Read Khoekhoegowab 2 Gao-aogu 3 Bible Online

2 Gao-aogu 3 - Khoekhoegowab bible

2 Gao-aogu 3

¹Tsî Jorammi, Axab ôab, ge Israeli ǂama ge gao-ao kai Samarias tawa disiǁkhaisaǀaǁî kurib Josafati, Judab di gao-aob dib ǃnâ, tsîb ge disiǀgamǀa kuriga gere gaosîsen.

²Tsîb ge ǃKhūb mûǁae a ǂkhabana gere dī, xawe ǁîb îb tsî ǁîb îs tsîra khami tama; ǁnā ǂnûikhâihesa īb Baali dib, ǁîb îb ge dībab ge dībē xui-ao.

³Ti ī xaweb ge Jerobeammi, Nebati ôab, Israela ge ǁore kaib di ǁoren tawa ge ǂgāsen; ǁîna xub ge ǂgō tama ge i.

⁴Tsî Mesab, Moabǁîn di gao-aob ge ǀgoaǁama-ao ge i, tsîb ge Israeli di gao-aoba ǀguikaidisiǀoadisi ǁkhaona ge ūhāba tsî ǀguikaidisiǀoadisi bairaǀûn tsîna.

⁵Tsî i ge ge ī, Axab ge ǁō ǃnubaib ge Moabǁîn di gao-aoba Israeli di gao-aoba xu ǁnāǁgôa ǃkhaisa.

⁶Nētib ge gao-aob Joramma ǁnā ǁaeb ǁkhāb ai Samariasa xu ǂoa tsî Israeli hoaba ge ǃgôa.

⁷Tsîb ge ǃgû tsî sî Josafati, Judab gao-aob ǃoa tsî ge mî: Moabǁîn di gao-aob ge tita xu ge ǁnāǁgôa; tita ǀkha ǃgûts nî torob ǃnâ Moabǁîn ǃoagu? Ob ge ge mî: Tita ge nî sī ǃapa, o ta ge sats ī khami nî ī, os ge ti ǁaesa sa ǁaes khami ī tsî ti hāna sa hān khami nî ī.

⁸Ob ge ge mî: Mâ daoba-ū khom nî ǃapa? Ob ge: Edommi ǃgaroǃhūb di daoba-ū, ti ge mî.

⁹Nētib ge Israeli gao-aoba ge ǃgû tsî Judab gao-aob tsî Edommi gao-aob tsîga; tsî hû tsēde gu ge ǃgûmao, on ge ǁgoeǃkhais din tsî ǀgoan, ǁîga ra saon tsîna ǁgam-e ūhâ tama ge hâ i.

¹⁰ǃNubaib ge Israeli gao-aoba ge mî: Okha, ǃKhūb ge nē ǃnona gao-aoga go ǂgai, ǁîgab nî Moabǁîn ǃomǁae māse.

¹¹Ob ge Josafata ge mî: ǃKhūb di kēbo-ao-e nēpa hâ tama i hâ, î ge ǁî-e xu ǃKhūba dî ǁkhā? ǃNubaib ge Israeli gao-aob di ǃgāgu ǀguiba ǃeream tsî ge mî: Nēpab ge hâ Elisab, Safati ôab, Eliab di ǃomkha ai ǁgam-e gere ǂnâba.

¹²Ob ge Josafata ge mî: ǃKhūb di mîs ge ǁîb ǀkha hâ. Nēti gu ge Israeli gao-aob tsî Josafati tsî Edommi gao-aob tsîga ǁîb ǃoa ge ǁgôa.

¹³Xawe Elisab ge Israeli gao-aob ǃoa: Tare-e ta sats ǀkha ǁae hâ? ǃGû sa îb di kēbo-aogu tsî sa îs di kēbo-aogu ǃoa, ti ge mî. Ob ge Israeli gao-aoba ǁîb ǃoa ge mî: Hî-î, ǃKhūb kom nē ǃnona gao-aoga go ǂgaio, ǁîgab nî Moabǁîn ǃomǁae māgao.

¹⁴Ob ge Elisaba ge mî: ǃKhūb ǂnubidi dib, ǁîb aiǃâ ta mâb a ûitsama ǃkhais ao: Josafati, Judab gao-aob di aisa ta ga ǃkhōǃoa tama hâ io, o ta ga satsa ǃgapaǀî tama i hâ, tsî ta ga kō tsi tama i hâ.

