Read Khoekhoegowab 2 Gao-aogu 5 Bible Online

2 Gao-aogu 5 - Khoekhoegowab bible

2 Gao-aogu 5

¹Tsî Naamanni, Siriab gao-aob di toroǂamkhoeb ge ǀhonkhoeb âb di ais aiǃâ kai ao tsî ǀgapiǃgôahesa ge i; ǁîba xu i ge ge ī xui-ao, ǃKhūb Siriaǁîna dansa ge mā ǃkhaisa; ob ge nē aoba ǃgari ǁē-ao tsî xawe ǃomamaxa ge i.

²Tsî di ge toroǂnubide Siriaba xu ǂoa tsî ǂkham ǀgôasa Israeli di ǃhūba xu ǃkhōsase ge ūǃgû hā, Naamanni taras di ǃoabas ǃnâ ge hâ isa.

³Tsîs ge ǁîsa ǀhonkhoes âs ǃoa ge mî: Ae, ti ǀhonkhoeb ga koma ǁnā kēbo-aob, Samarias tawa hâb di ais aiǃâ hâ hâo, ob ge ga ǁîba ǃomamasis âba xu ore hâ.

⁴ǃNubaib ge ǁîba ǂgâ tsî ǀhonkhoeb âba sī ǂanǂan tsî: Nēti tsî nētis ge ǁnā ǂkham ǀgôas Israeli ǃhūb disa ge ǃhoa, ti ge mî.

⁵ǃNubaib ge Siriab di gao-aoba ge mî: ǃGû îts sī, o ta ge tita Israeli gao-aoba ǂkhani-e nî sîba. Ob ge ǃgû tsî ǃomǁaeb âb ǃnâ disi talendi ǀhaiǀurib xa tsî ǃnaniǀoadisi sekeln ǃhuniǀurib tsî disi anaǃkhunisaran xa ge ū.

⁶Tsîb ge ǂkhanisa Israeli gao-aoba ge ūsība, nēti ra mîsa: Tsî nēsi, nē ǂkhanis ga sa tawa sīo, mû, tita ge ti ǃgāb Naamanna sa ǃoa go sî, ǃomamasis âba xuts nî ǁîba orega.

⁷Tsî i ge ge ī, Israeli di gao-aob ge ǂkhanisa khomaio, ob ge saran âba ǀkhau tsî: Elota kha ǁnâi tita, ǃgam tsî ûi-ûi ǁkhā ta, ob ra ǁîba tita ǃoa sî, khoeba ta nî ǃomamasis âba xu orese? ti ge mî. ǂAnǃā î du mû, nēb ra ǀhapiǀhapiǃkhai-e ti ǃoagu ôa ǃkhaisa.

⁸Tsî i ge ge ī, Elisab Elob aob ge ǁnâuo, Israeli gao-aob saran âba go ǀkhau ǃkhaisa, ob ge gao-aob ǃoa sî tsî ge mîba kai bi: Tare xū-i ǃaromasa sa saranats go ǀkhausa? Ab ti tawa hā re, ob ge nî ǂan, kēbo-ao-i Israeli ǃnâ hâ ǃkhaisa.

⁹Nētib ge Naamanna ǁîb hān tsî ǁîb kunidi tsîn ǀkha hā tsî Elisab ommi dao-ams aiǃâ ge mâ.

¹⁰ǁGoasib ge Elisaba sîsabeba ǁîb ǃoa sî tsî: ǃGû îts hû ǃnāde Jordanǃāb ǃnâ sī khōsen, os ge ǁgans âtsa ǁkhawa nîra ǀkhība tsi, ots ge nîra ǃanu, ti ge mî.

¹¹Ob ge Naamanna kaise ǁaixa tsî bē tsî ge mî: Mû, tita ge tita ǃnâ go ǂâi, ǂoaxa tsîb mâ tsî ǃKhūb, ǁîb Elob di ǀonsa ǂgaiǀî tsî ǃommi âb ǀkha ǃkhaisa ǀnopo-ai tsî ǁnāti ǃomamasisa nî sîsenbē, ti.

¹²Abanab tsî Parpari tsîkha, Damaskus di ǃākha, Israeli di ǁgamgu hoagu ǃgâ-ai ǃgâi tama kha hâ? ǁÎkha ǃnâ khōsen tsî ta kha ǁnâi ǃanu tide? Nētib ge oa tsî kai ǁgôasib ǃnâ ge bē.

¹³ǃNubai gu ge ǃgāgu âba dāhā tsî ǁîba ǃhoaǀî tsî ge mî: Ti îtse, kēbo-aob ga kai xū-e ǂgaoǀkhā tsi hâo, ǁnâi dī tamats ga i hâ ǁî xū-e? Matikō ǃnā hâsets ga dī: Khōsen, ots ge nî ǃanu, tib go mîǀî tsis khaoǃgâ.

¹⁴Ob ge ǁgôa tsî hû ǃnāde Jordanǃāb ǃnâ ge dū, Elob aob di mîsa ǃoa; os ge ǁgans âba ǁkhawa ǂkham ǀgôab dis axase ge ǀkhī, ob ge ge ǃanu.

