Read Khoekhoegowab 1 Kroniks 26 Bible Online

1 Kroniks 26 - Khoekhoegowab bible

1 Kroniks 26

¹ǁĀb ǃûi-aogu di ǀgoradi xasa: Koraxǁîn dib ge Meselemjab Koreb ôab, Asafi ôan di ǀguiba ge i.

²Tsî Meselemjab ge ǀgôaga ge ūhâ i: Saxariab ge ǂguroǃnaesabe ge i, Jediaela ǀgamǁî, Sebadjaba ǃnonaǁî, Jatniela hakaǁî,

³Elamma koroǁî, Johananna ǃnaniǁî, tsî Eljoenaiba hûǁî.

⁴Obed-Edommi ge ǁkhāti ǀgôaga ge ūhâ i: Semajab ge ǂguroǃnaesabe ge i, Josabada ǀgamǁî, Joaba ǃnonaǁî, Sakara hakaǁî, Netanela koroǁî,

⁵Amiela ǃnaniǁî, Isaskara hûǁî, Peuletaiba ǁkhaisaǁî; Elob ge ǁîba ge ǀkhae amaga.

⁶ǁKhātib ge ǁîb di ôab Semajaba ǀgôaga ge ǁorabahe, ǁgûb di omma ra gaoǂamga, ǃgari ǁē-aogu ge i xui-ao.

⁷ǀGôagu Semajab digu ge Otnib tsî Refaeli tsî Obedi tsî Elsabadi tsîga ge i, tsî ǁîgu di ǃgâsakha, ǃgari ǁē-aokha, Elihub tsî Semaxjab tsîkha.

⁸Nēgu hoagu ge Obed-Edommi di ôa ge i, ǁîgu tsî ǁîgu di ôan tsî ǁîgu di ǃgâsagu, ǃgari-aogu, sîsenbasa a ǁkhābaga, tsî gu ge Obed-Edommi diga ǃnanidisiǀgamǀa ge i.

⁹Tsî Meselemjab ge ǀgôagu tsî ǃgâsagu tsîga ge ūhâ i, ǃgari-aogu, disiǁkhaisaǀaga.

¹⁰Tsî Hosab, Merarib ôan dib ge ǀgôaga ge ūhâ i: Simrib ge dana ge i, ǂguroǃnaesabe tamab a xaweb ge ǁgûba ǁîba danase ge ǂnûi.

¹¹Hilkiab ge ǀgamǁî ge i, Tebaljaba ǃnonaǁî tsî Saxariaba hakaǁî; ǀgôagu tsî ǃgâsagu Hosab digu ge disiǃnonaǀa ge i.

¹²ǁÎga xu di ge ǀgoradi ǁāb ǃûi-aogu dide ge hâ i, danagu ǁnā aogu ǃûisa ra dīgu ǁîgu di ǃgâsagu ǀkha, ǃKhūb di ommi ǃnaga nî ǃoabase.

¹³Tsî gu ge ǀkhūde ge ao ǂkharigu kas kaigu kas hoasa, ǁîgu di ǁgûsi omgu ǃoa, mâ ǁāb hoab tawa.

¹⁴Os ge ǀkhūs aiǂoas disa Selemjaba ge hō; xawe ǁîb di ôab Saxariab, ǁnâuǃāxa ǀapemā-aoban ge ǀkhūsa ge aoba, os ge ǁîb di ǀkhūsa ǀapas ǀkhāb dise ge ǀkhī.

¹⁵Obed-Edommi ǃkhawagas ǀkhāb; tsî ǁîb di ôagu ge ǁuiǃnā-omdi diba ge hō.

¹⁶Supimmi tsî Hosab tsîkha ge huriǂoas ǀkhāb ai ǁāb Salexeta ge hō, ǃgûts ra ǀgapi daob tawa ǃûisa xu ǃûis ǃoa-ai.

¹⁷Aiǂoas ǀkhāb ai gu ge ǃnani Leviǁîga ge hâ i, tsî ǀapas ǀkhāb ai tsēa hakaga, ǃkhawagas ǀkhāb ai tsēa hakaga tsî ǁuiǃnā-omdi tawa ǀgamǀgamese.