¹⁵Î go ǁnâi ǀkhō-ao-e ūhāba te re. Tsî i ge ge ī, ǀkhō-aob ge ǁapagu ai ǀkhō-o, ob ge ǃKhūb di ǃomma ǁîb ai ge hā.

¹⁶Tsîb ge ge mî: Nētib ra ǃKhūba mî: Nē ǃgoaǃnāb ǃnâ ǂgui āga dībasen.

¹⁷Nētib ra ǃKhūba mî xui-ao: Sadu ge ǂoa-e mû tide tsî sadu ge ǀapi-e mû tide, xaweb ge nē ǃgoaǃnāba ǁgam-i xa nîra ǀoa, sadu nîra āse, sadu tsî sadu di ǀgoan tsî sadu di goman tsîdo.

¹⁸Tsî nēs ge ǂâu tama hâ ǃKhūb mûǁae, ǁîb ge ǁkhāti Moabǁîna sago ǃomǁae nîra mā.

¹⁹Tsî go ge ǁaposa ǃādi hoadi tsî ǃkhōǂuihesa ǃādi hoade nîra ǂnau, tsî go ge ǃgâi haidi hoade nîra ǁhāǁnâ, tsî go ge ǀaudi hoade nîra ǂganam; tsî ǃhanagu di ǃgâi ǃâdi hoade go ge ǀuidi ǀkha nîra hîkākā.

²⁰Tsî i ge ǃnauǁgoaga ǂûǁguibas ra ǁguibahe ǃnubai ge ī, mû, o-i ge ǁgam-e Edommi ǀkhāba-ū ge hā, ǃhūb ge ǁgam-i xa ǀoas kōse.

²¹Tsî Moabǁîn hoan ge ǁnâuo, gao-aogu go hā ǃkhaisa, ǁîna gu nî ǃkhamūga, on ge ge ǂgaiǀhaohe, ǃgaesenna ra ǃgae khoena xu ǁîna ǃnā hân kōse, tsîn ge ǀkharib tawa sī ge mâ.

²²Tsî ǃnauǁgoagan ge khâio, tsî sores ge ǁnā ǁgam-i ǂama ǁhaio, on ge Moabǁîna ǁnā ǁgam-e ǁîn ǃoa-ai ǀapase ge mû, ǀaob axase.

²³On ge ge mî: Nēb ge a ǀao; gao-aogu ge ǂanǂansase hîkākāgu hâ gôab ǀkha, tsî ǀguib ge nauba go ǂnau; nēsi ǁkhâuǁnâxūn ǁga, sadu Moabǁîdo!

²⁴Xawe Israeli di ǁgoeǃkhais tawan ge sīo, on ge Israelǁîna khâi tsî Moabǁîna ge ǂnau; on ge ais ân aiǃâ ge ǁhâ; ā, ǃhūb ân ǃnâ sī, tsîn ge ǁkhāti ǁnāpa Moabǁîna ge ǂnau.

²⁵Tsîn ge ǃāde ge khôaǁnâ, tsî mâ-i hoa-i ân ge ǁî-i di ǀuisa ǃhanagu di ǃgâi ǃâdi hoadi ai ao tsî ǁîde ge ǀoaǀoa, tsîn ge ǀaudi hoade ge ǂganam tsî haidi hoade ge ǁhāǁnâ, Kir-Heres di ǀuidi ǀguiden ge ǃgaus kōse; tsî kēbo-aogu ge ǁîsa xāǂgā tsî ge ǂnau si.

²⁶Tsî Moabǁîn di gao-aob ge mûo ǃkhammi xab ra dāhe ǃkhaisa, ob ge hûkaidisi aogu, gôaba ra ǂgaeǂuiga ǁîb ǀkha ge ū, Edommi di gao-aob kōseb nî ǃganuse; xawe gu ge ǁkhā tama ge i.

²⁷ǃNubaib ge ǁîb di ǂguroǃnaesabeb hîa nî ǁîb di ǃās ǃnâ gao-ao kaiba ū tsî ǁîba ǂnubiǂgoab ai khauǁguibase ge ǁguiba. ǁÎ ǃkhaisa xub ge Israeli ǃnâ kai ǁaiba ge hā; on ge ǁîba xu bē tsî ǁîn ǃhūb ǃoa ǁkhawa ge ǁaru.