¹⁵ǃNubaib ge Elob aob ǃoa ǁkhawa ge oa, ǁîb tsî ǁîb di ǂnubis hoasa, tsî sī tsîb ge ais âb aiǃâ mâ tsî ge mî: Mû, nēsi ta ge a ǂan, ǀnî Elo-i ǃhūbaib hoab ai hâ tama ǃkhaisa, Israeli ǃnâ hâb ǀguib. Îts ǁnâi nēsi ǀkhae-e ū sa ǃgāta xu.

¹⁶Xawe ǁîb ge: ǃKhūb, ais âb aiǃâ ta mâb a ûitsama ǃkhais ao ta ge ǁî-e ū tide, ti ge mî. Ob ge ǁîba ge ǀkhoma, îb ū ti, xaweb ge ge ǂkhā.

¹⁷Ob ge Naamanna ge mî: ǁÎs ga ī tama io, îts ǁnâi sa ǃgāta ǃgomma māhe re ǃhūb xa, ǀgam hā-eselra a tani ǁkhās kōse; sa ǃgāta ge ǃaruǀî khauǁguibadi tsî ǂāǁguibade ǀkhara eloga ǁguiba tide tsî ǃKhūb ǀguiba nî ǁguiba.

¹⁸Nē ǃkhais ǀguis ǃnâ ab ǃKhūba sa ǃgāta ǀûba: Ti ǀhonkhoeb ga Rimonni ommi ǃnâ ǂgâo, ǁnāpab nî ǁnāǁgoese, tsîb ga ti ǃommi ai ǃgâseno, tsî ta ga Rimonni di ommi ǃnâ ǁnāǁgoe-o, ab ǃKhūba ǁî ǃkhais ǃnâ sa ǃgāta ǀûba re.

¹⁹Ob ge ǁîb ǃoa: ǃGû re ǂkhîb ǃnâ! ti ge mî. Tsî ǂkhari ǃgûdaorobab ge ǁîba xu bēo,

²⁰ob ge Gehasib, Elisab, Elob aob di ǃgāba ge mî: Mû, ti ǀhonkhoeb ge Naamanni, Siriaǁîba go ǂhani, ob ge ǁîb go ūhā xūna ǃommi âba xu ū tama hâ; o ta ge tita, ǃKhūb a ûitsama ǃkhais ao, ǁîba ǃkhoeǃgon tsî ǁîba xu xū-e nî ū.

²¹Nētib ge Gehasiba Naamanna ge ǃgôaǃgon. Tsî Naamanni ge mûo, ǁîbab ra ǃkhoeǃgon ǃkhaisa, ob ge kunisa xu uriǁgôa tsî ǁîba ǃgûǃoa tsî: ǂKhî-e? ti ge mî.

²²Ob ge: ǂKhî a, ti ge mî, xawe ti ǀhonkhoeb ge go sî te, mî ta nîse: Kō, nēsi kha ge ǀgam ǂkham khoekha, kēbo-aogu di ôagu dikha Efraimmi ǃhomma xu tita ǁga go hā, îts ǁnâi ǁîkha ǀgui talensa mā ǀhaiǀurib xa tsî ǀgam anaǃkhunisarakha.

²³Ob ge Naamanna ge mî: ǃGâibahets kao, ǀgam talenra ū. Tsîb ge ǁîba ǁgūǀkhā tsî ǀgam talenra ǀhaiǀurib xa ǀgam ǁhōkha ǃnâ ǃgae tsî ǀgam anaǃkhuni sarakha tsîna, tsîb ge ǁîna ǀgam ǃgākha âb ai ge ǁgui, ǁîkha ge ǁîna ǁîb di ais aiǃâ ge tani.

²⁴Tsî ǃnoms aib ge sīo, ob ge ǁîna ǃommi âkha xu ū tsî ǁîn ommi ǃnâ ge sâu; tsî khoekhab ge xūo, o kha ge ge ǃgû.

²⁵ǁNās khaoǃgâb ge ǂgâ tsî ǀhonkhoeb âb aiǃâ sī ge mâ. Ob ge Elisaba ǁîb ǃoa: Mapa xusa, Gehasitse? ti ge mî. Ob ge: Sa ǃgāta ge nēǀîs kas, nauǀîs kas hoasa bē tama go hâ i, ti ge mî.

²⁶Xaweb ge ǁîb ǃoa ge mî: Ti ǂgaoba hâ tamab go hâ i ǁnā aob, kunis âba xu oa tsî satsa goro ǃgûǃoa ǃnubai? Nēba kha ǁaeba ǀhaiǀurib nî ūheba tsî saran nî ūheba tsî ǀkherahaidi tsî ǂauxûiǂûǃhanagu tsî gūn tsî goman tsî ǃgāgu tsî ǃgādi tsîna?

²⁷ǁNā-amagas ge Naamanni di ǃomamasisa sats tsî sa suriba nî ǂae-ai, ǀamosib kōse. ǃNubaib ge ais âba xu ǃomamaxase ge ǂoa, tsamaros khami ǃurise.