Read Khoekhoegowab 2 Gao-aogu 4 Bible Online

2 Gao-aogu 4 - Khoekhoegowab bible

2 Gao-aogu 4

¹Tsî tara-i kēbo-aogu di ôagu di-i ge Elisaba ǂgaiǀî tsî ge mî: Sa ǃgāb, ti aob ge ge ǁō, tsî sats ge a ǂan, sa ǃgāb ǃKhūba ge ǃaoǃgâ ǃkhaisa; tsî nēsib ge surudeǀhonkhoeba go hā, ti ôakhab nî ǃgāse ūbasense.

²Ob ge Elisaba ǁîs ǃoa ge mî: Tare xū-e ta nî dība si? ǂAnǂan te re tarexūnas ommi ǃnâ ūhâ ǃkhaisa. Os ge: Sa ǃgāta ge ǀnî xū-e ommi ǃnâ ūhâ tama hâ, ǀgui ǂkhenas olib ǀkha hâs ǀguis, ti ge mî.

³ǃNubaib ge ǁîba ge mî: ǃGû îs sa ǁanǁare-aon hoan tawa soade sī ǂgan, ǀkhaiǃnâ soade; dī îs ǂguide hō.

⁴Îs ǂgâ îs sa khaoǃgâ tsî sa ôakha khaoǃgâ dao-amsa ǂganam îs ǁnā soadi hoadi ǃnâ ǁhōǂgā, îs ǀguis ga ǀoao, ǁîsa mâibē.

⁵Nētis ge ǁîba xu tsî dao-amsa ge ǂganam ǁîs khaoǃgâ tsî ǁîs ôakha khaoǃgâ; ǁîkha ge soade ǁîsa ge ūhāba, tsî ǁîs ge ge ǂnâǂgā.

⁶Tsî i ge ge ī, ǁnā soadi ge ǀoao, os ge ǁîs di ôab ǃoa: ǀNî soasa ūhāba te re, ti ge mî. Xawe ǁîb ge: ǀNî soa-i ge a ǀkhai, ti ge mî. Ob ge oliba ge ǂnâǀû.

⁷ǃNubais ge hā tsî Elob aoba ǁîsa ge ǂanǂan, ob ge ǁîba ge mî: ǃGû îs oliba ǁamaxū, îs sa surudeǀhonkhoeba matare; î du sas tsî sa ôakha tsîdo ǃgau nî-e xu ûi.

⁸Tsî i ge ǁkhāti ǀguitsē ge ī, Elisab ra Sunems ǃoa ǃgâu ǃkhaisa; ǁnāpas ge ǃkhū hâ tarasa ge hâ i, ǁîba ge ǁkhausa, ǁîs ǀkhab nî pereǂûse. O i ge ge ī, ǃgâub gere ǃnās hoas aib ge ǁîs tawa gere sī ǃkhaisa, pereǂûb nîga.

⁹Os ge aob âs ǃoa ge mî: Kō, tita ge go hōǃâ, nē aob Elob dib hîa samma-ū ra ǃkharub a ǃanu ǃkhaisa.

¹⁰Xuige am ǁîba ǂamǃnā-omrosa dība ǂnubiǂgoab ǀkha, îm ǁîba kharob tsî tāb tsî ǂnû-aiǃnaos tsî kandelars tsîna mâiba; o i ge nî ī, sam tawab ga hā ǃnubaib ge ǁnāpa nî sī ǂgâ.

¹¹Tsî ǀguitsēb ge ǁnāpa a sī, ob ge ǁnā ǂamǃnā-oms ǃnâ ǂgâ tsî ǁnāpa ge ǁgoe.

¹²ǃNubaib ge ǃgāb âb, Gehasib ǃoa: Nē Sunemǁîsa ǂgai! ti ge mî. Tsî ǂgai sib geo, os ge ais âb aiǃâ ge hā mâ.

¹³Elisab ge ǁîs ǃoa mî xui-ao: Îts ǁîsa mîba: Mû, sas ge sikhoma ge ǂhansenba nē ǂhansens hoas ǀkha; mâ xū-es dīdawa-amhe ǁkhā? Xū-i hîa gao-aob ǃoas kas, toroǂamkhoeb ǃoas kasas nî ǃhoabahe-e hâ i a? Os ge ǁîsa: Tita ge ti ǁaes ǁaegu ǁan hâ, ti ge mî.

¹⁴Ob ge: Tare xū-es kha ǁnâi dībahe ǁkhā? ti ge mî. Ob ge Gehasiba: ǀGôabas ge ūhâ tama hâ, tsî aob âs ge kaira hâ, ti ge mî.