¹⁸Parbari tawa huriǂoas ǀkhāb ai gu ge hakaga ge hâ i ǀgapi daob tawa tsî ǀgamkha Parbari tawa.

¹⁹Nēdi ge ǀgoradi ǁāb ǃûi-aogu dide ge i, Koraxǁîn dide tsî Merarib ôagu dide.

²⁰ǁKhātib ge Ahiab, Leviǁîn diba, Elob ommi di ǁuigu ǂama ge hâ i, tsî khaihe hâ xūn di ǁuigu ǂama.

²¹ǀGôagu Ladanni digu xa, Gersonǁîb Ladanni xa: Ladanni Gersonǁîb xab ge Jehiela ǁgûgu di dana ge i.

²²Tsî Jehieli di ôakha ge Setammi tsî Joeli ǁîb di ǃgâsab tsîkha ge i, nēkha ge ǁuigu ǃKhūb ommi digu ǂama ge hâ i.

²³Amramǁîn tsî Jitsharǁîn tsî Hebronǁîn tsî Usielǁîn xasa:

²⁴ǁÎn tawab ge Subaeli, Gersommi, Moseb ôab di ôaba ǁuigu di ǂamsa ge i.

²⁵Tsî ǃgâsagu âb Elieseri digu ge nēga ge i: Rehabjab ge ǁîb ôa ge i, tsî Jesajaba ǁîb di ôa, tsî Joramma ǁîb di ôa, tsî Sixriba ǁîb di ôa tsî Selomita ǁîb di ôa.

²⁶Nē Selomiti tsî ǁîb di ǃgâsagu tsîgu ge ǃanu xūn di ǁuigu hoagu ǂama ge hâ i, gao-ao Davib tsî ǁgûgu di danagu, ǀoadisigu tsî kaidisigu di ǂamsagu tsî ǂnubis di ǂamsagu ge khaina.

²⁷Torogu tsî ǁkhâuǁnâsa xu gu ge ǁîna ge khai, ǃKhūb di omma gu nî ǃkhōmâise.

²⁸ǁKhāti ǁnān hoan, Samueli mû-aob ge khain tsî Sauli Kisi ôab, tsî Abneri, Neri ôab, tsî Joab, Serujas ôab, ǁnā-i khoe-i xa khaihe hâ-i hoa-i ge Selomiti tsî ǁîb ǃgâsagu di ǃomǁae ge hâ i.

²⁹Jitsharǁîn xasa: ǁÎn tawab ge Kenanjaba ǃgâsagu âb ǀkha Israeli ǃnâ ǃaugab di sîsenni ǂama gaosase tsî ǂhanuǂhanu-aose ge hâ i.

³⁰Hebronǁîn xa gu ge Hasabjab tsî ǁîb di ǃgâsagu tsîgu, ǃgari-aogu, ǀguiǀoadisi tsî hûkaidisiga sîsenǃādi Israeli didi ǂama ge hâ i nēxa ǃnanib ai Jordanna xu, huriǂoasǀî ǃKhūb di sîsenni hoab ǂama tsî gao-aob di ǃoabas ǂama.

³¹Hebronǁîn xab ge Jeriaba dana ge i. Hebronǁîn xasa: ǁÎb di ǃhaodi ǁgûdi didi ǃnâ gu ge hakadisiǁî kurib gao-aob Davib dib ǃnâ ǃgari ǁē-aoga ge ôahe tsî ǁîgu ǃnâ ge hōhe Jasers Gileadi dis tawa.

³²Tsî ǃgâsagu âb ge ǃgari-ao ge i, ǀgamǀoadisi tsî hûdisi danagu ǁgûgu digu kōse, tsî gao-aob Davib ge ǁîga Rubenǁîn tsî Gadǁîn tsî ǃkhare ǃhaos Manaseb dis din ǂama ge ǂnûi, ǃkhaidi Elob didi tsî ǃkhaidi gao-aob didi hoadi ǂama.