Read Khoekhoegowab 1 Kroniks 14 Bible Online

1 Kroniks 14 - Khoekhoegowab bible

1 Kroniks 14

¹ǃNubaib ge Hirammi, Tires di gao-aoba sîsabega ge sî Davib ǁga tsî sederhain tsî ǂnubi-aogu tsî ǃnaokuru-aogu tsîga, omma gu nî ǂnubiba bise.

²Ob ge Daviba ge hōǃâ, ǃKhūb ge ǁîba gao-aose Israeli ǂama ǁapoǁapo ǃkhaisa; gaosis âb ge kaise ge ǀgapi ǁîb di ǁaes Israels ǃaroma.

³Tsî Davib ge gorose ǀnî tarade ge ū Jerusalems tawa, tsî Davib ge ǃaruǀî ǂgui ǀgôadi tsî ǀgôagu tsîna ge hō.

⁴Tsî nēdi ge ǀondi ǁnā ǀgôan, Jerusalems tawab ge ūhâ in dide: Samuab tsî Sobab, Natanni, Salomob,

⁵Jibhari, Elisuab, Elpeleti,

⁶Nogab, Nefegi, Jafiab,

⁷Elisamab, Beeljadab tsî Elifeleti tsîga.

⁸Tsî Filisteǁîn ge ǁnâuo, Davib ge Israeli hoab ǂama gao-aose ǂkhauǀkhāhe ǃkhaisa, on ge Filisteǁîn hoana ge ǃgû, Daviban nî ôase. Tsî Davib ge ǁnâuo, ob ge ge ǂoa ǁînab nî ǃgûǃoase.

⁹Tsî Filisteǁîn ge hāo, on ge ǃgoaǃnāb Rafaims dib ǃnâ ge khoraǁguisen.

¹⁰ǃNubaib ge Daviba Eloba dî tsî ge mî: ǂGaeǂoa ta nî Filisteǁîn ǃoagu, tsî ti ǃomǁae māts nî ǁîna? Ob ge ǃKhūba ǁîb ǃoa ge mî: ǂGaeǂoa re, sa ǃomǁae ta ge ǁîna nîra mā xuige.

¹¹Tsî Baal-Perasims ǃoan ge ǃgûo, ob ge Daviba ǁnāpa ǁîna ge ǂnau. Tsî Davib ge ge mî: Elob ge khākhoen âtana ti ǃommi ǀkha go khôaǃganu, ǁgamgu ra khôaǃganu khami. ǁNā-amagan ge ǀons ǁnā ǃkhais disa Baal-Perasims ti ge ǂgai.

¹²Tsîn ge ǁîn di eloga ǁnāpa ge ǁnāxū; ob ge Daviba ge mîmā, î gu ǀaes ǀkha khauǃkhūhe.

¹³Xawen ge Filisteǁîna ǃaruǀîǀgui hā tsî ǁnā ǃgoaǃnāb ǃnâ ge khoraǂuisen.

¹⁴Ob ge Daviba Eloba ǁkhawa ge dî; ob ge Eloba ǁîb ǃoa ge mî: Tā ǁîna ǃgôaǃgon, îts ǁîna ǀgapiseba xu ǃnamiǂgā, îts ǀgoehaina xu ǁîn ǂama hā.

¹⁵O i ge nîra ī, ǀōb ǀgoehain di ǂaogu ai ra ǀōbats ga ǁnâu, ǃnubai ǂoaxa ǃkhammi ǁga; Elob ge sa aiǃâ nîra ǂoa xuige, Filisteǁîn di toroǂnubisab nî ǂnause.

¹⁶Ob ge Daviba Elob ge mîmā bi khami ge dī; on ge Filisteǁîn di ǂnubisa ge ǂnau Gibeonsa xu Gesers kōse.

¹⁷Nētis ge Davib di ǀonsa ǃhūgu hoagu ǃnâ ge ǂoa, tsî ǃKhūb ge ǃhurib âba ǁnā ǀūben hoan ǂama ge hā kai.