Read Khoekhoegowab 2 Gao-aogu 18 Bible Online

2 Gao-aogu 18 - Khoekhoegowab bible

2 Gao-aogu 18

¹Tsî i ge ge ī, ǃnonaǁî kurib Hoseab, Elab ôab, Israeli gao-aob dib ǃnâb Hiskiab, Axasi, Judab gao-aob ôaba ge gao-ao kai ǃkhaisa.

²ǀGamdisikoroǀa kurixab ge ǁîba ge i, gao-ao kaib ge ǃnubai, tsîb ge ǀgamdisikhoeseǀa kuriga gere gaosîsen Jerusalems tawa, tsî ǁîb îs di ǀons ge Abi ge i, Saxariab ôasa.

³Tsîb ge ǁîba ǃKhūb mûǁae a ǂhanuna gere dī, ǁîb îb Davib ge dīn hoan ǃoa.

⁴ǁÎb ge ǀgapiga ge dībē tsî ǂnûikhâihesa īga ge khôaǁnâ tsî ǀhomade ge ǃhomǂui; tsîb ge ǂaiǀaob Moseb ge dība ge ǂkhūǂkhū, Israeli ôan ge ǁnā tsēdi ai ǁîba ǀanǀanba xui-ao, tsîn ge ǁîba Nehustan ti ge ǂgai.

⁵ǁÎb ge ǃKhūb, Israeli di Elob ai ge ǂgomaiǂnûi, ǁîb khaoǃgâb ǀnîb ǁîb khami ība Judab gao-aogu ǃnâ hâ tama tsî ǁkhāti ǁîb aiǃâ hâ tama ge hâ is kōse.

⁶ǃKhūbab ge ǁîba ǂae-ai xui-ao, tsîb ge ǁîba saoǃgonsa xu ǁgôa tama, tsîb ge mîmādi âb, ǃKhūb ge Moseba mîmāde ge ǃkhōǀgaipe.

⁷Nētib ge ǃKhūba ǁîb ǀkha ge hâ i; ǃgûǂoab gere ǀkhān hoan tawab ge gā-aise ge sîsen; tsîb ge ǁkhāti ge ǁnāǁgôa Asiriab gao-aoba xu, tsîb ge ǁîba ǃoaba tama ge i.

⁸ǁÎb ge Filisteǁîna ge ǂnau Gasas kōse, tsî ǁîs di ǀkhariga ǃûiǂgō-omma xu ǁaposa ǃādi kōse.

⁹Tsî i ge ge ī hakaǁî kurib gao-aob Hiskiab dib ǃnâ (hûǁî kurib Hoseab, Elab ôab, Israeli gao-aob dib ge a ǁî), ob ge Salmaneseri, Asiriab gao-aoba Samarias ǃoagu hā ǂoaxa tsî ǁîsa ge xāǂgā.

¹⁰Tsîb ge ǁîsa ǃnona kurigu di ǀunis ai ge ū ǃnaniǁî kurib Hiskiab dib ǃnâ; (khoeseǁî kurib Hoseab, Israeli gao-aob dib ge a ǁî) Samarias ge ūhesa.

¹¹Tsî Asiriab gao-aob ge Israela ge ǃgûbē-ū Asiriab ǁga, tsî ǁîna Halaxs tsî Habori, ǃāb Gosanni dib tawa tsî Medeǁîn di ǃādi kōse ge ūsī kai.

¹²Dommi ǃKhūb, ǁîn Elob diban ge ǁnâuǀnam tama ge i tsî ǁîb di ǃgaeǀhaosan ge ǃûǂam xui-ao; tsî Moseb, ǃKhūb di ǃgāb ge mîmān hoanan ge ǁnâuǀnam tsî dī tama i xui-ao.

¹³Tsî disihakaǀaǁî kurib gao-aob Hiskiab dib ǃnâb ge Sanherib, Asiriab gao-aoba Judab di ǁaposa ǃādi ǃoagu hā ǂoaxa tsî ǁîde ge ū.

