Read Khoekhoegowab 2 Gao-aogu 19 Bible Online

2 Gao-aogu 19 - Khoekhoegowab bible

2 Gao-aogu 19

¹Tsî i ge ge ī, gao-aob Hiskiab ge ǁnâuo, ob ge saran âba ǀkhau tsî ǁhō-e ana tsî ǃKhūb di ommi ǃnâ ge ǂgâ.

²ǁNās khaoǃgâb ge Eljakimmi, ommûǂamaob tsî Sebnab, xoa-aob tsî kaigu pristergu digu tsîga ǁhōga anasen hâǃâ Jesajab, kēbo-aob, Amob ôab ǃoa ge sî.

³Tsî gu ge ǁîb ǃoa ge mî: Nētib ra Hiskiaba mî: Nētsēs ge a ǂōǂōsib tsî ǃaob tsî ǃkhāǃkhās tsîn di tsē; ǀgôan ge ǃnaen nîs kōse go sī, xawe i ge ǁoraǀgai-i xare-e a ǀkhai.

⁴ǀNîsib ge ǃKhūb, sa Eloba Rabsakeb di mîde nî ǁnâu, ǀhonkhoeb âb, Asiriab gao-aob xa ge sîheb dide, ûitsama Elobab nî ǃkhāǃkhāse tsî ǀaob nîse ǁnā mîdi, ǃKhūb, sa Elob ge ǁnâudi ǀkha; ǁnâi ǀgoreba re ǁnān ǃgau gen hîa nî hōhena.

⁵Tsî ǃgāgu gao-aob Hiskiab digu ge Jesajab tawa sīo,

⁶ob ge Jesajaba ǁîgu ǃoa ge mî: Nēti mîba sago di ǀhonkhoeba: Nētib ra ǃKhūba mî: Tā ǃao ǁnā mîdi hîats go ǁnâudi xa, Asiriab gao-aob di ǃgāgu tita go ǃkhāǃkhā-ūdi xa.

⁷Mû, tita ge gaga-e ǁîb ǃnâ nîra mā, ob ge gom-e ǁnâu tsî ǁkhawa ǁîb di ǃhūb ǃoa nîra oa, o ta ge ǁîba gôab ǀkha ǃhūb âb ǃnâ nîra ǁnā kai.

⁸Nētib ge Rabsakeba oa tsî Asiriab di gao-aoba Libnasa ra ǃkhamūse ge hō; Laxisa xub go ǂnauǁnâ tib ge ǁnâu xui-ao.

⁹Tsî Tirhakab, Etiopiab gao-aob xab ge nēti ǁnâuo: Mû, ǁîb ge ǃkhamū tsi nîse go ǂoa, ti, ob ge ǁkhawa sîsabega Hiskiab ǃoa sî tsî ge mî:

¹⁰Nēti go ge Hiskiab, Judab gao-aob ǃoa ǃhoa tsî nî mî: Tā ǂgaeǂhapukaisen sa Elob, ǁîb aits ra ǂgomaiǂnûib xa, mî raǃâ: Jerusalems ge Asiriab gao-aob di ǃomǁae māǁnâhe tide.

¹¹Mû, sats ge go ǁnâu, tare-e gu Asiriab gao-aoga ǃhūgu hoaga ge dī-ū ǃkhaisa, ǁîga ra ǀâxareǃâ; tsî satsa ǁnâi sâuhets nî?

¹²Elogu ǁnā ǁaedi, ti îgu xa ge hîǀhuruhedi diga ǁîde ore gu ge? Gosanǁîn, Haranǁîn, Resefǁîn tsî Edenni ôan, Telasars tawa hân tsîna?

¹³Mapab hâ Hamats di gao-aoba tsî Arpads di gao-aoba tsî ǃās Sefarvajims di gao-aoba tsî Henas tsî Avas diba?

¹⁴Tsî Hiskiab ge ǂkhanide sîsabegu ǃomǁaeba xu hō tsî khomaio, ob ge ǃKhūb di ommi ǃoa ge ǃapa tsî Hiskiab ge ǁîde ǃKhūb di ais aiǃâ ge khoraǁgui.

¹⁵Tsî Hiskiab ge ǃKhūb di ais aiǃâ ǀgore tsî ge mî: O ǃKhūtse, Israeli Elotse, xerugu ǁaegu ǁan hâtse, sats ǀguits ge ǃhūbaib gaosidi hoadi di Elotsa, sats ge ǀhommi tsî ǃhūbaib tsîkha ge kuru.

¹⁶ǃKhūtse, ǂō ǂgaes âtsa îts ǁnâu, mûra âtsa khowa ǃKhūtse, îts mû; îts ǁnâu mîdi Sanherib go ûitsama Elotsab nî ǃkhāǃkhāse sîde.

¹⁷Amase ǃKhūtse, Asiriab gao-aogu ge ǃhaodi tsî ǁîdi di ǃhūba ge hîkākā.

¹⁸Tsî gu ge ǁîn di eloga ǀaes ǃnâ ge aoǂgā, elo tamagu tsî khoen ǃomgu di sîsenni a xui-ao, haigu tsî ǀuigu tsîga; ǁnā-amaga gu ge nēga ge hîkākā ǁkhā i.

¹⁹Tsî nēsi ǁnâi, ǃKhū, sida di Elotse, ore da re ǁîb di ǃomǁaeba xu; o di ge ǃhūbaib di gaosidi hoade nî ǂan, sats, ǃKhūts, ǀguits a Elo ǃkhaisa.

²⁰ǃNubaib ge Jesajab, Amob ôaba Hiskiab ǃoa sî tsî ge mî: Nētib ra ǃKhūb, Israeli Eloba mî: ǁNān titats ge Sanherib, Asiriab gao-aob ǃoagu ǀgorena ta ge go ǁnâu.

