Read Khoekhoegowab 2 Gao-aogu 7 Bible Online

2 Gao-aogu 7 - Khoekhoegowab bible

2 Gao-aogu 7

¹ǃNubaib ge Elisaba ge mî: ǁNâu du re ǃKhūb di mîsa; nētib ra ǃKhūba mî: ǁAri, nē ǁaeb ǁkhāb aib ge ǀgui ǀguirob tsampereb diba ǀgui sekels ama tsî ǀgam ǀguirokha gerst dikha ǀgui sekels ama Samarias di ǁāb ǃnâ nîra hōhe.

²Ob ge danakhoeb, ǃommi âb aib ra gao-aoba ǃgâsenna Elob aoba ǃeream tsî ge mî: Kō, mûǂuidaodeb ga ǃKhūba ǀhommi ai dī xawe, matis kha ǁî ǃkhaisa nî ī ǁkhā? Ob ge ǁîba: Kō, sa mûra ǀkhats ge satsa ǁîsa nîra mû, xawets ge ǁîn xa ǂû tide, ti ge mî.

³Tsî gu ge haka ǃomamaxa khoega ǁāb di daos aiǃâ ge hâ i; ǁîgu ge nēba naub ǃoa ge mî: Tare xū-i ǃaroma ge nēpa ra hâ, ǁō ge nîs kōse?

⁴A ge ǃās ǃnâ ǂgâ! ti ge ga mî xaweb ge ǃâtsūǀkhāba hâ ǃās ǃnâ tsî ge ǁnāpa nî ǁō; tsî nēpa ge ga hâ xawe ge ǁkhāti nî ǁō; hā î ge ǁnâi Siriaǁîgu di ǁgoeǃkhais ǃnâ ǂgâ; ǁîgu ga ûi kai geo, o ge ge nî ûi, ǁîgu ga ǃgam geo, o ge ge nî ǁō.

⁵O gu ge ǁgoaǂnobos ǀkha ge khâi, Siriaǁîgu di ǁgoeǃkhais ǃnâ gu nî sīga. Tsî Siriaǁîgu di ǀams tawa gu ge sīo, mû, o i ge khoe-e ge ǀkhai i.

⁶ǃKhūb ge Siriaǁîgu di ǂnubisa ǀō-e ǁnâu kai xui-ao, kunidi di ǀō-i tsî hān di ǀō-i tsî kai toroǂnubis di ǀō-e; nēb ge naub ǃoa: Mû, Israeli di gao-aob ge gao-aogu Hetiǁîn digu tsî gao-aogu Egipteǁîn diga go ǃgae, sage ǂama gu nî hāse, ti mîs kōse.

⁷ǁNā-amaga khâi tsî gu ge ǁgoaǂnobos ǀkha go ǁhâ, tsî gu ge ǁîgu di tentomde go ǁnākhao tsî ǁîgu di hān tsî ǁîgu di eseln tsî ǁgoeǃkhaisa hâs a khami; tsî gu ge ǁîgu di ûib ǃaroma go ǁhâ.

⁸Tsî ǃomamaxagu ge ǁgoeǃkhais di ǀams tawa sīo, o gu ge ǀgui tentoms ǃnâ ge ǂgâ, tsî gu ge ǂû tsî ge ā tsî ǁnāpa xu ge ū ǀhaiǀurib, ǃhuniǀurib tsî saran tsîna, tsî gu ge ǃgû tsî ǁîna ge sī sâu; ǁnās khaoǃgâ gu ge oa tsî ǀnî tentoms ǃnâ ǂgâ tsî ǁnāpa xu ǁkhāti xūna ū tsî ǃgû tsî ge sī sâu.

⁹ǃNubai gu ge nēba naub ǃoa ge mî: Sage ge ǂhanuse dī tama hâ; nētsēs ge a ǃgâiǂhôatsē, tsî sage ge ǁîs xa a ǃnōsa. ǁGoas ra ǁgoas kōse ge ga ǀhaweo, o ge ge nî ǀhapixa; ǁnā-amaga hā î ge ǃgû, î ge ǁî ǃkhaisa gao-aob di omma sī ǂhôa.

