Read Khoekhoegowab 1 Kroniks 15 Bible Online

1 Kroniks 15 - Khoekhoegowab bible

1 Kroniks 15

¹Tsî Davib ge omga ge dībasen ǁîb di ǃās ǃnâ, tsîb ge Elob di ǂgaesa ǃkhaisa ge dība tsî tentomsa ǁîs ǂama ge ǂnaumâi.

²ǃNubaib ge Daviba ge mî: Khoe-i xare-i ge anu tama hâ, Elob di ǂgaesa tanisa, Leviǁîgu ǀguigu: ǁÎgab ge ǃKhūba ge ǁhûiǂuibasen, Elob di ǂgaesa gu nî taniga, tsî ǁîba gu nî ǃoabaga ǀamosib kōse.

³ǁKhātib ge Daviba Israeli hoaba Jerusalems tawa ge ǀhaoǀhao ǃKhūb di ǂgaesa gu nî ūsīse, ǁîs di ǃkhais, ǁîb ge ǁîsa ǂhomibas ǃoa.

⁴Tsî Davib ge Aronni di ôagu tsî Leviǁîgu tsîga ge ǀhaoǀhao.

⁵Kehati ôagu xab ge Uriela ǂamsa ge i, tsî ǁîb di ǃgâsagu ge ǀguikaidisi tsî ǀgamdisi ge i;

⁶Merarib di ôagu xab ge Asajaba ǂamsa ge i, tsî ǁîb di ǃgâsagu ge ǀgamkaidisi tsî ǀgamdisi ge i;

⁷Gersommi di ôagu xab ge Joela ǂamsa ge i, tsî ǁîb di ǃgâsagu ge ǀguikaidisi tsî ǃnonadisi ge i;

⁸Elisafanni di ôagu xab ge Semajaba ge ǂamsa i, tsî ǁîb di ǃgâsagu ge ǀgamkaidisi ge i;

⁹Hebronni di ôagu xab ge Eliela ǂamsa ge i, tsî ǁîb di ǃgâsagu ge ǁkhaisadisi ge i;

¹⁰tsî Usieli di ôagu xab ge Aminadaba ǂamsa ge i, tsî ǁîb di ǃgâsagu ge ǀguikaidisi tsî disiǀgamǀa ge i.

¹¹Tsî Davib ge pristerkha Sadoki tsî Abjatari tsîkha ge ǂgai tsî Leviǁîgu Urieli tsî Asajab tsî Joeli tsî Semajab tsî Elieli tsî Aminadab tsîga.

¹²Tsîb ge ǁîgu ǃoa ge mî: Sago ge ǁgûgu Leviǁîn digu ǃnâ a dana; khaisen re sago tsî sago di ǃgâsagu tsîgo, î go ǃKhūb, Israeli Elob di ǂgaesa ūsī, ǁnā ǃkhais, ǁîsa ta ge ǂhomibas ǃoa.

¹³Sago ge ǂgurose ǁîsa dī tama amagab ge ǃKhūb, sada Eloba, ǀkhao-e ge ǀkhao, ǁîba da ge ǂhanu a khami ôa tama hâ i xui-ao.

¹⁴O gu ge pristergu tsî Leviǁîgu tsîga ge khaisen, ǃKhūb Israeli di Elob ǂgaesa gu nî ūsīse.

¹⁵Tsî Leviǁîgu ge Elob di ǂgaesa ǁîgu di ǃhōgu ai ge tani, hain ǁîgu ai hân ǀkha, Moseb ge mîmā khami, ǃKhūb di mîs ǃoa.

¹⁶Tsî Davib ge Leviǁîn di ǂamsagu ǃoa ge mî, ǁîn di ǃgâsagu, ǁnae-aoga gu ǀkhōxūn ǀkha nî ǂnûi ǃkhaisa ǀganaǀkhōxūn tsî harpdi tsî simbaldi tsîn ǀkha, î gu ǁnâukaisen domma ǃgâiaǂgaob ǀkha ra ǃhâkhâiǃâ.

