Read Khoekhoegowab 2 Gao-aogu 20 Bible Online

2 Gao-aogu 20 - Khoekhoegowab bible

2 Gao-aogu 20

¹ǁNā tsēdi ǃnâb ge Hiskiaba ǁōb kōse ge ǀaesen. Ob ge kēbo-aob Jesajab, Amob ôaba, ǁîb tawa hā tsî ǁîb ǃoa ge mî: Nētib ra ǃKhūba mî: Sa omma ǃkhō-ūnuǃgâ, ǁōts nîra tsîts ûi tide xuige.

²ǃNubaib ge Hiskiaba ais âba ge unu ǂnubiǂgoabǀî, tsîb ge ǃKhūb ǃoa ǀgore tsî ge mî:

³O ǃKhūtse, ǂâi re, sa ais aiǃâ ta ge amab ǃnâ tsî ǀoasa ǂgaob ǀkha gere tanisen tsî sa mûǁae a ǃgâina gere dī ǃkhais xa. Tsî Hiskiab ge kaise ge ā.

⁴Tsî i ge ge ī, Jesajab ganupe ai-ommi di ǁaeguba xu ǂoa tama hâ hîas ge ǃKhūb di mîsa ǁîba hāba ǃkhaisa, mî rase:

⁵Oa îts Hiskiab, ti ǁaes di ai-aiba-aoba mîba: Nētib ra ǃKhūba mî, sa îb Davib di Eloba: Tita ge sa ǀgoresa go ǁnâu, tita ge sa ǁgamroga go mû; mû, tita ge nîra ǂgauǂgau tsi, ǃnonaǁî tsēs aits ge ǃKhūb di ommi ǃoa nîra ǃapa.

⁶Tsî tita ge disikoroǀa kuriga sa tsēde nîra dīǀaro tsî Asiriab gao-aob di ǃomǁaeba xu nîra ore, sats tsî nē ǃās ona; tsî tita ge nē ǃāsa nîra sâu tita ǃaroma tsî ti ǃgāb, Davib ǃaroma.

⁷ǁNās khaoǃgâb ge Jesajaba ge mî: ǀNomahais ǂûn di naru-e ūhā. On ge ū tsî ūǀhapis ai ge ǁgui, ob ge ge ǂgau.

⁸Tsî Hiskiab ge Jesajab ǃoa ge mî: Mâsa ǁnā saosa, ǃKhūb nîra ǂgauǂgau tes tsî ǃnonaǁî tsēs ai ta ǃKhūb di ommi ǃoa nîra ǃapas disa?

⁹Tsî Jesajab ge ge mî: Nēs ge ǃKhūb di saose nî ība tsi, ǃKhūb ǁnā mîs hîab ge ǃhoasa nîra dīsa: Somma ǃapab nî disi ǁgaragu kōse? Oab nî disi ǁgaragu kōse?

¹⁰Ob ge Hiskiaba ge mî: Disi ǁgaragu kōse ǁgôas ge somma a supuba; hî-î, îb somma disi ǁgaragu kōse khaosǀî oa.

¹¹Ob ge kēbo-aob Jesajaba ǃKhūba ge ǂgaiǀî; tsî ǁîb ge somma disi ǁgaragu kōse khaosǀî ge oa kai, ǁîb ge Axasi di soreǁgauxūs di ǁgaragu ai ǁgôas kōse.

¹²ǁNā ǁaeb ǁkhāb aib ge Merodax-Baladanni, Baladanni ôab, Babilons gao-aoba Hiskiaba ǂkhanidi tsî ǀkhaexū-i tsîna ge sîba; Hiskiab ge ǀaesen hâ i ǃkhaisab ge ǁnâu amaga.

¹³Ob ge Hiskiaba ǁîn ǂama ǃgâiaǂgao tsî ǁîga ǁui-ommi âb hoaba ge ǁgau, ǀhaiǀurib, ǃhuniǀurib tsî ǃgâihamxūn tsî hoan xa ǃgâi olib tsî ǁîb di ǁâtanin ommi tsî sâuǃnâ ommi âb ǃnâ hân hoana; ǀgui xū-i xare-i ge hâ tama ge hâ i, ommi âb ǃnâs kas, ǁîb di gaosis ǃnâs kas hoasa, Hiskiab ǁîga ǁgau tama-e.

¹⁴ǃNubaib ge kēbo-aob Jesajaba gao-aob Hiskiab tawa hā tsî ǁîb ǃoa ge mî: Tare-e gu ǁnā aoga go mî, tsî mapa xu gu go hā? Ob ge Hiskiaba ge mî: ǁÎgu ge ǃnū ǃhūba xu ge hā, Babilonsa xu.

¹⁵Ob ge ge mî: Tare xū-e gu go mû sa ommi ǃnâ? Ob ge Hiskiaba ge mî: ǁÎgu ge ti ommi ǃnâ hân hoana go mû. ǀGui xū-i xare-i ge hâ tama ti ǁuigu ǃnâ, ǁîga ta ǁgau tama-e.

¹⁶Ob ge Jesajaba Hiskiab ǃoa ge mî: ǁNâu ǃKhūb di mîsa!

¹⁷Mû, tsēdi ge nîra hā, on ge sa ommi ǃnâ hân hoan tsî sa îgu ge nētsēs kōse ǀhaoǀhaon tsîna Babilons ǃoa nîra ūǃgûhe; xū-i xare-i ge ǃgau tide, tib ra ǃKhūba mî.

¹⁸ǁNās tawan ge sa ôagu, satsa xu nî ǀkhīgu tsî sats nî hōgu xa nîra ū, tsî nî ǁîga gao-aob ǃoaba-aose dī, Babilons gao-aob di î-ommi ǃnâ.

¹⁹Ob ge Hiskiaba Jesajab ǃoa ge mî: Mîs ǃKhūb dis sats go mîs ge a ǃgâi. Tsîb ge ǁîba ǁkhāti ge mî: ǃGâi a, ǂkhîb tsî amab tsîkha nî hâ ti tsēdi ǃnâ, amaga.

²⁰Tsî nau xūn Hiskiab di ǃnaeǃkhaidi din tsî ǁîb di ǀgaib hoab tsî matib ge îǁgams tsî dâudâudaoba dī tsî ǁgam-e ǃās ǃnâ ge ūhā ǃkhais tsîn ge ǃNaeǃkhaidi ǂkhanis Judab gao-aogu dis ǃnâ xoahe hâ.

²¹Tsî Hiskiab ge ǁō tsî ǁîb di îgu tawa ge ǁkhōhe, tsî ǁîb ôab Manaseb ge ǁîb di ǃās ǃnâ ge gao-ao kai.