Read Khoekhoegowab 2 Gao-aogu 23 Bible Online

2 Gao-aogu 23 - Khoekhoegowab bible

2 Gao-aogu 23

¹ǃNubaib ge gao-aoba ge sî, o gu ge kaigu Judab tsî Jerusalems tsîra digu hoaga ǁîb tawa ge ǀhaoǀhaohe.

²Tsî gao-aob ge ǃKhūb di ommi ǃoa ge ǃgû tsî Judab aogu hoagu tsî Jerusalems di ǁansaben hoan, ǁîb ǀkha tsî pristergu tsî kēbo-aogu tsî ǁaes hoasa ǂkhari-e xu kai-i kōse; tsîb ge ǁîn di ǂgaedi ǃnâ ǁnā ǂkhanis ǃgaeǀhaos dis, ǃKhūb di ommi ǃnâ ge hōhes di mîdi hoade ge khomai.

³Tsî gao-aob ge ǂkhâǃnâb tawa ge mâ i tsî ǃgaeǀhao-e ge dī ǃKhūb di ais aiǃâ, ǃKhūbab nî saoǃgon tsî ǁîb di mîmādi tsî ǁîb di ǃkhō-amdi tsî ǁîb di ǂnûiǂgādi tsînab ǂgaob hoab ǀkha tsî ǀoms hoas ǀkha nî ǃkhōǀgaipe, ti, mîdi ǃgaeǀhaos didi, ǁnā ǂkhanis ǃnâ xoahe hâde ra ǀgaiǀgaiǃâ. Tsî ǁaes hoas ge nē ǃgaeǀhaos ǃnâ ge ǂgâ.

⁴Tsî gao-aob ge ǀgapipristeri Hilkiab tsî ǀgamǁîse hâ pristergu tsî ǁāb ǃûi-aogu tsîga ge mîmā, î gu ǃKhūb tempela xu dīǂui ǁnā sîsenūdan, Baali tsî ǀhomas tsî ǀhommi di ǂnubis hoasa dībahe hâna; ob ge ǁîna Jerusalems ǃauga Kidronni di ǃaugu ai khauǃkhū tsî tsarab âna Bet-Els ǁga ge tani kai.

⁵ǁNās tawab ge ǁgôa-elopristergu, Judab gao-aogu ge ǂnûiga ge dīǁnâ, Judab ǃādi ǃnâ nî ǀgapigu ai ǀanǀanhega tsî Jerusalems ǂnamipe, tsî ǁnāgu, Baali tsî sores tsî ǁkhâb tsî ǀgamirodi tsî ǀhommi di ǂnubis hoasa ra ǀanǀanbagu tsîga.

⁶Tsîb ge ǁkhāti ǀhomas di ība ǃKhūb di omma xu Jerusalems ǃauga, ǃārob Kidronni ǁga ūǂui tsî ǃārob Kidronni tawa khauǃkhū tsî tsarab ase ge xontsautsau; tsîb ge ǁîb di tsaraba ǁaes ôan di ǀhobadi ai ge tsoro.

⁷ǁNās tawab ge ǀai-aogu ǃKhūb ommi tawa hâgu di omga ge khôaǁnâ, ǁnāpa di ge tarade ǀhomas īgu di omrode ge ǂgapuǃnâgu.

⁸Tsîb ge Judab di ǃādi ǃnâ hâ pristergu hoaga ūhā tsî ǀgapigu ǁnā pristergu, ǁîgu ai gere ǀanǀanga ge ǀuriǀuri, Gebasa xu Bersebas kōse; tsîb ge ǁāgu di ǀgapiga ge khôaǁnâ, ǁkhāti ǁnāb, Josuab ǃās di ǂamkhoeb di ǁāb tawa hâb, sats khoets ǃās di ǁāb ǃnâ ra ǂgâts di ǁareǀkhābǀî hâba.

⁹Xawe pristergu ǀgapigu digu ge ǃKhūb di altars, Jerusalems tawa hâs ai ǁguiba tama ge i, tsî gu ge ǀkhuruoǃnâ perena ǁîgu di ǃgâsagu ǁaegu gere ǂû.

¹⁰Tsîb ge Tofeti, Hinommi ôan di ǃgoaǃnāb ǃnâ hâb ona ge ǀuriǀuri, khoe-i xare-i ǃaruǀî ǁî-i di ôab kas, ǁî-i di ôas kas hoasa Moloxa ǀaesa ǃgûǃganu kaiba tidese.

¹¹Tsîb ge ǁkhāti ǁnā hāga ge dīǁnâ, Judab gao-aogu soresa ǂnûiba ge hâ iga, ǃKhūb di ommi ǃnâts ra ǂgâ ǃkhaisa xu, Natan-Melexi, omǃnāb di ǃoabasabeb, Parvarims ǃnâ hâb di omǃnāb kōse; tsîb ge kunidi sores dide ǀaes ǀkha ge khauǃkhū.

