Read Khoekhoegowab 2 Gao-aogu 9 Bible Online

2 Gao-aogu 9 - Khoekhoegowab bible

2 Gao-aogu 9

¹ǃNubaib ge kēbo-aob Elisaba ǀgôagu kēbo-aogu digu di ǀguiba ǂgai tsî ǁîb ǃoa ge mî: Kamanab âtsa ǃgae îts nē oliǂkhenasa sa ǃomǁae ū îts Ramot-Gileads ǃoa ǃgû.

²Tsî ǁnāpats ga sīo, ots ge nî kō, mapab Jehub, Josafati ôab, Nimsib ôaba hâ ǃkhaisa; îts ǂgâ tsî ǁîba ǃgâsagu âb ǁaegu khâi kai, îts ǃnāb ǃnâ ǂgâna hâ ǃnā-omdi di ǀguis ǃnâ ūǂgā bi,

³îts oliǂkhenasa ū tsî danas âb ai ǂnâǂui si îts mî: Nētib ra ǃKhūba mî: Tita ge satsa gao-aose go ǂkhauǀkhā Israeli ǂama. ǁNās khaoǃgâ dao-amsa ǁkhowa-am îts ǁhâ îts tā ǀhawe.

⁴Nētib ge ǂkham khoeb, ǁnā ǃgāb kēbo-aob diba ge ǃgû Ramot-Gileads ǃoa.

⁵Tsî ǂgâb ge sī, o gu ge danakhoegu ǂnubis diga ǁnāpa ge ǂnôa i, tsî ǁîb ǃoa: Mîxū-e ta satsa ūba hâ, danakhoetse, ti ge mî. Ob ge Jehuba: Tariba sige xu? ti ge mî. Ob ge: Sats ge: Sats danakhoetsa, ti ge mî.

⁶ǃNubaib ge khâi tsî ommi ǃnâ ge ǂgâ; tsîb ge oliba danas âb ai ǂnâǂui tsî ǁîb ǃoa ge mî: Nētib ra ǃKhūb, Israeli Eloba mî: Tita ge satsa gao-aose go ǂkhauǀkhā ǃKhūb ǁaes ǂama, Israeli ǂama.

⁷Tsîts ge satsa Axab, sa ǀhonkhoeb di omma nîra ǂnau; î ta tita ǀaob ti ǃgāgu, kēbo-aogu dib tsî ǀaob ǃKhūb ǃgāgu hoagu diba ǀkhao, Isebels di ǃomma xu.

⁸Îb Axab ommi hoaragaba kā; tsî tita ge Axab din xa nîra ǃhūǃnoma ǁnā-i, ǂnubiǂgoab ai ra ǀkham-e tsî ǂganhe tsî ǁnāxūhe hâ-e Israeli ǃnâ.

⁹Tita ge Axab di omma Jerobeammi, Nebati ôab di ommi khami nî dī tsî Basab, Ahiab ôab dib khami.

¹⁰Tsî Isebels ge arin xa nîra hapuhe ǃhanab, Jesreels dib ai, tsî khoe-i, ǁîsa nî ǁkhō-i ge nîra ǀkhai. ǃNubaib ge dao-amsa ǁkhowa-am tsî ge ǃhū.

¹¹Tsî Jehub ge ǀhonkhoeb âb ǃgāgu ǃoa ǂoao, on ge ǁîb ǃoa: ǂKhî i a? Tare xū-i ǃaromab kha nē ǃkhausaba sa tawa go hā? ti ge mî. Ob ge ǁîgu ǃoa: Sago kom khoeb tsî khommi âba a ǂano, ti ge mî.

¹²Xawe ǁîgu ge: Gāts ra; mîba ge re, ti ge mî. Ob ge ǁîba: Nēti tsî nētib ge ǃhoaǀî te tsî ge mî: Nētib ra ǃKhūba mî: Tita ge satsa Israeli ǂama gao-aose go ǂkhauǀkhā.

¹³ǃNubai gu ge ǃhae, tsî mâb hoab âga sarab âba ū, tsî ǁîb ǃnaga ge ǁgui, hoan xa ǀgapi ǃapa-ūdab ai, tsî gu ge xâiǁnâsa xâi tsî: Jehub ge go gao-ao kai, ti ge mî.