²¹Nēs ge ǁnā mîs ǃKhūb go ǁîb ǂama ǃhoasa: ǂKhamkhoes Sionni ôas ra ǃharaxū tsi. ǁÎs ra ǃhō tsi, ǀgôas Jerusalems dis ra sa khaos ai ǃnabindana.

²²Tari-ets kha ǃhō tsî go ǃkhāǃkhā? Tsî tari-i ǃoaguts kha sa domma go ūkhâi tsî mûra âts ǀkha go ǃgapakhâi? ǃAnub Israeli dib ǃoagus komo!

²³Sa sîsabega xuts ge ǃKhūba ǃhō tsî go mî: Tita ge ti kunidi di ǂguib ǀkha ǀgapib ǃhomgu dib ai go ǃapa, Libanonni di ǀkhāb ai. Tsî tita ge ǁîb di ǀgapi sederhaidi tsî ǁîb di ǃkhōǂuihesa denehaidi tsîde nîra ǁhāǁnâ; tsî ta nî ǀkhâuǀams tawa ǁgoe hâǃkhais âb ai sī, îsa ǃaub âb, ǃhanab khami īb ǃnâ.

²⁴Tita ge xora tsî ǃhao ǁgam-e ge ā. Tsî tita ge ti ǂaiǃnāgu ǀkha Egipteb di ǃāgu hoaga ge ǂnâǂnâ.

²⁵ǁNâu tamats kha hâ ǁî ǃkhaisa ta ge tita aibekam ǁaeba xu ǀnai dīsa, tsî hugasa xu ǁî ǃkhaisa aiǂhomisa? O ta ge ǁîsa nēsi go hā kai, sats nî ǁaposa ǃāde ǀkhaiǃnâ ǃkhaise hîkākāse.

²⁶ǁNā-amagan ge ǁîdi di ǁansabena ǀgaio ge i, ǁîn ge ǃhurigâ tsî tao ge hâ i, ǁîn ge ǀgâb ǃaub dib khami ge ī tsî ǃam ǁhaon khami, ǀgâb omǂamaidi dib khami tsî khauhe hâ ǃhorob khami, ganupeb kai tama hîa.

²⁷Xawe tita ge a ǂan sa ǂnûs tsî sa ǂoas tsî sa ǂgâs tsî tita ǃoaguts ra ǂkhupi ǂkhupiba.

²⁸Tita ǃoaguts ra ǂkhupi ǂkhupib ǃaroma tsî ǂnīǂnīsenni âts ti ǂgaera ǃnâ go hā amaga ta ge tita ti haiǂguisa sa ǂguis ǃnâ nîra ǁgui, tsî ti ǂgā-amǃnâxūsa sa amǁgaukha ǃnâ, o ta ge tita satsa ǁnā daob ǁîba-ūts ge hāb ǁkhāba-ū nîra oa kai.

²⁹Tsî nēs ge satsa saose nî ība: Nē kurib ǃnâts ge ǁnān ǁî-aitsama ra ǃīna nîra ǂû; tsî ǀgamǁî kurib ǃnâ ǁkhawa ga ǃīna; xawe ǃnonaǁî kurib ǃnâ tsoro îts ǃgao îts ǂauxûiǂûǃhanaga ǂgā îts ǁîgu di ǂûn xa ǂû.

³⁰Ûiǃgau gen Judab di ommi din ge ǁkhawa ǃnagabǀî nîra ǃnomaǃkhō tsî ǀgapisebǀî nîra ǂûtani.

³¹Jerusalemsa xun ge ǃgau gena nîra ǂoa, tsî Sionǃhomma xu ge ûina. ǃKhūb ǂnubidi dib di ôasasib ge nēsa nîra dī.

³²ǁNā-amaga, nētib ra ǃKhūba mî Asiriab gao-aob xa: ǁÎb ge nē ǃās ǃnâ hā tide tsî ǂā-e ǁîs ǃnâ ǁkhâuǂgā tide. ǁKhātib ge khōsikhō-i xare-i ǀkha ǁîsa hāǂam tide tsî ǁkhui-i xare-e ǁîs ǃoa-ai aokhâi tide.

³³ǁNā daob ǁîba-ūb ge hāb aib ge ǁkhawa nîra oa; xawe nē ǃās ǃnâb ge ǂgâ tide, tib ra ǃKhūba mî.

³⁴Tita ge nē ǃāsa nîra sâu xui-ao, ǁîsa ta nî orega, tita ǃaroma tsî Davib, ti ǃgāb ǃaroma!

³⁵Ob ge ǁnā tsuxub ǁkhāb ǃnâ ǀhomǃgāb ǃKhūb diba ge ǂoa tsî Asiriab di ǁgoeǃkhais ǃnâ ǀguikaidisi tsî ǁkhaisadisikoroǀaǀoadisiga ge ǂnau. Tsî ǃnauǁgoaga gu ge khâio, mû, o gu ge ǁîgu hoaga ǁō hâ soro ge i.

³⁶Ob ge Sanherib, Asiriab gao-aoba oa tsî bē tsî Nineves tawa sī ge hâ.

³⁷Tsî i ge ge ī, Nisroxi, ǁîb elob di ommi ǃnâb ge ǃhonǁgoa ǃnubai kha ge ǁîb ôakha Adramelexi tsî Sareseri tsîkha gôab ǀkha ǁhāǃan bi ǃkhaisa; tsî kha ge Araratǃhūb ǃoa ge ǁhâ-ûi, tsî Esar-Hadonni, ǁîb ôab, ge ǁîb ǃās ǃnâ ge gao-ao kai.