Read Khoekhoegowab 1 Kroniks 29 Bible Online

1 Kroniks 29 - Khoekhoegowab bible

1 Kroniks 29

¹ǃAruǀîb ge gao-aob Daviba ǀhaohâb hoab ǃoa ge mî: Elob ge Salomob, ti ôab ǀguiba ge ǁhûiǂuibasen, ǂkham ǀgôab hîa tsauraba, xawe nē sîsenni ge a kai, khoe-i di î-om tamab tsî Elob ǃKhūb di î-ommi a xui-ao.

²Tsî tita ge ti ǀgaib hoab ǀkha Elob di omma ǁhōde ge ǁāǁāba; ǃhuniǀuriba ǃhuniǀurisîsenni, ǀhaiǀuriba ǀhaiǀurisîsenni, ǂaiba ǂaisîsenni, tsî ǂnūǀuriba ǂnūǀurisîsenni, tsî haina haisîsenni ǁga tsî sardoniksǀuidi tsî ǀoaǀoas di ǀuidi, ananǀuidi tsî anxa xūn tsî mâ ǃgomǀgausa ǀuidi hoadi tsî marmerǀuide kaise ǂguise.

³Tsî nēn tawa ta ti Elob di ommi xa a ǃgâibahe amaga ta ge tita ǀō-aise ǃhuniǀurib tsî ǀhaiǀurib, ū ta hâb xa ra māǀaro ti Elob di ommi tawa, ǁnān ǃanusis di omma ta ge ǂhomiban hoan ǃgâ-ai:

⁴ǃNonaǀoadisi talende ǃhuniǀurib xa, Ofiri di ǃhuniǀurib xa tsî hûǀoadisi talende ǃanuǃanusa ǀhaiǀurib xa, ommi di ǂnubiǂgoagu nî ǃkhûǀkhāhega,

⁵ǃhuniǀuriba ǃhuniǀurisoan ǁga tsî ǀhaiǀuriba ǀhaiǀurisoan ǁga tsî sîsenaogu di ommi xa nî dīhe sîsenai-i hoa-i ǁga. Tsî tari-e nētsē a māsenxa ǁî-i di ǃomma ǃKhūba ǀoaǀoabasa?

⁶ǃNubai gu ge ǁgûgu di ǂamsagu tsî Israeli ǃhaodi di ǂamsagu tsî ǀoadisigu tsî kaidisigu di ǂamsagu tsî gao-aob sîsenni di ǂamsagu tsîga māsenxase ge mā.

⁷Tsî gu ge ǃoabas Elob ommi dis ǁga ge mā, koroǀoadisi talende ǃhuniǀurib xa tsî disiǀoadisi ǁguibamaridi tsî disiǀoadisi talende ǀhaiǀurib xa tsî disiǁkhaisaǀaǀoadisi talende ǂaib xa tsî kaidisiǀoadisi talende ǂnūǀurib xa.

⁸Tsî ǀuidi ge ǁîgu tawa hōhegu ǁîgu ge ǁîde ǁuib ǃKhūb ommi dib ǃnâ ge mā, Jehieli, Gersonǁîb ǃomǁae.

⁹Tsî ǁaes ge māsenxa ǀkhaeb ân ǂama ge ǃgâiaǂgao, ǂgaob hoab ǀkhan ge māsenxase ǀkhae amaga, tsî gao-aob Davib on di ǂgaob ge kaise ge ǃgâiaǂgao.

¹⁰ǁNā-amagab ge Daviba ǃKhūba ge ǃkhōǀkhā ǀhaohâb hoab di mûdi aiǃâ, tsî Davib ge ge mî: Ats koahe, sats ǃKhūts, sida îb Israeli di Elotsa, ǀamosiba xu ǀamosib kōse.

¹¹ǃKhūtse, san ge a kaisib tsî ǀgaib tsî ǂkhaisib tsî dans tsî ǃanusib tsîna, ǀhommi ǃnâ tsî ǃhūbaib ai hân hoan ge a sa. Sab ge gaosiba; tsî sats ge hoan ǂamai danase ǀgapiǀgapisen xui-ao.

¹²Tsî ǃkhūsib tsî ǃgôasib tsîkha ge ais âts aiǃâ hâ; tsî sats ra hoana gaoǂam. Tsî sa ǃommi ǃnâ kha ge ǀgaib tsî ǁkhāsib tsîkha hâ; ǁkhātib ge sa ǃomǁae khoe-e kaikais tsî ǀgaiǀgais tsîra di ǁkhāsiba hâ.

¹³Tsî nēsi ǁnâi sida di Elotse, sida ge satsa ra gangan tsî ǀons sa ǂkhaisib disa ra koa.

¹⁴Tari ta tita, tsî taresa ti ǁaesa, o da ǀgaiba go hō, māsenxase da nî ǀkhaega nē dommi ai? Hoan ge satsa xu go ǀkhī xui-ao, tsî sida ge ǁîna sa ǃomǁaeba xu ra mā tsi.

¹⁵Sida ge a ǃhaokhoe tsî ǁanǂgā-ao sa ais aiǃâ, sida îgu hoagu ge ī is ǁkhās xase. Sida di tsēdi ge ǃhūbaib ai sommi khami ī, tsî ǃâubasen-i xare-i ge ǃhūbaib ai a ǀkhai.

