Read Khoekhoegowab 2 Gao-aogu 22 Bible Online

2 Gao-aogu 22 - Khoekhoegowab bible

2 Gao-aogu 22

¹ǁKhaisa kurixab ge Josiaba ge i, gao-ao kaib ge ǃnubai, tsîb ge ǃnonadisiǀguiǀa kuriga ge gaosîsen Jerusalems tawa; tsî ǀons ǁîb îs dis ge Jedida ge i, Adajab, Boskats dib di ôasa.

²Tsîb ge ǁîba ǃKhūb mûǁae a ǂhanuna gere dī; tsîb ge ǁîb îb Davib di daob hoab ǃnâ ge ǃgû tsî ǁîba xu ǂgō tama amǀkhāb ais kas, ǁareǀkhāb ais kas hoasa.

³Tsî i ge disiǁkhaisaǀaǁî kurib gao-aob Josiab dib ǃnâ ge i, gao-aob ge xoa-aob Safanni, Asaliab ôab, Mesulammi ôaba, ǃKhūb di ommi ǃoa sî ǃkhaisa, mî raǃâ:

⁴ǃApa re Hilkiab, ǀgapipristeri ǃoa, îb ǁîba ǃgôaǀhao ǁnā marin, ǃKhūb di ommi ǃoa ge ūǃapahen, ǁāb di ǃûi-aogu ge ǁaesa xu ǀhaoǀhaona;

⁵î gu ǁîna sîsenni di mûǂamaogu, ǃKhūb ommi ǂama mâihe hâga sī mā; î gu ǁîna ǁnāgu, ǃKhūb ommi ǃnâ sîsenna ra dīga mā, khôaǃkhaidi ǃKhūb di ommi didi nî dī-unuhese:

⁶ǁNā haikuru-aogu tsî kuru-aogu tsî ǂnubi-aogu tsîga, tsî haigu tsî ǁhāǂhanuǂhanusa ǀuidi nî ǁamahega, ommi nî dī-unuhese.

⁷Xawe a gu tā ǃereamsa ǂgaoǀkhāhe ǁnā marin, ǁîgu ǃomǁae ra māhen xa, îǂhôase gu ra dī xuige.

⁸ǁGoasib ge ǀgapipristeri Hilkiaba Safanni, xoa-aob ǃoa ge mî: Tita ge ǂhanub di ǂkhanisa go hō ǃKhūb di ommi ǃnâ. Tsî Hilkiab ge ǂkhanisa Safanna ge mā, ob ge ge khomai si.

⁹ǁNās khaoǃgâb ge Safanni, xoa-aoba, gao-aob tawa sī tsî gao-aoba ǃereamsa ūsība tsî ge mî: Sa ǃgāgu ge ǁnā marin, ommi ǃnâ ge hōhena ǀhaoǀhao tsî ǁîna sîsenni di mûǂamaogu, ǃKhūb di ommi ǂama mâihe hâga ge mā.

¹⁰ǁKhātib ge Safanni, xoa-aoba, gao-aoba ǂanǂan tsî ge mî: Pristeri Hilkiab ge ǂkhani-e go mā te. Tsî Safanni ge ǁî-e gao-aob di ais aiǃâ ge khomai.

¹¹Tsî i ge ge ī, gao-aob ge ǂhanub ǂkhanis di mîde ǁnâuo, ob ge saran âba ge ǀkhau.

¹²Ob ge gao-aoba pristeri Hilkiab tsî Ahikammi, Safanni ôab, tsî Akbori, Mikajab ôab tsî Safanni, xoa-aob, tsî Asajab, gao-aob di ǃgāb tsîga ge mîmā:

¹³ǃGû î go tita tsî ǁaes tsî Judab hoab dida ǃaroma ǃKhūb tawa sī ǀape-ôa, mîdi nē ǂkhanis hîa go hōhes didi ǂama. ǁAib ǃKhūb dib ge a kai, sadaǀî ǂhubi hâba, sada îgu ge nē ǂkhanis di mîde ǃgâ tama hâ i amaga, xoabahe da hân hoan ǃoa gu nî dīse.

¹⁴ǃNubai gu ge pristeri Hilkiab tsî Ahikammi tsî Akbori tsî Safanni tsî Asajab tsîga kēbo-aos Huldas, Salummi, Tikwab ôab, Harhab, sarasâu-aob di taras ǃoa ge ǃgû. Tsîs ge ǁîsa Jerusalems ǃnâ ǀgamǁî ǃâs ǃās dis ǃnâ ge ǁan hâ i. Tsî gu ge ǁîs ǀkha ge ǃhoa.

¹⁵Os ge ǁîgu ǃoa ge mî: Nētib ra ǃKhūb, Israeli Eloba mî: Mîba ǁnā aob, sago tita ǁga go sîba:

¹⁶Nētib ra ǃKhūba mî: Mû, tita ge ǂkhababa nē ǃās ǂama nîra ūhā tsî ǁîs di ǁansaben ǂama, ǁnā ǂkhanis, Judab gao-aob goro khomais di mîdi hoade.

¹⁷Tita ǁnāxū tsîn ge ǀkhara eloga gere ǀanǀanba amaga, titan nî ǃomgu ân di sîsenni hoab ǀkha ǁaixa kaise; ǁnā-amagab ge ti ǁgôasiba nîra ǂhubi nē ǃāsǀî, tsîb ge ǀari tide.

¹⁸Tsî gao-aob Judab dib, sago ǃKhūba go nî dîse go sîb ǁga go nēti mî: Nētib ra ǃKhūb, Israeli di Eloba mî: ǁNā mîdi, hîats go ǁnâudi xasa:

¹⁹Sa ǂgaob go tsau tsî ǃKhūb di ais aiǃâts go ǃgamǃgamsen amaga, ǁnâuts go ǃnubai nē ǃās tsî ǁîs di ǁansaben ǃoagu ta ge ǃhoa xūna, hîǀhuru tsî ǀâxare kain nîrasa, tsîts ge saran âtsa ǀkhau tsî ti ais aiǃâ ge ā, amaga ta ge tita ǁkhāti go ǁnâu-am tsi, tib ra ǃKhūba mî.

²⁰ǁNā-amaga kō, tita ge satsa sa îgu ǀkha nîra ǀhao kai, tsîts ge ǂkhîb ǀkha sa ǀhobas ǃnâ nîra ǁkhōhe, tsî sa mûra ge ǁnā ǂkhabab, nē ǃās ǂama ta nîra hā kaiba mû tide. O gu ge ǃereamsa gao-aoba ge ūsība.