¹⁴ǃNubaib ge Hiskiab, Judab gao-aoba Sanherib, Asiriab gao-aob ǃoa ge sî, Laxis ǁga tsî ge mî: ǁOre ta go xuige tita xu oa, ǁguiǂam tets ga xū-i hoa-e ta ge nî tani xuige. ǁGoasib ge Asiriab gao-aoba Hiskiab, Judab gao-aoba ǃnonakaidisi talende ǀhaiǀurib xa tsî ǃnonadisi talende ǃhuniǀurib xa ge ǁguiǂam.

¹⁵Ob ge Hiskiaba ǀhaiǀurib, ǃKhūb di ommi ǃnâ ge hōheb hoaba ge mā tsî gao-aob ommi ǃnâ ge hōheb hoaba.

¹⁶ǁNāǃnubaib ge Hiskiaba ǃhuniǀuriba ǃKhūb tempeli di ǁāba xu ge ǃgaoǁnâ, tsî ǁāb haigu hîab Hiskiab, Judab gao-aoba ge ǃkhûǀkhāga xu tsî ǁîba Asiriab gao-aoba ge mā.

¹⁷Ob ge gao-aob Asiriab diba Tartanni, Rabsarib tsî Rabsakeb tsîga ge sî Laxisa xu gao-aob Hiskiab ǃoa, ǃgom ǂnubi-i ǀkha Jerusalems ǁga; o gu ge ǃgûǂoa tsî Jerusalems tawa ge sī. Tsî sī gu geo, o gu ge ǀgapise ǁgoe îsa ǁgam-i di dâudâudaob, ananaob di ǃhanaba-ū gau ǀgapi daob tawa hâb amǃgâ ge sī mâ.

¹⁸Tsî gu ge gao-aob ǃoa ge ǂgai; o gu ge Eljakimmi, Hilkiab ôab, ommûǂamaob, tsî Sebnab, xoa-aob, tsî Joab, Asafi ôab, ǂkhanisâu-aob tsîga ǁîb ǃoa ge ǂoa.

¹⁹Ob ge Rabsakeba ǁîgu ǃoa ge mî: Mîba Hiskiaba: Nētib ra mî ǁnā kai gao-aob Asiriab diba: Mâ ǂgomaiǂnûi-e kha nē-i, sats ra ǂgomaiǂnûi-e?

²⁰Sats ge ra ǂâi: Amǁgaukha di mîs ǀguis ge a ǁî, ǀapes tsî ǀgaib tsîra ge hâ torob ǁga. Tsî nēsi, tari-i aits ra ǂgomaiǂnûi, ots ra tita ǃoagu khâima?

²¹Kō re, sats ra ǂgomaiǂnûi ǁnā khôa hâ ǂāb Egipteb ai, ǁnā ǂāb, khoe-i ga ǁîb ai ǃgâsen ǃnubai ǃommi â-i ǃnâ ǂgâ tsî ǁîba ra ǃkhāǃganuba: ǁNātib ge Faraob, Egipteb gao-aoba ība ǁnān, ǁîb ai ra ǂgomaiǂnûin hoana.

²²Xawe tita ǃoats ga mîo, sida ge ǃKhūb sida Elob ai ra ǂgomaiǂnûi, ti: ǁNā tamaba kha, ǁîb ǀgapigu âb tsî altardi âbab ge Hiskiaba ūbē tsî Judab tsî Jerusalems ǃoa: Nē altars aiǃâ du ge nî ǃhonǁgoa Jerusalems tawa, ti mîba?

²³ǁNâi nēsi ǁgonagu ti ǀhonkhoeb, Asiriab gao-aob ǀkha, o ta ge ǀgamǀoadisi hāna nî mā tsi, ǃgapi-aogats ga ǁîn ai ǂnûi ǁkhāo.

²⁴Tsî matits kha ǁnâi nî ǁkhaedawa ǁkhā ǃkhams ti ǀhonkhoeb di hoan xa ǂkhari ǃgāgu di ǀgui gaosab disa? Xawets ge satsa Egipteb ai ra ǂgomaiǂnûi kunidi ǃaroma tsî ǃgapi-aogu ǃaroma.

