Read Khoekhoegowab 1 Kroniks 5 Bible Online

1 Kroniks 5 - Khoekhoegowab bible

1 Kroniks 5

¹Tsî ǀgôagu Rubenni, Israeli di ǂguroǃnaesab digu (ǁîb ge ǂguroǃnaesabe ge i xui-ao; xawe ǁgûb di kharobab ge ǀuriǀuri amagas ge ǂguroǃnaesis âba Joseb Israeli di ôab di ôakha ge māhe; xawe ǂguroǃnaesabeb aseb nî ǃgôaheses ose, ǃhaodi ǃnâ.

²Judab ge ǃgâsagu âb ǃnâ ge kaise ǀgaisa, tsîb ge aiǃgû raba ǁîba xu ge ǀkhī xui-ao; xawe ǂguroǃnaesis ge Joseb di ge i).

³ǀGôagu Rubenni, Israeli ǂguroǃnaesab digu ge Henoxi tsî Palub, Hesronni tsî Karmib tsîga ge i.

⁴ǀGôagu Joeli digu: ǁÎb di ôab Semajab, ǁîb di ôab Gogi, ǁîb di ôab Simib,

⁵ǁîb di ôab Mixab, ǁîb di ôab Reajab, ǁîb di ôab Baali,

⁶ǁîb di ôab Beerab, Tiglat-Pileseri, Asiriab di gao-aob xa ǃkhōsase ge ūǃgûheba; ǁîb ge Rubenǁîn di gaosa ge i.

⁷Tsî ǁîb di ǃgâsagu xasa, ǃhaoǃnādi âgu ǃnâ ǃnaes di saogubese gu ra xoamâihes xase: ǁÎdi di danakha ge Jeieli tsî Saxariab tsîkha ge i,

⁸tsî Belab, Asab ôab, Semab ôab, Joeli ôaba, ǁîb ge Aroers tawa tsî Nebos tawa tsî Baal-Meons tawa ge ǁan hâ i.

⁹Tsîb ge aiǂoasǀî ge ǁan, ǃāb Eufrata xuts ra ǃgaroǃhūb ǃnâ ǂgâs kōse, kaisen ge ǀgoan âna ǂguiǂguisen xui-ao, Gileadi ǃhūb ǃnâ.

¹⁰Tsî Sauli di tsēdi ǃnân ge Hagarǁîna ge torodī-ū, tsîn ge ǁîn di ǃomma xu ge ǁnā; tsîn ge tentomdi ân ǃnâ ge ǁan Gileadi hoaraga aiǂoas kōse.

¹¹Tsî Gadi di ôan ge ǁîn ǃoagu ge ǁan Basanni ǃhūb ǃnâ Salxas kōse.

¹²Joeli ge dana ge i, tsî Safammi ǀgamǁîb, tsî Janaib tsî Safati tsîkha ge Basanni ǃnâ ge hâ.

¹³Tsî ǁîn di ǃgâsagu ge ǁgûsi omgu ân ǃoa Mixaeli tsî Mesulammi tsî Sebab tsî Joraib tsî Jakanni tsî Siab tsî Eberi tsîga ge i, ǁî hûga.

¹⁴Nēgu ge ǀgôagu Abigaili diga: Huri ôab, Jaroaxi ôab, Gileadi ôab, Mixaeli ôab, Jesisaib ôab, Jahdob ôab, Busi ôab.

¹⁵Ahib, Abdieli ôab, Guni ôab ge ǁîn îgu ommi di dana ge i.

¹⁶Tsîn ge Gileadi ǃnâ ge ǁan Basanni ǃnâ tsî ǁîb ǃnaga hâ ǃādi ǃnâ tsî Saronni di aiǃādi hoadi ǃnâ, ǃgûǂoadi âdi kōse.

¹⁷Nēgu hoagu ge ǁîgu ǃhaos di ǃgôakhâiǂkhanis ǃnâ ge xoahe Jotammi, Judab gao-aob di tsēdi ǃnâ, tsî Jerobeammi, Israeli gao-aob di tsēdi ǃnâ.

¹⁸Rubenni ôan xa tsî Gadǁîn xa tsî ǃkhare ǃhaos Manaseb dis xa gu ge ǃkham ǁkhā aogu, khōsikhōb tsî gôab tsîkha ra tanigu tsî khāsa ra ǂgaeǃnâgu tsî toroba a ǂangu xa hakadisihakaǀaǀoadisihûkaidisiǃnanidisi ge i, ǂnubis ǃnâ ra ǂoaga.

¹⁹Tsî gu ge Hagarǁîna ge torodī-ū tsî Jeturi tsî Nafib tsî Nodab tsîga.

²⁰Xawen ge ǁîn ǃoagu ge huihe tsî Hagarǁîna ǃomǁae ge māhe tsî ǁîn ǀkha hân hoana, torob ǃnân ge Elob ǃoa ǂgai amagab ge ǁîba ǁîn di ǀgoresa ge ǁnâu-am, ǁîb ain ge ǂgomaiǂnûi amaga.

²¹Tsîn ge ǁîn di ǀgoana ge ūǃgûbē ǁîn ǃnain xa korodisiǀoadisise tsî gūn xa ǀgamkaidisikorodisiǀoadisise tsî eseln xa ǀgamǀoadisise tsî ǀguikaidisiǀoadisi khoena.

²²ǂGui ǁō hân ge ge ǁgoe i, torob ge Eloba xu hâ i amaga, tsîn ge ǁîn di ǃkhais ǃnâ ge ǁan, ǃkhōsasen ge ǂgaeǂguibēhes kōse.

²³Tsî ǀgôagu ǃkhare ǃhaos Manaseb dis digu ge ǁnā ǃhūb ǃnâ ge ǁan. ǁÎn ge ge ǂgui, Basanna xu Baal-Hermonni kōse tsî Seniri tsî Hermonǃhommi kōse.

²⁴Tsî nēgu ge ǁgûsi omgu âgu di dana ge i: ǃGōsase Eferi tsî Jisib tsî Elieli tsî Asrieli tsî Jeremiab tsî Hodaviab tsî Jaxdieli tsîga, aogu, ǃgari ǁē-ao, ǀondi â-i aogu, ǁgûsi omgu âgu di danakhoe ge iga.

²⁵Xawe gu ge ǁîgu îgu di Elob ǃoagu ǃûǂam tsî gere ǀaiǃgon ǁnā elogu ǃhūb di ǁaedi hîab ge Eloba aidi âna xu hîkākādi diga.

²⁶Ob ge Israeli Eloba gagas Puli, Asiriab gao-aob disa ge ǂkhaiǂkhaikhâi tsî gagas Tiglat-Pileseri Asiriab gao-aob disa ob ge ǁîba ǁîna ǃkhōsase ge ūǃgûbē Rubenǁîn tsî Gadǁîn tsî ǃkhare ǃhaos Manaseb dis din tsîna tsîb ge ǁîna Halaxs ǃoa tsî Habors ǃoa tsî Haras ǃoa tsî ǃāb Gosanni ǁga ge ūsī nētsēs kōse.