Read Khoekhoegowab 1 Kroniks 21 Bible Online

1 Kroniks 21 - Khoekhoegowab bible

1 Kroniks 21

¹ǃNubaib ge Satanna Israeli ǃoagu khâi tsî Daviba ge ǂgâǃnâ, îb ǁîba Israelǁaesa ǃgôakhâi, ti.

²Ob ge Daviba Joab tsî ǁaes di ǂamsagu ǃoa ge mî: ǃGû î go Israelǁaesa sī ǃgôakhâi Bersebasa xu Dans kōse, î go ǃgôaba tita ūhāba, î ta ǁîba ǂan.

³ǃNubaib ge Joaba ge mî: Ab ǃKhūba ǁîb di ǁaesa dīǀaro, nēsin īs ǃgâ-ai kaidisi ǃnādi kōse. Ti ǀhonkhoe gao-aotse, ǁîn hoana ti ǀhonkhoets di ǃgā tamana? Tarexats ra ti ǀhonkhoetsa nēsa ǂgaoǀkhā? Tare xū-i ǃaromas nî ǁîsa Israelǁaes di ǀhapi kai?

⁴Xawe gao-aob di mîs ge Joab disa ge ǃāǂam; ǁnā-amagab ge Joaba ǂoa tsî Israeli hoaba ge ǃgûǃnâǃganu; ǁnās khaoǃgâb ge ǁkhawa Jerusalems tawa ge hā.

⁵Tsî Joab ge ǃgôab ǁaes diba Daviba ge mā; tsî Israeli hoab ge disiǀguiǀakaidisiǀoadisi aogu di ge i, gôaba ra ǂgaeǂuiga, tsî Judaba hakakaidisi tsî hûdisiǀoadisigu, gôaba ra ǂgaeǂuiga.

⁶Xawe Levib tsî Benjaminni tsîkhab ge ǁîn ǃnâ ǃgôa tama ge i; gao-aob di mîs ge Joaba ǁgaisise ība xui-ao.

⁷Xawe nē ǃkhais ge Elob mûǁae ǂkhaba ge i; ǁnā-amagab ge Israela ge ǂnau.

⁸ǃNubaib ge Daviba Elob ǃoa ge mî: Tita ge kaise go ǁore nē ǃkhaisa ta go dī amaga; ǁnâi nēsi dīsās sa ǃgāta disa ūbē, kaise ta go gârese dī xuige.

⁹Ob ge ǃKhūba Gadi, Davib di mû-aob ǃoa ge mî:

¹⁰ǃGû îts Daviba sī mîba: Nētib ra ǃKhūba mî: ǃNona xūna ta ge tita ra ǁgui-aiǃâ tsi, ǁîna xu ǀgui-e ǁhûiǂuibasen, î ta ǁî-e dī-ū tsi.

¹¹Ob ge Gada Davib tawa hā tsî ǁîb ǃoa ge mî: Nētib ra ǃKhūba mî: ǁHûiǂuibasen.

¹²ǃNona kurigu kōse ǃâtsūǀkhā-e? ǃNona ǁkhâgu kōse mâǃoasabeb di ais aiǃâba xu hîkākāhesa, khākhoen âts di gôab nî saoǁae tsise? ǃNona tsēdi kōse ǃKhūb di gôaba, ǂhīǁōb ǃhūb hoaragab ǃnâ, hîǀhuru ra ǀhomǃgāb ǃKhūb diba Israeli di ǀkharigu hoagu ǃnâ? Îts ǁnâi mûbasen, mâ ǃereamsa ta ǁnāb, tita go sîba nî ūsība ǃkhaisa.

¹³ǃNubaib ge Daviba Gadi ǃoa ge mî: ǀHū ta ra, î ta ǁnâi ǃKhūb di ǃomǁae ǁnā, ǀkhomxaǂgaosigu âb a kai xuige, xawe a ta tā khoen di ǃomǁae ǁnā.

¹⁴Ob ge ǃKhūba ǂhīǁōba ge mā Israeli hoaba, on ge Israeli din xa hûdisiǀoadisina ge ǁnā.

¹⁵Tsî Elob ge ǀhomǃgā-e ge sî Jerusalems ǁga, ǁîsab nî hîkākāse; tsî hîǀhuru sib ge, ǃnubaib ge ǃKhūba ge kō, tsîb ge ǂkhabab xa ǃhausen tsî hîǀhuru ra ǀhomǃgāb ǃoa: ǂÂu go, xuige ǃommi âtsa nēsi ǂgae-oa, ti ge mî. Tsî ǀhomǃgāb ǃKhūb dib ge ǃhorob dāǃnâǃkhais Ornanni, Jebusǁîb dis tawa ge mâ i.

