Read Khoekhoegowab 1 Kroniks 20 Bible Online

1 Kroniks 20 - Khoekhoegowab bible

1 Kroniks 20

¹Tsî i ge ge ī kurib ra toa ǁaeb ai, gao-aogu ra torob ǁga ǂoa ǁaeb aib ge Joaba toroǂnubisa ǂgaeǂgui tsî Amonni ôan di ǃhūba hîǀhuru ǃkhaisa; tsîb ge hā tsî Rabasa ge xāǂgā; xawe Davib ge Jerusalems tawa ge hâ. Tsî Joab ge Rabasa ǂnau tsî ge hîǀhuru.

²Tsî Davib ge gao-aob ân di kronsa danas âba xu ge ūǁnâ, tsîb ge ǀgui talens ǃhuniǀurib dis kōses ǃgom ǃkhaisa ge hōǃâ, tsîs ge ǂoaǂamsa ǀuidi ǀkha ge î-îhe hâ i; tsîs ge ǁîsa Davib di danas ai ge ǂnûihe, tsîb ge ǂgui ǁkhâuǁnâxūna ǃāsa xu ge ūǃgû.

³Tsîb ge ǁkhāti ǁaes, ǁîs ǃnâ hâs hoasa ge ǂgaeǂguiǂoa, tsîb ge ǁîna saxab ǀkha ge sîsen kai tsî ǂnūǀuridāǃnâkunidi ǀkha tsî ǃōdi ǀkha; tsî nētib ge Daviba Amonni ôan di ǃādi hoade ge dī-ū. ǁNās khaoǃgâb ge Daviba ǁkhawa ǁaes hoas ǀkha Jerusalems ǃoa ge oa.

⁴Tsî i ge ǁnās khaoǃgâ ge ī, ǀnî torob ge ǁkhawa hâsa Filisteǁîn ǀkha Gesers tawa. ǃNubaib ge Sibexaib, Husaǁîb, Sipaib, Rafab ôan di ge iba ge ǂnau, tsîn ge ge ǃgamǃgamhe.

⁵ǁNās khaoǃgâb ge ǀnî toroba ge hâ i Filisteǁîn ǀkha; tsî Elhananni, Jairi ôab ge Laxmib Goliati di ǃgâsab, Gatǁîba ge ǂnau, ǁhâigôab âb kunis di ǂgae-ūhaib khami ge ī iba.

⁶ǁNās khaoǃgâb ge ǀnî toroba Gats tawa ge hâ i; tsî ǁnāpab ge kaise gaxu khoeba ge hâ i, ǃnani ǀkhunuga mâ ǀkhāb hoab di ǃommi âb tawa ge ūhâ ib, tsî ǃnani ǀkhunuga mâ ǂais hoas tawa, ǀgamdisihakaǀa ǀhaob aiga tsî ǁîb on ge Rafaba ge ǁorabahe.

⁷Tsîb ge ǁîba Israela ge ǃhō; xawe Jonatanni, Simeab ôab, Davib ǃgâsab ge ǁîba ge ǂnau.

⁸Nēgu ge Rafaba ge ǁorabahe Gats tawa; tsî gu ge Davib di ǃomma xu ge ǁnā tsî ǁîb ǃgāgu di ǃomma xu.