¹⁴Nētib ge Jehub, Josafati ôab, Nimsib ôaba, ǃgaeǀhao-e ge dī Jorammi ǃoagu. Tsî Jorammi ge Ramot-Gileadsa ge ǃûi, ǁîb tsî Israeli hoab, Hasaeli, Siriab gao-aob dib ǃoagu.

¹⁵Xawe gao-aob Jorammi ge ge oa, Jesreels tawab nî ǂgauǂgaukaisense ǁnā ǂnaudi, Siriaǁîgu ge ǁîba ǂnaudi xa, Hasaeli, Siriab gao-aobab ge ǃkhamū ǃnubai. Tsî Jehub ge ge mî: ǁNāti du ga ǂâio, a-i tā khoe-e ǃāsa xu ǂoa, ûi i nîga, nē ǃkhaisa i nî Jesreels ǃnâ sī ǂhôase.

¹⁶ǁGoasib ge Jehuba ǃgapi tsî Jesreels ǃoa ge ǃgû, Jorammi ge ǁnāpa ǁgoe i xui-ao; tsî Ahasiab, Judab gao-aob ge Jorammab nî hā kōse ge ǁgôaxa.

¹⁷Tsî ǃûi-aob, Jesreels di ǂgō-ommi ai mâb ge Jehub di ǂguib ǃgoaxa ǃkhaisa mû tsî: Tita ge ǂguiba ra mû, ti ge mî. Ob ge Joramma: ǃGapi-ao-e ū îts ǁîga sîǃoa i, î-i: ǂKhî i a? ti mî.

¹⁸Ob ge ǃgapi-aoba hāb ai ǃgûǃoa bi tsî: Nētib ra gao-aoba mî: ǂKhî i a? ti ge mî. Ob ge Jehuba: Tare-ets ǂkhîb ǀkha ǁae hâ? Ti ǃgâb ai ī! ti ge mî. Ob ge ǃûi-aoba ǁîsa ǂanǂan tsî: Sîsabeb ge ǁîgu kōse go sī, xaweb ge oa tama hâ, ti ge mî.

¹⁹Ob ge ǀnî ǃgapi-aoba hāb ai ge sî, tsî nēb ge ǁîgu tawa sīo, ob ge: Gao-aob ra nēti mî: ǂKhî i a? ti ge mî. Ob ge Jehuba: Tare-ets ǂkhîb ǀkha ǁae hâ? Ti ǃgâb ai ī! ti ge mî.

²⁰Ob ge ǃûi-aoba ǁîsa ǂanǂan tsî ge mî: ǁÎn kōseb ge ǁîba go sī, xaweb ge oa tama hâ; tsî ǁgaris ge Jehub, Nimsib ôab di ǁgaris khami ī, ǃkhausaseb kom ra ǁgario.

²¹Ob ge Joramma: ǂGāǃao! ti ge mî. On ge kunis âba ge ǂgāǃao. Nēti kha ge Jorammi, Israeli gao-aob, tsî Ahasiab, Judab gao-aob tsîkha mâb hoaba ǁîb kunis ai ge ǃnariǂoa, tsî kha ge Jehuba ǃoa tsî ǁîba ǃhanab ǃâs Naboti, Jesreelǁîb dis ai ge hō.

²²Tsî i ge ge ī, Jorammi ge Jehuba mûo, ob ge ǁîb ǃoa: ǂKhî i a, Jehutse? ti ge mî. Ob ge ǁîba: Mâ ǂkhî-e, ǀaigu sa îs Isebels digu tsî ǁîs di ǃgaidīgu nētikōse a ǂgui hîa?

²³ǃNubaib ge Joramma ǃommi âba ǂgae-oa tsî ǁhai tsî Ahasiab ǃoa: ǀApexūs ge nēsa, Ahasiatse, ti ge mî.

²⁴Xawe Jehub ge khāsa ǃommi âb hoab ǀkha ǂgaeǃnâ tsî Joramma ǁôakha âb ǁaegu ge ǁkhâu, ǂāb ǂgaoba-ū ge ǂoas kōse; ob ge kunis âb ǃnâ ge amisen.

