Read Khoekhoegowab 1 Kroniks 22 Bible Online

1 Kroniks 22 - Khoekhoegowab bible

1 Kroniks 22

¹Tsî Davib ge ge mî: Nēpab ge nî hâ ǃKhūb Elob di omma, tsî nēpas ge khauǁguibas Israeli dis di altarsa nî hâ.

²Tsî Davib ge ge mî, ǃhaokhoen Israelǃhūb ǃnâ hân nî ǀhaoǀhaohe ǃkhaisa; tsîb ge ǀuiǁhā-aoga ge mîmā, ǁnā ǀuidi, Elob ommi nî ǁîdi ǀkha ǂnubihedi nî ǁhāhega.

³Tsî Davib ge ǃnāǂamsase ǂnūǀurib xa ge ǁāǁā, ǁāgu daos di ǀurise tsî ǃkhōǁaexūse; tsî ǂaib on xa ǃnāǂamsase ǀnōhe ǁoasase.

⁴Tsî sederhain xa ǃgôahe ǁoasase, Sidonǁîn tsî Tireǁîn ge Daviba sederhain xa ǀoasase ūhāba xui-ao.

⁵Davib ge mî xui-ao: Ti ôab Salomob ge ǂkham tsî a tsaura, tsî ǁnā ommi, ǃKhūban nî ǂnubibab ge kaise nî kai, ǀons tsî ǂkhaisib tsîkhab nî ūhâga, ǃhūgu hoagu ǃnâ; î ta ǁîba nēsi xūna aiǂhomiba. Nētib ge Daviba kaise ǂgui xūna ǁōb âb aiǃâ ge ǁāǁā.

⁶ǃNubaib ge ǁîb di ôab Salomoba ǂgai tsî ge mîmā bi, ǃKhūb Israeli di Elobab nî omma ǂnubiba ǃkhaisa.

⁷Tsî Davib ge Salomob ǃoa ge mî: Ti ôatse, tita ge ge ǂâibasen hâ i ti ǂgaob ǃnâ, ǃKhūb, ti Eloba ta nî omma ǂnubiba ǃkhaisa;

⁸xawes ge ǃKhūb di mîsa tita ǃoa hā tsî ge mî: Sats ge kaise ge ǀaoǂnâxū kai, torogats ge dī xui-ao; ots ge satsa ti ǀonsa omma ǂnubiba tide, kaisets ge ǃhūbaib ai ti ais aiǃâ ǀaoǂnâxū amaga.

⁹Mû, ǁnā ǀgôab sats nî ǁorabaheb ge sâb di aose nî ī. Tita ge ǁîba ǁîb di ǂnamipe hâ khākhoen âba xu nîra sâ kai, Salomo tib ge nîra ǂgaihe, tita ǂkhîb tsî sâb tsîkha Israelǁaesa ǁîb di tsēdi ǃnâ nîra mā xui-ao.

¹⁰ǁÎb ge ti ǀonsa omma nîra ǂnubiba, tsî ǁîb ge tita ǀgôase nî ība, tsî tita ǁîba ǁgûse; tsî tita ge gaosis âb di tronsa Israeli ǂama nîra ǁapoǁapo ǀamosib kōse.

¹¹Nēsi, ti ôatse, ǃKhūb ge nîra hâǀkhā tsi, tsîts ge nîra ǃgâiǃgâ, tsîts ge ǃKhūb sa Elob di omma nîra ǂnubi, ǁîb ge sats xa ǃhoa khami.

¹²Îb ǁnâi ǃKhūba gā-aisib tsî ǁnâuǃāb tsîkha mā tsi, Israelǁîn ǂamats nî gaose; tsî ǃKhūb, sa Elob di ǂhanubats nî ǃkhōǀgaipese.

¹³ǁNāǃnubaits ge nîra ǃgâiǃgâ, ǁnā ǂnûiǂgādi tsî ǂhanugu tsîn, ǃKhūb ge Moseba Israeli ǂama mîmānats ga ǂano; xuige ǀgaisa îts ǃgâiǂâi; tā ǃao îts tā ǃhuri.

¹⁴Tsî kō, tita ge ti ǃoab ǃnâ ǃKhūb di omma ge ǂhomiba kaidisiǀoadisi talende ǃhuniǀurib xa tsî ǀguiǀoadisi ǃnādi ǀoadiside ǀhaiǀurib xa tsî ǂaib tsî ǂnūǀurib tsîkha ge a ǀgopeǀnōhe ǁoa, kaise a ǂgui xui-ao; tsî ta ge ǁkhāti hain tsî ǀuin tsîna ge ǁāǁā, îts satsa ǁîna dīǀāro.

¹⁵Sa tawa gu ge ǁkhāti ǀoasa khoega hâ, sîsenna dī ǁkhāga, ǁhā-aogu, ǀui tsî ǃnaokuru-aogu tsî mâ sîsenai-i hoa-i ǃnâ ǁnâuǃāxa khoega.

¹⁶ǃHuniǀurib tsî ǀhaiǀurib tsî ǂaib tsî ǂnūǀurib tsîn ge a ǃgôahe ǁoasa. Khâi îts sîsentsoatsoa, îb ǃKhūba hâǀkhā tsi.

¹⁷ǁKhātib ge Daviba Israeli gaosaga ge mîmā, ǁîb ôab Salomoba gu nî hui ǃkhaisa, mî raǃâ:

¹⁸ǃKhūb sago Eloba sago ǀkha hâ tamab hâ, tsî sago ǂnamipe sâba mā tamab hâ? ǁÎb ge ǃhūb di ǁanǂgāsabena ti ǃomǁae nî mā xui-ao, tsî nē ǃhūb ge ǃKhūb di ais aiǃâ tsî ǁaes di ais aiǃâ ge dāhe.

¹⁹Î go ǁnâi sago ǂgaob tsî sago di ǀomsa mā, ǃKhūb, sago Eloba go nî ôaga, î go khâi î go ǃKhūb Elob di ǃanusiba kuru, în ǃKhūb di ǃgaeǀhaos di ǂgaes tsî ǃanu xapan Elob din tsîna nē ommi, ǃKhūb di ǀonsa nîra ǂnubibaheb ǃnâ ūhāhe.