-altars, ǃKhūb di ais aiǃâ hâsab ge aiǃâ hâ ǃkhais ommi disa xu altars tsî ǃKhūb ommi ǁaeguba xu ge ūhā tsî ǁîsa altars âb xōǀkhā ǀapasǀî ge mâi.

¹⁵Tsî gao-aob Axasi ge Uriab pristera, mîmā tsî: Altars kais ai ǂhubi re ǁgoaǁguibas tsî ǃuiǂûǁguibas tsî gao-aob di khauǁguibas tsî ǁîb di ǂûǁguibas tsî ǃhūb di ǁaes hoas di khauǁguibas tsî ǁîn di ǂûǁguibadi tsî ǁîn di ǂnâǁguibadi tsîna; îts ǁîs ai ǀgapi re khauǁguibas di ǀaob hoaba tsî ǂāǁguibas di ǀaob hoaba; xawe ǂai-altars ge ôaǃnâ-altarse nî ība te.

¹⁶Ob ge Uriab, pristera, ge dī, gao-aob Axasi ge mîmā bin hoan ǃoa.

¹⁷Tsî gao-aob Axasi ge ǂnûi-aixūdi di laide ūǁnâ tsî ǁîdi ǀgapiseba xu ǁāǃnâǃoreba ge ūbē tsî huriba ǂaigomagu, ǁîb ǃnaga hâga xu ūǁnâ tsî ǁîba ǀuiǃhū-i ai ge ǂnûi.

¹⁸Tsî sâtsē, ǃgûdaob di ǂamais hîan ge ommi tawa kurus, tsî ǃauga hâ ǂgâǃkhais gao-aob dis tsîrab ge ǃKhūb di omma xu ge dībē Asiriab gao-aob ǃaroma.

¹⁹Tsî nau xūn Axasi di ǃnaeǃkhaidi din hîab ge dīn ge ǃNaeǃkhaidi ǂkhanis Judab gao-aogu dis ǃnâ xoahe hâ.

²⁰Tsî Axasi ge ǁō tsî ge ǁkhōhe ǁîb îgu tawa Davib di ǃās ǃnâ, tsî Hiskiab, ǁîb ôab ge ǁîb ǃās ǃnâ ge gao-ao kai.