¹⁶Tsî Davib ge kōkhâio, ob ge ǀhomǃgāb ǃKhūb diba ge mû, ǃhūbaib tsî ǀhommi tsîkha ǁaegu mâse, ǂgaeǂuisa gôab âba ǃomǁaeb âb ǃnâ Jerusalems ǂama ǀhōǂui hâse. ǃNubaib ge Davib tsî kaigu ona ǁhōga anasen hâǃâ ǁîgu di aidi ai ge ǁnāǁgoe.

¹⁷Tsî Davib ge Elob ǃoa ge mî: Ti tama ta: As ǁaesa ǃgôahe, ti ge mî ta? Ā, tita ǂûta ge ǁnā ta, hîa ge ǁore tsî ǂkhabase dī ta; xawe nē gūna, tare-en kha ǁîna dī hâ? O, ǃKhū, ti Elotse, ab sa ǃomma ti ǃoagu tsî ti îb di ommi ǃoagu hâ, îb tā ǁkharaba sa ǁaes ǃoagu hâ.

¹⁸ǃNubaib ge ǃKhūb di ǀhomǃgāba Gadi ǃoa ge mî, Davibab nî mîba ǃkhaisa: Ab Daviba ǃgû îb ǃKhūba altar-e sī ǂnubikhâiba dāǃnâǃkhais Ornanni, Jebusǁîb dis ai.

¹⁹Ob ge Daviba Gadi di mîs hîab ge ǃKhūb di ǀons ǃnâ ǃhoas ai ge ǃgû.

²⁰Tsî Araunab ge ǂnan tsî ǀhomǃgāba mû; o gu ge ǁîb di haka ǀgôagu, ǁîb ǀkha hâga, ge sâusen; tsî Araunab ge ǃhoroba gere dāǃnâ.

²¹Ob ge Daviba Ornanni ǁga ge hā, tsî Araunab ge kō tsî Daviba mûo, ob ge dāǃnâǃkhaisa xu ǂoa tsî Davib ais aiǃâ ǃhūb ai ge ǁnāǁgoe.

²²Tsî Davib ge Ornanni ǃoa ge mî: Dāǃnâǃkhais di ǃkhaiba mā te re, î ta ǁîb ai ǃKhūba altarsa ǂnubiba, îts ǁîba ǀoasa maris ama mā te re, îb nē ǁkhara-aiba ǁaesa xu ǀû, ti.

²³ǃNubaib ge Ornanna Davib ǃoa ge mî: ǁÎba ū re, îts ti ǀhonkhoe gao-aotsa dī, sa mûǁae i a ǃgâi khami; mû, tita ge nē gomana khauǁguibase ra mā tsî nē dāǃnâǃnaoga ǀaese tsî ǃhoroba ǂûǁguibase, nēn hoana ta ge tita ra mā.

²⁴Ob ge gao-aob Daviba Ornanni ǃoa ge mî: Hî-î, a ta ǁîsa ǁama ǀoasa maris ama. Tita ge ǃKhūba sana ūba tide, tsî ǁause khauǁguibade ǁguiba ǂgao tama hâ.

²⁵Ob ge Daviba Ornanna ǁnā ǃkhaib ama ǃnanikaidisi sekeln kōse ǃgom ǃhuniǀuriba ge mā.

²⁶ǃNubaib ge Daviba ǁnāpa ǃKhūba altarsa ge ǂnubiba tsîb ge khauǁguibadi tsî ganganǁguibadi tsîna ge ǁguiba. Tsî ǃKhūbab ge ǂgaiǀîo, ob ge ǁîba ǀhomma xu ǀaes ǀkha ge ǃeream bi khauǁguibas di altars ai.

²⁷Tsî ǃKhūb ge ǀhomǃgāba ge mîmā gôab âbab nî ǁkhawa ǁhōs âb ǃnâ ǂgā ǃkhaisa.

²⁸ǁNā ǁaeb ǁkhāb ai, Davib ge mûo, ǃKhūb go ǁîba Ornanni, Jebusǁîb di dāǃnâǃkhais ai ǃeream ǃkhaisa, ob ge ǁnāpa ge ǁguiba.

²⁹Tabernakeli ǃKhūb dib, Moseb ge ǃgaroǃhūb ǃnâ kurub, tsî altars khauǁguibas dib tsîkha ge ǁnā ǁaeb ai Gibeons di ǀgapib ai ge hâ i.

³⁰Tsî Davib ge ǁîb aiǃâ sī ǁoa ge i, Elobab nî ôase, ǀhomǃgāb ǃKhūb dib di gôab xab ge ǃhuri hâ i xui-ao.