Read Khoekhoegowab 1 Kroniks 17 Bible Online

1 Kroniks 17 - Khoekhoegowab bible

1 Kroniks 17

¹Tsî i ge ge ī, Davib ge oms âb ǃnâ ǁano, ob ge Daviba Natanni kēbo-aob ǃoa ge mî: Mû, tita ge sederoms ǃnâ ǁan hâ, xawe ǂgaes ǃKhūb di ǃgaeǀhaos dis ge tentoms ǃnâ mâ.

²ǃNubaib ge Natanna Davib ǁga ge mî: Sa ǂgaob ǃnâ hân hoana dī re, Elob sa ǀkha hâ xuige.

³Xawe i ge ǁnā tsuxub ǁkhāb ǃnâ ge i, Elob mîs ge Natanni tawa hā tsî mî ǃkhaisa:

⁴ǃGû îts Davib ti ǃgāb ǁga mî: Nētib ra ǃKhūba mî: Sats ge tita omma ǂnubiba tide, ǁîb ǃnâ ta nî ǁanse.

⁵Tita ge om-i xare-i ǃnâ ge ǁan tama hâ i, ǁnā tsēs Israela ta ge ǂgaeǂguiǂuisa xu nētsēs kōse; tsî ta ge tita ge re ǃgû tentomsa xu tentoms kōse tsî tabernakela xu tabernakeli kōse.

⁶Israeli ôan ǀkha ta gere ǃgûma ǃkhai-i hoa-i tawa, xare ǀgui mîs xawesa mî ta ge, ǁnā ǂhanuǂhanu-aogu Israels digu, ti ǁaesa gu nî ǃûi, ti ta ge mîmā gu di ǀguib ǃoa: Tare xū-i ǃaroma du kha sederom-e ǂnubiba te tama hâ?

⁷Tsî nēsits ge nēti ti ǃgāb Davib ǃoa nî mî: Nētib ra mî ǃKhūb ǂnubidi diba: Tita ge satsa gūn di ǃû-aisa xu, gūn khaoǃgâba xu ge ū, ti ǁaes Israels di aiǃgû-ao kaits nîga.

⁸Tsî tita ge sa ǀkha ge hâ i, ǃgûts gere ǃkhai-i hoa-i tawa, tsî tita ge sa khākhoen hoana ais âtsa xu ge hîkākā; tsî tita ge satsa ǀonsa ge dība ǁnā kaigu, ǃhūbaib ai hâgu di ǀons ǁkhās xase.

⁹Tsî tita ge ti ǁaes Israelsa ǃkhai-e ge ǁāǁāba tsî ǁîsa ge ǂgā, ǁîs di ǃkhais ais nî ǁanga, tsî ǃaruǀîs doeǁgamahe tidega; tsî ǂkhabasib ôan ǁîsa ǃaruǀî ǂkhôadī tidega, ǂguro i ge ī i khami.

¹⁰ǂHanuǂhanu-aogu nî ti ǁaes Israels ǂama hâsa ta ge mîmā tsēsa xu ta ge tita satsa ǁkhāti sâba ge mā sa khākhoen hoana xu; tsî ta ge sa khākhoen hoana ge ǃgamǃgam; tsî ta ge ǁkhāti ge ǂanǂan tsi, ǃKhūb satsa omma nîra dība ǃkhaisa.

¹¹Sa tsēdi ga ǀoao, ǁgûgu ǃoats nî ǃgûse, o ta ge tita sa suriba sa khaoǃgâ nîra khâi kai, sa ôagu di ǀgui nî iba; tsî ta ge gaosisa ǁîba nîra ǁapoǁapoba.

¹²ǁÎb ge tita omma nîra ǂnubiba, tsî tita ge trons ǁîb disa nîra ǁapoǁapo ǀamosib kōse.

