Read Khoekhoegowab 1 Kroniks 19 Bible Online

1 Kroniks 19 - Khoekhoegowab bible

1 Kroniks 19

¹Tsî i ge nēn khaoǃgâ ge ī, Nahab, Amonni ôan gao-aob ge ǁō, tsî ǁîb ôab ge ǁîb di ǃās ǃnâ gao-ao kai ǃkhaisa.

²ǃNubaib ge Daviba ge mî: Tita ge ǀkhomxaǂgaosiba Hanunni, Nahab ôaba nî dī-ū, ǁîb îb ge tita ǀkhomxaǂgaosiba dī-ū xui-ao. ǁNā-amagab ge Daviba sîsabega ge sî, ǁkhaeǂgao bib nîga ǁîb îb ǂama. Tsî Davib di ǃgāgu ge Amonni ôan di ǃhūb ǃnâ ge sī, Hanunni tawa, ǁîba gu nî ǁkhaeǂgaoga.

³ǃNubai gu ge Amonni ôan di gaosaga Hanunni ǃoa ge mî: Xare ǃgôab hâ Daviba sa îba sa mûǁae, ǁkhaeǂgao-aogab go sa ǃoa sî amaga? Xare ǃgāgu âba sa tawa hā tama gu hâ, ǃhūba gu nî ôaǃnâǃganu, dawaǃkhapu tsî ǃkhēǃnâse?

⁴ǃNubaib ge Hanunna Davib ǃgāga ū tsî ge ǂkhom tsî saran âga ǃkharese ge ǃgaoǁnâ ǂnamira kōse tsî ǁnāti ǁîga ge ǃgû kai;

⁵o gu ge ge ǃgû. Tsî Davib ge ǂhôaheo nē khoegu xa, ob ge ǁîga ge sîǃoa, nē khoegu ge kaise tao hâ i xui-ao. Ob ge gao-aoba: Jerixos tawa hâ ǀhō-amdi âgo nî ǁkhawa ǁhoas kōse, î go ǁnās khaoǃgâ oahā, ti ge mî.

⁶Tsî Amonni ôan ge mûo, Davib tawan ge ǀōkaisen ǃkhaisa, on ge Hanunni tsî Amonni ôan tsîna ǀguiǀoadisi talende ǀhaiǀurib xa ge sî kunidi tsî ǃgapi-aogu tsînab nî ǃgaese Mesopotamiaba xu tsî Siria-Maaxaba xu tsî Sobaba xu.

⁷On ge ǃnonadisiǀgamǀaǀoadisi kunide ge ǃgae; on ge Maaxab gao-aob tsî ǁîb di ǁaesa hā tsî Medebas aiǃâ ge ǁgoe; tsîn ge ǁkhāti Amonni ôana ǁîn di ǃāde xu ǀhao tsî ǃkhammi ǁga ge hā.

⁸Tsî Davib ge ǁnâuo, ob ge Joaba ge sî tsî ǂnubis hoasa ǁē-aogu ǀkha.

⁹Tsî Amonni ôan ge ǂnauǂui tsî toroǂnubisa sī ge mâi ǃās ǂgâ-ams aiǃâ, xawe ǁnā gao-aogu, hîa ge hāgu ge ǀguri ge hâ i ǃgarob ǃnâ.

¹⁰Tsî Joab ge mûo, ǃkhammi aisǀkhāba xu tsî khaosǀkhāba xu ǁîb ǃoagu hâsa, ob ge ǀnîga Israeli ǃkhōǂuisabegu hoaga xu ūǂuibasen tsî ǁîga ǃkhammi ǃoa ge mâi, Siriaǁîgu ǃoa-ai.

¹¹Tsî nau ǃâs ǁaes disab ge ǁîb di ǃgâsab Abisaib di ǃomǁae ge mā, tsîb ge ǁîga ǃkhammi ǃoa ge mâi Amonni ôan ǃoa-ai.

¹²Tsîb ge ge mî: Siriaǁîgu ga ǀgaidā teo, o go ge hā nî hui te; tsî Amonni ôan ga satsa ǀgaidāo, o ta ge tita satsa sī nî hui.

¹³ǃGariǃgarisen î ge sage ǁaesa ǀgaisase ība tsî sage Elob di ǃāde; îb ǃKhūba ǁîb mûǁae a ǃgâi khami dī.

¹⁴ǃNubaib ge Joab tsî ǁaes, ǁîb ǀkha hâsa ge ǀgū Siriaǁîn ǀkha nî ǃkhamse; on ge ǁîb di ais aiǃâba xu ge ǁhâ.

¹⁵Tsî Amonni ôan ge mûo Siriaǁîn ra ǁhâ ǃkhaisa, on ge ǁkhāti ge ǁhâ, Abisaib, ǃgâsab âb di ais aiǃâba xu, tsîn ge ǃās ǃnâ sī ge ǂgâ. Ob ge Joaba Jerusalems ǁga ge oa.

¹⁶Tsî Siriaǁîn ge mûo, Israeli di ais aiǃân ǂnauhe hâsa, on ge sîsabega ge sî tsî ǁnā Siriaǁîn, ǃāb nauǃani ǁan hâna ge ǀkhī kai; Sobaxi, Hadad-Eseri di toroǂamkhoeb ge ǁîna ge ai-aiba.

¹⁷Tsî Davib ge ǂhôaheo, ob ge Israeli hoaba ǀhaoǀhao tsî Jordanna sī ǃgâu tsî ǁîna ǃkhammi ǁga ǁîn ǃoagu ge mâi. Tsî Davib ge ǃkhammi ǁga ǂhomisen Siriaǁîn ǃoa-ai, tsî ǁîna ge ǃkhamū.

¹⁸On ge Siriaǁîna Israeli di ais aiǃâba xu ge ǃhū, tsî Davib ge Siriaǁîn xa hûǀoadisi kunidi tsî hakadisiǀoadisi khoegu, ǀnūǃgû-aoga ge hîkākā; ǁîn tawab ge ǁkhāti Sobaxi, toroǂamkhoeba ge ǃgam.

¹⁹Tsî Hadad-Eseri di ǃgāgu ge Israeli di ais aiǃâ gu ǂnauhe hâsa mûo, o gu ge Davib ǀkha ǂkhîba dī tsî ǁîba gere ǃoaba. On ge Siriaǁîna Amonni ôana ǃaruǀî hui ǂgao tama ge i.