Read Khoekhoegowab 1 Kroniks 16 Bible Online

1 Kroniks 16 - Khoekhoegowab bible

1 Kroniks 16

¹Tsî Elob di ǂgaesa gu ge ūǂgāo, o gu ge ǁîsa ge mâi ǁnā tentoms Davib ge ǁîsa ǂnaumâibas ǃnâ; tsîn ge khauǁguibadi tsî ganganǁguibadi tsîna Elob di ais aiǃâ ge ǁguiba.

²Tsî Davib ge khauǁguibadi tsî ganganǁguibadi tsîna ǁguibatoao, ob ge ǁaesa ǃKhūb ǂnubidi dib di ǀons ǃnâ ge ǀkhae.

³Tsîb ge mâ-i hoa-i Israeli di-i, aob kas, taras kas hoasa mâ-i hoa-e pereǃâs tsî îsa ǁganǃâ-i tsî ǃgapas ǂauxûib xa ge ǂhûiǂuiba.

⁴Tsîb ge ǃKhūb di ǂgaes aiǃâ ǀnîgu Leviǁîn diga ǃoaba-aose ge ǂnûi, ǃKhūb, Israeli di Eloba gu nî kare tsî gangan tsî ǃkhōǀkhāse:

⁵Asafi ge dana ge i tsî Saxariaba ǀgamǁîse, ǁîb khaoǃgâ; Jaasieli, Semiramoti, Jehieli, Matitjab, Eliab, Benajab, Obed-Edommi tsî Jeieli tsîga ǀkhōxūn, ǀganaǀkhōxūn tsî harpdi ti ra ǂgaihen ǀkha; tsî Asafi ge simbaln ǀkha ge ǀkhō,

⁶tsî Benajab tsî Jahasieli tsîkha, pristerkha, ge hugaǀgui xâiǁnâde gere xâi Elob di ǃgaeǀhaos di ǂgaes aiǃâ.

⁷ǁNā tsēs ǁkhās aib ge Daviba ǂguro ǃnās ai nē psalmsa ge mā, ǃKhūb nî ganganhega, Asafi tsî ǃgâsagu âb di ǃoabasa xu.

⁸Koa re ǃKhūba, ǂgaiǀî re ǀons âba; ǁîb di dīga ǂanǂan re ǁaedi ǃnâ.

⁹ǁNaeba bi re, psalmǁnaeba bi re; ǃhoa re ǁîb di buruxa dīn hoan xa.

¹⁰Koasen re ǃanu ǀons âb ǃnâ; ab ǂgaob ǁnān, ǃKhūba ra ôan diba ǃgâiaǂgao re.

¹¹ǃKhūb tsî ǀgaib âb tsîkha ǂgan re; ôa re ǁîb di aisa hugaǀgui.

¹²ǂÂi re ǁîb di buruxan hîab ge dīn xa, ǁîb di buruxa saodi xa tsî ǀgoraǃgâdi ǁîb ams didi xa,

¹³sa suridu, Israeli, ǁîb ǃgāb dido, Jakob, ǃkhōǂuisabeb âb di ôado.

¹⁴ǁÎb ge a ǃKhū, sada di Elo; ǀgoraǃgâdi âb ge ǃhūbaib hoab ai hâ.

¹⁵ǁÎb ge ǃgaeǀhaos âb xa ra ǂâi ǀamosib kōse; ǁnā mîs ǁîb ge ǂnûiǂgās xa, ǀoadisi ǃhaodi kōse,

¹⁶ǁnā ǃgaeǀhaos Abrahammi ǀkhab ge dīs xa, tsî Isakab ge nūba nūs xa.

¹⁷ǁÎsab ge ǁkhāti Jakoba ǂnûiǂgās ase ge ǂnûiba, Israela ǀamo ǃgaeǀhaos ase,

¹⁸mî raǃâ: Tita ge Kanaanǃhūba nîra mā tsi, sadu di ǀumis di ǀnōǁnâb ase.

¹⁹ǃGôab ân ge ǀoro ge i, ā, ǀoro khoese tsî ǃhaokhoese ǁîb ǃnâ,

²⁰tsî ǁaesa xu ǁaes ǃoan ge doe ǃnubai, nē gaosisa xu nau ǁaes kōse,

²¹ob ge khoe-i xare-e mā-am tama ge hâ i ǁîna ǁgâiǀāsa; tsîb ge ǁkhāti gao-aoga ǁîn ǃaroma gere ǁkhara.

²²Tā tsâǀkhā re ti ǂkhauǀkhāsabena, î ti kēbo-aoga tā tsūdī re.

²³ǁNaeba re ǃKhūba, ǃhūgo hoago; ǂhôa re ǁîb di ǃgâiǃōba tsēsa xu tsēs ǃoa.

