Read Khoekhoegowab 2 Gao-aogu 2 Bible Online

2 Gao-aogu 2 - Khoekhoegowab bible

2 Gao-aogu 2

¹Tsî i ge ge ī, ǃKhūb nî Eliaba tūǀnanu-i ǃnâ ǀhommiǀî ūǃapa ǃnubaib ge Eliaba Elisab ǀkha Gilgalsa xu ǃgû ǃkhaisa.

²Ob ge Eliaba Elisab ǃoa ge mî: Hâ re nēpa, ǃKhūb ge tita Bet-Els ǃoa go sî xuige. Xawe Elisab ge: ǃKhūb a ûitsama ǃkhais ao tsî sa ǀoms a ûitsama ǃkhais ao ta ge ǁnāxū tsi tide, ti ge mî. Nēti kha ge ge ǁgôa Bet-Els ǃoa.

³ǃNubai gu ge kēbo-aogu di ôagu, Bet-Els tawa hâga Elisab ǃoa ǂoa tsî ǁîb ǃoa ge mî: ǂAnts a xare, ǃKhūb nî nētsē sa ǀhonkhoeba danas âtsa xu ūbē ǃkhaisa? Ob ge ǁîba: Tita on ge a ǂan, xuige sago ǃnō, ti ge mî.

⁴Tsî Eliab ge ǁîb ǃoa: Elisatse, hâ re nēpa, ǃKhūb ge tita Jerixos ǃoa go sî xuige, ti ge mî. Xaweb ge: ǃKhūb a ûitsama ǃkhais ao tsî sa ǀoms a ûitsama ǃkhais ao ta ge ǁnāxū tsi tide, ti ge mî. Nēti kha ge Jerixos tawa ge sī.

⁵ǃNubai gu ge ǀgôagu kēbo-aogu digu Jerixos tawa hâga Elisab tawa dāsī tsî ǁîb ǃoa ge mî: ǂAnts a xare, ǃKhūb nî nētsē sa ǀhonkhoeba danas âtsa xu ūbē ǃkhaisa? Ob ge ǁîba: Tita on ge a ǂan, xuige sago ǃnō, ti ge mî.

⁶Tsî Eliab ge ǁîb ǃoa ge mî: Hâ re nēpa, ǃKhūb ge tita Jordanǃāb ǃoa go sî xuige. Xaweb ge: ǃKhūb a ûitsama ǃkhais ao tsî sa ǀoms a ûitsama ǃkhais ao ta ge ǁnāxū tsi tide, ti ge mî. Tsî kha ge ǁî ǀgamkha ge ǃgû.

⁷Tsî korodisi khoegu kēbo-aoǀgôagu digu ge ǃgû tsî ǃnūseba xu sī ge mâ; tsî ǁî ǀgamkha ge Jordanǃāb amǃgâ ge mâ i.

⁸ǃNubaib ge Eliaba ǂamsarab âba ū tsî ǁîba xami tsî ǁgamma ge ǂnau, ob ge nēǀî tsî nauǀî ge ǀgorasen; o kha ge ǁî ǀgamkha ǂnâsa ǃhūb ai ge ǃgâu.

⁹Tsî i ge ge ī, ǃgâu kha geo, ob ge Elisab ǃoa ge mî: Mîba te re, tare-e ta nî dī-ū tsi ǃkhaisa, satsa xu ta nî ūbēhes aiǃâ. Ob ge Elisaba ge mî: Î ra ga ǀgam ǃâra sa gagas dira ti ai hâ!

¹⁰Ob ge ǁîba ge mî: Karosa ǃkhai-ets go ǂgaobasen, satsa xu ta ra ūbēhe ǃkhai-ets ga mûo, o i ge ǁnāti nîra ī, tsî ti ga ī tama io, o i ge ī tide.

¹¹Tsî i ge ge ī, aiǃâb ǃoa kha ǃgûgaruǃâ ra ǃhoa hîan ge ǀaexa kuni-i tsî ǀaexa hāgu tsîna hā tsî ǁî ǀgamkha ge ǀgora. Nētib ge Eliaba tūǀnanu-i ǃnâ ǀhommi ǃoa ge ǃapa.