¹⁵ǁNā-amagab ge: ǂGai sī re, ti ge mî. Tsî ǂgai sib ge ǃnubais ge dao-ams ǃnâ ge hā mâ.

¹⁶Ob ge ǁîs ǃoa ge mî: Nau kurib ǃnâ nē mîmâisa ǁaeb ûib dib ǁkhāb ais ge sasa ǀgôaba nîra ǁnam. Os ge ǁîsa: Hî-î, ti ǀhonkhoe, Elob aotse, sa ǃgāta tā ǂhumiba re! ti ge mî.

¹⁷Tsî taras ge ǀgamǀkhā tsî mîmâisa ǁaeb ai, nau kurib ǃnâ ǀgôaba ge ǁora, Elisab ge ǁîs ǃoa ǃhoa khami.

¹⁸Tsî ǀgôab ge kaio, o i ge ǀguitsē ge ī, ǁgûb ǃoab ra ǂoa ǃkhaisa, ǃgao-aogu ǃoa.

¹⁹Tsîb ge ǁgûb ǃoa: Ti danase, ti danase, ti ge mî. Ob ge ǃgāgu di ǀguib ǃoa: ǁGûsa ǁîba tanisība, ti ge mî.

²⁰Ob ge ǁîba tani tsî ǁgûsa ge ūsība bi. Tsîb ge ǁîs di ǁgoara ai ge ǂnû, tsēǃgâǁaeb kōse; ǃnubaib ge ge ǁō.

²¹Os ge ǃgû tsî ǁîba Elob aob di kharob ai ge ǁgui; ǁnās khaoǃgâs ge ǁîb khaoǃgâ ǂganam tsî ge ǂoa.

²²Tsîs ge aob âsa ǂgai tsî ge mî: ǃGāgu di ǀguib tsî eseldi di ǀguis tsîna sîba te re, î ta Elob aob ǃoa ǃkhoe, î ta ǁkhawa oa.

²³Ob ge ǁîba: Tarexas ra nētsē ǁîb ǃoa ǃgû? ǂKham ǁkhâb di tsē tsî sâtsē tama i komo, ti ge mî. Os ge ǁîsa: ǂKhî re, ti ge mî.

²⁴ǁGoasis ge eselsa ǃgaeǃgâ tsî ǃgāb âs ǃoa ge mî: Doeǁgahâhâ îts ǃgapis ǃnâ tā ǀhawe kai te, mîba tsi tama ta ka io.

²⁵Nētis ge ǃgû tsî Elob aob tawa ge sī, Karmelǃhommi tawa. Tsî i ge ge ī, Elob aob ge ǁîsa ǁîb ǃoa-ai mûo, ob ge Gehasib, ǃgāb âb ǃoa ge mî: Mû, Sunemǁîs ge nē hâ.

²⁶ǁNâi ǃkhoeǃoa si îts mîba si: Sasa ǃgâises hâ? Sa aoba ǃgâiseb hâ? Sa ôaba ǃgâiseb hâ? Os ge: ǃGâi a, ti ge mî.

²⁷Tsî Elob aob ǁgas ge ǃhommi tawa sīo os ge ǂaira âb ai ge ǃkhōbasen. Ob ge Gehasiba ge dāhā, ǁîsab nî ǂhābēga, xawe Elob aob ge ge mî: ǀÛǀkhā si re, ǀoms âs ge ǁîs ǃnâ ause ǃoa hâ, tsî ǃKhūb ge ǁî ǃkhaisa gaugau-ai te hâ tsî ǂhôa te tama hâ.

²⁸Tsîs ge ǁîsa: ǀGôaba ǂgan tsi ta ge xare, ti ǀhonkhoetsa? ti ge mî. Tā ǂhumiba te! ti mî tama ta hâ?

²⁹Ob ge ǁîba Gehasib ǃoa ge mî: ǃGae sa kamanaba îts ti ǁgâibasenhaiba sa ǃomǁae ū îts ǃgûsī; khoe-ets ga hō-o, tā ǁî-e tawede, tsî khoe-i xats ga tawedeheo, tā ǁî-e ǃeream, îts ti ǁgâibasenhaiba ǀgôab di ais ai ǁgui.

³⁰Xawe ǀgôab îs ge ge mî: ǃKhūb a ûitsama tsî sa ǀoms a ûitsama ǃkhais ao ta ge tita ǁnāxū tsi tide. Ob ge khâi tsî ǁîsa ge sao.