¹³Tita ge ǁîba ǁgûse nîra ība, tsî ǁîb ge tita ǀgôase nîra iba; tsî ti ǀkhomxasiba ta ge ǁîba xu ǁkhae tide, ǁnāb, sa aiǃâ ge hâ iba xu ta ge ǁîba ūbē khami.

¹⁴Tsî ta ge ǁîba nîra ǂnûi ti ommi ǃnâ tsî ti gaosis ǃnâ ǀamosib kōse; tsî trons âb ge ǀamosib kōse nîra mâǁapo.

¹⁵Nē mîdi hoadi ǃoa tsî nē ai-i hoa-i ǃoab ge Natanna Davib ǁga ge ǃhoa.

¹⁶ǃNubaib ge gao-aob Daviba ǂgâ tsî ǃKhūb di ais aiǃâ ǂnû tsî ge mî: Tari ta tita, ǃKhū Elotse, tsî tareba ti omma, ots nēs kōse go ūhā te?

¹⁷Tsî nēs ge sa mûǁae ganupe ǂkhari ge i, ǃKhū Elotse, tsîts ge ǁkhāti sa ǃgāta di ommi xa ǃnūse ǃgoaxa xūn xa goro ǃhoa, tsîts ge ǁîsa khoen di dommi ai goro dī, ti ǃKhū Elotse.

¹⁸Tsî tare-e ta Davita ǃaruǀî nî ǃhoa sa ǃgāta ti ǃgôasib xa? Sats kom sa ǃgāta a ǂano.

¹⁹Sa ǃgāta ǃaroma tsî sa ǂgaob ǃoats ge satsa nē kai xūn hoana goro dī, nē kai xūn hoanats nî ǂanǂanga.

²⁰ǃKhūtse, khoe-i xare-i ge sats khami ī tama hâ, tsî ǀnî Elob xareb ge a ǀkhai, sats ǀguits, sida di ǂgaedi ǀkha da ge ǁnâu khami.

²¹Tsî mâ ǁae-e kha sa ǁaes Israels khami ī ǃhūbaib ai, sats Elots ge ǃgû tsî orebasensa sa ǁaese, ǀonsats nî dībasense kai tsî ǃhuriǃhurisa dīǃkhaidi ǀkha, ǃhaode ra ǂhāǂuiǃâ, sa ǁaes Egipteba xuts ge orebasens di ais aiǃâba xu?

²²Tsîts ge sa ǁaes Israelsa satsa ǁaese ge ǁapoǁapobasen ǀamosib kōse, tsî sats ǃKhūts ge ǁîna ge Elo kaiba.

²³Tsî nēsi ǁnâi, ǃKhū Elotse, nē mîs sa ǃgāta ǂama tsî ommi âtab ǂamats goro ǃhoasa, as ǁîsa mâhō ǀamosib kōse; îts sats ge mî khami dī re.

²⁴Îs ǀons âtsa kaikaihe re ǀamosib kōse, în khoena mî: ǃKhūb ǂnubidi dib ge a Elo Israeli ǂama, ob ge ommi sa ǃgāb Davib diba nîra mâhō sa ais aiǃâ.

²⁵Sats, ti Elots sa ǃgāta di ǂgaera ǃnâ ge ǂhaiǂhai xui-ao, sats nî tita omma kuruba ǃkhaisa; ǁnā-amaga ta ge sa ǃgāta ǂgaob âtab ǃnâ go hō sa ais aiǃâ ǀgoresa.

²⁶Tsî nēsi, ǃKhūtse, sats ge a ǁnā Elo, tsî sats ge nē ǃgâiba sa ǃgāta ǂama ge ǃhoa.

²⁷O ǁnâi nēsi ǃgâibahe re sa ǃgāta di ommats nî ǀkhae ǃkhais xa, ǀamosib kōseb nî sa ais aiǃâ hâse: Sats ǃKhū Elots ge ǁîba ge ǀkhae, tsîb ge sa ǃgāta di omma ǀamosib kōse ǀkhaehe hâse nîra hâ.