Read Khoekhoegowab 1 Kroniks 11 Bible Online

1 Kroniks 11 - Khoekhoegowab bible

1 Kroniks 11

¹ǃNubaib ge Israeli hoaba Davib ǀkha ge ǀhao Hebrons tawa, mî rase: Mû, sida ge sa ǂkhōda tsî sa ǁganda.

²ǁKhāti, Sauli ganupe a gao-ao hîats ge satsa Israela ǂgaeǂguiǂui tsî gere ǂgaeǂguiǂgâxa; ǁkhātib ge ǃKhūb sa Eloba sa ǃoa: Sats ge ti ǁaes Israelsa nîra ǃûi, tsî sats ge nîra ti ǁaes Israels di aiǃgû-ao kai, ti ge mî.

³ǁKhāti gu ge Israeli di kaigu hoaga gao-aob ǃoa Hebrons ǁga ge sī, tsî Davib ge ǃgaeǀhao-e ǁîgu ǀkha ge dī Hebrons tawa, ǃKhūb di ais aiǃâ; tsî gu ge Daviba Israeli ǂama gao-aose ge ǂkhauǀkhā ǃKhūb di mîs ǃoa, Samueli di ǃoabasa xu.

⁴Ob ge Daviba ge ǃgû tsî Israeli hoaba Jerusalems, ǁnās ge Jebus ǁgasa; ǁnāpan ge Jebusǁîna ǃhūb di ǁanǂgāsabe i xui-ao.

⁵On ge Jebus di ǁanǂgāsabena Davib ǃoa: Sats ge nēpa ǂgâxa tide, ti ge mî, xawe Davib ge ǁaposa ǃkhaisa, Sions, ǁnās ge Davib di ǃāsa, ge ū.

⁶Davib ge mî xui-ao: Mâb hoab, Jebusǁîna ga ǂguro ǂnaub, ǁîb ge nîra dana, ǁîb ge nîra ǂamkhoe kai. ǃNubaib ge Joab, Serujas ôaba ǂgurose ge dāsī, ǁnā-amagab ge ǁîba ge dana kai.

⁷Tsî Davib ge ǁaposa ǃkhais ǃnâ ge ǁan, ǁnā-amagas ge Davib di ǃās ti ge ǂgaihe.

⁸Tsîb ge ǃāsa ge ǂnubiǂnamipe Milosa xu ǁîs ǂnamipeb kōse, tsî Joab ge nau ǃâs ǃās disa ge dī-unu.

⁹Tsî Davib ge ǃaruǀîǀgui ge kai, ǃKhūb ǂnubidi dib ge ǁîb ǀkha hâ i xui-ao.

¹⁰Tsî nēgu ge ǁnā ǁē-aogu, Davib ge ūhâ igu di danakhoe ge i, ǁîb di gaosis ǃnâ ǃgari-aose ge tanisenga Israeli hoab ǀkha ǁîban nî gao-aodīse, ǁnā mîs ǃKhūb dis, Israeli ǂamab ge ǃhoasa.

¹¹Tsî nēs ge ǀgaus ǁnā ǁē-aogu Davib ge ūhâ igu disa: Jasobeammi, Haxmonib ôab ge ǁnā ǃnonadisigu di ǂguro ge i, gôab âba ǃnonakaidisiguǀî ra ūkhâiǃâ ǁîga ǀgui ǃnās ama ge ǃgamma.

¹²Tsî ǁîb khaoǃgâb ge Eleasari Dodob ôab, Ahohiǁîba ge i, ǁîb ge ǁnā ǃnona ǁē-aogu ǃnâ ge hâ i.

¹³ǁÎb ge Davib ǀkha Pas-Damims tawa ge hâ i, Filisteǁîn ge ǁnāpa ǃkhammi ǁga ǀhû, tsî ǃâs ǁnā ǃhūb dis ge gerst xa ge ǀoa hâ i, ǁaes ge Filisteǁîn di ais aiǃâ ǃhū ǃnubai.

¹⁴Tsîn ge ǁnā ǃâs di ǁaegub ǃnâ mâ tsî ǁîsa ge sâu tsîn ge Filisteǁîna ge ǂnau, tsî ǃKhūb ge ǁîna kai ores ǀkha ge ore.

¹⁵Tsî ǃnonagu ǁnā ǃnonadisi danagu digu ge ǃhaob ǃoa ge ǁgôa Davib ǁga ǁhoab Adulammi ǃnâ, tsî toroǂnubis Filisteǁîn dis ge ǃgoaǃnāb Rafaimmi ǃnâ ge ǁgoe i.

¹⁶Tsî Davib ge ǁnāǃnubai ǁaposa ǃkhais ǃnâ ge hâ i, tsî ǁgoeǃkhais Filisteǁîn dis ge ǁnāǃnubai Betlehems tawa ge hâ i.

¹⁷Tsî Davib ge tura tsî ge mî: Tari-e kha ǁgam-e nî ā kai te, Betlehems di tsaus, ǁāb tawa hâsa xu?