³¹Tsî Gehasib ge aiǃgû tsî ǁgâibasenhaiba ǀgôab di ais ai ge ǁgui; xawe dommi tsî ǃgaoǃgâ-i ge ǀkhai ge i. Ob ge ǁîba ǁkhawa oaǂoa tsî ǂhôa bi tsî: ǀGôab ge ǂkhai tama hâ, ti ge mî.

³²Tsî Elisab ge ommi ǃnâ sīo, mû, ob ge ǀgôaba ǁō hâse kharob âb ai ge ǁgoe i.

³³Ob ge ǂgâ tsî dao-amsa ǁî ǀgamkha khaoǃgâ ge ǂganam tsî ge ǀgore.

³⁴Ob ge ǃapa tsî ǀgôab ai ǁgoe tsî ams âba ǁîb di ams ai tsî mûra âba ǁîb mûra ai tsî ǃomkha âba ǁîb di ǃomkha ai ra ǁguiǃâb ge ǁîb ǂamai ge khoraǂuisen. Ob ge ǀgôab di ǀkhāba ge ǃnae.

³⁵ǁGoasib ge ǁkhawa khâi tsî ommi ǃnâ nēǀî tsî nauǀî ge ǃgûma, tsîb ge ǁkhawa ǃapa tsî ǁîb ǂamai ge khoraǂuisen; ob ge ǀgôaba hû ǃnādi kōse ge tsî; ǁnās khaoǃgâb ge ǀgôaba mûra âba ge khowa.

³⁶Ob ge Gehasiba ǂgai tsî: Nē Sunemǁîsa ǂgai, ti ge mî. Ob ge ge ǂgai si, tsîs ge ǁîb tawa ge hā; tsîb ge: Sa ôaba ū! ti ge mî.

³⁷Os ge hā tsî ǂaira âb aiǃâ ǁnāǁgoe tsî ǃhūb ai ge ǃgamǃgâ; tsîs ge ǀgôab âsa ū tsî ge ǂoa.

³⁸Tsî Elisab ge ǁkhawa Gilgals tawa sīo, ob ge ǃâtsūǀkhāba ge hâ i ǁnā ǃhūb ǃnâ, tsî ǀgôagu kēbo-aogu digu ge ais âb aiǃâ ge ǂnôa i. Ob ge ǃgāb âb ǃoa ge mî: Kai sūsa mâi-ai îts kēbo-aogu di ôaga ǁhaon xa sâiba.

³⁹ǃNubaib ge ǀguiba ǃgarob ǃoa ge ǂoa, ǁhaon xab nî ǀhaoǀhaoga; tsîb ge ǃaub di ǂauxûiǂûhai-e ge hō tsî ǁî-e xu tôan ǃaub dina ge hare, sarab âb di ǀoase, tsîb ge ǁîna ǁhaon di sūs ǃnâ ge aoǂgā, ǁîna gu a ǀū xui-ao.

⁴⁰ǁNās khaoǃgân ge aoga ge horaba, ǂû gu nîse; tsî i ge ge ī, ǁnā ǂû-i xa gu ge ǂû ǃnubai gu ge ǂgai tsî: Elob aotse, ǁōb ge sūs ǃnâ hâ, ti mî ǃkhaisa. Tsî gu ge ǁî-e ǂû ǁoa ge i.

⁴¹Ob ge ǁîba: Tsampereb xa ūhā, ti mî tsî ǁîba sūs ǃnâ ge aoǂgā; tsîb ge: ǁÎga horaba î gu ǂû! ti ge mî. ǃNubai i ge tsū-i xare-e sūs ǃnâ hâ tama ge hâ i.

⁴²Tsî aore khoe-i ge Baal-Salisasa xu hā tsî Elob aoba ǂgurosan di peregu xa ǀgamdisi gerstperegu tsî ǁhōs âgu ǃnâ hâ ǃam ǃnurugu tsîna ge ūhāba; ob ge: ǁÎga mā î gu ǂû! ti ge mî.

⁴³Ob ge ǃgāb âba: Mati ta kha ǁîna ǀguikaidisi aoga nî mâi-aiǃâ? ti ge mî. Xaweb ge: ǁÎga mā, î gu ǂû! ti ge mî; nētib ra ǃKhūba mî: ǂÛ tsîn ge nîra ǃgau xuige.

⁴⁴Ob ge ǁîna ǁîga ge mâi-aiǃâ, tsî gu ge ǂû tsî ge ǃgau, ǃKhūb di mîs ǃoa.