Read Khoekhoegowab 1 Kroniks 23 Bible Online

1 Kroniks 23 - Khoekhoegowab bible

1 Kroniks 23

¹Tsî Davib ge kaira tsî ǁîb di tsēdi ge ǀoao, ǁîb di ôab Salomoba ge gao-aodī Israeli ǂama.

²Tsîb ge Israeli gaosagu hoaga ge ǀhaoǀhao tsî pristergu tsî Leviǁîgu tsîga.

³Tsî gu ge Leviǁîga ge ǃgôakhâihe, ǃnonadisi kurixasa xu tsî ǁnāsa ǃnā hâga, tsî ǃgôab âgu ge ǃnonadisiǁkhaisaǀaǀoadisi aore khoe ge i.

⁴Nēgu xa gu ge ǀgamdisihakaǀaǀoadisiga nî hâ, ǃKhūb ommi di sîsenna nî ǃhaeǃhaega; tsî ǃnaniǀoadisi ǂamkhoegu tsî ǂhanuǂhanu-aogu tsîga,

⁵tsî hakaǀoadisi ǁāb ǃûi-aogu tsî hakaǀoadisi ǃkhōǀkhāǁnae-aogu ǃKhūb diga, ǀkhōxūn tita ge dīn ǀkha, tib ge Daviba ge mî.

⁶Tsî Davib ge ǁîga ǃâdi ǃnâ ge ǀgora, Levib di ôagu Gersonni tsî Kehati tsî Merarib tsîgu ǃoa.

⁷Gersonǁîn xa kha ge Ladanni tsî Simib tsîkha ge i.

⁸Ladanni ôagu ge nēga: Jehieli, danakhoeb, tsî Setammi tsî Joeli tsîgu, nē ǃnonaga ge i.

⁹Tsî Simib ôagu ge Selomiti tsî Hasieli tsî Haranni tsîgu, nē ǃnonaga ge i. Nēgu ge Ladanni îgu di dana ge i.

¹⁰Tsî Simib ôagu ge Jahati tsî Sisnab tsî Jeub tsî Beriab tsîga ge i: Nē hakagu ge Simib di ôa ge i.

¹¹Tsî Jahati ge dana ge i, tsî Sisab ge ǀgamǁî ge i; xawe Jeub tsî Beriab tsîkha ge ǂgui ǀgôana ge ūhâ tama hâ i, ǁnā-amagan ge ǁgûb di ommi ǃnâ ǀgui ǀgôas ǀguis di ge i.

¹²ǀGôagu Kehati digu ge Amrammi, Jitshari, Hebronni tsî Usieli tsî hakaga ge i.

¹³ǀGôakha Amrammi dikha ge Aronni tsî Moseb tsîkha ge i. Tsî Aronni ge ge ǃkhōǂuihe, hoan xa ǃanu xūnab nî ǀkhaese, ǁîb tsî ǁîb di ôagu tsîga ǀamosib kōse, ǃKhūb di ais aiǃâ gu nî ǀanǀanse, ǁîba gu nî ǃoabase, tsî ǁîb di ǀons ǃnâ gu nî ǀamosib kōse ǀkhaeba māse.

¹⁴Tsî Moseb, Elob aob xasa; ǁîb di ôagu ge Levib di ǃhaos ǃnâ ge ǂgaihe.

¹⁵ǀGôakha Moseb dikha ge Gersommi tsî Elieseri tsîkha ge i.

¹⁶Gersommi di ôagu xab ge Subaela dana ge i.

¹⁷Tsî Elieseri di ôagu ge nēga: Rehabjab ge dana ge i, tsî Elieseri ge ǀnî ǀgôa-e ūhâ tama ge hâ i, xawe Rehabjab di ôagu ge kaise ge ǂgui.

¹⁸Jitshari ôagu xab ge Selomita dana ge i.

¹⁹Hebronni ôagu xasa: Jeriab ge dana ge i, Amariab ge ǀgamǁî ge i, Jahasieli ge ǃnonaǁî tsî Jekamammi ge hakaǁîba ge i.

²⁰Usieli di ôagu xasa: Mixab ge dana ge i tsî Jisiab ge ǀgamǁîba.

²¹Merarib ôakha ge Maxlib tsî Musib tsîkha ge i. Maxlib ôakha ge Eleasari tsî Kisi tsîkha ge i.

²²Tsî Eleasari ge ǁō, tsîb ge aore ǀgôa-e ūhâ tamase ǀgôadi ǀguide ge ūhâ i; tsî ǀgôagu Kisi digu, ǁîdi ǃgâsagu ge ǁîde ge ū.

²³ǀGôagu Musib digu ge Maxlib tsî Ederi tsî Jeremoti tsîgu, nē ǃnonaga ge i.

²⁴Nēgu ge ǀgôagu Levib diga, ǁîgu îgu di omgu ǃoa, ǁgûgu di danaga, ǀondi ǀkha ǃgôab ǃnâ ge ǂgaikhâihega, danadi âgu ǃoa, ǃKhūb ommi di sîsenni di ǃoabasa ra dīǃâ, ǀgamdisi kurigu â-iga xu tsî ǁnāsa ǃnā hâgu kōse.

²⁵Davib ge mî xui-ao: ǃKhūb, Israeli di Elob ge ǁaes âba sâba ge mā, tsî ǁîb ge Jerusalems tawa nî ǁan ǀamosib kōse.

²⁶Tsî Leviǁîgu xasa, ǁîgu ge tabernakeli kas, ǁîb di sîsenūdan ǃoabas âb anuban kas hoasa ǃaruǀî tani tide.

²⁷ǀUni mîdi Davib didi ǃoa gu ge Levib ôaga ge ǃgôahe xui-ao, ǀgamdisi kurigu â-iba xu tsî ǁnāsa ǃnā hâgu kōse.

²⁸Mâǃkhais âgu ge Aronni ôagu xōǀkhā ommi di ǃoabas ǃnâ hâ i xui-ao ai-omgu ǂama tsî ǃnā-omdi ǂama tsî ǃanu xūn hoan di ǃanuǃanus ǂama tsî Elob ommi sîsenni di ǃoabas ǂama,

²⁹tsî pereb ǁāǁās dib ǂama tsî tsampereb ǂûǁguibas dib ǂama tsî ǀkhuruoǃnâ ǁganpereb ǂama tsî amǃnâǃores di amxūn ǂama tsî ǁnaruǀkhāhesan tsî ǀguirodi, ǂkharidi tsî kaidi hoadi ǂama,

³⁰tsî mâ ǁgoas hoas ai nî mâse, ǃKhūba gu nî ǃkhōǀkhā tsî karese; tsî ǁnās ǁkhās xase ǃuia,

³¹tsî ǁguibas khauǁguibadi ǃKhūb didi ǂama sâtsēdi ai, ǂkham ǁkhâgu ai tsî ǂnûihe hâ ǁâutsēdi ai, ǁnâ dommi, hugaǀgui ǃKhūb di ais aiǃâ ra dīhe dīb di ǃgôab ǃoa.

³²Tsî ǂan gu nîga ǃûis tentoms ǀhûs dis disa tsî ǃûis ǃanusib disa tsî ǃûis Aronni ôagu, ǁîgu ǃgâsagu disa, ǃKhūb ommi di ǃoabas ǃnâ.