¹⁶ǃKhū, sida di Elotse, nē ǂguib hoab hîa da ge omma da sa ǃanu ǀonsa nî ǂnubibase a ǁāǁāb, ǁîb ge sa ǃomǁaeba xu hâ, tsî xūn hoan ge a sa.

¹⁷Tsî tita ge a ǂan, ti Elotse, sats ra ǂgaoba ǃâitsâ ǃkhaisa, tsî ǂhauǃnâsib xats a ǃgâibahe ǃkhaisa. Tita ge ǂhauǃnâsib ti ǂgaob dib ǃnâ nē xūn hoana māsenxase gere ǀkhae, tsî ta ge ǃgâiaǂgaob ǀkha sa ǁaes nēpa ra hōhesa go mû, matis māsenxase satsa goro ǁguiba ǃkhaisa.

¹⁸ǃKhūtse, sida îgu Abrahammi tsî Isaki tsî Israeli tsîgu di Elotse, ǁî ǃkhaisa ǀamosib kōse sâu re ǂâis sa ǁaes di ǂgaob dis di ǂâibasense, îts ǂgaob âna sa ǃoa unu.

¹⁹Îts ti ôab Salomoba ǀoasa ǂgaoba mā re, îb ǃkhōǀgaipe sa mîmādi tsî sa ǀhûǀguitimîdi tsî sa ǂnûiǂgādi tsîna, îb dī nēn hoana, îb kuru nē î-ommi hîa ta ge ǁāǁāba.

²⁰ǁNās khaoǃgâb ge Daviba ǀhaohâb hoab ǃoa ge mî: Î du ǁnâi ǃKhūb sadu Eloba ǃkhōǀkhā. ǃNubaib ge ǀhaohâb hoaba ǃKhūb, ǁîn îgu di Eloba ge ǃkhōǀkhā; tsîn ge ǃgamǃgâ tsî ge ǃhonǁgoa ǃKhūb aiǃâ, tsî gao-aob aiǃâ.

²¹Tsîn ge ǃKhūba ǂāǁguibade ge ǁguiba, tsîn ge ǁkhāti ǃKhūba khauǁguibade ge ǁguiba, sao ra ǁgoas ai: ǀGuiǀoadisi ǁgōgu, ǀguiǀoadisi bairagu, ǀguiǀoadisi ǁkhaogu ǂnâǁguibadi ân ǀkha tsî ǂāǁguibade kaise ǂguise Israeli hoab ǂama.

²²Tsîn ge ǁnā tsēs ǁkhās ai ǂû tsî ge ā, ǃKhūb di ais aiǃâ kai ǃgâiaǂgaob ǀkha. Tsîn ge Salomob, Davib ôaba ǀgamǁî ǃnās ai gao-aodī tsî ǃKhūba ge ǂkhauǀkhāba bi, aiǃgû-aose tsî Sadoka pristerse.

²³Nētib ge Salomoba ǃKhūb di trons ai gao-aose ge ǂnû, ǁîb îb Davib di ǃās ǃnâ, tsîb ge ge ǃgâiǃgâ, tsî Israeli hoab ge ǁîba ge ǁnâuǀnam.

²⁴Tsî gaosagu hoagu tsî ǁē-aogu tsî gao-aob Davib ôagu hoagu ge ǃomma ge mā, Salomoba gu nî ǃnaga hâba ti.

²⁵Tsî ǃKhūb ge Salomoba Israeli di mûdi hoadi aiǃâ kaise ge kaikai, tsîb ge ǁîba gao-aosi anusiba ge mā, ǁîb aiǃâ ge hâ i gao-ao-i xare-i ge ūhâ tama is kōse.

²⁶Nētib ge Davib, Isaib ôaba Israeli hoab ǂama ge gaosîsen.

²⁷Tsî tsēdi, Israeli ǂamab ge gaodi ge hakadisi kuri ge i. Hebrons tawab ge hû kuriga ge gaosîsen, tsî Jerusalems tawab ge ǃnonadisiǃnonaǀa kuriga ge gaosîsen.

²⁸Tsîb ge ǃgâi kairasib ǃnâ ge ǁō, tsēdi tsî ǃkhūsib tsî ǃgôab tsîn xa ǁâ hâse, tsî ǁîb di ôab Salomob ge ǁîb di ǃās ǃnâ gere gaosîsen.

²⁹Tsî ǃnaeǃkhaidi gao-aob Davib didi, ǂgurodi tsî ǀunidi, mû ǁîdi ge xoahe hâ Samueli, mû-aob, di ǃnaeǃkhaidi ǃnâ tsî kēbo-aob Natanni di ǃnaeǃkhaidi ǃnâ tsî Gadi, mû-aob di ǃnaeǃkhaidi ǃnâ,

³⁰gaosis âb hoab ǀkha tsî ǀgaib âb ǀkha tsî ǁaegu ǁîb ǂama tsî Israeli ǂama tsî ǃhūgu di gaosidi ǂama ge ǃgôa-īgu ǀkha.