Read Khoekhoegowab 2 Gao-aogu 8 Bible Online

2 Gao-aogu 8 - Khoekhoegowab bible

2 Gao-aogu 8

¹Tsî Elisab ge ǁnā taras, ǀgôab âsab ge ûi-ûis ǃoa ge mî: Khâi îs ǃgûbē, sas tsî sa ommi dido, îs ǃhaokhoese hâ, hâ ǁkhās ka ǃkhai-i hoa-i tawa; ǃKhūb ge ǃâtsūǀkhā-e go ǂgai, ǁkhāti hû kurigu kōse ǃhūb ǃnâ nîra hâ-e.

²Os ge tarasa khâi tsî Elob aob di mîs ǃoa ge dī, ǁîs ommi din ǀkha ǃgûbē, tsîs ge ǃhaokhoese Filisteǁîn di ǃhūb ǃnâ ge hâ, hû kurigu kōse.

³Tsî i ge hû kurigu di ǀunis ai ge ī, taras Filisteǁîn di ǃhūba xu ǁkhawa ge oa ǃkhaisa; tsîs ge ge ǂoa, gao-aobas nî ǂgaiǀîse ǁîs di ommi ǂama tsî ǁîs di ǃhanab ǂama.

⁴Tsî gao-aob ge Gehasib, Elob aob di ǃgāb ǃoa ǃhoa tsî: ǃHoaba te re ǁnā kai xūn, Elisab ge dīn hoan xa, ti ge mî.

⁵Tsî i ge ge ī, gao-aobab ge ǃhoabao, matib ge ǁō hâba ûi-ûi ǃkhaisa, mû, os ge ǁnā taras ǀgôab âsab ge ûi-ûisa gao-aoba ge ǂgaiǀî ǁîs di ommi ǂama tsî ǁîs di ǃhanab ǂama. ǁGoasib ge Gehasiba ge mî: Ti ǀhonkhoe gao-aotse, nēs ge ǁnā tarasa, tsî nēb ge ǁîs di ôab, Elisab ge ûi kaiba.

⁶Ob ge gao-aoba tarasa ge dî, tsîs ge ge ǃhoaba bi. ǃNubaib ge gao-aoba ǁîsa omǃnās di ǃoabasabeba mā tsî ge mî: As ǁîsa ǁîs di ge in hoana ǁkhawa ūhâ, ǁnās xōǀkhā ǃhanab di ūǀkhīn hoana, ǁnā tsēs, ǃhūbas ge ǁnāsa xu nēsis kōse.

⁷ǁNās khaoǃgâb ge Elisaba Damaskus tawa ge sī, Benhadadi, Siriab gao-aob ǀaesen hâ hîa; on ge ǂhôa bi tsî: Elob aob ge nēpa go hā, ti ge mî.

⁸ǃNubaib ge gao-aoba Hasaeli ǃoa ge mî: ǀKhaexū-e sa ǃomǁae ū îts Elob aoba ǃgûǃoa îts ǁîba xu ǃKhūba dî tsî: ǂUru ta nî nē ǀaesenna xu? ti mî.

⁹Ob ge Hasaela ǁîba ge ǃoa, tsîb ge ǀkhaexū-e ǁîb ǃomǁae ge ūǃgû, hoa xūǃnôan Damaskus din xa, hakadisi ǃnaidi di ǃnaoba tsîb ge hā tsî ais âb aiǃâ mâ tsî ge mî: Sa ôab Benhadadi, Siriab di gao-aob ge tita ge sîǂûi, mî ta nîse: ǂUru ta nî nē ǀaesenna xu?

¹⁰Ob ge Elisaba ǁîb ǃoa ge mî: ǃGû îts: Ûits ge tide, ti mîba bi; ǃKhūb ge go ǁgau te, ǁōb nîra ǃkhaisa xuige.

¹¹Tsîb ge ais âb ǀkha ǀkhamasase ge ǃgapa bi tsî ǁîsa ge ǂnûiǁapo, taob ges kōse; tsî Elob aob ge ge ā.

¹²ǃNubaib ge Hasaela: Tarexats ra ā, ti ǀhonkhoetsa? ti ge mî. Ob ge ge mî: ǂAn ta a xui-ao, mâ ǂkhabanats satsa Israeli ôana nîra dī-ū ǃkhaisa: Sats ge ǁîn di ǁaposa ǃkhaide ǀaes ǀkha nîra khauǃkhū tsî ǂkhamkhoegu ânats ge gôab ǀkha nîra ǃgam tsî ǂkham ǀgôan ânats ge nîra ǂkhūǂkhū tsî ǀgamǀkhā taradi ânats ge nîra ǃhôaǁkhowa-am.

¹³Ob ge Hasaela ge mî: Tsî tareta sa ǃgāta hîa arita, o ta nē kai ǃkhaisa nî dī? Ob ge Elisaba ge ǃeream: ǃKhūb ge go ǁgau te, sats Siriab ǂama nîra gao-ao ǃkhaisa, ti.