¹²Tsî Elisab ge mûo, ob ge ge mî: Ti îtse, ti îtse, Israeli di kunis tsî ǁîs di ǃgapi-aogu ase ītse! Tsîb ge ǃaruǀî ǁîba mû tama ge i, tsî saran âba ū tsîb ge ǀgam ǃâra ǃnâ ge ǀkhau.

¹³Tsîb ge ǁkhāti Eliab di ǂamsarab, ǁîba xu ge ǁnāba, ūkhâi tsî oa tsî Jordanǃāb di amǃgâb ai sī ge mâ.

¹⁴Tsîb ge Eliab di ǂamsarab, ǁîba xu ge ǁnāba, ū tsî ǁgamma ǂnau tsî ge mî: Mapab hâ ǃKhūb, Eliab di Eloba? Ā, ǁîba? Tsîb ge ǁgamma ge ǂnau, ob ge nēǀî tsî nauǀî ge ǀgorasen, tsî Elisab ge ge ǃgâu.

¹⁵Tsî ǀgôagu kēbo-aogu digu, Jerixos tawa hâgu ge mûo, o gu ge: Eliab di gagas ge Elisab ai sâ hâ, ti ge mî; tsî gu ge ǁîba ǃgûǃoa tsî ǁîb aiǃâ ǃhūb ai ge ǃhonǁgoa.

¹⁶Tsî gu ge ǁîb ǃoa ge mî: Kō, sa ǃgāge tawa gu korodisi ǃgari-aoga hâ, a gu ǃgû î gu ǀhonkhoeb âtsa sī ôa, iseb ǃKhūb di Gagaba ǀnîsi ū tsî ǃhomgu di ǀguib ais kas, ǃgoaǃnāgu di ǀguib ǃnâs kasa aoǂgā bi tama hâsa. Xawe ǁîb ge: Tā sî gu re! ti ge mî.

¹⁷Xawe gu ge ǁîba taos kōse ǁgūǀkhā, ob ge: Sî re! ti ge mî. O gu ge korodisi khoega ge sî, ǁîba ǃnona tsēdi kōse ge ôa, xawe hō bi tama ge iga.

¹⁸ǃNubai gu ge ǁkhawa ǁîb tawa ge hā, Jerixos tawab go hâ i xui-ao. Ob ge ǁîba ge mî: Mîba go tama ta hâ: Tā ǃgû! ti?

¹⁹Tsî aogu ǃās digu ge Elisab ǃoa ge mî: Kō, nē ǃās ǃnâ ǁans ge a ǃgâi, ti ǀhonkhoets ra mû khami, xawe ǁgam-i ge a tsū, tsî ǃhūb ge a ǂûoǃnâ.

²⁰Ob ge: ǀAsa xapa-e ūhāba te î go ǂō-i xa dīǃnâ, ti ge mî. O gu ge ǁî-e ǁîba ge ūhāba.

²¹ǃNubaib ge ǀaus ǃoa ǂoa tsî ǁîs ǃnâ ǂō-e aoǂgā tsî ge mî: Nētib ra ǃKhūba mî: Tita ge nē ǁgam-e go ǂgauǂgau; o i ge ǃaruǀî ǁō-i kas, ǂûoǃnâsi-i kas hoasa ǀkhī tide.

²²Nēti i ge ǁgam-e ge ǂgau nētsēs kōse, ǁnā mîs Elisab dis hîab ge ǃhoas ǃoa.

²³Tsîb ge ǁnāpa xu Bet-Els ǃoa ge ǃapa. Tsî daobab ge ǃgâuo, o gu ge ǂkham ǀgôaga ǁnā ǃāsa xu ge ǀkhī; ǁîgu ge ǁîba ǃhō tsî ǁîb ǃoa: ǃGoradanatse, ǃapaǂoa! ǃGoradanatse, ǃapaǂoa! ti ge mî.

²⁴Ob ge ǂnan tsî ǁîga ge mû tsî ǁîga ge ǀâxare ǃKhūb di ǀons ǃnâ. ǃNubai kha ge ǀgam bērkha ǁoesa xu ǀkhī tsî ǁîgu xa hakadisiǀgamǀa ǀgôaga ge ǀkhauǃā.

²⁵Tsîb ge ǁnāpa xu Karmelǃhommi ǃoa ge ǃgû; tsî ǁnāpa xub ge ǁkhawa Samarias ǃoa ge oa.