Read Khoekhoegowab 1 Kroniks 12 Bible Online

1 Kroniks 12 - Khoekhoegowab bible

1 Kroniks 12

¹Tsî nēgu ge ǁnāgu, Davib ǁga Siklags tawa ge hāga, ganupeb Sauli, Kisi ôab di ais aiǃâ sâusen hâ hîa, ǁîgu ge ǁkhāti ǁnā ǁē-aogu torodīhui ra gu ǃnâ ge hâ i;

²khāsa ra ǂgaeǃnâǃâ amǀkhāb ǁôab tsî ǁareǀkhāb ǁôab tsîn ǀkha, ǀuidi ǀkha ra ǂnoaǃâ tsî ǂāga khāsa xu ra ǁkhâuǃâ; ǁîgu ge Sauli Benjaminni dib di ǃgâsagu di ge i:

³Ahieseri tsî Joab tsîkha ge dana ge i, Semaab, Gibeas dib di ôakha; ǁnās khaoǃgâ Jesieli tsî Peleti tsîkha, Asmaveti ôakha, tsî Beraxab tsî Jehub, Anatots dib tsîkha,

⁴tsî Jismajab, Gibeonǁîb, ǃnonadisigu ǃnâ a ǁē-aob ge ǃnonadisigu ǂamai ge ǂnûihe hâ i; tsî Jeremiab, Jahasieli, Johananni, Josabadi, Gederaǁîb,

⁵Elusaib, Jerimoti, Bealjab, Semarjab, Sefatjab, Harifǁîb;

⁶Elkanab, Jisiab, Asareli, Joeseri tsî Jasobeammi tsîgu, Koraxǁîga;

⁷tsî Joelab tsî Sebadjab tsîkha, Jerohammi, Gedors dib di ôakha.

⁸Tsî Gadǁîna xu gu ge ǁkhāti ge ǀgora Davib ǃoa ǁaposa ǃkhais ǃgaroǃhūb dis ǁga ǃgari ǁē-aogu, ǃkham ǁkhā toro-aogu, khōsikhōb tsî gôab tsîkha sîsenū ǁkhā gu, xamaigu ǀkha, tsî ǃhomgu ai hâ ǁkhâisedi kōse ǃhaegu.

⁹Eseri ge dana ge i, Obadjaba ǀgamǁî, Eliaba ǃnonaǁî,

¹⁰Mismanaba hakaǁî, Jeremiaba koroǁî,

¹¹Ataiba ǃnaniǁî, Eliela hûǁî,

¹²Johananna ǁkhaisaǁî, Elsabada khoeseǁî,

¹³Jeremiaba disiǁî tsî Maxbanaiba disiǀguiǀaǁî.

¹⁴Nēgu ge Gadi di ôa ge i, toroǂnubis di danaga; ǀguib hoan xa ǂkharib ge kaidisigu ǂama tsî hoan xa kaiba ǀoadisigu ǂama ge hâ i.

¹⁵Nēgu ge ǁnāgu ǁkhāgu, Jordanna ǂguro ǁkhâb ǃnâ ǁîb di amǃgâkha hoakha kōseb ǀoa hâ hîa ge ǃgâuga tsî gu ge ǃgoaǃnāgu di ǁanǂgāsaben hoana ge doeǁgaǂui, aiǂoasǀî tsî huriǂoasǀî.

¹⁶Tsîn ge ǁkhāti ǀnîn Benjaminni tsî Judab tsîkha dina ǁaposa ǃkhais ǃoa Davib tawa ge hā.

¹⁷Ob ge Daviba ǂoa tsî ǁîna ǃoa tsî ǃeream tsî ǁîn ǃoa ge mî: ǂKhîse du ga ti ǁga hāo, tita du nî huise, ob ge ti ǂgaoba sadu ǀkha ǀguitikōse nî hâ, xawe ti khākhoen ǃomǁae du gāxaǃnâse nî māǁnâ tese i ga io, ǂkhaba-i xare-i ti ǃomkha ǃnâ hâ tama xawe, ab ǁnâi Elob sada îgu diba mû, îb ǁîsa ǁkhara.

¹⁸Tsî Gagab ge Amasaib, danakhoegu di ǂamsaba ge hāǂam, ob ge ge mî: Sida ge a sats Davits di, tsî sa ǀkha da ge hâ, sats Isaib ôatsa; ǂkhîb, ǂkhîba ab hâǀkhā tsi, tsî ǂkhîba ab hâ sa hui-aogu ǀkha, sa Elob ra hui tsi xuige. ǃNubaib ge Daviba ǁîga ǃkhōǃoa tsî toroǂnubidi di danase ge ǂnûi gu.

¹⁹Tsî ǀnîn Manaseb din ge ǁkhāti Davib ǀkha ge ǁaeǁaesen, Filisteǁîn ǀkhab ge hā ǃnubai, Saulab nî ǃkhamūse, ǁînab hui tama xawe. Filisteǁîn di gaosagu ge ǀape-ai-i ǀkha xū bi tsî: ǀNîsib ge ǁîba Sauli, ǀhonkhoeb âb ǀkha nî ǁaeǁaesen, sige di danadi ǀkha, ti ge mî.

