Read Khoekhoegowab 1 Kroniks 28 Bible Online

1 Kroniks 28 - Khoekhoegowab bible

1 Kroniks 28

¹ǃNubaib ge Daviba Jerusalems tawa Israeli ǃhaodi hoadi tsî ǃhaodi di ǂamsagu tsî ǀgoradi gao-aoba ra ǃoabadi di ǂamsagu tsî ǀoadisin di ǂamsagu tsî kaidisin di ǂamsagu tsî xūn tsî ǀgoan, gao-aob tsî ǀgôagu âb din hoan di ǂamsagu tsî ǃnā-oms di ǃoabasabegu tsî ǁē-aogu, ā, mâ ǁē-aob hoab tsîna ge ǀhaoǀhao.

²Tsî gao-aob Davib ge ǂaira âb ai mâ tsî ge mî: ǁNâu te re ti ǃgâsago tsî ti ǁaese, tita ge ǂgaob âtab ǃnâ ge ǂâibasen hâ i, ǂgaes ǃKhūb di ǃgaeǀhaos dis tsî ǂaiǃnaob ǁîb di ǂaira diba ta nî ommi sâb diba ǂnubibasa, tsî ta ge ǂnubisa ge ǁāǁāba.

³Xawe Elob ge tita ǃoa ge mî: Sats ge ti ǀonsa omma ǂnubiba tide, toro-aots a tsîts ge kaise ǀaoǂnâxū amaga.

⁴Tsî ǃKhūb Israeli Elob ge ti îb di ommi hoaragaba xu tita ge ǁhûiǂuibasen, Israeli ǂama ta nî gao-ao kaise ǀamos kōse. ǁÎb ge Judaba aiǃgû-aose ge ǃkhōǂuibasen tsî ti îb di omma Judab ommi ǃnâ, tsî ti îb di ôagu ǃnâb ge tita xa ge ǃgâibahe, titab nî ǁîba gao-aodīse, Israeli hoaragab ǂama.

⁵Tsî ti ôagu hoaga xub ge—tsî ǃKhūb ge ǂgui ǀgôaga ge mā te—ti ôab Salomoba ge ǁhûiǂuibasen, ǁîb nî gaosib ǃKhūb dib di ǂnû-aiǃnaos ai Israeli ǂama ǂnûga.

⁶Tsî ǁîb ge tita ǃoa ge mî: Sa ôab Salomob ge ti ommi tsî ti ai-omga nî ǂnubi, tita ge ǁîba ǀgôase ge ǁhûiǂuibasen, tsî tita ge ǁîba ǁgûse nî ība xui-ao.

⁷Tsî tita ge ǁîb di gaosisa nîra ǁapoǁapo ǀamosib kōse, ǀgaisab ga io, ti mîmādi tsî ti ǂhanugu tsînab nî dīse, nētsēs ǁkhās khami.

⁸Tsî nēsi Israeli hoab ǃKhūb di ǀhaohâb di mûdi aiǃâ tsî sada Elob di ǂgaera ǃnâ: ǃKhō î go ôa ǃKhūb sada Elob di mîmādi hoade, î du nē ǃgâi ǃhūba sadu ôana sadu khaoǃgâ ǀumi kai ǀamosib kōse.

⁹Tsî sats ti ôa Salomotse, ǂan sa îb di Eloba, îts ǁîba ǃoaba ǀoasa ǂgaob ǀkha tsî māsenxa ǀoms ǀkha, ǃKhūb ra ǂgaogu hoaga ôaǃnâǃganu tsî ǁîb ra ǂâiǂâisendi ǂâis didi hoade ǁnâuǃā xuige; ǁîbats ga ôao, ob ge sats xa nîra hōhe xuige, xawe ǁîbats ga ǁnāxūo, ob ge ǁîba ǀamosib kōse nîra ǂhāxu tsi.

¹⁰ǁNâi mûbasen, ǃKhūb ge satsa ge ǁhûiǂuibasen, ommats nî ǁîba ǃanusib ǃaroma ǂnubibase; ǀgai îts ǁnâi dī.

