Read Khoekhoegowab 2 Gao-aogu 6 Bible Online

2 Gao-aogu 6 - Khoekhoegowab bible

2 Gao-aogu 6

¹Tsî kēbo-aogu di ôagu ge Elisab ǃoa ge mî: Kō re, nē ǃkhais, sa ais aiǃâ ge ǁîs ǃnâ ǁan hâs ge sige a ǂōba.

²Îts ǁnâi Jordanǃāb ǃoa ǃgû kai ge, îb mâb hoab âge ǁnāpa xu ǃnao-e ū, î ge ǁnāpa ǃkhai-e kurubasen, ǁanǃnâ ge nî-e. Ob ge: ǃGû! ti ge mî.

³Tsî ǀguib ge: ǁNātikōse ǃgâi îts sa ǃgāge ǀkha ǃgû re, ti ge mî. Ob ge: ǃGû ta nî, ti ge mî.

⁴Nētib ge ǁîgu ǀkha ge ǃgû. Tsî Jordanǃāb tawa gu ge sī, o gu ge haide ge ǁhāǁnâ.

⁵Tsî i ge ge ī, ǀguib ra haisa ǁhāǁnâ hîas ge ǃōsa ǁgam-i ǃnâ ǁnā ǃkhaisa. Ob ge ǂgai tsî: Okha, ti ǀhonkhoetse, ti ge mî, ǀkhupihe hâ xūs komo.

⁶Ob ge Elob aoba: Mapas go ǁnā? ti ge mî. Tsî ǃkhaisab ge ǁgau bio, ob ge hai-e ǃgao tsî ǁî-e ǁnāpa ge aoǂgā. Os ge ǀuriǃōsa ǀgapise ge tsâ.

⁷Ob ge: Ūkhâi si, ti ge mî. ǃNubaib ge ǃommi âba ǀhōǂui tsî ǁîsa ge ū.

⁸Tsî Siriab di gao-aob ge Israela gere torodī-ū, tsîb ge ǃgāgu âb ǀkha ǀape tsî: Ti ǁgoeǃkhais ge nēti ī tsî nēti ī ǃkhais tawa nî hâ, ti ge mî.

⁹ǃNubaib ge Elob aoba Israeli gao-aob ǃoa sî tsî: ǂAnbasen îts ǁnā ǃkhaisa-ū tā ǃgû, Siriaǁîn ge ǁnāpa go ǁgôaxa xuige, ti ge mîba kai bi.

¹⁰ǁNā-amagab ge Israeli gao-aoba ǁnā ǃkhais, Elob aob go ǁîs xa mî tsî ǁnama bis ǃoa sî tsî ǁnāpa ge ǃûisen, ǀgui ǃnās ǀguis ai tama i tsî, ǀgam ǃnāra ǀguira ai tama.

¹¹ǃNubaib ge Siriab gao-aob di ǂgaoba ǁî ǃkhais xa ge ǀhomaxa, tsîb ge ǃgāgu âba ǂgai tsî ǁîgu ǃoa ge mî: ǁNâi mîba te go tide, tarib âge Israeli di gao-aob di ǀkhāb ai hâ ǃkhaisa?

¹²Ob ge ǃgāgu âb di ǀguiba ge mî: Hî-î, ti ǀhonkhoe gao-aotse, xawe Elisab, ǁnā kēbo-aob, Israeli ǃnâ hâb, ǁîb ge Israeli gao-aoba ǁnā mîdi, sats ra sa ǁomoms ǃnâ ǃhoade ra ǂanǂan.

¹³Ob ge: ǃGû î go sī mû, mapab hâsa, î ta sî î ta ūhā kai bi, ti ge mî. Tsîb ge ǂanǂanhe tsî: Mû, Dotans tawab ge ǁîba hâ, ti ge mîbahe.

¹⁴ǃNubaib ge hān, kunidi tsî kai ǂnubis tsîna ge sî, tsuxub ǃnâ sī tsî ǃāsa ge xāǂgāna.

¹⁵Tsî ǃgāb Elob aob dib ge ǃnauǁgoaga khâi tsî ge ǂoa; tsî mû, ǂnubi-i ge ǃāsa ge hâǂgā hâ i, hān tsî kunidi tsîn ǀkha. Ob ge ǃgāb âba ǁîb ǃoa: Okha, ti ǀhonkhoetse, mati khom nî dī? ti ge mî.

¹⁶Ob ge ǁîba: Tā ǃao, sakhom ǀkha hân ge ǁîgu ǀkha hân ǃgâ-ai a ǂgui xuige, ti ge mî.

¹⁷Tsî Elisab ge ǀgore tsî: ǃKhūtse, ǁîb di mûra khowaba bi, îb mû, ti ge mî. Ob ge ǃKhūba ǃgāb di mûra ge khowa, ob ge ge mû: Tsî kō, ǃhommi ge Elisab ǂnamipe ǀaexa hān tsî ǀaexa kunidi tsîn xa ge ǀoa hâ i.

¹⁸Tsî ǁîb tawa gu ge ǁgôao, ob ge Elisaba ǃKhūba ǀgore tsî: Nē ǁaesa ǂnau re ǂgīsib ǀkha, ti ge mî. Ob ge ǁîga ǂgīsib ǀkha ge ǂnau Elisab di mîs ǃoa.