²⁴ǂHôa re ǃgôasib âba ǃhaodi ǃnâ, ǁîb di buruxa dīna ǁaedi hoadi ǃnâ.

²⁵ǃKhūb ge a kai tsî karehesa anu xuige; tsî ǁîb ge a ǃaoǃaosa elogu hoagu ǂamai.

²⁶ǁAedi di elogu ge a ǁgôatsuiǁgoa-elo xui-ao, xawe ǃKhūb ge ǀhomga ge dī.

²⁷Anusib tsî ǂkhaisib tsîkha ge ais âb aiǃâ hâ, ǀgaib tsî dâb tsîkha ǁîb di hâǃkhais ǃnâ.

²⁸ǃKhūba mā re, ǁaedi di ǃhaoso, ǃKhūba mā re ǃgôasib tsî ǀgaib tsîkha.

²⁹ǃKhūba mā re ǀons âb di ǃgôasiba, ǁguibade ǁguiba re, î du ais âb aiǃâ hā re. ǀGoreǀî du re ǃKhūba ǂkhaisib ǃanusib âb dib ǃnâ.

³⁰ǃHuri re ais âb aiǃâ, ǃhūbaits hoatse! ǃHūbaib on ge nîra ǁapoǁapohe ǁnopeb tides kōse.

³¹A gu ǃhomga ǃgâiaǂgao re, îb ǃhūbaiba dâ re; în ǀūben ǁaegu: ǃKhūb ra gaosîsen, ti mî re.

³²Îb huriba ǀō re ǁîb ǃnâ hân hoan ǀkha; îb ǃauba dâ re ǁîb ǃnâ hân hoan ǀkha!

³³ǃNubai di ge haidi ǁoes dide nîra dâ ǃKhūb di ais aiǃâ, ǁîb ra hā, ǃhūbaibab nî ǀgoraǃgâse xui-ao.

³⁴ǃKhōǀkhā re ǃKhūba, ǁîb a ǃgâi xuige; ǁîb di ǀkhomxaǂgaosib ge a ǀamo xuige.

³⁵Î du mî: Ore da re, Elots sida ǃgâiǃōb ditse; îts ǀhaoǀhao da re, îts ore da re ǀūbena xu, î da ǃanu ǀons âtsa ǃkhōǀkhā, î da sa koas ǃnâ koasen re.

³⁶Ab koahe re ǃKhūb, Israeli di Eloba, ǀamosiba xu ǀamosib kōse! Os ge ǁaes hoasa: Amen, ti mî tsî ǃKhūba ge koa.

³⁷Nētib ge ǁnāpa ǃKhūb di ǃgaeǀhaos di ǂgaes aiǃâ Asafi tsî ǁîb di ǃgâsagu tsîga ge ǁnāxū, hugaǀgui gu nî ǂgaes aiǃâ ǃoabase, mâ tsēs hoasa ǁîs ǂnûibahe hâ xū-e.

³⁸Tsî Obed-Edommi ge ǁîgu di ǃgâsagu ǀkha ǃnanidisiǁkhaisaǀa ge i; tsîb ge Obed-Edommi, Jedutunni ôab, tsî Hosab tsîkha ǁāb ǃûi-aose ge ǂnûi.

³⁹Tsî pristeri Sadoki tsî ǁîb di ǃgâsagu pristergab ge tabernakeli aiǃâ ge ǁnāxū, ǀgapib, Gibeons tawa hâb ai,

⁴⁰hugaǀgui gu ǃKhūba nî ǁguibaga khauǁguibas di altars ai, ǁgoaga tsî ǃuia, tsî nēn hoana gu nî dīse ǃKhūb di ǂhanub, Israelab ge mîmāb ǃnâ xoahe hâ xase.

⁴¹Tsî ǁîgu ǀkha Hemanni tsî Jedutunni tsî nau ǃkhōǂuisabegu ǀons ǀkha ge ǂgaihegu tsîga, ǃKhūba gu nî ǃkhōǀkhāse, ǀkhomxasib âb ǀamosib kōse hâ xui-ao.

⁴²Tsî ǁîgu ǀkha kha ge Hemanni tsî Jedutunni tsîkha ge hâ i xâiǁnâdi tsî simbaln ǀkha, ǁnān, hîa ra ǁnâukaisenn, tsî ǀkhōxūn, Elob ra koa-ūhen ǀkha; xawe Jedutunni ôagu ge ǁāb tawa ge hâ i.

⁴³Nētis ge ǁaes hoasa ge ǃgû, mâ-i hoa-e ǁî-i di oms ǃoa, tsî Davib ge ge oa, ommi âbab sī nî ǀkhaese.