Read Khoekhoegowab 2 Gao-aogu 17 Bible Online

2 Gao-aogu 17 - Khoekhoegowab bible

2 Gao-aogu 17

¹Disiǀgamǀaǁî kurib Axasi, Judab gao-aob dib ǃnâb ge Hoseab, Elab ôaba Israeli ǂama ge gao-ao kai Samarias tawa, khoese kurigu kōse.

²Tsîb ge ǃKhūb mûǁae a ǂkhabana gere dī, xawe ǁîb aiǃâ ge hâ i Israeli di gao-aogu khami tama.

³ǁÎb ǃoagub ge Salmaneseri Asiriab di gao-aoba ge ǃgûǃapa; tsî Hoseab ge ge ǁîb di ǃgā kai, tsîb ge ǀkhaexū-e ge mā bi.

⁴Xawe Asiriab gao-aob ge Hoseab ǃnâ ǃgaeǀhao-e ge hō, Sob, Egipteb gao-aob ǃoab sîsabega ge sî tsî ǀkhaexū-eb, aibeb kuriba xu kuriba ǃoa gere dī xase Asiriab gao-aoba ūhâba tama ge i ǃkhaisa. Ob ge Asiriab gao-aoba ǁîba ǃkhō tsî ǃkhō-oms ǃnâ ge ǂgā bi.

⁵Tsî Asiriab gao-aob ge ǃhūb hoaragab ǃnâ ge ǃgûǃapa; ā, Samarias kōse ǃapa tsîb ge ǁîsa ǃnona kurigu kōse ge ǃnamiǂgā.

⁶Khoeseǁî kurib Hoseab dib ǃnâb ge Asiriab di gao-aoba Samariasa ū tsî Israela Asiriab ǃoa ǃgû-ū tsî ǁîna ge ǁan kai Halaxs ǃnâ, tsî Habori, Gosanni ǃāb amǃgâ tsî Medeǁîn ǃādi ǃnâ.

⁷Nēs ge ge ī xui-ao, Israeli ôan ǃKhūb, ǁîn di Elob, ǁîna Egipteǃhūba xu Faraob, Egipteb gao-aob di ǃommi ǃnagaba xu ge ǂgaeǂguiǃapab ǃoagun gere ǁore tsî ǀkhara elogan gere ǃao ǃkhais ǃaroma.

⁸Tsîn ge ǂnûiǂgādi ǁnā ǀūben, ǃKhūb ge Israeli ôan di ais aiǃâba xu doeǁgabēn didi tsî Israeli gao-aogu, ǁîga ge dīgu didi ǃnâ ge ǃgû.

⁹Tsî Israeli ôan ge ǁnā ǃkhaidi hîa ǂhanu tamade ǃKhūb, ǁîn di Elob tawa ǂganǃgâsase gere dī; tsîn ge ǀgapiga ge dībasen ǁîn di ǃādi hoadi ǃnâ, ǃûiǂgō-omma xu ǁaposa ǃādi kōse.

¹⁰Tsîn ge mâ hâ īga ge ǂnûikhâibasen tsî ǀhomaba mâ ǀgapi ǃnoms hoas ai tsî mâ ǃam hai-i hoa-i ǃgao.

¹¹Tsîn ge ǁnāpa ge gere ǀanǀan ǀgapigu hoagu ai ǁnā ǀūben, ǃKhūb ge aidi âna xu doeǁgabēn ge dī xase; tsîn ge ǂkhaba xūna gere dī, ǃKhūban nî ǂoeǂoese ǁaibǀî.

¹²Tsîn ge ǁgôa-eloga gere ǃoaba, ǁîgu xab ǃKhūba ǁîna ǃoa: Nē ǃkhaisa du ge dī tide, ti ge mîga.

¹³Tsî ǃKhūb ge Israeliǀî tsî Judabǀî kēbo-aogu hoagu tsî mû-aogu hoagu di ǃoabasa xu ǀhûǀguitimî tsî ge mî: ǃHobasen sadu di ǂkhaba daoga xu, î du mîmādi tsî ti ǂnûiǂgādi tsîde ǃkhōǀgaipe, ǁnā ǂhanub sadu îga ta ge mîmāb tsî ǃgāgu, kēbo-aogu di ǃomdi ǀkha ta ge sîba dub ǃoa.