²⁵Tsî nēsi, ǃKhūb osesa ǁnâi nē ǃās ǃoagu ta ge ǂoaxasa, ǁîsa ta nî hîkākāse? ǃKhūb kom tita ǁga: ǃApa nē ǃhūb ǃoagu îts ǁîba hîkākā, ti ge mîo.

²⁶ǃNubai gu ge Eljakimmi, Hilkiab ôab, tsî Sebnab tsî Joab tsîga Rabsakeb ǃoa ge mî: Sa ǃgāge ǃoa Siriaǁîgowab ǃnâ ǃhoa, ǃgâise ge ǁîba ra ǁnâuǃā xuige, îts tā Jodeǁîgowab ǃnâ ǃhoa-ū ge, ǁaes ǂnubiǂgoab ai hâs ra ǁnâuse.

²⁷Xaweb ge Rabsakeba ǁîgu ǃoa ge mî: Ti ǀhonkhoeba kha sî teb go sa ǀhonkhoeb ǃoa tsî sats ǃoa nē mîde ta nî ǃhoase? ǁNā aogu, ǂnubiǂgoab ai ǂnôagu ǃoa tamasa, sago ǀkha gu nî ǁîgu di xauba ǂûse tsî ǁîgu di ǀūba āse?

²⁸Ob ge Rabsakeba khâi tsî ǃgari dommi ǀkha Jodeǁîgowab ǃnâ ǂgai tsî ge mî: ǁNâu mîs ǁnā kai gao-aob Asiriab dib disa!

²⁹Nētib ra gao-aoba mî: Ab Hiskiaba sago tā ǂgaeǂhapu, ǁîb sago ore ǁkhā tide xuige!

³⁰Îb Hiskiaba tā ǃKhūb ai ǂgomaiǂnûi kai du, mî rase: ǃKhūb ge amase nîra ore da tsî nē ǃās ge Asiriab gao-aob ǃomǁae māhe tide.

³¹Tā Hiskiaba ǃgâ. Nētib ra Asiriab di gao-aoba mî xuige: ǂKhîb ǃgaeǀhao-e dī tita ǀkha, î du tita ǁga ǂoaxa, î du ǂû re mâ-i hoa-e ǁî-i di ǂauxûiǂûhais xa tsî mâ-i hoa-e ǁî-i di ǀnomahais xa, î du ā mâ-i hoa-e ǁî-i ǀaus di ǁgam-i xa,

³²hā tsî ta nî ǃhū-i, sadu di ǃhūb khami ī-i ǃoa ūsī dus kōse, ǃhū-i ǃhorob di-i tsî ǂauxûib di-i, ǃhū-i pereb tsî ǂauxûiǂûǃhanagu di-i, ǃhū-i ǀkheraǂûn di-i, olib tsî danib tsîkha di-i ǃoa; o du ge nîra ûi tsî ǁō tide; î du Hiskiaba tā ǃgâ, ǁîb ǃhoadan du tsî ǃKhūb ge nîra ore da, ti ra mîba.

³³ǁAedi di elogu xa kha mâb hoab âga ǁîb di ǃhūba Asiriab gao-aob di ǃomǁaeba xu oreb ge?

³⁴Mapa gu hâ Hamats tsî Arpads tsîra di eloga? Mapa gu hâ Sefarvajims tsî Henas tsî Avas tsîdi di eloga? Ore gu ge Samariasa ti ǃomǁaeba xu?

³⁵Mâga nē ǃhūgu di elogu hoagu digu hîa ǁîgu di ǃhūba ti ǃomǁaeba xu ge ore ǁkhā iga, ob ǃKhūba Jerusalemsa ti ǃomǁaeba xu nî ore?

³⁶Xawe ǁaes ge ǃnō tsî mî-i xare-e oe-am tama ge i, gao-aob di mîmās ge: Oe-am bi du tide, ti hâ i xui-ao.

³⁷ǃNubai gu ge Eljakimmi, Hilkiab ôab, ommûǂamaob, tsî Sebnab, xoa-aob, tsî Joab Asafi ôab, ǂkhanisâu-aob tsîga Hiskiab ǃoa doa hâ saran ǀkha ge hā; tsî gu ge ǁîba Rabsakeb di mîde ge ǂanǂan.