²⁵Ob ge Jehuba Bidkari, danakhoeb âb ǃoa ge mî: Ū îts ǁîba ǁnā ǃhanab, ǃâs Naboti, Jesreelǁîb dis ai aoǁnâ; îts ǂâi, matib ge ǃKhūba, sakhom ra ǁîb di îb Axab khaoǃgâ ǃgapi hîa nē ǃgomma ǁîba ǁgui-ai tsî ge mî ǃkhaisa:

²⁶Amase ta ge tita ǁarikamǃoe ǀaob Naboti dib tsî ǀaob ǁîb ôagu diba go mû, tib ra ǃKhūba mî, tsî: Tita ge ǁîsa nîra mādawa-am tsi ǁnā ǃhanab ǃâs ai, tib ra ǃKhūba mî. Ūkhâi î ǁnā ǃhanab ǃâs ai aoǁnâ bi, ǃKhūb di mîs ǃoa.

²⁷Tsî Ahasiab, Judab gao-aob ge ǁnāsa mûo, ob ge ǃhanab ommi di daoba-ū ge ǁhâ; xawe Jehub ge ǁîba sauruǃgon tsî ge mî: ǁÎb ona ǃgam kunis ai ǁnā ǁnōb Gurs, Jibleams tawa ǁgoes diba-ū. Ob ge Megidos ǃoa ǁhâ tsî ǁnāpa ge ǁō.

²⁸Tsî ǃgāgu âb ge ǁîba Jerusalems ǃoa ǃnari tsî ǀhobas âb ǃnâ ǁîb îgu tawa ge sī ǁkhō, Davib di ǃās ǃnâ.

²⁹Disiǀguiǀaǁî kurib Jorammi, Axab ôab dib aib ge Ahasiaba ge gao-ao kai Judab ǂama.

³⁰Tsî Jehub ge Jesreels tawa ge sī. Tsî Isebels ge ǁnâuo, os ge ais âsa boro tsî danas âsa ani tsî mûǂuidaosa-ū ge ǂui.

³¹Tsî Jehub ra ǁāb ǃnâ ǂgâ hîas ge: ǂKhî i a sats, Simrits, ǀhonkhoeb âts di ǃgamaotse? ti ge mî.

³²Ob ge mûǂuidaosǀî ǃgapakhâi tsî: Tari-e ti ǀkha hâ? Tari-e? ti ge mî. ǃNubai gu ge ǀgam, ǃnona ǃnā-oms di ǃoabasabega ǁîb ai ge kōǁgôa.

³³Ob ge: ǀGapiseba xu ǂhāǁnâ si! ti ge mî. O gu ge ǁîsa ǀgapiseba xu ge ǂhāǁnâ, ob ge ǀaob âsa ǂnubiǂgoab tawa tsî hān tawa ge ǀaisen; tsîb ge ǁîsa ge dāǂkhū.

³⁴Tsî ǂgâ tsîb ge ǂû tsî āo, ob ge ge mî: Nēsi ǁnā ǀâxarexuhe hâsa kō î du sī ǁkhō si, gao-aob ôas a ǁî xuige.

³⁵O gu ge ge ǃgû ǁîsa gu nî sī ǁkhōga; xawe gu ge ǁîs xa ǀnî xū-e hō tama ge i, danaǂkhōs, ǂaira tsî ǃomkha tsîn ǀguin.

³⁶ǃNubain ge ǁkhawa hā tsî ǁîba ge ǂanǂan; ob ge ge mî: Nēs ge mîs ǃKhūb dis, ǁîb ge ǃgāb âb Eliab, Tisbeǁîb di ǃoabasa xu ǃhoasa, mî raǃâ: ǃHanab ǃâs Jesreels dis ain ge arina Isebels di sorosa nîra hapu.

³⁷Tsî ǁō hâ soros Isebels dis ge ǀarub, ǃaub ai ǁgoeb xase nîra ī, ǁnā ǃhanab ǃâs Jesreels dis ai, nēs ge Isebelsa tin mî ǁkhā tides kōse.