¹⁴Nētib ge Elisaba xu ǃgû tsî ǀhonkhoeb âb tawa sī tsî ǁîba: Tare xū-eb Elisaba sa ǃoa go mî? ti ge mîba. Ob ge ge mî: ǁÎb ge: ǂAnǂansasets ge nîra ǂgau, ti ge mî.

¹⁵Tsî i ge ǀguitsē ge ī, ǃkhaiba ū tsîb ge ǁîba ǁgam-i ǃnâ ǂgā tsî ais âb ai ge ǃā, ǃnubaib ge ǁō ǃkhaisa. Tsî Hasaeli ge ǁîb di ǃās ǃnâ ge gao-ao kai.

¹⁶Koroǁî kurib Jorammi, Axab ôab, Israeli gao-aob dib ǃnâ, Josafati, Judab ǃnâ a gao-ao hîab ge Jorammi, Josafati ôab, Judab gao-aoba ge gaosîsentsoatsoa.

¹⁷ǁÎb ge ǃnonadisiǀgamǀa kurixa ge i, gao-ao kaib ge ǃnubai, tsîb ge ǁkhaisa kuriga ge gaosîsen, Jerusalems tawa.

¹⁸Tsîb ge daob Israeli di gao-aogu dib ǃnâ ge ǃgû, Axab di ommi gere dī khami; Axab di ôasab ge tarase ūhâ i xui-ao; tsîb ge ǃKhūb mûǁae a ǂkhabana gere dī.

¹⁹Xawe ǃKhūb ge Judaba hîǀhuru ǂgao tama ge i Davib, ǁîb di ǃgāb ǃaroma, ǁîb ǃoab ge ǃhoa khami, ǁîb ôagab nî hugaǀgui ǃamamǀae-e mā ti.

²⁰ǁÎb di tsēdi ǃnân ge Edomǁîna, Judab di gaoǂamsisa xu ge ǁnāǁgôa, tsîn ge gao-ao-e ǁîn ǂama ge mâibasen.

²¹ǁNā-amagab ge Joramma Sairs ǃoa ge ǃgâu tsî kunidi hoade ǁîb ǀkha; tsîb ge tsuxuba khâi tsî Edomǁîn, ǁîb ǂnamipe hâna ge ǂnau, tsî ǁîn tawa kunidi di ǂamkhoega; tsî ǁaes ge omdi ân ǃoa ge ǁhâ.

²²Tsî Edomǁîn ge Judab di gaoǂamsisa xu ge ǁnāǁgôa nētsēs kōse. ǁNāǃnubais ge ǁkhāti Libnasa ge ǁnāǁgôa.

²³Tsî naun Jorammi di ǃnaeǃkhaidi din tsîb ge dīn hoan, ǁîn ge xoahe hâ ǃNaeǃkhaidi ǂkhanis Judab gao-aogu dis ǃnâ.

²⁴Tsî Jorammi ge ǁō tsî ge ǁkhōhe ǁîb di îgu tawa Davib ǃās ǃnâ; tsî Ahasiab, ǁîb ôab ge ǃās âb ǃnâ ge gao-ao kai.

²⁵Disiǀgamǀaǁî kurib Jorammi, Axab ôab, Israeli gao-aob dib ǃnâb ge Ahasiab, Jorammi ôab, Judab gao-aoba ge gaosîsentsoatsoa.

²⁶ǀGamdisiǀgamǀa kurixab ge Ahasiaba ge i, gao-ao kaib ge ǃnubai, tsîb ge ǀgui kuriba ge gaosîsen Jerusalems tawa; tsî ǁîb îs di ǀons ge Ataliasa ge i, Omrib Israeli gao-aob di ôasa.

²⁷Tsîb ge Axab ommi di daob ai ǃgû tsî ǃKhūb mûǁae a ǂkhabana gere dī, Axab di ommi xase: Axab ommi di ǀuiǀgôab ge i xui-ao.

²⁸Tsîb ge Jorammi, Axab ôab ǀkha ǃkhammi ǁgā ge ǂoa, Ramot-Gileads ǃoa, Hasaeli Siriab gao-aob ǃoagu; tsî Siriaǁîgu ge Joramma ge ǂnau.

²⁹ǃNubaib ge gao-aob Joramma ge oa, Jesreels tawab nî ǂgaukaisense, ǁnā ǀhapidi, Siriaǁîn ge Ramas tawa tsui bide xu, Hasaeli, Siriab di gao-aobab ra ǃkhamū hîa. Ob ge Ahasiab, Jorammi ôab, Judab gao-aoba ge ǁgôaxa, Jorammi, Axab ôabab nî Jesreels tawa si kōse, ǁîb ge ǀaesen hâ i amaga.