Read Khoekhoegowab 2 Gao-aogu 21 Bible Online

2 Gao-aogu 21 - Khoekhoegowab bible

2 Gao-aogu 21

¹Manaseb ge disiǀgamǀa kurixa ge i, gao-ao kaib ge ǃnubai tsîb ge korodisikoroǀa kuriga ge gaosîsen Jerusalems tawa; tsî ǁîb îs di ǀons ge Hefsiba ge i.

²Tsîb ge ǁîba ǃKhūb mûǁae a ǂkhabana gere dī, ǁgaidīgu ǁnā ǀūben, ǃKhūb ge Israeli ôan ais aiǃâ ūn hâna xu doeǁgaǂuin digu ǃoa.

³ǁÎb ge ǁnā ǀgapigu, ǁîb îb Hiskiab ge hîǀhuruga ǁkhawa ge ǂnubi; tsîb ge Baala altarde ge ǂnûikhâiba, tsîb ge ǀgoreǀîǀhoma-e ge dī, Axab, Israeli di gao-aob ge dī xase, tsîb ge ǂnubis ǀhommi dis hoas aiǃâ ǃhonǁgoa tsî gere ǃoaba si.

⁴Tsîb ge altarde ge ǂnubi ǃKhūb di ommi ǃnâ, ǁîb xab ge ǃKhūba: Jerusalems tawa ta ge ti ǀonsa nîra ǂnûi, ti mîba.

⁵ǁNās tawab ge altarde ǀhommi di ǂnubis hoasa ge ǂnubiba ǃKhūb ommi di ai-omkha hoakha ǃnâ.

⁶Ā, ǁîb ôabab ge ǀaesa ge ǃgûǃganu kai, tsîb ge ǃgaidī tsî ani-āsa ge ǃgaoǃgâ; tsîb ge ǃgaidī-aogu tsî ǁgâuaǁkhāǁkhāsabega ge ǂnûi; ǁîb ge kaise ǃKhūb mûǁae a ǂkhabana gere dī, ǁîbab nî ǁaibǀî ǂkhaiǂkhaise.

⁷ǁÎb ge ǁkhāti ǃgaohesa īb Asers dib hîab ge dīs dība ǁnā ommi ǃnâ ge ǂnûi, ǁîb xab ge ǃKhūba Davib ǃoa tsî ǁîb ôab Salomob ǃoa mîba: Nē ommi ǃnâ tsî Jerusalems hîa ta Israeli ǃhaodi hoadi xu ǁhûiǂuibasens ǃnâ ta ge tita ti ǀonsa nîra ǂnûi ǀamosib kōse.

⁸Tsî ta ge ǃaruǀî Israeli di ǂâisa nē ǃhūb, ǁîn îga ta ge māba xu ǃgû kai tide; xawe an ǂan tsî dī, ǁîna ta ge mîmān hoan ǃoa tsî ǁnā ǂhanub, ti ǃgāb Moseba ta ge mîmāb hoab ǃoa.

⁹Xawen ge ǁîna ǁnâuǀnam tama ge i, Manaseb ge ǁîna ǁhapu kai amaga, on ge ǃnāsase gere tsūdī ǁnā ǀūben, ǃKhūb ge Israeli ôan di ais aiǃâba xu ǃhūǃnoman ǃgâ-ai.

¹⁰ǃNubaib ge ǃKhūba ǃoabas kēbo-aogu, ǁîb di ǃgāgu disa xu ǃhoa tsî ge mî:

¹¹ǁNā-amaga, Manaseb, Judab gao-aob ge nē ǁgaidīga ge dī, Amorǁîn ǁîb aiǃâ ge hâ in ge dīn hoan ǃgâ-ai ra tsūdīse tsî Judab onab ǁgôa-elogu âb ǀkha ge ǁore kai amaga,

¹²ǁnā-amagab ge ǃKhūb, Israeli Eloba nēti ra mî: Mû, tita ge Jerusalems tsî Judab tsîra ǂkhaba-i xa nîra hāǂam kai, mâ-i hoa-i, ǁî-e ga ǁnâu-i di ǂgaera hoara nî ǃnurus kōse.