¹⁴Xawen ge ǁnâu tama ge i tsî ǁîn di ǃaode ge karokaro, ǁîn îgu, ǃKhūb, ǁîn di Elob ǃnâ ǂgom tama ge igu di ǃaodi ge ī i xase.

¹⁵Tsîn ge ǁîb di ǂnûiǂgādi tsî ǁîb di ǃgaeǀhaos, ǁîn îgu ǀkhab ge dīs tsî ǁîb di ǃkhō-amdi, ǁînab ge ǃkhō-amūdi tsîna aoxū tsî ǁausiba ge saoǃgon; on ge ǁau tsî ǁnā ǀūben, ǁîn ǂnamipe hâna ge saoǃgon, ǁîn xab ge ǃKhūba ǁîna mîmā tsî: Tā ǁîn ra dī khami dī, ti mîna.

¹⁶Ā, ǃKhūb, ǁîn Elob di mîmādi hoade ǁnāxū tsîn ge ǂnâhesa īga ge dībasen, ǀgam tsâukha, tsîn ge ǀhomade dībasen tsî ǀhommi di ǂnubis hoas aiǃâ ǃhon tsî Baala gere ǃoaba.

¹⁷Tsîn ge ǁkhāti ǁîn ôagu tsî ǁîn ôadi tsîna ǀaesa gere ǃgûǃganu kai, tsîn ge gere ǃgaidī tsî ani-ās ai gere ǃgaoǃgâ, tsîn ge ge ǁamaxūsen, ǃKhūb mûǁae a ǂkhabanan nî dīse, ǁîban nî ǂoeǂoese ǁaibǀî.

¹⁸ǁNā-amagab ge ǃKhūba Israeli ǂama kaise ge ǁaixa, ais âb aiǃâba xub ge ǁîna dībēs kōse; tsî ǀnî xū-i ge ǃgau tama ge i, Judab di ǃhoas ǀguis.

¹⁹Xawe Judab on ge mîmādi ǃKhūb, ǁîn di Elob dide ǃkhōǀgaipe tama ge hâ i, tsîn ge Israeli di ǂnûiǂgādi ǁîn ge dīdi ǃnâ ge ǃgû.

²⁰Nētib ge ǃKhūba Israeli di surib hoaba aoxū tsî ǁîna ge ǁgâiǀā, tsîb ge ǁîna ǁkhâuǁnâ-aon ǃomǁae ge mā, ais âb aiǃâba xub ge ǁîna aoxūs kōse.

²¹ǁÎb ge Israela Davib di omma xu ge ǁkhâuǁnâ, tsîn ge Jerobeammi, Nebati ôaba gao-aose ge dī; tsî Jerobeammi ge Israela ǃKhūb khaoǃgâba xu ge doeǁgabē, tsîb ge ǁîna kai ǁoreba ge ǁore kai.

²²Nētin ge Israeli ôana Jerobeammi di ǁoren hîab ge dīn hoan ǃnâ gere ǃgû; tsîn ge ǁîna xu ǁgôa tama ge i,

²³ǃKhūb ge Israela ais âba xu dībēs kōse, ǁîb ge ǁîb di ǃgāgu hoagu kēbo-aogu di ǃoabasa xu ǃhoa xase; nētib ge Israela ǃhūb âna xu Asiriab ǃoa ge ūbēhe nētsēs kōse.

²⁴Tsî Asiriab gao-aob ge ǁae-e ge hā kai Babilonsa xu tsî Kutasa xu tsî Avasa xu tsî Hamatsa xu tsî Sefarvajimsa xu, tsîb ge ǁîna Samariab di ǃādi ǃnâ ge ǁan kai Israeli ôan di ǃās ǃnâ; tsîn ge ǁîna Samariaba ǀumise ū tsî ǁîb di ǃādi ǃnâ ge ǁan.

²⁵Tsî i ge ǁnāpa ǁans ân di tsoatsoas ǃnâ ge ī, ǃKhūban ǃao tama ge i ǃkhaisa; ob ge ǃKhūba xamga ge sî ǁîn ǁaegu, ǁîgu ge ǀnîn âna ge ǃgam.

²⁶ǁNā-amagan ge Asiriab gao-aob ǃoa ge mî: ǁNā ǁaedi, sats ge ǃgû-ū tsî ǁîna Samariab di ǃādi ǃnâ ǁan kaidi, ǁîdi ge Elob ǁnā ǃhūb dib di domma a ǀū; ǁnā-amagab ge xamga ǁîn ǁaegu ge sî tsî mû, ǁîgu ge ǁîna ra ǃgam, ǁîn ge Elob ǁnā ǃhūb dib di domma a ǀū xui-ao.