¹⁸ǃNubai gu ge ǁnā ǃnona ǁē-aoga Filisteǁîn di ǁgoeǃkhaisa ǃgûǃganu tsî ǁgam-e sī ge xuri, Betlehems di tsaus, ǁāb tawa hâs ǃnâ, tsî ǁî-e Davib tawa ge ūsī, xawe Davib ge ǁî-e ā ǂgao tama ge i tsîb ge ǁî-e ǃKhūb aiǃâ ge ǁhōǂui.

¹⁹Tsî ge mî: Tā ta ībahe, ti Elotse, nē xū-e ta nî dī ǃkhaisa. Nē aogu hîa ûib âga mā tsî go ǃgûgu di ûib ǀaoba ta kha nî ā? Tsîb ge ǁî-e ā ǂgao tama ge i. Nē ǃkhaisa gu ge nē ǃnona ǁē-aoga ge dī.

²⁰Tsî Abisaib, Joab di ǃgâsab on ge ǃnonagu di dana ge i; tsîb ge ǁhâigôab âba ǃnonakaidisigu, hîab ge ǃgamgu ǂama ge ǁhâi; tsîb ge ǁnā ǃnonagu ǃnâ ǀon-e ge ūhâ i.

²¹ǁNā ǃnonagu ǃnâb ge ǁîba nau ǀgamkha xa ǃgôasa ge i; ǁnā-amagab ge ge ǁîkha di ǂamsa kai; xaweb ge ǂguro ǃnonagu kōse sī tama ge hâ i.

²²Tsî Benajab, Jojadab ôab, ǃgari-aob, dīxūxab, Kabseels dib; ǁîb ge ǀgam ǀgaisa ǁē-aokha Moab dikha ge ǃgam, tsîb ge ǁkhāti ǁgôa tsî xamma tsaus ǃnâ ge ǃgam, tsamaros di ǁaeb ai.

²³ǁÎb ge ǁkhāti Egipteǁî khoeb hîa ge kaise gaxu ib, koro ǂhâgu kōse ge gaxu iba ge ǃgam. Tsî Egipteǁîb ge ǁhâigôab, kunis di ǂgae-ūhai-i khami ība ǃomǁae ge ūhâ i, xaweb ge Benajaba ǁîb ǃoa haib ǀkha ge ǃkhoe tsî ǁhâigôaba Egipteǁîb di ǃomǁaeba xu tsubuǂui tsî ǁîb di gôab ǂhanib ǀkha ge ǃgam bi.

²⁴Nēnab ge Benajab, Jojadab ôaba ge dī, ǁnā-amagab ge ǀon-e ge ūhâ i ǁnā ǃnona ǁē-aogu ǃnâ.

²⁵ǁÎb ge ǃnonadisigu ǂamai ge ǂkhaisa i, xaweb ge ǃnonagu ǀkha ge ǀguitikō tama hâ i. Tsî Davib ge ǁîba ǀapemā-aogu âb ǂama ge ǂnûi.

²⁶Tsî toroǂnubidi di ǁē-aogu ge nēga ge i: Asaeli, Joab ǃgâsab, Elhananni, Dodob ôab, Betlehems dib

²⁷Samoti, Harods dib, Heleb, Pelets dib,

²⁸Irab, Ikeb ôab, Tekoas dib, Abieseri, Anatots dib,

²⁹Sibexaib, Husas dib, Ilaib, Ahohiǁîb,

³⁰Maharaib, Netofas dib, Heledi, Baanab ôab, Netofaǁîb,

³¹Itaib, Ribaib ôab, Gibeas Benjaminni ôan dis dib, Benajab, Piratons dib,

³²Huraib, Gaas di ǃārogu dib, Abieli, Arbaǁîb,

³³Asmaveti, Baharums dib, Eljaxbab, Saalbons dib,

³⁴Hasemmi, Gisonǁîb di ôan Jonatanni, Sageb, Harars dib di ôab,

³⁵Ahiammi, Saxari ôab, Harars dib, Elifali, Uri ôab,

³⁶Heferi, Mexeras dib, Ahiab, Pelons dib,

³⁷Hesrob, Karmels dib, Naaraib, Esbaib ôab;

³⁸Joeli, Natanni ǃgâsab, Mibhari, Hagrib ôab,

³⁹Seleki, Amonǁîb, Naharaib, Beerotǁîb, Joab, Serujas ôab di ǀāxūtani-aob,

⁴⁰Irab, Jitriǁîb, Gareb, Jitriǁîb,

⁴¹Uriab, Hetiǁîb, Sabadi, Axlaib ôab,

⁴²Adinab, Sisab ôab, Rubenǁîb ge Rubenǁîn di dana ge i, xawe ǃnonadisigu ge ǁîb ǃnaga ge hâ i,

⁴³Hananni, Maaxas ôab, tsî Josafati Mitniǁîb,

⁴⁴Usiab, Astarots dib, Samab tsî Jeieli, Hotammi ôab, Aroers dib,

⁴⁵Jediaeli, Simrib ôab, tsî Johab, ǁîb di ǃgâsab Tisiǁîb,

⁴⁶Elieli, Mahavims dib, tsî Jeribaib tsî Josaviab, Elnaammi di ôaba tsî Jitmab, Moabǁîb,

⁴⁷Elieli tsî Obedi tsî Jaasieli, Sobab dib.