¹⁷O gu ge Leviǁîga Hemanni, Joeli ôaba ge ǂnûi tsî ǃgâsagu âb xa Asafi Berexjab ôaba, tsî Merarib ôagu, ǁîgu di ǃgâsagu xa Etanni, Kusajab ôaba;

¹⁸tsî ǁîgu ǀkha ǁîgu di ǃgâsagu ǀgamǁî dommi diga; Saxariab, Jaasieli, Semiramoti, Jehieli, Unib, Eliab, Benajab, Maasejab, Matitjab, Elifelehub, Miknejab, Obed-Edommi tsî Jeieli tsîga, ǁāb ǃûi-aoga.

¹⁹Tsî ǁnae-aogu Hemanni tsî Asafi tsî Etanni tsîgu ge ge ǁnâukaisen ǂaib simbaln ǀkha;

²⁰tsî Saxariab, Asieli, Semiramoti, Jehieli, Unib, Eliab, Maasejab tsî Benajab tsîga ǀganaǀkhōxūn ǀkha Alamots ai,

²¹tsî Matitjab, Elifelehub, Miknejab, Obed-Edommi, Jeieli tsî Asasiab harpdi ǀkha, Seminits ai ǀōba nî ǀgaiǀgaise.

²²Tsî Kenanjab, Leviǁîn di ǂamsab, ge ǁnaes di tsoatsoas ǂama ge hâ i; ǁîb ge ǁîna ǁnaeb di tsoatsoas ǃnâ gere ǁgau, ǁnâuǃāxab ge i amaga.

²³Tsî Berexjab tsî Elkanab tsîkha ge ǂgaes di ǁāb ǃûi-ao ge i.

²⁴Tsî Sebanjab, Josafati, Netaneli, Amasaib, Saxariab, Benajab tsî Elieseri, pristergu, ge ǀgapadadi ǀkha ge xâi Elob di ǂgaes aiǃâ. Tsî Obed-Edommi tsî Jehiab tsîkha ge ǂgaes di ǁāb ǃûi-ao ge i.

²⁵Tsî i ge ge ī, Davib tsî Israeli di kaigu tsî ǀoadisigu di ǂamsagu tsîgu ge ǃgû ǃkhaisa ǃKhūb di ǃgaeǀhaos di ǂgaesa gu nî ūsīse Obed-Edommi di omma xu ǃgâiaǂgaob ǀkha.

²⁶Tsî i ge ge ī, Elob ge Leviǁîgu, ǃgaeǀhaos di ǂgaesa ra taniga hui ǃkhais ǃaroma gu ge hû ǁgōgu tsî hû bairagu tsîna a ǁguiba ǃkhaisa.

²⁷Tsî Davib ge ǂamsaraba ge ana hâ i, ǀui lineǃkhaib ǀkha a dīsaba, ǁkhāti Leviǁîgu, ǂgaesa ra tanigu hoagu tsî ǁnae-aogu tsî Kenanjab, ǁnae-aogu di ǁnaes tsoatsoa-amaob on; ǁkhātib ge Daviba ǀkhāb di saraba ge ana hâ i, lineǃkhaib ǀkha a dīsaba.

²⁸Nētib ge Israeli hoaba ǂgaes ǃKhūb di ǃgaeǀhaos disa ge ūsī dâb ǀkha, tsî ǀgapadas di ǀōb ǀkha tsî xâiǁnâdi ǀkha tsî simbaln ǀkha tsî ǃgarise ra ǀō ǀganaǀkhōxūn tsî harpdi tsîn ǀkha.

²⁹Tsî i ge ge ī, ǂgaes ǃKhūb di ǃgaeǀhaos dis ge Davib di ǃās ǃnâ sīo, os ge Mixals, Sauli ôasa mûǂuidaosa-ū ǂui tsî gao-aob Davib ra uri tsî ǀkhō ǃkhaisa ge mû; os ge ǁîba ǂgaob âs ǃnâ ge ǃharaxū.