¹⁰Nēti gu ge ǃās tawa hā tsî ǁāb ǃûi-aob ǃās diba ǂgaiǀî tsî ǁîna ǂhôa tsî ge mî: Sige ge ǁgoeǃkhais Siriaǁîgu dis tawa go sī, mû, o i ge khoe-e a ǀkhai tsî khoe-i di dom-i a ǀkhai, tsî hān ge ǃgaemâihe hâ tsî eseln ge ǃgaemâihe hâ, tsî tentomdi ge ī di a khami hâ.

¹¹Tsîb ge ǁāb di ǃûi-aoga ge ǂgai; o gu ge ǂhôasa ge ǂanǂan gao-aob di ommi ǃnâ.

¹²Ob ge gao-aoba tsuxuba khâi tsî ǃgāgu âb ǃoa ge mî: Tita ge nî ǂanǂan go, mati gu Siriaǁîga go dī-ū da ǃkhaisa; ǁîgu ge a ǂan, ǃâ da hâ ǃkhaisa; ǁnā-amaga gu ge ǁgoeǃkhaisa xu go ǂoa, ǃaub ǃnâ gu nî gaugausenga: ǃĀsa xun ga ǂoaxao, o ge ge ǁîna ûitsamase nî ǃkhō, tsî ge ge ǃās ǃnâ nî sī, ti.

¹³ǁGoasib ge ǃgāgu âb di ǀguiba ǃeream tsî ge mî: ǃGau go hān xa an korona ūhe, ǁîs ǃnâ go ǃgaun xa; mû, ǁîn ge Israelǁîn ǁîs ǃnâ go ǃgaun di ǂguib khami ī, tsî mû, ǁîn ge Israelǁîn hîa go kān di ǂguib khami ī, ǁîna a da sî, î da mû.

¹⁴On ge ǀgam kunira di hāna ge ū. Tsî gao-aob ge Siriaǁîgu di toroǂnubisa sîǃgon tsî: ǃGû î go sī kō! ti ge mî.

¹⁵Tsî Jordanǃāb kōse gu ge ǁîga ǃgôaǃgono, mû, ob ge daob hoaba saran tsî sîsenūxūn, Siriaǁîgu ge ǃnoesa ǃhūs âgu ǃnâ aoxūn xa ge ǀoa hâ i. O gu ge sîsabega ǁkhawa oa tsî gao-aoba ǁîsa ge ǂhôa.

¹⁶ǃNubais ge ǁaesa ǂoa tsî Siriaǁîgu di ǁgoeǃkhaisa ge ǃnariǀhana; tsî ǀgui ǀguirob tsampereb dib ge ǀgui sekels ama tsî ǀgam ǀguirokha gerst dikha ge ǀgui sekels ama ge ǁamaxūhe, ǃKhūb di mîsa ǃoa.

¹⁷Tsî gao-aob ge ǁnā danakhoeb, ǃommi âb aib ra ǃgâsenna ǁnā ǁāb ǂama ge mâi, tsî ǁaes ge ǁîba ǁāb ǃnâ ge dāǂkhūǂkhū, ǁōb ges kōse, Elob aob ge ǃhoa xase, gao-aob ge ǁîb tawa ǁgôa ǃnubai, nēsa ge ǃhoaba.

¹⁸ǁNāti i ge ge ī xui-ao, Elob aob ge gao-aob ǃoa ǃhoa xase, mî raǃâ: ǁAri, nē ǁaeb ǁkhāb ai kha ge ǀgam ǀguirokha gerstǃhorob dikha ǀguiba sekels ama tsî ǀgui ǀguirob tsampereb diba ǀgui sekels ama nîra ǁamaxūhe, Samarias di ǁāb ǃnâ.

¹⁹Tsî ǁnā danakhoeb ge Elob aoba ǃeream tsî ge mî: Kō, ǃKhūb ga mûǂuidaode ǀhommi ai dī xawe, xare ī ǁkhā i ga nē mîsa ǃoa? Ob ge ǁîba: Kō, sa mûra ǀkhats ge ǁîsa nîra mû, xawets ge ǁîn xa ǂû tide, ti ge mî.

²⁰ǁNās ǁkhās xaseb ge ge ībahe, tsî ǁaes ge ǁîba ǁāb ǃnâ ge dāǂkhūǂkhū, ǁōb ges kōse.