Read Khoekhoegowab 2 Gao-aogu 24 Bible Online

2 Gao-aogu 24 - Khoekhoegowab bible

2 Gao-aogu 24

¹ǁÎb di tsēdi ǃnâb ge Nebukadnesari, Babilons di gao-aoba ge ǃapa, tsî Jojakimmi ge ge ǁîb di ǃgā kai ǃnona kurigu kōse; ǁnās khaoǃgâb ge ǁnāǁgôa tsî ǁîba ge mâǃoa.

²Ob ge ǃKhūba ǁîb ǃoagu ge sî ǂnubidi Xaldeaǁîn didi tsî ǂnubidi Siriaǁîn didi tsî ǂnubidi Moabǁîn didi tsî ǂnubidi Amonni ôan dide, tsîb ge ǁîna Judab ǃoagu ge sî, ǁîba di nî hîkākāse ǁnā mîs, ǃKhūb dis, ǁîb ǃgāgu, kēbo-aogu di ǃoabasa xub ge ǃhoas ǃoa.

³ǃKhūb di mîmās ǀguisa xus ge nēsa Judaba ge ība, ǁîb di aisa xub ge ǁîna dībē ǃkhaisa, Manaseb di ǀǀoren ǃaroma, ǀǀîb ge dīn hoan ǃoa;

⁴tsî ǁkhāti ǁnā ǀhapio ǀaob, ǁîb ge ǂnâxūb ǃaroma, Jerusalems ge ǀhapio ǀaob ǀkha ǀoas kōse; ǁnā-amagab ge ǃKhūba ǀûba bi ǂgao tama ge i.

⁵Tsî nau xūn, Jojakimmi ǃnaeǃkhaidi din tsî ǁîb ge dīn hoan ge ǃNaeǃkhaidi di ǂkhanis Judab gao-aogu dis ǃnâ xoahe hâ.

⁶Tsî Jojakimmi ge ǁō tsî ǁîb îgu tawa ge ǁkhōhe; tsî ǁîb ôab Jojaxinni ge ǁîb di ǃās ǃnâ ge gao-ao kai.

⁷Tsî gao-aob Egipteb dib ge ǃaruǀî ǁîb di ǃhūba xu ǂnauǂui tama ge i; Babilons di gao-aob ge Egipteb di ǃāba xu ǃāb Eufrati kōse gao-aob Egipteb dib di ge in hoana ū xui-ao.

⁸Jojaxinni ge disiǁkhaisaǀa kurixa ge i, gao-ao kaib ge ǃnubai, tsîb ge ǃnona ǁkhâga ge gaosîsen Jerusalems tawa; tsî ǀons ǁîb îs dis ge Nehusta ge i, Elnatanni, Jerusalems dib di ôasa.

⁹Tsîb ge ǁîba ǃKhūb mûǁae a ǂkhabana gere dī, ǁîb îb ge dīn hoan ǃoa.

¹⁰ǁNā ǁaeb ǁkhāb ai gu ge Nebukadnesari, Babilons gao-aob ǃgāga Jerusalems ǁga ge hā; os ge ǃāsa ge xāǂgāhe.

¹¹Tsî Nebukadnesari, Babilons gao-aob ge ǁkhāti aitsama ǃās ǃoagu ge hā, ǁîb di ǃgāgu ge ǁîsa xāǂgā ǃnubai.

¹²ǃNubaib ge Jojaxinni, Judab gao-aoba Babilons gao-aob ǃoa ge ǂoa, ǁîb tsî ǁîb îs tsî ǁîb ǃgāgu tsî ǁîb gaosagu tsî ǁîb di omǃoabasabegu tsîna. Ob ge Babilons di gao-aoba ǁîba ge ǃkhō disiǁkhaisaǁî kurib ǁîb gaosis dib ǃnâ.

¹³Tsîb ge ǁnāpa xu ge ūǂoaxa ǁuigu ǃKhūb di ommi digu hoaga tsî gao-aob ommi di ǁuiga; tsîb ge ǃhuniǀurisoadi Salomob, Israeli gao-aob ge ǃKhūb di tempeli ǃnâ dī kaidi hoade ge ǁhāǂkhūǂkhū, ǃKhūb ge mî xase.

¹⁴Tsîb ge Jerusalems hoasa ge ūǃgûbē gaosagu hoagu ǀkha tsî ǃkham ǁkhā ǁē-aogu hoaga, disiǀoadisi ǃkhōsagu tsî haikuru-aogu tsî ǀuriǂnau-aogu tsîga; khoe-i xare-i ge ǃgau tama ge i, ǀgâsa ǁaes ǃhūb dis ǀguis.

¹⁵Nētib ge ǁîba Jojaxinna ge ūǃgûbē Babilons ǁga, gao-aob îs tsî gao-aob taradi tsî ǁîb di omǃoabasabegu tsîn ǀkha; tsî ǀgaisagu ǃhūb digab ge ǃkhōsase ge ūǃgû Jerusalemsa xu Babilons ǁga;

¹⁶tsî ǁkhā khoegu hoaga hûǀoadisigu kōse tsî haikuru-aogu tsî ǀuriǂnau-aogu tsîga ǀguiǀoadisigu kōse tsî ǁē-aogu, toroba ǁkhāba hâgu hoaga; ǁîgab ge gao-aob Babilons diba ǃkhōsase Babilons ǁga ge ūsī.

¹⁷Tsî gao-aob Babilons dib ge Matanjab, Jojaxinni di ǁnaosaba, ge gao-aodī ǁîb di ǃās ǃnâ, tsîb ge ǁîb ǀonsa Sedekia ti ge ǀkharaǀkhara.

¹⁸Tsî Sedekiab ge ǀgamdisiǀguiǀa kurixa ge i, gao-ao kaib ge ǃnubai tsîb ge disiǀguiǀa kurigu kōse gere gaosîsen Jerusalems tawa; tsî ǀons ǁîb îs dis ge Hamutal ge i, Jeremiab, Libnas dib di ôasa.

¹⁹Tsîb ge ǁîba ǃKhūb mûǁae a ǂkhabana gere dī, Jojakimmi ge dīn hoan ǃoa.

²⁰Nēn ge ī xui-ao, ǃKhūb di ǁaib Jerusalems ǃoagu, tsî Judab ǃoagub ūhâb ǃaroma, ǁînab ge ais âba xu aoxūs kōse. Tsîb ge Sedekiaba Babilons gao-aoba ge mâǃoa.