²⁰Siklags ǃoab ge ǃgûo, o gu ge Manaseb din xa ǁîb ǀkha ge ǁaeǁaesen: Adnab, Josabadi, Jediaeli, Mixaeli, Josabadi, Elihub tsî Siletaib tsîga, ǀoadisigu Manaseb ǃnâ hâgu di danaga.

²¹Tsî ǁîgu ge Daviba toroǂnubidi ǃoagu ge hui, nēgu hoagu ge ǃgari ǁē-ao ge i xui-ao, tsî gu ge ǂamkhoe ge i toroǂnubis ǃnâ.

²²Tsēsa xu tsēs ǃoan ge ǀnîna Davib tawa ge sī, hui bin nîga; kai ǂnubi-i ge ge i Elob di ǂnubis ǁkhās khami.

²³Tsî nēdi ge ǀgaudi danagu, ǁnān toroǂnubise ǁāǁābahe hân digu dide, Davib tawa Hebrons ǁga ge hāna, Sauli di gaosisan nî ǁîb ai ǁkhae-unuse, ǃKhūb di mîmāsa ǃoa.

²⁴Judab di ôan xa khōsikhōgu tsî gôagu tsîga ra tanigu ge ǃnaniǀoadisi tsî ǁkhaisakaidisi ge i, toroǂnubisa ǁāǁābahe hâga.

²⁵Simeonni ôan xa ǃgari ǁē-aogu toroǂnubis digu hûǀoadisi tsî kaidisiga.

²⁶Levib ôan xa hakaǀoadisi tsî ǃnanikaidisiga.

²⁷Tsî Jojadab ge Aronǁîn di ǂamsa ge i, tsî ǁîb ǀkha gu ge ǃnonaǀoadisi tsî hûkaidisiga ge hâ i.

²⁸Tsî Sadoki ge ǂkham khoe ǃgari ǁē-ao ge i; tsî ǁîb îb omma xu gu ge ǀgamdisiǀgamǀa ǂamkhoega ge ǀkhī.

²⁹Tsî Benjaminni di ôan, Sauli di ǃgâsagu xa gu ge ǃnonaǀoadisi ge i; nēsis kōsen ge ǁnān, Sauli di ommi ǀkha ǁae hâna ǂgui ge i xui-ao.

³⁰Tsî Efraimmi di ôan xa ǀgamdisiǀoadisi tsî ǁkhaisakaidisigu ǃgari ǁē-aogu, ǀons â-i aogu ǁgûgu di omgu ǃnâ.

³¹Tsî ǃkhare ǃhaos Manaseb dis xa disiǁkhaisaǀaǀoadisigu, ǀondi ǀkha ge xoamâihe hâ igu, hā tsî gu nî Daviba gao-aodīga.

³²Tsî Isaskari di ôan xa gu ge ǁaegu di ǂansa ūhâga ge hā, Israeli nî dīse i xūna nî ǂanga; ǁîn di danagu ge ǀgamkaidisi ge i, tsî ǁîgu di ǃgâsagu hoagu ge ǁîgu di mîsa gere ǃgâ.

³³Tsî Sebulonna xu gu ge toroǂnubis ǃnâ ge ǂoa, toroba ǁāǁābahe hâǃâ, toroǀāxūn hoan ǀkha, korodisiǀoadisiga ǁnope ǁoa ǂgaob ǀkha ra ǀhûǃâ.

³⁴Tsî Naftaliba xu ǀguiǀoadisi ǂamsagu tsî ǁîgu ǀkha khōsikhōb tsî gôab tsîkha ǀkha ǃnonadisihûǀaǀoadisiga.

³⁵Tsî Danǁîna xu ǃkhamma ǁāǁābahe hâǃâ ǀgamdisiǁkhaisaǀaǀoadisi tsî ǃnanikaidisiga.

³⁶Tsî Asera xu toroǂnubis ǃnâ ra ǂoaǃâ, torodomma gu nî ūhâse, hakadisiǀoadisiga.

³⁷Tsî Jordanǃāb nau ǃnanib din, Rubenni tsî Gadǁîn tsî ǃkhare ǃhaos Manaseb dis dina xu hoaǃnâgu toroǀāxūn ǀkha; ǀguikaidisi tsî ǀgamdisiǀoadisiga.

³⁸Nē toro-aogu hoagu, torob di dommi ai ra tanisengu ge ǀoa hâ ǂgaob ǀkha Hebrons tawa ge hā, Daviba gu nî Israeli hoab ǂama gao-aodīse. Tsî nau ǃâs Israeli dis hoas on ge ǀgui ǂgaob ǀkha ge hā, Daviban nî gao-aodīse.

³⁹Tsîn ge ǁnāpa Davib tawa ǃnona tsēdi kōse ge hâ ǂû tsî ra āǃâ; ǁîn di ǃgâsagu ge ǁîna ǁāǁāba xui-ao.

⁴⁰Tsî ǁkhāti ǁîna, ǀgūse hân, Isaskari tsî Sebulonni tsî Naftalib tsîn kōsen ge pere-e ge ūhā eseln ai tsî kameln tsî hā-eseln ai tsî goman ai, tsampereǂûn, ǀnomaǂûn di ǃâdi tsî ǂâunarudi tsî ǂauxûib tsî olib tsî goman tsî ǀgoan tsîn xa kaise ǂguina, ǃgâiaǂgaob ge Israeli ǃnâ hâ i xui-ao.