²⁷ǃNubaib ge Asiriab gao-aoba ge mîmā: ǁNā pristergu hîa du ge ǁnāpa xu ǂgaeǂguibēgu di ǀguiba ūsī ǁnāpa, î gu ǃgû tsî ǁnāpa sī ǁan; îb ǁîna ǃKhūb Elob di domma ǁkhāǁkhā.

²⁸Ob ge ǀguib ǁnā pristergu hîan ge Samariasa xu ǂgaeǂguibēgu diba sī tsî Bet-Els tawa ge ǁan; tsîb ge ǁîna ge ǁkhāǁkhā, matin ǃKhūba nî ǃao ǃkhaisa.

²⁹Xawe mâ ǁaes hoas ge ǁîs di eloga ge dībasen; tsîn ge ǁîga ǀgapigu omgu digu ǃnâ ge ǂnûi, Samariaǁîn ge dībasenga, mâ ǁaes hoasa ǁîn ǁanǃnâ hâ ǃādi ǃnâ.

³⁰Babilons di khoen ge Sukot-Benota ge dībasen, tsî Kutas di khoen ge Nergala ge dībasen, tsî Hamats di khoen ge Asimaba ge dībasen;

³¹tsî Aviǁîn ge Nibhab tsî Tartaki tsîna ge dībasen; tsî Sefarvajimǁîn ge ǁîn ôaga Adramelexi tsî Anamelexi, Sefarvajims di elokha ǀaes ǀkha ge khauǃkhūba.

³²Tsîn ge ǃKhūb ona ǃao tsî ǁau khoen ân xa ǀgapigu di pristerga ge dībasen, ǀgapigu di omgu ǃnâ ǃoabasa ǁîna ge dībaga.

³³ǃKhūba ǃao tsîn ge ǁkhāti ǁîn di eloga gere ǃoaba ǁnā ǁaedi, ǁîde xun ge ǃgû-ūhedi di dommi ai.

³⁴Nētsēs kōsen ge aibekam domgu ǃoa ra dī; ǃKhūban ge ǃao tama hâ, tsîn ge ǁîn di ǂnûiǂgādi ǃoa dī tama hâ tsî ǁîn di ǂhanugu ǃoa tsî ǁnā ǂhanub tsî ǁnā mîmās tsîra, ǃKhūb ge Jakob, Israeli tib ge ǂgaib di ôana mîmāra ǃoa.

³⁵Tsî ti ī xaweb ge ǃKhūba ǃgaeǀhao-e ǁîn ǀkha ge dī tsî ge mîmā: ǀKhara eloga du ge ǃao tide, î du ǁîgu aiǃâ tā ǃhonǁgoa, î du tā ǁîga ǃoaba, î du ǁîga tā ǁguiba,

³⁶î du ǃKhūb, Egipteǃhūba xu kai ǀgaib tsî ǀhōǂuihesa ǁôab tsîkha ǀkha ge ǂgaeǂguiǂoa duba ǃao î du ǁîb aiǃâ ǃhonǁgoa î du ǁîba ǁguiba.

³⁷Î du ǁnā ǂnûiǂgādi tsî ǁnā ǂhanu-aigu tsî ǁnā ǂhanub tsî ǁnā mîmās tsîn, ǁîb ge xoamâiba duna ǂan, î du ǁîna mâ tsēs hoasa dī; î du ǀkhara eloga tā ǃao.

³⁸Tsî ǁnā ǃgaeǀhaos, tita ge sadu ǀkha dīs, ǁîsa du ge ǀuru tide; î du ǀkhara eloga tā ǃao.

³⁹Î du ǃKhūb, sadu Eloba ǃao, ob ge ǁîba sadu khākhoen hoan di ǃomǁaeba xu nîra ore du.

⁴⁰Xawen ge ǁnâu tama ge i tsî aibekam dommi ân ǃoa gere dī.

⁴¹Nēti di ge ǁnā ǁaede ǃKhūba ǃao tsî ǁîn di ǃgaohesa īga gere ǃoaba; tsî ǁîn ôan tsî ǁîn ǀgôan di ôan on ge ǁîn îgu gere dī khami ra dī, nētsēs kōse.