¹⁹ǃNubaib ge Elisaba ǁîgu ǃoa ge mî: Nēb ge dao tamaba, tsî nēs ge ǃā tamasa; tita sao, o ta ge sago ǁnā khoeb hîa go ra ôab ǃoa nî ǂgaeǂguisī, tsîb ge ǁîga Samarias ǃoa ge ǂgaeǂguisī.

²⁰Tsî i ge ge ī, Samarias tawa gu ge sī ǃnubaib ge Elisaba: ǃKhūtse, nēgu di mûde khowa, î gu mû, ti mî ǃkhaisa. Ob ge ǃKhūba mûdi âga ge khowa, o gu ge ge mû, tsî kō, o gu ge Samarias di ǁaegub ǃnâ hâ.

²¹Tsî Israeli gao-aob ge ǁîga mûo, ob ge Elisab ǃoa: ǂNau ta nî ǁîga, ǂnau ta nî ǁîga, ti îtse? ti ge mî.

²²Xaweb ge ge mî: ǁÎgats ge ǂnau tide; sa gôab tsî sa khās ǀkhats ga ǃkhōgats kha nî ǂnau? Pere-i tsî ǁgam-i tsîna ǁîga mâi-aiǃâ, î gu ǂû tsî ā, î gu ǁîgu di ǀhonkhoeb ǃoa ǁaru.

²³Ob ge ǁîga kai ǂûǁae-e ge ǁāǁāba, o gu ge ǂû tsî ge ā; ǁnās khaoǃgâb ge ǁîga ge xū, tsî gu ge ǁîgu di ǀhonkhoeb ǃoa ge ǁaru. Nēti di ge Siriaǁîn di toroǂnubide ǃaruǀî Israeli di ǃhūb ǃnâ hā tama ge hâ i.

²⁴Tsî i ge ǁnās khaoǃgâ ge ī, Benhadadi Siriab di gao-aob ge ǁîb di toroǂnubis hoasa ǀhaoǀhao tsî Samarias ǃoa ǃapa tsî ǁîsa xāǂgā ǃkhaisa.

²⁵Ob ge kai ǃâtsūǀkhāba ge hā Samarias ǃnâ; nēti ī xui-ao: ǁÎgu ge ǁîsa ge xāǂgā, eseli di danas ǁkhaisadisi ǀhaiǀurimarin ama ra ǁamaxūhes kōse tsî hakaǁî ǃâs kab dis ǂnabuxaub ǀkha hâsa, koro ǀhaiǀurimarin ama.

²⁶Tsî i ge ge ī, gao-aob ra ǂnubiǂgoab ai ǃgû-ī hîa i ge tara-e ǁîba ǂgaiǀî tsî: Hui te re, ti ǀhonkhoe gao-aotse! ti mî ǃkhaisa.

²⁷Ob ge: ǃKhūb ge hui si tama hâ; mâ xū-i ǀkha ta kha ǁnâi tita nî hui si? Dāǃnâǃkhaisa xu? ǂAuxûiǀāǃnâxūsa xu? ti ge mî.

²⁸ǃAruǀîb ge gao-aoba ǁîs ǃoa: Tare-es hō hâ? ti ge mî. Os ge ge mî: Nē taras ge tita ǃoa: Sa ôaba ūǀkhī, îm nētsē ǁîba ǂû, îm ǁari ti ôaba ǂû, ti ge mî.

²⁹Om ge sima ti ôaba sâi tsî go ǂû; xawe sao ra tsē ta ge ǁîs ǃoa: Sa ôaba ūǀkhī, îm ǂû bi, ti mîo, os ge ǁîs ôaba ge sâu.

³⁰Tsî i ge ge ī, gao-aob ge nē mîdi taras dide ǁnâuo, ob ge saran âba ge ǀkhau, ǂnubiǂgoab aib ra aiǃâb ǃoa ǃgû hîa; tsî ǁaes ge kō-o, ob ge ǁhō-e soros âb ai ge ana hâ i.

³¹Tsîb ge ge mî: Ab Eloba nēti dī-ū te îb ǁnāti dīǀaro te, Elisab, Safati ôab di danas ga nētsē ǁîb ai mâhâhâo.

³²Tsî Elisab ge ǁîb di ommi ǃnâ ge ǂnôa i, tsî kaigu ge ǁîb ǀkha ge ǂnôa i. Tsî gao-aob ge ais âb aiǃâ sîsabeba ge sî; xawe ǁnā sîsabeb ge ǁîb tawa hās aiǃâb ge ǁîba kaigu ǃoa ge mî: Xare mû go go sago, matib nē ǃgamaob ôaba go sîhe ǃkhaisa, ti danasab nî ūǁnâse? Kōǃgâ î go sîsabeb ga hāo, dao-amsa ǂganam, î go dao-ams ǀkha ǁgâiǂui bi; ǀhonkhoeb âb ǂaira di ǀōba ǁîb khaoǃgâ hâ tamab hâ?

³³Tsî ǁîgu ǀkhab ra ganupe ǃhoa, mû, hîab ge sîsabeba ǁîb tawa ge ǁgôaxa; tsî gao-aob ge ge mî: Mû, nē ǂkhabab ge ǃKhūba xu hâ, mati ta kha ǁnâi ǃaruǀî ǃKhūb ai nî ǂgomaiǂnûi?