¹²Tsî ǁnā altardi, Axasi omǃnāb di ǂamais ai hâdi, Judab gao-aogu ge dī hâ idi, tsî ǁnâ altardi, Manaseb ge ǃKhūb ommi di ai-omkha ǃnâ dī hâ idi onab ge gao-aoba ge khôaǁnâ; tsî ǁnāpa xu hîkākā tsîb ge ǁîdi di tsaraba ǃārob Kidronni ǃnâ ge tsoroǂgā.

¹³Tsî ǁnā ǀgapigu, Jerusalems aiǃâ hâgu, ǃhommi Masiti di amǀkhāb ai hâgu, Salomob, Israeli gao-aob ge Astarots, Sidonǁîn di ǁgaidīb, tsî Kemob, Moabǁîn di ǁgaidīb, tsî Milkommi, Amonǁîn di ǁgaidīb tsîna ge ǂnubiba hâ igab ge gao-aoba ge ǀuriǀuri.

¹⁴ǁNās ǁkhās xaseb ge ǂnûikhâihesa īga ge khôaǁnâ tsî ǀhomade ge ǃhomǂui; tsîb ge ǁîgu di ǃkhaide khoeb di ǂkhōgu ǀkha ge ǀoaǀoa.

¹⁵ǁNās ǁkhās xase ǁnā altars Bet-Els tawa hâs, tsî ǁnā ǀgapib, Jerobeammi, Nebati ôab, Israela ge ǁore kaib diba, ǁnā altars tsî ǁnā ǀgapib onab ge ge khôaǁnâ; ā, ǀgapiba khauǃkhū tsîb ge ǁîsa tsarase ge xontsautsau tsî ǀhomasa ge khauǃkhū.

¹⁶Tsî Josiab ge ǂnan tsî ǀhobadi ǃhommi ai hâde mûo, ob ge sî tsî ǂkhōga ge ūǀkhī kai, ǀhobade xu tsî ǁîga ge khauǃkhū altars ai tsî ǁîsa ge ǀuriǀuri ǁnā mîs ǃKhūb dis, Elob aob nē xūna ge ǂhôab dis ǃoa.

¹⁷Tsîb ge: Mâ ǀhobaǀui-e ǁnā ta ra mû-e? ti ge mî. On ge khoen ǁnā ǃās dina ǁîb ǃoa: Nēs ge ǀhobas ǁnā Elob aob, Judaba xu hā tsî nē xūn, sats nē altars Bet-Els disa go dī-ūna ge ǂhôab disa, ti ge mî.

¹⁸Ob ge: Ab ǁgoe î-i khoe-i xare-e ǁîb di ǂkhōga tā gongon! ti ge mî. Nētin ge ǁîb di ǂkhōga ge sâu ǁnā kēbo-aob, Samariasa xu ge hāb di ǂkhōgu ǀkha.

¹⁹ǁNās tawab ge Josiaba ǁkhāti ǀgapigu di omgu, Samarias di ǃādi ǃnâ hâgu, Israeli di gao-aogu, ǃKhūba gu nî ǁaibǀî ǂkhaiǂkhaise ge ǂnubiga ge ūbē; tsîb ge ǁîga ge dī-ū, Bet-Elsab ge dī-ūs ǁkhās xase.

²⁰Tsîb ge ǀgapigu di pristergu, ǁnāpa hâgu hoaga altardi ai ge ǂā tsî khoen di ǂkhōga ǁîdi ai ge khauǃkhū. ǁNās khaoǃgâb ge ǁkhawa Jerusalems ǃoa ge oa.

²¹Tsî gao-aob ge ǁaes hoasa mîmā tsî ge mî: ǃKhūb, sadu Eloba Pasxaba dība, nē ǂkhanis ǃgaeǀhaos dis ǃnâ xoahe hâ khami.

²²Nē Pasxab khami ī-i ǀnî-i ge dīhe tama ge hâ i ǁnā ǂhanuǂhanu-aogu di tsēde xu tsî ǁkhāti Israeli gao-aogu di tsēdi ǃnâ tsî ǁkhāti Judab gao-aogu di tsēdi ǃnâ.

²³Tsî disiǁkhaisaǀaǁî kurib gao-aob Josiab dib ǃnâb ge nē Pasxaba ǃKhūba ge dībahe, Jerusalems tawa.

²⁴Tsîb ge Josiaba ǁkhāti ge dībē aimûǀgaru-aogu tsî ǁgâuaǁkhāǁkhāsabegu tsî omelogu tsî ǁgôa-elogu tsî ǁgaiǁgaisan, Judab ǃhūb ǃnâ tsî Jerusalems ǃnâ ge mûsa in hoan tsîna, ǂhanub di mîdi, ǂkhanis ǃnâ xoahe hâdeb nî ǀgaiǀgaise, ǁnā ǂkhanis, pristeri Hilkiab ge ǃKhūb di ommi ǃnâ hōsa.