¹¹Tsî Davib ge ǁîb ôab Salomoba ǁgaeǁgae-ai-i ai-ommi di-e ge mā tsî ǁîb di kuru-aigu tsî ǁîb di ǁuib ǃnā-omdi tsî ǂkhîbagu-ais di ommi di-e.

¹²Tsî ǁgaeǁgaeba ǁnān, gagaba xu ǁîb ǃnâ hân hoan diba, ǃKhūb ommi di ai-omgu diba tsî ǁîb ǂnamipe hâ ǃnā-omdi hoadi diba, ǁîdi ge ǁuigu Elob ommi digu tsî ǁuigu ǃanu xūn digu tsîna ge hâba i;

¹³tsî pristergu tsî Leviǁîgu di ǀgoradi diba, tsî ǃKhūb ommi di ǃoabas di sîsenni hoab diba tsî ǃKhūb ommi di ǃoabas di soadi hoadi diba.

¹⁴ǃHuniǀuribab ge ge mā ǃhuniǀurib di ǃgommi ī xase, mâ ǃoabas hoas di soadi hoadi ǁga, ǀhaiǀurib onab ge ǃgommi ī xase ǀhaiǀurisoadi hoadi ǁga ge mā, mâ ǃoabas hoas di soadi hoadi ǁga.

¹⁵Tsîb ge ǃgommi ǃhuniǀurikandelargu tsî ǁîgu di ǃhuniǀuriǃamamǀaedi diba ge mā, mâ kandelari hoab tsî ǁîb di ǃamamǀaedi di ǃgommi ī xase; ǀhaiǀurikandelari on, kandelari tsî ǁîb di ǃamamǀaedi di ǃgommi ī xase, mâ kandelari hoab di ǃoabas ǃoa.

¹⁶ǁKhātib ge ǃhuniǀuriba ǁāǁās di tāgu ǁga ǃgommi ī xase ge mā, mâ tāb hoab ǁga tsî ǀhaiǀurib ona ǀhaiǀuritāgu ǁga;

¹⁷tsî ǃūmû ǃhuniǀuriǃkhā-ūxūdi ǁga tsî ǀgapiǃoredi ǁga tsî ǃoredi ǁga tsî ǃhuniǀuriǀgabidi ǁga, mâ ǀgabis hoas di ǃgommi ī xase, ǁnās ǁkhās khami ǀhaiǀuriǀgabidi ǁga, mâ ǀgabis hoas di ǃgommi ī xase;

¹⁸tsî ǀanǀanaltars ǁga ǀkhaiǀkhaiǃganuhesa ǃhuniǀuriba ǃgommi ī xase; tsî ǃhuniǀuriba ǁgaeǁgaes kunis dis ǁga, ǁnās ge ǁnā xerukha, ǁgabogu âkha nî khoraǃā tsî ǂgaes ǃKhūb di ǃgaeǀhaos disa nî ǃgūǂamkha disa.

¹⁹Nēn hoana ta ge xoa-i ǀkha ge ǁnâuǃā kaihe ǃKhūb di ǃomma xu, tib ge Daviba ge mî, nē ǁgaeǁgaedi di sîsengu hoaga.

²⁰Tsî Davib ge ǁîb ôab Salomob ǃoa ge mî: ǀGai re, îts ǃgâiǂâi re, îts sîsenna dī re, tā ǃao îts tā ǃhuri re, ǃKhūb Elob, ti Elob, ge sa ǀkha nîra hâ xuige. ǁÎb ge satsa ǀûǀkhā tsî satsa ǁnāxū tide, ǃKhūb ommi ǃoabas di sîsenni hoabats nî dītoas kōse.

²¹Tsî mû, ǁnāpa di ge ǀgoradi pristergu tsî Leviǁîgu dide hâ Elob ommi ǃoabas hoas ǁga, tsî sa ǀkhan ge hâ, mâ sîsenni hoaba māsenxaba hân hoana, gā-aisiba ūhâǃâ, mâ ǃoabas hoas ǁga tsî gaosagu on tsî ǁaes hoas, sa mîmādi hoade ǂhomiba hâsa.