Read Khoekhoegowab 1 Kroniks 13 Bible Online

1 Kroniks 13 - Khoekhoegowab bible

1 Kroniks 13

¹Tsî Davib ge ǀapeǀhaosa ge dī ǀoadisigu tsî kaidisigu di ǂamkhoegu ǀkha tsî gaosagu hoagu ǀkha.

²Tsî Davib ge Israeli ǀhaohâb hoab ǃoa ge mî: ǃGâibahe du kao, tsî ǃKhūb sada Eloba xu i ga io, a da sîma nau ǃgâsagu sada diga, Israeli ǃhūgu hoagu ǃnâ hâgu tsî pristergu tsî Leviǁîgu ǃādi ǃnâ ǁîgu ǀkha tsî aiǃādi âdi ǃnâ, î gu sada tawa ǀhû.

³Î da ǂgaes sada Elob disa ǁkhawa sada tawa ūhā, Sauli di tsēdi ǃnâ da ge ǁîsa ôa tama hâ i xuige.

⁴ǁGoasib ge ǀhaohâb hoaba: A da ǁnāti dī, ti ge mî; nē ǃkhais ge ǁaes hoas mûǁae ǃgâi i xui-ao.

⁵Ob ge Daviba Israeli hoaba ge ǀhaoǀhao Egipteǁî Sihorsa xu, Hamats tawats ra sīs kōse, Elob di ǂgaes nî Kiriat-Jearimsa xu ūhāhega.

⁶ǃNubaib ge Daviba Israeli hoab ǀkha Baalas, ǁnās ge Kiriat-Jearims Judab ǃnâ ǁgoes ǃoa ge ǃgû, ǂgaes Elob, ǁnā ǃKhūb xerugu ǁaegu ǁan hâb disab nî ǁnāpa xu ūǃapase, ǀons ra ǁîs tawa ǂgaiǀîhesa.

⁷Tsîn ge Elob ǃgaeǀhaos di ǂgaesa ǀasa kuni-i ai Abinadab di omsa xu ge ūǃgû. Tsî Usab tsî Ahiob tsîkha ge kunisa ge ǂgaeǂgui.

⁸Tsî Davib tsî Israeli hoab ge Elob di ais aiǃâ ǀgaib hoab ǀkha ge ǀkhō, amdi ǀkha tsî harpdi ǀkha tsî ǀganaǀkhōxūn ǀkha tsî ǃkhuwuǃkhuwudi ǀkha tsî simbaln ǀkha tsî ǀgapadadi ǀkha.

⁹Tsî Kidonni di dāǃnâǃkhais tawan ge sīo, ob ge Usaba ǃommi âba ge ǀhōǂui, ǂgaesab nî ǂhēse, goman ge ǂgō xui-ao.

¹⁰ǃNubaib ge ǃKhūb di ǁaiba ge ǂhubi Usab ǂama, tsîb ge ǁîba ge ǂnau, ǃommi âbab ge ǂgaesǀî ǀhōǂui amaga; ob ge ǁnāpa Elob di ais aiǃâ ge ǁō.

¹¹Ob ge Daviba ge ǃoa, ǃKhūb go Usab tawa ǂkhôa-e dī amaga; ǁnā-amagab ge ǁnā ǃkhaisa Peres-Usa ti ge ǂgai nētsēs kōse.

¹²Tsî Davib ge ǁnātsē ǃKhūba ge ǃao, mî rase: Mati ta kha ǂgaes Elob disa tita tawa nî ūhā?

¹³ǁNā-amagab ge Daviba ǂgaesa ǁîb tawa Davib di ǃās tawa ūhā kai tama, tsîb ge ǁîsa Obed-Edommi, Gatǁîb di oms ǃnâ ge ūsī.

¹⁴Nētis ge Elob di ǂgaesa Obed-Edommi di ommi din ǀkha ǁîb di oms ǃnâ ge hâ ǃnona ǁkhâgu kōse; ob ge ǃKhūba Obed-Edommi di omma ge ǀkhae tsî ǁîb ūhân hoana.