Read Khoekhoegowab 1 Kroniks 18 Bible Online

1 Kroniks 18 - Khoekhoegowab bible

1 Kroniks 18

¹Tsî i ge nēn khaoǃgâ ge ī, Davib ge Filisteǁîna ǂnau tsî ǁîna dā ǃkhaisa, tsîb ge Gats tsî ǁîs ǃnaga hâ ǃāde Filisteǁîn di ǃomǁaeba xu ge ū.

²ǁKhātib ge ǁîba Moabǁîna ge ǂnau on ge Moabǁîna ge Davib di ǃgā kai ǀkhaexūna ra ūhāǃâ.

³Davib ge ǁkhāti Hadad-Eseri, Sobas di gao-aoba ge ǂnau, Hamats kōse ǃommi âbab nî Eufratǃāb kōse ǂnûiseb ge ǃgû ǃnubai.

⁴Tsî Davib ge ǁîba ǀguiǀoadisi kunide ge ūǀhana tsî hûǀoadisi ǃgapi-aoga tsî ǀgamdisiǀoadisi ǀnūǃgû-aoga; tsî Davib ge kunihāgu hoaga ge ǃkhaiǃnôa, xaweb ge ǀguikaidisi kunidi diga ge ǃgaubasen.

⁵Tsî Siriaǁîgu ge Damaskusa xu ge hā, Hadad-Eseri, Sobas di gao-aoba gu nî huiga; xawe Davib ge Siriaǁîgu xa ǀgamdisiǀgamǀaǀoadisi aoga ge ǂnau.

⁶Tsî Davib ge toroǂnubide Damaskus Siriab dis ǃnâ ge ǂnûi, tsî Siriaǁîn ge Daviba ge ǃgā kaiba, ǀkhaexūna ra ūhāse. Tsî ǃKhūb ge Daviba gere sâu ǃgûǂoab gere ǃkhai-i hoa-i tawa.

⁷Tsî Davib ge ǃhuniǀurikhōsikhōgu, Hadad-Eseri di ǃgāgu di ge iga ū tsî ǁîga Jerusalems tawa ge ūsī.

⁸ǁKhātib ge Daviba kaise ǂgui ǂaiba ge ū Tibhatsa xu tsî Kunsa xu, Hadad-Eseri di ǃāra xu; ǁîb ǀkhab ge Salomoba ǂaihurib tsî ǂkhâǃnâgu tsî ǂaixapan tsîna dība.

⁹Tsî Toub, Hamats di gao-aob ge ǁnâuo, Davib ge Hadad-Eseri, Sobas gao-aob di toroǂnubis hoasa ǂnau ǃkhaisa,

¹⁰ob ge Touba ǁîb di ôab Hadoramma gao-aob Davib ǃoa ge sî, ǃgâihâsib âb xab nî dî biga tsî ǁîbab nî ǀkhaega, Hadad-Esera ǃkhamū tsîb ge ǁîba ǂnau ǃkhais xa, Hadad-Eseri hūkaǀgui gere torodī Toub ǀkha xui-ao, tsîb ge ǃhuniǀurib tsî ǀhaiǀurib tsî ǂaisoade ge sîba bi.

¹¹Nēn onab ge gao-aob Daviba ǁkhāti ǃKhūba ge khaiba ǁnā ǀhaiǀurib tsî ǃhuniǀurib tsîkha ǀūben hoana xub ge ūhākha ǀkha: Edomǁîna xu tsî Moabǁîn tsî Amonni ôana xu tsî Filisteǁîna xu tsî Amalekǁîna xu.

¹²Tsî Abisaib, Serujas ôab on ge Edomǁîna ǂŌbǃgoaǃnāb ǃnâ ge ǂnau disiǁkhaisaǀaǀoadisin kōse.

¹³Tsîb ge toroǂnubi-e Edommi ǃnâ ge ǁgui, Edomǁîn hoan ge Davib di ǃgā kais kōse; tsî ǃKhūb ge Daviba ǃgûǂoab gere ǃkhai-i hoa-i tawa gere sâu.

¹⁴Nētib ge Daviba Israeli hoab ǂama gere gao, tsîb ge ǁîb di ǁaes hoasa ǂhanub tsî ǂhanu-aisib tsîkha ǀkha gere sîsenū.

¹⁵Tsî Joab, Serujas ôab, ge ǂnubis ǂama ge hâ i; tsî Josafati, Ahiludi ôab, ge ǂkhanisâu-ao ge i.

¹⁶Tsî Sadoki, Ahitub ôab, tsî Abimelexi, Abjatari ôab tsîkha ge prister ge i tsî Savsab ge xoa-ao ge i;

¹⁷tsî Benajab, Jojadab ôab ge Keretǁîgu tsî Peletǁîgu ǂama ge hâ i, xawe Davib ôagu ge gao-aob ǃoabas ǃnâ ge dana i.