Read Khoekhoegowab 1 Kroniks 10 Bible Online

1 Kroniks 10 - Khoekhoegowab bible

1 Kroniks 10

¹Tsî Filisteǁîn ge Israela ge ǃkhamū, tsî Israeli aogu ge Filisteǁîn di ais aiǃâ ge ǁhâ tsîn ge ǂnauhe hâǃâ ge ǁnā Gilboaǃhommi ai.

²Tsî Filisteǁîn ge Sauli tsî ǁîb ôagu tsîga ǂōse ge sauru tsî Filisteǁîn ge Sauli di ôagu, Jonatanni tsî Abinadab tsî Malkisuab tsîga ge ǃgam.

³Tsî ǃkhammi ge Sauli ǃoagu kaise ge karosa; tsî ǁkhâu-aogu ge ǁîba ge hō, ob ge kaise ge tsuihe.

⁴ǃNubaib ge Saula ǀāxūtani-aob âb ǃoa ge mî: Gôab âtsa ǂgaeǂui îts ǃkhāǃan te, î gu tā nē ǃgaohe tama hâga hā tsî ǃhō te. Xawe ǀāxūtani-aob âb ge dī ǂgao tama ge i, kaiseb gere ǃao amaga. ǁGoasib ge Saula gôab âba ū tsî ǁîb ai ge ǁnāǁnāsen.

⁵Tsî ǀāxūtani-aob âb ge mûo, Sauli go ǁō ǃkhaisa, ob ge ǁkhāti ǁîb ona gôab ai ǁnā tsî ge ǁō.

⁶Nēti gu ge Sauli tsî ǁîb di ǃnona ǀgôagu tsîga ge ǁō tsî ommi âb hoab ge ge ǀguiǁō.

⁷Tsî Israeli di aogu, ǃgoaǃnāb nau ǀkhāb ai hâgu tsî Jordanǃāb nē ǃnanib ai hâgu ge mûo, Israeli di khoegu ge ǃhū ǃkhaisa, tsî Sauli tsî ǁîb di ôagu ǁō hâ ǃkhaisa, o gu ge ǃādi âga ǁnāxū tsî ge ǁhâ. On ge Filisteǁîna hā tsî ǁîdi ǃnâ ge ǁan.

⁸Tsî i ge sao ra tsē ge ī Filisteǁîn ge hāo, ǃgamhe hâgan nî ǁkhâuǁnâse, on ge Sauli tsî ǁîb ôagu tsîga Gilboaǃhommi ai ǁgoese ge hō.

⁹On ge ǂgaeǂuiǀkhā bi tsî danas tsî ǀāxūn âba ge ū, tsîn ge ǁîna Filisteǁîn di ǃhūb ǃnâ ge sîma, ǂhôan nîse ǁî ǃkhaisa ǁîn elogu di omgu ǃnâ tsî ǁaes ǃnâ.

¹⁰Tsîn ge ǁâtanin âba ǁîn elob ommi ǃnâ ge ǁgui, tsî danas âban ge Dagonni di ommi ǃnâ ge ǂgāmâi.

¹¹Tsî Jabes, Gileadi dis di ǁansaben ge Filisteǁîn ge Sauli ǀkha dīna ǁnâuo,

¹²o gu ge ǃkham ǁkhā aogu hoaga ǂhomisen tsî Sauli di soros tsî ǁîb ôagu di sorodi tsîde ū tsî ǁîde Jabes tawa ge ūsī, tsîn ge ǂkhōgu âga terpentinhais ǃgao Jabes tawa sī ge ǁkhō, tsîn ge hû tsēde ǂûtama ge hâ.

¹³Nētib ge Saula ǃûǂams âb ǃnâ ge ǁō, ǃKhūb aiǃâb ge ǃûǂamsa; ǃKhūb mîsab ge ge ǃûǂam, ǁîsab ge ǃkhōǀgaipe tama i amaga, tsî ǁkhāti aimûǀgaru-aosab ge dî amaga, ǁîsa ra ôaǃâ.

¹⁴Tsî ǃKhūbab ge ôa tama ge i, ǁnā-amagab ge ǁîba ǃgam tsî gaosisa Davib, Isaib ôabǀî ge unu.