¹³Tsî tita ge Jerusalems ǂama ǀguirotsurib Samarias diba nîra ǂgae Axab ommi di ǀnē-ūdas ǀkha; tsî tita ge Jerusalemsa nîra ǀomǃnâ, ǃore-i ra ǀomǃnâhes ǁkhās khami; ǀomǃnâ tsîts ra ǁî-e ǃkhupuǃnā-ais ǁkhās khami.

¹⁴Tsî tita ge ǃgaus ti ǀumi-amǃnâs disa ǁnāxū tsî nî ǁîna ǁîn di khākhoen ǃomǁae mā; on ge ǀâǀhanaxūse tsî ǁkhâuǁnâxūse ǁîn di khākhoen hoana nîra ība,

¹⁵Ti mûǁae a ǂkhabanan ge dī tsî titan ge ǁaibǀî ǂkhaiǂkhai amaga ǁnā tsēs, ǁîn îgu ge ǁîs ai Egipteba xu ǃgûǂoasa xu nētsēs kōse.

¹⁶ǁNās tawab ge Manaseba ǁkhāti kaise ǀhapio ǀaoba ge ǂnâxū, Jerusalemsab ge nē ǀamsa xu nau ǀams ǁga ǀoaǀoas kōse; nau ǁoreb ose, Judabab ge ǁore kaib, ǃKhūb mûǁae a ǂkhabana ra dīǃâ.

¹⁷Tsî nau xūn, Manaseb di ǃnaeǃkhaidi din tsî ǁnān hîab ge dīn hoan tsî ǁîb di ǁoreb hîab ge ǁoreb tsîn ge ǃNaeǃkhaidi ǂkhanis Judab gao-aogu dis ǃnâ xoahe hâ.

¹⁸Tsî Manaseb ge ǁō tsî ge ǁkhōhe ommi âb di ǃhanab ǃnâ, Usab di ǃhanab ǃnâ; tsî ǁîb ôab Amonni ge ǁîb di ǃās ǃnâ ge gao-ao kai.

¹⁹Amonni ge ǀgamdisiǀgamǀa kurixa ge i, gao-ao kaib ge ǃnubai, tsîb ge ǀgam kurikha Jerusalems tawa gere gaosîsen; tsî ǀons ǁîb îs dis ge Mesulemet ge i, Harub, Jotbas dib di ôasa.

²⁰Tsîb ge ǁîba ǃKhūb mûǁae a ǂkhabana gere dī, ǁîb di îb Manaseb ge dī xase.

²¹ǁÎb ge ǁnā daob, ǁîb îb ge ǃgûb hoab ǃnâ ǃgû tsî gere ǃoaba ǁnā ǁgôa-elogu, ǁîb îb ge ǃoabaga, tsîb ge ǁîgu aiǃâ gere ǃhonǁgoa.

²²Nētib ge ǁîba ǃKhūb, ǁîb îgu di Eloba ǁnāxū tsî ǃKhūb di daob ǃnâ ǃgû tama ge hâ i.

²³Tsî Amonni di ǃgāgu ge ǃgaeǁare-e ǁîb ǃoagu dī tsî gao-aoba ge ǃgam, ǁîb di ommi ǃnâ.

²⁴Xawes ge ǁaes ǃhūb disa ǁnān, gao-aob Amonni ǃoagu ge ǃgaeǁare-e dīn hoana ge ǃgam; tsîs ge ǁaes ǃhūb disa ǁîb ôab Josiaba ge gao-aodī ǁîb di ǃās ǃnâ.

²⁵Tsî nau xūn Amonni di ǃnaeǃkhaidi din tsîb ge dī xūn, ǁîn ge ǃNaeǃkhaidi ǂkhanis Judab gao-aogu dis ǃnâ xoahe hâ.

²⁶Tsîn ge ǀhobas âb ǃnâ ge ǁkhō bi Usab di ǃhanab ǃnâ; tsî ǁîb ôab Josiab ge ǁîb di ǃās ǃnâ ge gao-ao kai.