²⁵Tsî ǁîb aiǃâb ǁîb khami ī gao-aoba ge hâ tama hâ i, ǂgaob âb hoab ǀkha tsî ǀoms âb hoas ǀkha tsî ǀgaib âb hoab ǀkha ǃKhūb ǃoa ge ǃhobasenna Moseb di ǂhanub hoab ǃoa, tsî ǁîb khaoǃgâb ge ǁîb khami ība khâi tama ge hâ i.

²⁶Xawe ǃKhūb ge khau hâ ôasasib ǁîb di kai ǁaib diba xu oa tama, Judabǀî ge khau hâ iba, ǁnā ǂoeǂoedi Manaseb ge ǁîba ǂoeǂoe-ūdi hoadi ǃaroma.

²⁷Tsîb ge ǃKhūba ge mî: Tita ge Judab ona ti aisa xu nîra dībē, Israela ta ge dībēs ǁkhās xase; tsî tita ge nē ǃās Jerusalems hîa ta ge ǁhûiǂuibasensa nîra aoxū tsî ǁnā ommi, ǁîb xa ta ge ti ǀons ge ǁnāpa nîra hâ, ti a mîba.

²⁸Tsî nau xūn, Josiab ǃnaeǃkhaidi din tsîb ge dīn hoan ge ǃNaeǃkhaidi di ǂkhanis Judab gao-aogu dis ǃnâ xoahe hâ.

²⁹ǁÎb di tsēdi ǃnâb ge Farao Nexob, Egipteb gao-aoba Asiriab gao-aob ǃoagu ge ǃapa, ǃāb Eufrati ǁga; ob ge gao-aob Josiaba ǁîba ge ǃgûǃoa tsîb ge ǁîba, mû bib geo, ge ǃgam Megidos tawa.

³⁰Tsî ǃgāgu âb ge ǁîba ǁō hâse kuni-i ai ge ǃgû-ū Megidosa xu, tsî gu ge ǁîba Jerusalems tawa ūsī tsî ǀhobas âb ǃnâ ge ǁkhō. Tsî ǁaes ǃhūb dis ge Joahab, Josiab ôaba ū tsî ǂkhauǀkhā tsî ge gao-aodī, ǁîb îb di ǃās ǃnâ.

³¹ǀGamdisiǃnonaǀa kurixab ge Joahaba ge i, gao-ao kaib ge ǃnubai, tsîb ge ǃnona ǁkhâgu kōse ge gaosîsen Jerusalems tawa; tsî ǀons ǁîb îs dis ge Hamutal ge i, Jeremiab Libnas dib di ôasa.

³²Tsîb ge ǁîba ǃKhūb mûǁae a ǂkhabana gere dī, ǁîb îgu ge dīn hoan ǃoa.

³³Tsî Farao Nexob ge ǁîba Riblas tawa Hamatǃhūb ǃnâ ge ǃgae kai, Jerusalems tawab gaosîsen tidega; tsîb ge ǃhūba ǁkharaǁguiba-e ge ǁguiǂam ǀguikaidisi talende ǀhaiǀurib xa tsî ǀgui talens ǃhuniǀurib xa.

³⁴Tsî Farao Nexob ge ǁkhāti Eljakimmi, Josiab ôaba ge gao-aodī ǁîb îb Josiab di ǃās ǃnâ, tsîb ge ǀons âba Jojakim ti ge ǀkharaǀkhara; xawe Joahabab ge ge ūǃgû, tsîb ge Egipteb ǃnâ sī tsî ǁnāpa ge ǁō.

³⁵Tsî Jojakimmi ge ǁnā ǀhaiǀurib tsî ǁnā ǃhuniǀuriba Faraoba ge mā; ob ge ǁîba ǃhūba ge ǁguiǂam, Faraob di mîmās ǃoab nî mariba māse; mâb hoab xab ge ǁguiǂams âb ǃoa ǀhaiǀurib tsî ǃhuniǀurib tsîkha ge ǂgaoǀkhā ǃhūb di ǁaes xa, Farao Nexobab nî māga.

³⁶ǀGamdisikoroǀa kurixab ge Jojakimma ge i, gao-ao kaib ge ǃnubai, tsîb ge disiǀguiǀa kuriga gere gaosîsen Jerusalems tawa; tsî ǀons ǁîb îs dis ge Sebuda ge i, Pedajab, Rumas dib di ôasa.

³⁷Tsîb ge ǁîba ǃKhūb mûǁae a ǂkhabana gere dī, ǁîb îgu ge dīs ǁkhās xase.